Amalungelo Abantu Bonke Aya Kuze Ahlonelwe Ehlabathini Lonke!

KALOKU kwakha kwabuzw’ eny’ inqeberhu eligqwetha lamalungelo abantu nekudala ixhents’ izombelela: “Yintoni kanye kanye intsusa-mabandla yokunyathelwa ngeenyawo kwamalungelo abantu?” Le nqeberhu yaphendula yathi: “Kukunyoluka. Ukunyolukela igunya lezobupolitika nelezoqoqosho.” Yaye ekubeni ukunyoluka kusengqondweni yomntu, umntu onyathela ngeenyawo amalungelo abanye, uqhala indlela acinga ngayo. Eny’ intsusa-mabandla kukuthand’ izwe. Ingcamango yokuba izwe lam phambili itshokotsha ukunyathelwa ngeenyawo kwamalungelo abantu. Kaloku omny’ unjingalwazi ongumDatshi oyingqanga kwezomthetho noqoqosho uJan Berkouwer uthi, noko ke aya kuthi ukuze ahlonelwe amalungelo abantu ‘kubekho urhulumente wehlabathi oza kuyinyanzelisa loo nto.’

Ngamany’ amazwi, ukuze amalungelo abantu ahlonelwe ngokwenene, kukho izinto ezimbini ezifanele zenzeke kuqala: ukutshintsha kweengqondo nokutshintsha korhulumente. Ngaba ukufuna loo nto asikokufun’ iinkwenkwezi ezisesibhakabhakeni?

Isizathu Esintlu-mbini Sokutshintsha

Ngoxa sele kumbovu ukuba iShumi Leminyaka Lokuba iZizwe Ezimanyeneyo Zifundise Abantu Ngamalungelo Abo lingene kunyaka walo wesihlanu, inkqubo yokufundisa yehlabathi lonke engeyiyo ekarhulumente ibisele ihlabele mgama kangangamashumi eminyaka ekuzameni ukuguqula indlela ezicinga ngayo izigidi zabantu. Ngenxa yaloo nto, aba bantu babaphethe ngesidima abamelwane babo. Le nkqubo isetyenziswa ngamaNgqina kaYehova kumazwe angaphezu kwama-230. Kutheni iphumelela?

Phakathi kwezinye izinto, le nkqubo yokufundisa iBhayibhile yehlabathi lonke iyichaza kakuhle indlela abantu abayiqonda ngayo imvelaphi yamalungelo abantu. ISindululo Sehlabathi Lonke Samalungelo Abantu sithi umntu unamalungelo ngenxa yokuba enengqiqo nemilinganiselo yokuziphatha.

Umntu umele ukuba wawafumana amandla akhe okuqiqa nesazela kumthombo ongaphezu kwakhe. (Bona ibhokisi ethi “Umthombo Wamalungelo Abantu,” ekwiphepha 13.) Ukuqonda lo mthombo uphakamileyo nongokobuthixo kukunika isizathu esinamandla sokuhlonela ummelwane wakho. Ubaphatha ngesidima ke abany’ abantu kungekuphela nje ngenxa yokuba uqhutywa sisazela kodwa esona sizathu sibaluleke ngakumbi kukuba uthando ngoMdali lukuqhubela ekubeni uyiphathe ngesidima indalo yakhe. Le ngcamango intlu-mbini isekelwe kumazwi kaYesu Kristu athi: “Uze umthande uYehova uThixo wakho ngentliziyo yakho iphela nangomphefumlo wakho uphela nangengqondo yakho iphela” nathi, “Uze umthande ummelwane wakho njengawe siqu.” (Mateyu 22:37-39) Umntu omhlonela ngokusuk’ entliziyweni uMdali akanakuze awanyathele ngeenyawo amalungelo ommelwane wakhe ngenxa yokuba alilifa alifumene kuThixo. Umntu owanyathela ngenyawo amalungelo abanye ubakhuthuza ilifa labo.

Imfundo Etsho Kungafani Nakuqala

Isebenza kangakanani ke le nkqubo yokufundis’ iBhayibhile yamaNgqina kaYehova ekupheliseni ukunyathelwa ngeenyawo kwamalungelo abantu? Eyona ndlela ifanelekileyo yokuphendula lo mbuzo kukujonga nje imiphumo yale nkqubo, kuba uYesu wathi, “ubulumko bungqineka bububulungisa ngemisebenzi yabo.”—Mateyu 11:19.

Umbhalo owaziwayo oseludongeni lweSakhiwo seZizwe Ezimanyeneyo kwisiXeko saseNew York ufundeka ngolu hlobo: “Ziya kukhanda amakrele azo abe ngamakhuba. Nemikhonto yazo ibe ngamagwegwe okuthena izityalo: Uhlanga aluyi kuphakamisela uhlanga ikrele. Zingasayi kuphinda zifunde imfazwe.” Xa zicaphula kule ncwadi yeBhayibhile kaIsaya isahluko 2, indinyana 4, kwiKing James Version, iZizwe Ezimanyeneyo zithetha ngeyona ndlela ibalulekileyo yokunciphisa ukunyathelwa ngeenyawo kwamalungelo abantu—ukuphelisa imfazwe. Elinye iphephancwadi leZizwe Ezimanyeneyo lithi, ngapha koko, imfazwe ‘isisichasi sokuhlonelwa kwamalungelo abantu.’

Le nkqubo yokufundisa yamaNgqina kaYehova ayaneli nje ukubhala amazwi kaIsaya kudonga lwamatye. La mazwi kaIsaya “iwabhala” ezintliziyweni zabantu. (Thelekisa amaHebhere 8:10.) Ikwenza njani oko? Le nkqubo iphelisa imiqobo yobuhlanga ize idilize iindonga ezibangelwa bubuhlanga ngokufundisa ngoko kuthethwa yiBhayibhile ngobuhlanga: Lunye kuphela uhlanga olukhoyo—uhlanga loluntu. (IZenzo 17:26) Abo baye bangenela le nkqubo baba nomnqweno wokuba “ngabaxelisa uThixo,” ethi ngaye iBhayibhile: “Akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.”—Efese 5:1; IZenzo 10:34, 35.

Ngenxa yale mfundo isekelwe eBhayibhileni, izigidi zabantu namhlanje ‘azisaphindi zifunde imfazwe.’ Sele zitshintshile ke ingqondo neentliziyo. Ibe olu tshintsho luhlala luhleli. (Bona ibhokisi enomxholo othi “Ukufundiswa Uxolo,” ekwiphepha 14.) Xa kungoku, ubuncinane, bangaphezu kwe-1 000 ngosuku abantu abagqiba ezi zifundo zisisiseko ziqhutywa ngamaNgqina kaYehova baze babe phakathi kwezintlu zalo mkhosi usehlabathini lonke woxolo.

Lunzulu kangakanani ke olu tshintsho lwenzeka engqondweni lokuhlonela amalungelo abantu ngokwala ukuba nenxaxheba emfazweni? Lusuk’ emazantsi entliziyo. Ngokomzekelo: Ubunzulu bokuhlonela kwamaNgqina amalungelo abantu babekwa eluvavanyweni oluqatha ebudeni beMfazwe Yehlabathi II, ingakumbi kwiJamani yamaNazi. Eny’ ingcungela yombhali-mbali uBrian Dunn yathi: “AmaNgqina kaYehova ayengahambisani namaNazi. Eyona nto ingamandla amaNazi awayengayifuni kuwo yayikukuba ngoondilele kwawo kwezobupolitika. Oku kwakuthetha ukuba akukho kholwa laliya kuphakamisa isixhobo.” (The Churches’ Response to the Holocaust) Kwincwadi ethi A History of Christianity, uPaul Johnson wathi: “Uninzi lwagwetyelwa ukufa ngenxa yokwala inkonzo yasemkhosini . . . , okanye aphelela eDachau okanye kwizibhedlele zamageza.” Sekunjalo, omelela. Eny’ ingcali yezentlalo uAnna Pawełczyńska wawachaza loo maNgqina “njengeqaqobana elingoyiki ngokoyikiswa nangona liphila phakathi kwabantu abaxhaxhayo luloyiko.”

Khawucinge nje indlela ebekuya kuhla ngayo ukunyathelwa ngeenyawo kwamalungelo abantu ukuba bonke abantu bebenokuzimisela kwangoku ‘ukungaphindi bafunde ukulwa’!

Urhulumente Wehlabathi—‘Ngaba Kukuzakhela Nje Inqaba Ezinkwenkwezini’?

Omnye osebenza kwiZizwe Ezimanyeneyo wakha wathi, ‘Ukutshintsha iingqondo zabantu lucelomngeni, kodwa ukwenza urhulumente wehlabathi kukuzakhela nje inqaba ezinkwenkwezini.’ Ibe eneneni, isibakala sokuba amazwe engakulungelanga ukuphos’ iintambo kwiZizwe Ezimanyeneyo, okanye nakuwuphi na omnye umbutho kuyasingqinela esi sigqibo. Nakuba kunjalo abo bayiphikisayo ingcamango yokuba kuza kubakho urhulumente wehlabathi, uNjingalwazi Berkouwer uphefumla ngelithi, “banembopheleleko yokuza nezinye iindlela zokucombulula iingxaki zehlabathi. Noko ke, azikho ezinye iindlela zokucombulula ezi ngxaki.” Sithetha ke ngezicombululo zabantu. Kodwa zikho izicombululo eziza kuza namandla angaphezu kwawomntu. Ziziphi ezo?

Kanye njengokuba iBhayibhile ibonisa ukuba uMdali ungumthombo wamandla abangela umntu abe namalungelo, kwakhona isixelela ukuba ungumthombo worhulumente oza kuqinisekisa ukuba ayahlonelwa. Lo rhulumente wasezulwini akabonakali kodwa ukho ngokwenene. Enyanisweni, izigidi zabantu, mhlawumbi zingaqondi zithandazela lo rhulumente womhlaba xa zisenza lo mthandazo waziwa ngokuqhelekileyo ngokuba nguMthandazo weNkosi: “Mabufike ubukumkani bakho. Makwenzeke ukuthanda kwakho nasemhlabeni, njengasezulwini.” (Mateyu 6:10) INtloko yobo Bukumkani emiselwe nguThixo nguMthetheli woXolo, uYesu Kristu.—Isaya 9:6.

Lo rhulumente wehlabathi uya kuphumelela ekukhuthazeni ukuhlonelwa kwamalungelo abantu ehlabathini lonke nangonaphakade ngokuthi phakathi kwezinye izinto aphelise imfazwe ngonaphakade. IBhayibhile ithi xa iprofeta: “[UMdali] ulophelisa iimfazwe kude kuse eziphelweni zehlabathi; waphula isaphetha, angqumze umkhonto, atshise iinqwelo zokulwa ngomlilo.”—INdumiso 46:9.

Iya kukhawuleza kangakanani ukwenzeka le nto emhlabeni wonke? Impendulo eyanelisayo kulo mbuzo iyafumaneka kwinkqubo yokufundisa iBhayibhile yamaNgqina kaYehova. Siyakukhuthaza ukuba uziqhelanise nale nkqubo.a Ukuba uyawahlonela amalungelo abantu, akusayi kuphoxeka.

[Imibhalo esemazantsi]

[Ibhokisi ekwiphepha 13]

Umthombo Wamalungelo Abantu

IGatya 1 leSindululo Sehlabathi Lonke Samalungelo Abantu lithi “wonke umntu uzelwe ekhululekile yaye enesidima namalungelo alinganayo.” Ngenxa yoko amalungelo abantu yinto abazalwa nayo esuka kubazali iye ebantwaneni, kanye njengokuba umlambo uthwala amanzi uwathumele kwabo bahlala ngasezindongeni zawo. Uqala phi ke lo mlambo wamalungelo abantu?

ISindululo Sehlabathi Lonke sithi, abantu banamalungelo kuba “banikwe amandla okucinga nesazela.” Eny’ incwadi yeZizwe Ezimanyeneyo ithi: “Ekubeni umntu enengqiqo nemilinganiselo yokuziphatha, wahlukile kwezinye izidalwa ezisemhlabeni ibe ngenxa yoko unelungelo lokufumana amalungelo athile nenkululeko engafunyanwayo zezinye izidalwa.” (Akekeliswe sithi.) Ngenxa yoko, kuthiwa ukuba nengqiqo nesazela yintsusa-mabandla yokufumana kwabantu amalungelo. Ngenxa yaloo nto ke, ingqiqo nesazela somntu sikwangumthombo wamalungelo akhe.

Isibakala sokuba abantu bafumana amalungelo ngenxa yokuba bekwazi ukuqiqa yaye benesazela kutsho ziphixane iingqondo zabo bakumzabalazo wokuhlonelwa kwamalungelo abantu nabakholelwa kwindaleko. Incwadi emela indaleko ethi Life Ascending ithi: “Xa sizibuza ngokuba inkqubo [yendaleko] . . . ibinokuzivelisa njani iimpawu ezinjengokuthanda intw’ entle nenyaniso, uvelwano, inkululeko yaye ngaphezu kwazo zonke ukubalasela komntu, sitsho singazi nokuba kubethw’ abaphi.” Ibe ifanele ukwenzeka loo nto. Ngapha koko, ukuthi amandla omntu okucinga nokuba nesazela avela kwizinyanya ezikumgangatho ongaphantsi kowomntu, kwazona ezingenangqiqo nesazela kufana nokuthi umlambo uphuma equleni elingenamanzi.

Ekubeni amandla omntu okuqiqa engenakuphuma kumthombo ongaphantsi kunomntu, la mandla amele ukuba aphuma kumandla angaphezu kwawomntu. Ngabantu kuphela abaneempawu ezinxulumene namalungelo abo—ingqiqo nesazela—kuba iBhayibhile ithi, abantu badalwa “ngokomfanekiselo” kaThixo ngokungafaniyo nezilwanyana. (Genesis 1:27) Ngenxa yoko, njengokuba incwadi ethi Human Rights—Essays on Justification and Applications isitsho, impendulo echanileyo kumbuzo othi kutheni abantu benamalungelo kukuba “baxabiseke ngokwemvelo okanye . . . bangabantwana bakaThixo.”

[Ibhokisi/Imifanekiso ekwiphepha 14]

Ukufundiswa Uxolo

Kwiminyaka ethile eyadlulayo, ngoxa imfazwe yayidlakaza iiBalkans, uBranko wayesebenza njengomlindi oxhobileyo kwikliniki ekwicandelo laseBosnia elihlala abemi baseCroatia.b Ugqirha walapho wayefundisisa iBhayibhile namaNgqina kaYehova ibe ngobunye ubusuku wabalisela uBranko izinto awayezifunda. Izinto awazibaliselwayo uBranko zamnceda walahla phantsi izixhobo zakhe. Kwithuba elithile kamva, emva kokuba efudukele kwelinye ilizwe laseYurophu, uBranko waya kwiintlanganiso zamaNgqina kaYehova, ibe apho wadibana noSlobodan.

NoSlobodan wayesuka eBosnia. Babesilwa kwimfazwe enye noBranko—kodwa beziintshaba. USlobodan wayesilwela amaSerb nxamnye namaCroat. Ngeli xesha aba babini bedibana, uSlobodan wayesele eliNgqina likaYehova ibe wacela ukuqhubela uBranko, owayesakuba lutshaba lwakhe, isifundo seBhayibhile. Njengoko isifundo sasiqhubeka, uthando lukaBranko ngoMdali, uYehova, lwakhula. Kungekudala wagqiba kwelokuba abe ngomnye wamaNgqina kaYehova.c

NoSlobodan lo waba liNgqina ngokuncedwa ngowayesakuba lutshaba lwakhe. Kwenzeka njani oko? Kaloku, emva kokuba eshiye ithafa ledabi eBosnia, uSlobodan watyelelwa nguMujo, naye owayesuka eBosnia kodwa owayekhulele kunqulo olwahlukileyo kolukaSlobodan. Ngoku uMujo wayengomnye wamaNgqina kaYehova. Nangona babekhe baziintshaba, uSlobodan wavuma ukufundisisa iBhayibhile noMujo ibe kamva wathabatha inyathelo lokuba ngomnye wamaNgqina kaYehova.

Yintoni eyabangela la madoda oyise intiyo enzulu kangaka yobuhlanga aze endaweni yokuba yinyoka nesele kungangeni moya phakathi kwawo? Kaloku athi esakufundisisa iBhayibhile, akhulisa uthando lwawo ngoYehova. Emva koko, akulungela ‘ukufundiswa nguThixo ukuba athandane.’ (1 Tesalonika 4:9) Ngokusuka kumazwi kaNjingalwazi Wojciech Modzelewski ngokuphathelele amaNgqina kaYehova ngokubanzi, “eyona ntsusa-mabandla yokuba abe nesimo sengqondo sokuba noxolo kukulandela imigaqo eyandlalwe eBhayibhileni.”

[Imibhalo esemazantsi]

[Imifanekiso ekwiphepha 11]

Ukutshintsha kweengqondo norhulumente—ngaba oko kuya kuze kwenzeke?

[Inkcazelo]

U.S. National Archives photo

[Imifanekiso ekwiphepha 12, 13]

Imfundo esekelwe eBhayibhileni itshintsha ingqondo