Abavakalisi BoBukumkani Bayabalisa

Ababesakuba Ziintshaba Bamanyene Ekukhonzeni UYehova

“ISIHLANDLO sokuqala endathi ndeva ngamaNgqina kaYehova kwakuxa ndandisebenza njengomlindi eBosnia,” utsho njalo uBranko.a

UBranko wayekumsebenzi wokulinda kwisibhedlele apho iingxwelerha zazinyangwa khona. Omnye ugqirha wayeqhutyelwa isifundo seBhayibhile ngamaNgqina, yaye njengoko babesebenza ebusuku, wabalisela uBranko okuninzi koko wayekufunde ngeBhayibhile.

Oko uBranko wakuva ngobo busuku kwamchukumisa kangangokuba walahla phantsi izixhobo zakhe. Waqhagamshelana namaNgqina, efuna ukufunda okungakumbi. Kwithuba elithile kamva, emva kokufudukela kwelinye ilizwe laseYurophu, uBranko wafuna iHolo YoBukumkani waza waya kwiintlanganiso zebandla eliseYugoslavia lamaNgqina kaYehova. Kulapho uBranko wadibana khona noSlobodan.

USlobodan naye wayesuka eBosnia yaye wayesebenza njengetsha-ntliziyo kwimfazwe enye naleyo wayekuyo uBranko—kodwa kwikampu yotshaba. USlobodan wayesilwela amaSerb nxamnye namaCroat. Ngeli xesha aba babini bedibana, uSlobodan wayesele eliNgqina likaYehova elibhaptiziweyo. Wacela ukuqhubela uBranko owayesakuba lutshaba lwakhe isifundo seBhayibhile. Njengoko isifundo sasiqhubeka, uBranko wafunda okungakumbi ngoYehova, yaye uthando lwakhe ngoThixo lwakhula. Oku kwashukumisela uBranko ekwahluleleni ubomi bakhe kuMdali. Ngo-Oktobha 1993 wafuzisela uzahlulelo lwakhe ngokubhaptizwa emanzini.

Kwenzeka njani ukuba uSlobodan abe ngomnye wamaNgqina kaYehova? Wawushiya ummandla onemfazwe eBosnia kwithuba elithile ngaphambilana. Wayefunde iimpapasho ezithile zamaNgqina, kodwa umdla wakhe ngeLizwi likaThixo awuzange ukhule de amaNgqina amabini afika ekhayeni lakhe ebutsheni bowe-1992. Ngubani owafika kuSlobodan, waza wacela ukumqhubela isifundo seBhayibhile? YayinguMujo naye owayesuka eBosnia kodwa wakhuliswa njengoMsilamsi. Njengoko isifundo seBhayibhile sasiqhubeka, uMujo noSlobodan, ababekhe baziintshaba, babechitha ixesha kunye suku ngalunye ukuze bomelezane elukholweni.

Imfazwe kwindawo eyayisakuba yiYugoslavia iye yabulala abantu abangamakhulu amawaka. Kodwa uBranko, uSlobodan noMujo ngoku bakhonza njengabashumayeli bexesha elizeleyo beendaba ezilungileyo kwibandla elinye lamaNgqina kaYehova. Baye bayoyisa imbambano engokobuhlanga yaye ngoku bafuna uxolo njengoko bezithoba kuMdali, uYehova.

Kodwa yintoni eyabangela iinguqulelo ezinjalo? Yayiluthando lwabo ngoYehova, intlonelo yabo ngeBhayibhile nokulangazelela kwabo ukusebenzisa inyaniso yeBhayibhile ebomini babo. Njengoko iZibhalo Ezingcwele zisitsho, “ilizwi likaThixo liphilile kwaye lisebenza . . . linokugweba iingcingane nezicamango zentliziyo.”—Hebhere 4:12.

[Umbhalo osemazantsi]