IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w96 6/1 iphe. 14-19
  • Sabela Kwindawo Ekhuselekileyo Ngaphambi ‘Kwembandezelo Enkulu’

No video available for this selection.

Sorry, there was an error loading the video.

  • Sabela Kwindawo Ekhuselekileyo Ngaphambi ‘Kwembandezelo Enkulu’
  • IMboniselo Evakalisa UBukumkani BukaYehova—1996
  • Imixholwana
  • Amanqaku Afanayo
  • “Ofundayo Makasebenzise Ukuqonda”
  • Kwakungxamisekile Ukuba Asabe!
  • “Into Elizothe” Yanamhlanje
  • Basabe Entwenini?
  • Ungavumeli Nanye Into Ikuthintele Ekusabeni!
  • “Ofundayo Makasebenzise Ukuqonda”
    IMboniselo Evakalisa UBukumkani BukaYehova—1999
  • Umqondiso wemihla yokugqibela
    IMboniselo Evakalisa UBukumkani BukaYehova—1990
IMboniselo Evakalisa UBukumkani BukaYehova—1996
w96 6/1 iphe. 14-19

Sabela Kwindawo Ekhuselekileyo Ngaphambi ‘Kwembandezelo Enkulu’

“Xa niyibona iYerusalem ingqongwe yimikhosi emise iintente, . . . mabandule ke abo bakwelakwaYuda baqalise ukusabela ezintabeni.”—LUKA 21:20, 21.

1. Kutheni kungxamisekile ukusaba kwabo baseyinxalenye yehlabathi?

KUBO bonke abayinxalenye yehlabathi likaSathana, kungxamisekile ukuba basabe. Ukuze basinde xa le nkqubo yezinto itshayelwa emhlabeni, bamele banikele ubungqina obaneleyo bokuba bami ngakwicala likaYehova yaye abaseyonxalenye yehlabathi elilawulwa nguSathana.—Yakobi 4:4; 1 Yohane 2:17.

2, 3. Yiyiphi imibuzo enokuthanani namazwi kaYesu abhalwe kuMateyu 24:15-22 esiza kuyixubusha?

2 Kwisiprofeto sakhe esibalaseleyo sokuqosheliswa kwale nkqubo yezinto, uYesu wakubalaselisa ukubaluleka kokusaba okunjalo. Siyixubusha ngokufuthi ingxelo ekuMateyu 24:4-14; ukanti, kwanengxelo elandelayo ibalulekile. Ngoku sicela ukuba nityhile iiBhayibhile zenu nize nifunde Mt 24 indinyana 15 ukusa kweyama-22.

3 Sithetha ntoni eso siprofeto? Kwinkulungwane yokuqala, yayiyintoni “into elizothe ebangela isiphanziso”? Kwakufuzisela ntoni ukuma kwayo “kwindawo engcwele”? Kubaluleke ngantoni oko kuthi?

“Ofundayo Makasebenzise Ukuqonda”

4. (a) UDaniyeli 9:27 wathi kwakuza kwenzeka ntoni emva kokuba amaYuda emchasile uMesiya? (b) Xa wayebhekisela koku, kwakutheni ukuze uYesu athi, “Ofundayo makasebenzise ukuqonda”?

4 Phawula ukuba kuMateyu 24:15 uYesu wayethetha ngoko kubhalwe kwincwadi kaDaniyeli. Kwisahluko 9 saloo ncwadi kukho isiprofeto esaxela kwangaphambili ngokuza kukaMesiya nomgwebo owawuza kufikela uhlanga lakwaYuda ngenxa yokumchasa. Inxalenye yokugqibela yendinyana 27 ithi: “Ize ngamaphiko ezinto ezinezothe ingumphanzisi.” (Akekeliswe sithi.) Mandulo amaYuda ayenengcamango yokuba loo nxalenye yesiprofeto sikaDaniyeli yayibhekisela ekungcolisweni kwetempile kaYehova eyayiseYerusalem nguAntiochus IV ngenkulungwane yesibini ngaphambi kweXesha lethu Eliqhelekileyo. Kodwa uYesu walumkisa esithi: “Ofundayo makasebenzise ukuqonda.” Ukungcoliswa kwetempile nguAntiochus IV, nangona kwakulizothe ngenene, akuzange kukhokelele ekuphanzisweni—kweYerusalem, itempile, okanye uhlanga lwamaYuda. Ngoko ke kubonakala ukuba uYesu wayelumkisa abaphulaphuli bakhe ngokuba oko kwakungazalisekanga kwixesha elidluleyo kodwa kwakuseza kuzaliseka.

5. (a) Ukuthelekisa iingxelo zeVangeli kusinceda njani siyazi “into elizothe” yenkulungwane yokuqala? (b) Kwakutheni ukuze uCestius Gallus afunze imikhosi yaseRoma eYerusalem ngowama-66 C.E.?

5 Yayiyintoni “into elizothe” ababemele bahlale beyilindile? Okubangel’ umdla kukuba ingxelo kaMateyu ithi: “Xa nibona into elizothe ebangela isiphanziso . . . imi kwindawo engcwele.” Noko ke, ingxelo efanayo ekuLuka 21:20 ifundeka ngolu hlobo: “Xa niyibona iYerusalem ingqongwe yimikhosi emise iintente, nandule ke nazi ukuba ukuphanziswa kwayo kusondele.” Ngowama-66 C.E., amaKristu awayehlala eYerusalem akubona oko uYesu wayekuxele kwangaphambili. Uthotho lweziganeko ezazibangelwa lungquzulwano lwamaYuda namagosa amaRoma lwakhokelela ekubeni iYerusalem ibe ngumthombo wemvukelo nxamnye namaRoma. Ngokomphumo, ugonyamelo lwathabath’ unyawo kulo lonke elakwaYuda, eSamariya, eGalili, eDekapoli naseFinike, lwanyukela emantla eSiriya nasemazantsi kwelaseYiputa. Ukuze abuyisele uxolo kuloo nxalenye yoBukhosi beRoma, uCestius Gallus wagaya imikhosi yakhe ukususela eSiriya ukusa eYerusalem, awayesithi amaYuda ‘ngumzi wawo ongcwele.’—Nehemiya 11:1; Isaya 52:1.

6. Laliyinene njani elokuba “into elizothe” eyayinokubangela isiphanziso ‘yayimi kwindawo engcwele’?

6 Kwakuqhelekile ngemikhosi yamaRoma ukuphatha iibhanile, okanye iindwe zesizwe, eyayizigqala njengezingcwele kodwa amaYuda ezigqala njengonqulo-zithixo. Okubangel’ umdla kukuba igama lesiHebhere eliguqulelwe ngokuthi “into elizothe” kwincwadi kaDaniyeli ngokuyintloko lisetyenziswa kwizithixo nasekuzinquleni.a (Duteronomi 29:17) Nakuba amaYuda ayexhathisa, imikhosi yamaRoma enezo bhanile zonqulo-zithixo yangena eYerusalem ngoNovemba wama-66 C.E. yaza yaqalisa ukuludiliza udonga olungasentla lwetempile. Ngokungathandabuzekiyo—“into elizothe” eyayinokuyiphanzisa ngokupheleleyo iYerusalem ‘yayimi kwindawo engcwele’! Kodwa umntu wayenokusaba njani?

Kwakungxamisekile Ukuba Asabe!

7. Yintoni eyayingalindelekanga eyenziwa ngumkhosi wamaRoma

7 Ngequbuliso yaye ngesizathu esingenakuqondwa mntu, xa kwakubonakala ngathi iYerusalem yayinokuthinjwa lula, imikhosi yamaRoma yarhoxa. Abavukeli abangamaYuda bayisukela imikhosi yamaRoma eyayirhoxa ukuya kuthi xhaxhe ngeAntipatris, malunga neekhilomitha ezingama-50 ukusuka eYerusalem. Emva koko babuyela ekhaya. Bakufika eYerusalem, bahlanganisana etempileni ukuze balixhobele ngakumbi idabi labo. Kwagaywa ulutsha ukuze luzenze zibe luqilima iinqaba nokuze lube semkhosini. Ngaba amaKristu ayeza kubandakanyeka koku? Enoba ayekuphepha ukwenjenjalo, ngaba ayeza kuba kummandla oyingozi xa imikhosi yamaRoma ibuya?

8. Liliphi inyathelo elingxamisekileyo elathatyathwa ngamaKristu ethobela amazwi kaYesu esiprofeto?

8 Kungekudala amaKristu awayeseYerusalem nakulo lonke elakwaYuda athobela isilumkiso sikaYesu Kristu aza asaba aphuma kummandla oyingozi. Kwakungxamisekile ukuba asabe! Kungekudala afika kummandla osezintabeni, mhlawumbi wambi ahlala ePella, kwiphondo lePereya. Abo basithobelayo isilumkiso sikaYesu abazange benze ubudenge bokubuyela emva ukuze basindise izinto zabo eziphathekayo. (Thelekisa uLuka 14:33.) Ngaphantsi kwezo meko, abafazi abakhulelweyo nabanyisayo bamele ukuba balufumanisa lunzima olo hambo ngeenyawo. Ukusaba kwabo akuzange kuthintelwe yimiqathango yomhla weSabatha, yaye nangona ubusika babusemnyango, babungekafiki. Kungekudala abo basithobelayo isilumkiso sikaYesu sokusaba msinya babesele bengaphandle kweYerusalem nakwelakwaYuda. Ubomi babo babuxhomekeke koko.—Thelekisa uYakobi 3:17.

9. Yabuya nini imikhosi yaseRoma, yaye waba yintoni umphumo woko?

9 Kunyaka olandelayo, ngowama-67 C.E., amaRoma awahlasela ngokutsha amaYuda. Okokuqala, ahlasela elaseGalili. Kunyaka olandelayo, atshabalalisa elakwaYuda. Ngowama-70 C.E., imikhosi yamaRoma yarhawula iYerusalem. (Luka 19:43) Indlala yathabath’ unyawo. Abo babevaleleke kweso sixeko bajikelana. Nabani na owayezama ukuqhwesha wayebulawa. Behlelwa koko kanye uYesu wayekuchazile, ‘imbandezelo enkulu.’—Mateyu 24:21.

10. Ukuba sisebenzisa ukuqonda xa sifunda, yintoni enye esiya kuyiphawula?

10 Ngaba oko kwakuzalisekisa ngokupheleleyo oko uYesu wayekuxele kwangaphambili? Akunjalo, kwakumele kwenzeke okungakumbi. Njengoko uYesu wabonisayo, ukuba sisebenzisa ukuqonda xa sifunda iZibhalo, asisayi kungakuboni oko kuseza kwenzeka. Kwakhona siya kucinga nzulu ngoko zikuthethayo ebomini bethu.

“Into Elizothe” Yanamhlanje

11. Ziziphi ezinye iindinyana ezimbini uDaniyeli athetha kuzo ‘ngento elizothe,’ yaye liliphi ixesha ekuxutyushwa ngalo kwezo ndinyana?

11 Phawula ukuba, ukongezelela koko sikubonileyo kuDaniyeli 9:27, kuDaniyeli 11:31 nese-12:11, kuyaphinda kuthethwe ‘ngento elizothe ebangela isiphanziso.’ Kwezi nxalenye zimbini zokugqibela akuxutyushwa ngokutshatyalaliswa kweYerusalem. Eneneni, okuthethwayo kuDaniyeli 12:11 kubonakala kwiindinyana nje ezimbini emva kokuba kuthethwe ‘ngexesha lokuphela.’ (Daniyeli 12:9) Besiphila kwelo xesha ukususela ngowe-1914. Ngoko kufuneka sikuphaphele ukwazi “into elizothe ebangela isiphanziso” yanamhlanje size siqinisekise ukuba siyaphuma kummandla oyingozi.

12, 13. Kutheni kufanelekile ukuluchaza uManyano Lwezizwe ‘njengento elizothe’ yanamhlanje?

12 Iyintoni loo ‘nto ilizothe’ namhlanje? Ubungqina balatha kuManyano Lwezizwe, olwaqalisa ukusebenza ngowe-1920, emva nje kokuba ihlabathi lingene kwixesha lesiphelo salo. Kodwa lunokuba ‘yinto elizothe nebangela isiphanziso’ ngayiphi indlela?

13 Khumbula ukuba eBhayibhileni igama lesiHebhere elithetha “into elizothe,” ngokuyintloko lisetyenziswa ukubhekisela kwizithixo nakwizenzo zonqulo-zithixo. Ngaba uManyano lwalunqulwa? Kunjalo kanye! Abefundisi balubeka “kwindawo engcwele,” yaye abalandeli babo babelunqula ngokunyanisekileyo. IFederal Council of the Churches of Christ yaseMerika yathi uManyano lwaluya kuba “yimbonakaliso yobupolitika yoBukumkani bukaThixo emhlabeni.” IU.S. Senate yafumana inkitha yeeleta ezivela kumaqela onqulo eyibongoza ukuba yamkele uMnqophiso woManyano Lwezizwe. Iqumrhu lamaBhaptizi, amaCongregational namaRhabe aseBritani laluqhwabel’ izandla ‘njengekuphela kwesixhobo esikhoyo sokufumana uxolo emhlabeni.’—Bona ISityhilelo 13:14, 15.

14, 15. UManyano yaye kamva iZizwe Ezimanyeneyo zema njani “kwindawo engcwele”?

14 UBukumkani bukaThixo obungoMesiya bebumiselwe emazulwini ukususela ngowe-1914, kodwa iintlanga beziqhubeka zisilwela ulongamo lwazo. (INdumiso 2:1-6) Xa kwakulungiselelwa ukusekwa koManyano Lwezizwe, iintlanga ezazisandul’ ukulwa kwimfazwe yehlabathi yokuqala, kwanabefundisi ababesikelele imikhosi yazo, babesele bekubonakalisile ukuba bawulahlile umthetho kaThixo. Babengafuni ukuba uKristu abe nguKumkani wabo. Ngaloo ndlela, bayabela intlangano yabantu indima yoBukumkani bukaThixo; babeka uManyano Lweziwe “kwindawo engcwele,” indawo eyayingalufanelanga.

15 Njengelandela loManyano, iZizwe Ezimanyeneyo zasekwa ngo-Oktobha 24, 1945. Kamva, oopopu baseRoma bazidumisa iZizwe Ezimanyeneyo besithi ‘kuphela kwethemba lemvisiswano noxolo nequmrhu elizukileyo loxolo nokusesikweni.’ Ewe, uManyano Lwezizwe, kunye nelandela lalo, iZizwe Ezimanyeneyo, zaba sisithixo sokwenene, “into elizothe” emehlweni kaThixo nawabantu bakhe.

Basabe Entwenini?

16. Abathandi bobulungisa bafanele basabe baphume entwenini namhlanje?

16 ‘Xa bekubona’ oku, xa bekuqonda oko ikuko loo ntlangano yehlabathi lonke nendlela enqulwa ngayo, abathandi bobulungisa bafanele basabele kwindawo ekhuselekileyo. Basabe baphume entwenini? Baphume koko namhlanje kufanekisela iYerusalem engathembekanga, oko kukuthi, iNgqobhoko, yaye baphume kwiBhabhiloni Enkulu, inkqubo yehlabathi lonke yonqulo lobuxoki.—ISityhilelo 18:4.

17, 18. Sisiphi isiphanziso esiya kubangelwa ‘yinto elizothe’ yanamhlanje?

17 Kwakhona, khumbula ukuba ngenkulungwane yokuqala, xa umkhosi wamaRoma owawuphethe iibhanile zonqulo-zithixo wangena kwisixeko esingcwele samaYuda, wawulapho ukuze uphanzise iYerusalem nenkqubo yayo yonqulo. Kumhla wethu isiphanziso asisayi kufikela isixeko esinye kuphela, kungekhona kwiNgqobhoko kuphela, kodwa kuyo yonke inkqubo yehlabathi lonke yonqulo lobuxoki.—ISityhilelo 18:5-8.

18 KwiSityhilelo 17:16, kwaxelwa kwangaphambili ukuba irhamncwa elimfusa lokomfuziselo, elingqineke liziZizwe Ezimanyeneyo, liya kuyijikela iBhabhiloni Enkulu efana nehenyukazi lize liyitshabalalise linengcwangu. Sisebenzisa intetho efuziselayo, sithi: “Iimpondo ezilishumi owazibonayo, nerhamncwa, aba baya kulithiya ihenyukazi ibe baya kulenza liphanziswe lize libe ze, kwaye baya kuzidla iinxalenye zenyama yalo baze balitshise ngokupheleleyo ngomlilo.” Kuyakhwankqisa ukucinga ngokuzaliseka koku. Kuya kuphumela kwisiphelo salo lonke uhlobo lonqulo lobuxoki kuzo zonke iindawo zomhlaba. Ngenene oku kuya kubonisa ukuba imbandezelo enkulu seyiqalisile.

19. Ngoobani abebeyinxalenye yeZizwe Ezimanyeneyo ukususela ekusekweni kwazo, yaye kutheni kubalulekile oku?

19 Kubangel’ umdla ukuba ukususela ekusekweni kweZizwe Ezimanyeneyo ngowe-1945, abantu abangakholelwayo kubukho bukaThixo nakunqulo bebengamalungu azo akwizikhundla eziphambili. Maxa wambi ehlabathini lonke, aba funz’ eweni bebenegalelo ekumiseleni imiqathango kwizenzo ezithile zonqulo okanye ukuziphelisa ngokusemthethweni. Noko ke, kwiminyaka embalwa edluleyo, urhulumente uye wayeka ukuwacinezela amaqela onqulo kwiindawo ezininzi. Oku kusenokwenza abanye abantu bacinge ukuba unqulo alusekho mngciphekweni.

20. Yintoni ezidume ngayo iinkonzo zehlabathi?

20 Iinkonzo zeBhabhiloni Enkulu ziyaqhubeka ziphembelela ugonyamelo olugqithiseleyo ehlabathini. Ngokufuthi iindaba eziphambili ziye zachaza amaqela abavukeli nawabanqolobi ngegama lonqulo lwabo. Amapolisa namajoni athunyelwa kwindawo ezinodushe kuye kwafuneka angene ngenkani ezitempileni ukuze aphelise ugonyamelo phakathi kwamaqela onqulo aphikisanayo. Iinkonzo bezibaxhasa ngemali abavukeli bezobupolitika. Intiyo yonqulo iye yaphazamisa imigudu yeZizwe Ezimanyeneyo yokulondoloza uxolo phakathi kwezizwe ezahlukeneyo. Kusukelo lwawo lokugcina uxolo nonqabiseko, wambi amalungu eZizwe Ezimanyeneyo angakuvuyela ukupheliswa kwayo nayiphi na impembelelo yonqulo olungumqobo endleleni yawo.

21. (a) Ngubani oya kumisa ixesha lokutshatyalaliswa kweBhabhiloni Enkulu? (b) Yintoni ekungxamisekileyo ukuyenza ngaphambi koko?

21 Kukwakho nomnye uthunywashe obalulekileyo esifanele siwuqwalasele. Nangona kuya kusetyenziswa iimpondo ezixhobileyo zeZizwe Ezimanyeneyo ukutshabalalisa iBhabhiloni Enkulu, eneneni loo mbubhiso iya kube ingumgwebo kaThixo. Loo mgwebo uya kufika ngexesha elimiselwe nguThixo. (ISityhilelo 17:17) Sifanele senze ntoni okwangoku? IBhayibhile iphendula ngelithi, “Phumani kuyo”—phumani kwiBhabhiloni Enkulu.—ISityhilelo 18:4.

22, 23. Oko kusaba kubandakanya ntoni?

22 Oku kusabela kwindawo ekhuselekileyo akwenziwa ngokoqobo, njengoko amaKristu angamaYuda kwafuneka ayishiye ngokoqobo iYerusalem. Kukusaba ngokuphuma kwiinkonzo zeNgqobhoko, ewe, ukuphuma kuyo nayiphi na inxalenye yeBhabhiloni Enkulu. Kuthetha ukuzahlula ngokupheleleyo kungekhona nje kwiintlangano zonqulo lobuxoki kodwa kwanakwizithethe neemfundiso zazo. Kukusabela kwindawo ekhuselekileyo kwintlangano kaYehova yobuthixo.—Efese 5:7-11.

23 Bakuba abakhonzi abathanjisiweyo bakaYehova beyiqondile into enezothe yanamhlanje, uManyano Lwezizwe, emva kweMfazwe Yehlabathi I, asabela njani amaNgqina? Ayesele ezahlukanisile neecawa zeNgqobhoko. Kodwa ngokuthe ngcembe aqonda ukuba ayesanamathele kwezinye zezithethe nezenzo zeNgqobhoko, ezinjengokusebenzisa umnqamlezo nokubhiyozela iKrismesi nezinye iiholide zabahedeni. Xa athi ayifumana inyaniso ngezi zinto, azivisisanisa naloo nyaniso. Athobela isiluleko esikuIsaya 52:11: “Mkani, mkani, phumani apho; musani ukuphatha nto iyinqambi; phumani phakathi kwayo; zenzeni nyulu, nina bathwali beempahla zikaYehova.”

24. Ngokukodwa ukususela ngowe-1935, ngoobani abaye bathelela ekusabeni?

24 Ngokukodwa ukususela ngowe-1935, abanye abasisihlwele esandayo, abantu abalamkelayo ithemba lokuphila ngonaphakade kumhlaba oyiparadisi, baqalisa ukuthabatha inyathelo elifanayo. Nabo baye ‘bayibona into elizothe emi kwindawo engcwele,’ baza bayiqonda intsingiselo yoko. Emva kokwenza isigqibo sokusaba, baye bawacima amagama abo kwiincwadi zeentlangano eziyinxalenye yeBhabhiloni Enkulu.—2 Korinte 6:14-17.

25. Yintoni efunekayo ukongezelela ekuqhawuleni kukabani nawaphi na amaqhina anawo nonqulo lobuxoki?

25 Noko ke, ukusaba kwiBhabhiloni Enkulu kuquka okungakumbi kunokushiya unqulo lobuxoki kuphela. Kufuneka okungakumbi kunokuya kwiintlanganiso ezimbalwa kwiHolo yoBukumkani okanye ukushumayela iindaba ezilungileyo kwinkonzo yasentsimini kanye okanye kabini ngenyanga. Umntu usenokuba uphumile kwiBhabhiloni Enkulu, kodwa ngaba uyishiye ngasemva ngenene? Ngaba uzahlule kwihlabathi inxalenye yalo enkulu eyiBhabhiloni Enkulu? Ngaba usanamathele kwizinto ezibonakalisa umoya walo—umoya wokuyinyelisa imilinganiselo kaThixo yobulungisa? Ngaba ukuthabatha lula ukuziphatha kakuhle ngokwesini nokuthembeka emtshatweni? Ngaba ukhokelisa izinto zobuqu neziphathekayo ngaphambi kwezinto zokomoya? Akamele azivumele ukuba amilise okwale nkqubo yezinto.—Mateyu 6:24; 1 Petros 4:3, 4.

Ungavumeli Nanye Into Ikuthintele Ekusabeni!

26. Yintoni eya kusinceda singaqali nje ukusaba kodwa sikuphumeze ngempumelelo?

26 Xa sisabela kwindawo ekhuselekileyo, kufuneka singazinqweneli izinto esizishiye ngasemva. (Luka 9:62) Sifanele similisele iingqondo neentliziyo zethu kuBukumkani bukaThixo nakubulungisa bakhe. Ngaba sizimisele ukubonakalisa ukholo lwethu ngokufuna ezo zinto kuqala, sinentembelo yokuba uYehova uya kulisikelela ikhondo lokuthembeka elinjalo? (Mateyu 6:31-33) Ukweyiseka kwethu ngenxa yeZibhalo kufanele kusishukumisele ekwenzeni njalo njengoko silangazelela ukubona iziganeko ezibalulekileyo eziza kwenzeka kweli hlabathi.

27. Kutheni kubalulekile ukucinga nzulu ngemibuzo ebuzwe apha?

27 Umgwebo kaThixo uya kuqalisa ngokutshatyalaliswa kweBhabhiloni Enkulu. Ubukhosi bonqulo lobuxoki obufana nehenyukazi buya kutshayelwa bungabikho ngonaphakade. Elo xesha lisemnyango! Siya kuma njani thina xa lifika elo xesha libalulekileyo? Yaye kwincopho yembandezelo enkulu, xa kutshatyalaliswa yonke inkqubo kaSathana engendawo, siya kufunyanwa simi kwiliphi icala? Ukuba silithabatha ngoku inyathelo elifanelekileyo, ngokuqinisekileyo siya kukhuseleka. UYehova usixelela oku: “Ke yena ondivayo uhleli ekholosile.” (IMizekeliso 1:33) Ngokuqhubeka sikhonza uYehova ngokunyaniseka yaye sinovuyo ebudeni bokuqosheliswa kwale nkqubo, sisenokukufanelekela ukukhonza uYehova ngonaphakade.

[Umbhalo osemazantsi]

a Bona ethi Insight on the Scriptures, epapashwe yiWatchtower Bible and Tract Society of New York, Inc., Umqulu 1, iphepha 634-5.

Uyakhumbula Na?

◻ Yintoni “into elizothe” yanamhlanje?

◻ “Into elizothe . . . imi kwindawo engcwele” ngayiphi ingqiqo?

◻ Yintoni ebandakanyekileyo ekusabeleni kwindawo ekhuselekileyo ngoku?

◻ Kutheni kungxamisekile ukuthabatha elo nyathelo?

[Umfanekiso okwiphepha 16]

Ukuze basinde, abalandeli bakaYesu kwafuneka basabe ngokukhawuleza

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share