Itempile KaYehova Enkulu Yokomoya
“Sinombingeleli omkhulu onjengalo, . . . isicaka sikawonke-wonke sendawo engcwele nesentente yokwenyaniso, ayimisileyo uYehova, kungekhona umntu.”—HEBHERE 8:1, 2.
1. Liliphi ilungiselelo lothando uThixo awalenzela uluntu olunesono?
NGENXA yothando lwakhe olunzulu ngoluntu, uYehova uThixo walungiselela idini lokususa izono zehlabathi. (Yohane 1:29; 3:16) Kwafuneka afudusele ubomi boNyana wakhe wamazibulo owayesezulwini kwisibeleko sentombi enyulu engumYuda egama linguMariya. Ingelosi kaYehova yamchazela ngokucacileyo uMariya ukuba umntwana awayeza kumkhawula wayeya ‘kubizwa ngokuba ngungcwele, uNyana kaThixo.’ (Luka 1:34, 35) UYosefu, owayegane uMariya, waxelelwa ngokukhawulwa kukaYesu ngokungummangaliso yaye waxelelwa kwanokuba wayeza “kusindisa abantu bakhe ezonweni zabo.”—Mateyu 1:20, 21.
2. UYesu wenza ntoni xa wayeneminyaka emalunga nama-30 ubudala, yaye kwakutheni?
2 Njengoko uYesu wayekhula, umele ukuba waya eziqonda ezinye zezinto eziphathelele ukuzalwa kwakhe okungummangaliso. Wayesazi ukuba uYise wasezulwini wayembekele umsebenzi wokusindis’ ubomi emhlabeni. Ngoko, xa wayeyindoda epheleleyo emalunga neminyaka engama-30 ubudala, uYesu waya kumprofeti kaThixo uYohane ukuze abhaptizwe kuMlambo iYordan.—Marko 1:9; Luka 3:23.
3. (a) Wayethetha ukuthini uYesu xa wayesithi, “Akufunanga mbingelelo namnikelo”? (b) Nguwuphi umzekelo obalaseleyo uYesu awawumisela bonke abafuna ukuba ngabafundi bakhe?
3 UYesu wayethandaza ebudeni bokubhaptizwa kwakhe. (Luka 3:21) Kubonakala ukuba ukususela kweli nqanaba lobomi bakhe ukusa phambili, wazalisekisa amazwi eNdumiso 40:6-8, njengoko asetyenziswa ngumpostile uPawulos kamva: “Akufunanga mbingelelo namnikelo, kodwa undilungiselele umzimba.” (Hebhere 10:5) Ngoko uYesu wabonakalisa ukuba wayeqonda ukuba uThixo ‘wayengafuni’ kuqhubeke kusondezwa amadini ezilwanyana kwitempile yaseYerusalem. Kunoko, wayeqonda ukuba uThixo wayemlungiselele umzimba ofezekileyo uYesu, ukuze awunikele njengedini. Oku kwakuza kuwenza angabi safuneka amadini ezilwanyana. Ebonisa umnqweno osuk’ entliziyweni wokwenza ukuthanda kukaThixo, uYesu waqhubeka ethandaza: “Khangela! Ndiyeza (emqulwini wencwadi kubhaliwe ngam) ukuza kwenza ukuthanda kwakho, Owu Thixo.” (Hebhere 10:7) Onjani ukubalasela umzekelo wenkalipho nokuzinikela ngokupheleleyo owamiselwa nguYesu ngaloo mini kubo bonke ababeza kuba ngabafundi bakhe!—Marko 8:34.
4. UThixo wakubonakalisa njani ukuba wayekwamkela ukuzinikezela kukaYesu?
4 Ngaba uThixo wabonakalisa ukuwamkela umthandazo kaYesu ekubhaptizweni kwakhe? Masivumele omnye wabapostile owakhethwa nguYesu asiphendule: “Emva kokuba ebhaptiziwe uYesu ngoko nangoko wenyuka emanzini; yaye, khangela! amazulu avuleka, yaye wabona umoya kaThixo njengehobe usehlela kuye. Khangela! Kanjalo, kwakukho ilizwi eliphuma emazulwini elathi: ‘Lo nguNyana wam, oyintanda, endikholisiweyo nguye.’”—Mateyu 3:16, 17; Luka 3:21, 22.
5. Sasifanekisela ntoni isibingelelo setempile yokoqobo?
5 Ukuwamkela kukaThixo umzimba kaYesu njengedini, ngengqiqo yokomoya, kwakuthetha ukuba kwakumiswe isibingelelo esikhulu ngakumbi kuneso sasikwitempile yaseYerusalem. Isibingelelo sokoqobo ekwakusondezwa amadini ezilwanyana kuso sasifanekisela isibingelelo sokomoya, eneneni ‘esasikukuthanda’ kukaThixo okanye ilungiselelo lakhe lokwamkela ubomi bukaYesu njengedini. (Hebhere 10:10) Kungoko umpostile uPawulos wabhalela amanye amaKristu esithi: “Sinesibingelelo abangenagunya lakudla kuso abo benza inkonzo engcwele ententeni [okanye, etempileni].” (Hebhere 13:10) Ngamanye amazwi, amaKristu okwenyaniso azuza iingenelo zedini lokucamagushela izono elikhulu ngakumbi, dini elo lachaswayo yinkoliso yababingeleli abangamaYuda.
6. (a) Yintoni eyamiselwayo ekubhaptizweni kukaYesu? (b) Sithetha ntoni isibizo esithi Mesiya, okanye Kristu?
6 Ukuthanjiswa kukaYesu ngomoya oyingcwele kwakuthetha ukuba uThixo wayeqalise ilungiselelo lakhe letempile yokomoya, esebenzisa uYesu njengoMbingeleli Omkhulu. (IZenzo 10:38; Hebhere 5:5) Umfundi uLuka waphefumlelwa ukuba achaze unyaka esasiya kwenzeka ngawo esi siganeko sibalulekileyo ‘njengonyaka weshumi elinesihlanu wolawulo lukaTibheriyo Kesare.’ (Luka 3:1-3) Oko kungqamana nonyaka wama-29 C.E.—iminyaka eziiveki ezingama-69, okanye iminyaka engama-483, ukususela kwixesha uKumkani uArtashashta awakhupha umyalelo wokuba ziphinde zakhiwe iindonga zeYerusalem. (Nehemiya 2:1, 5-8) Ngokutsho kwesiprofeto, ‘uMthanjiswa Oyinganga’ wayeya kuvela ngaloo nyaka wawuxelwe kwangaphambili. (Daniyeli 9:25) Kubonakala ukuba amaYuda amaninzi ayekuqonda oku. ULuka uthi “abantu babenolindelo” lobukho bukaMesiya, okanye uKristu, zibizo ezo eziphuma kumagama esiHebhere nawesiGrike anentsingiselo efanayo, “umthanjiswa.”—Luka 3:15.
7. (a) UThixo wayithambisa nini “iNgcwele kaNgcwele,” yaye kwakuthetha ntoni oku? (b) Yintoni enye eyenzekayo ekubhaptizweni kukaYesu?
7 Ebudeni bokubhaptizwa kukaYesu, indawo ahlala kuyo uThixo ezulwini yathanjiswa, okanye yabekelwa bucala, ‘njengeNgcwele kaNgcwele’ kwilungiselelo letempile enkulu yokomoya. (Daniyeli 9:24) ‘Intente [okanye, itempile] yokwenyaniso, emiswe nguYehova, kungekhona umntu’ yaqalisa ukusebenza. (Hebhere 8:2) Kwakhona, ngokubhaptizwa kwakhe ngamanzi nangomoya oyingcwele, uYesu Kristu ongumntu wazalwa kwakhona njengoNyana kaThixo. (Thelekisa uYohane 3:3.) Oku kwakuthetha ukuba ngexesha elifanelekileyo uThixo wayeza kumbuyisela kubomi basezulwini uNyana wakhe, apho wayeza kukhonza njengoKumkani noMbingeleli Omkhulu “ngokohlobo lukaMelkitsedeki” ngakwisandla sasekunene sikaYise.—Hebhere 6:20; INdumiso 110:1, 4.
INgcwele KaNgcwele Yasezulwini
8. Ziziphi iinkalo ezintsha ezavelayo kwitrone kaThixo yasezulwini?
8 Ngosuku lokubhaptizwa kukaYesu, kongezelelwa iinkalo ezintsha kwitrone kaThixo yasezulwini. Ilungiselelo ledini lomntu ofezekileyo lokucamagushela izono zehlabathi labethelela umahluko ophakathi kobungcwele bukaThixo nokungafezeki kwabantu. Kwakhona inceba kaThixo yabalaseliswa kwisibakala sokuba ngoku wayebonakalisa ukukulungela ukungxengxezwa, okanye ukuxolela. Ngoko itrone kaThixo yasezulwini yathi yafana neyona nxalenye iphakathi etempileni, awayengena kanye ngonyaka kuyo umbingeleli omkhulu ephethe igazi lezilwanyana ukuze acamagushele izono ngokufuziselayo.
9. (a) Wawufanekisela ntoni umkhusane owawuphakathi kweNgcwele neNgcwele kaNgcwele? (b) UYesu wangena njani ngaphaya komkhusane wetempile kaThixo yokomoya?
9 Umkhusane owawusahlula iNgcwele kwiNgcwele kaNgcwele wawufanekisela umzimba kaYesu wenyama. (Hebhere 10:19, 20) Wawumthintela uYesu ekungeneni kwindawo enoYise ngoxa wayengumntu emhlabeni. (1 Korinte 15:50) Ekufeni kukaYesu, “ikhuselo lengcwele lakrazuka kubini, ukusuka phezulu ukusa ezantsi.” (Mateyu 27:51) Oko kwakubonisa kakuhle ukuba umqobo owawumthintela uYesu ukuba angene ezulwini wawushenxisiwe. Kwiintsuku ezintathu kamva, uYehova uThixo wenza ummangaliso obalaseleyo. Wamvusa uYesu ekufeni, kungekhona njengomntu onenyama negazi, kodwa njengesidalwa somoya esizukileyo ‘esiqhubeka siphila ngonaphakade.’ (Hebhere 7:24) Kwiintsuku ezingama-40 kamva, uYesu wanyukela ezulwini waza wangena ‘kwiNgcwele kaNgcwele’ yokwenene ukuze “abonakale phambi kukaThixo ngenkqu ngenxa yethu.”—Hebhere 9:24.
10. (a) Yintoni eyenzekayo emva kokuba uYesu esondeze ixabiso ledini lakhe kuYise wasezulwini? (b) Ukuthanjiswa ngomoya oyingcwele kwathetha ntoni kubafundi bakaKristu?
10 Ngaba uThixo walamkela ixabiso legazi likaYesu elaphalalayo njengesicamagushelo sezono zehlabathi? Walamkela ngenene. Ubungqina boku bafika kwiintsuku ezingama-50 emva kokuvuswa kukaYesu, ngosuku lokubhiyozela iPentekoste. Umoya oyingcwele kaThixo wathululwa phezu kwabafundi bakaYesu abali-120 ababehlanganisene eYerusalem. (IZenzo 2:1, 4, 33) NjengoMbingeleli wabo Omkhulu, uYesu Kristu, ngoku babethanjiselwe ukukhonza ‘njengababingeleli abangcwele, ukuze banikele imibingelelo yokomoya’ ngaphantsi kwelungiselelo likaThixo letempile enkulu yokomoya. (1 Petros 2:5) Ngaphezu koko, aba bathanjiswa babeyila uhlanga olutsha, “uhlanga olungcwele” lwamaSirayeli kaThixo okomoya. Ukususela ngoko, zonke iziprofeto zezinto ezilungileyo zikaSirayeli, ezinjengesithembiso ‘somnqophiso omtsha’ esibhalwe kuYeremiya 31:31, zaziya kusebenza kwibandla lamaKristu athanjisiweyo, “uSirayeli kaThixo” wokwenene.—1 Petros 2:9; Galati 6:16.
Ezinye Iinkalo Zetempile KaThixo Yokomoya
11, 12. (a) Yintoni eyayifanekiselwa yintendelezo yababingeleli kwimeko kaYesu, yaye ifanekisela ntoni kwimeko yabalandeli bakhe abathanjisiweyo? (b) Sifanekisela ntoni isitya samanzi yaye sisetyenziswa njani?
11 Nangona iNgcwele kaNgcwele yayifanekisela ‘izulu ngokwalo’ indawo enetrone kaThixo, zonke ezinye iinkalo zetempile kaThixo yokomoya ziyafana nezinto ezazikweyasemhlabeni. (Hebhere 9:24) Kwitempile yaseYerusalem, kwakukho intendelezo yababingeleli engaphakathi eyayinesibingelelo samadini nesitya esikhulu samanzi, ababehlambela kuso ababingeleli ngaphambi kokunikela inkonzo engcwele. Ezi zinto zifanekisela ntoni kwilungiselelo likaThixo letempile yokomoya?
12 Kwimeko kaYesu Kristu, intendelezo yababingeleli engaphakathi yayifanekisela ukungabi nasono kwakhe njengoNyana kaThixo ongumntu nofezekileyo. Ngokuba nokholo kwidini likaYesu, abalandeli bakaKristu abathanjisiweyo bagqalwa njengamalungisa. Ngaloo ndlela, ngokufanelekileyo uThixo ubajonga njengabangenasono. (Roma 5:1; 8:1, 33) Ngenxa yoko, le ntendelezo ikwafanekisela ilungelo lokuma kwababingeleli abangcwele njengamalungisa phambi kukaThixo. Kwangaxeshanye, amaKristu athanjisiweyo asengabantu abangafezekanga yaye anokusenza isono. Isitya samanzi esasisentendelezweni sifanekisela iLizwi likaThixo elisetyenziswa nguMbingeleli Omkhulu ukugcina ababingeleli abangcwele becocekile. Ngokuzithoba kule nkqubo yokucocwa, baye bazenzela igama elihle elimnika indili uThixo elitsalela abantu bangaphandle kunqulo lwakhe olunyulu.—Efese 5:25, 26; thelekisa uMalaki 3:1-3.
INgcwele
13, 14. (a) INgcwele yetempile ifanekisela ntoni kwimeko kaYesu nabalandeli bakhe abathanjisiweyo? (b) Sifanekisela ntoni isiphatho sesibane segolide?
13 Inxalenye yokuqala yetempile ifanekisela isigxina esingaphezulu kuneso sentendelezo. Kwimeko yomntu ofezekileyo uYesu Kristu, ifanekisela ukuzalwa kwakhe ngokutsha njengoNyana kaThixo wokomoya nowayeza kubuyela kubomi basezulwini. Emva kokuba bevakaliswe njengamalungisa ngenxa yokuba nokholo kwigazi likaKristu elaphalalayo, umoya kaThixo usebenza ngale ndlela ikhethekileyo nakubalandeli bakhe abathanjisiweyo. (Roma 8:14-17) ‘Ngamanzi [okanye, ngokubhaptizwa kwabo] nangomoya,’ ‘bazalwa kwakhona’ njengoonyana bakaThixo bokomoya. Ngenxa yoko, banethemba lokuvuselwa kubomi basezulwini njengoonyana bakaThixo bokomoya, ukuba bahlala bethembekile kuse ekufeni.—Yohane 3:5, 7; ISityhilelo 2:10.
14 Ababingeleli ababekhonza ngaphakathi kwiNgcwele yetempile yasemhlabeni babengabonwa ngabanquli abangaphandle. Ngokufanayo, amaKristu athanjisiweyo anamava emeko yokomoya abangenakwabelana okanye engaqondwa ngokupheleleyo ngabanye abanquli bakaThixo, abanethemba lokuphila ngonaphakade kumhlaba oyiparadisi. Isiphatho sesibane segolide esasisemnqubeni sifanekisela ukukhanyiselwa kwamaKristu athanjisiweyo. Ukusebenza komoya oyingcwele kaThixo, njengeoli esezibaneni, kuyenza ikhanye iBhayibhile. AmaKristu akalugcini kuwo ulwazi alufumana ngoncedo lwawo. Kunoko, athobela uYesu, owathi: “Nikukukhanya kwehlabathi. . . . Makukhanye ukukhanya kwenu phambi kwabantu, ukuze babone imisebenzi yenu emihle base uzuko kuYihlo osemazulwini.”—Mateyu 5:14, 16.
15. Sifanekisela ntoni isonka esikwitafile yezonka ezingenagwele?
15 Ukuze ahlale esekukhanyeni, amaKristu athanjisiweyo amele azondle rhoqo ngoko kwakufanekiselwa sisonka esasikwitafile yezonka ezingenagwele. Umthombo wawo oyintloko wokutya kokomoya liLizwi likaThixo, azabalazela ukulifunda nokucamngca ngalo imihla ngemihla. NoYesu wawathembisa ngokuwanika ‘ukutya ngexesha elifanelekileyo’ esebenzisa ‘ikhoboka lakhe elithembekileyo neliyingqondi.’ (Mateyu 24:45) Eli “khoboka” libunjwa ngawo onke amaKristu athanjisiweyo aphilayo emhlabeni ngalo naliphi na ixesha. UKristu ebesebenzisa aba bathanjiswa ukupapasha inkcazelo engokuzaliseka kweziprofeto zeBhayibhile nokunikela ulwalathiso ngexesha elifanelekileyo ngendlela esebenza ngayo imigaqo yeBhayibhile kubomi bethu bemihla ngemihla. Ngoko, enoxabiso amaKristu athanjisiweyo azondla kuwo onke loo malungiselelo okomoya. Kodwa ukuhlala kwawo ephilile ngokomoya akuxhomekekanga ekondleni iingqondo neentliziyo zawo ngolwazi olungoThixo kuphela. UYesu wathi: “Okwam ukutya kukuba ndenze ukuthanda kondithumileyo nokuba ndiwugqibe umsebenzi wakhe.” (Yohane 4:34) Ngokufanayo, amaKristu athanjisiweyo ayaneliseka ngokuzinikela ekwenzeni ukuthanda kukaThixo okutyhiliweyo imihla ngemihla.
16. Zifanekisela ntoni iinkonzo ezazinikelwa kwisibingelelo sesiqhumiso?
16 Kusasa nangokuhlwa, umbingeleli wayesondeza isiqhumiso kuThixo kwisibingelelo sesiqhumiso esasikwiNgcwele. Kwangaxeshanye, abanquli abangengabo ababingeleli babedla ngokuthandaza kuThixo ngoxa bemi kwiintendelezo ezingaphandle zetempile yakhe. (Luka 1:8-10) IBhayibhile iyachaza: “Iziqhumiso zithetha imithandazo yabo bangcwele.” (ISityhilelo 5:8) Umdumisi uDavide wabhala: “Umthandazo wam mawuhlale uhleli phambi kwakho usisiqhumiso.” (INdumiso 141:2) NamaKristu athanjisiweyo ayalixabisa ilungelo lokusondela kuYehova ngomthandazo egameni likaYesu Kristu. Imithandazo esuk’ entliziyweni ifana nesiqhumiso esinevumba elimnandi. AmaKristu athanjisiweyo amdumisa nangezinye iindlela uThixo, esebenzisa imilebe yawo ukufundisa abanye. Ukunyamezela kwawo ebunzimeni nokugcina kwawo ingqibelelo ngaphantsi kwezilingo kumkholisa ngokwenene uThixo.—1 Petros 2:20, 21.
17. Yintoni eyayibandakanyekile kwinzaliseko yoko kwakufanekiselwa kukungena kombingeleli omkhulu okwesihlandlo sokuqala kwiNgcwele kaNgcwele ngoMhla Wocamagusho?
17 NgoMhla Wocamagusho, umbingeleli omkhulu wakwaSirayeli wayefanele angene kwiNgcwele kaNgcwele aze atshise isiqhumiso kugcedevu lwegolide olunamalahle atshisayo. Wayefanele enjenjalo ngaphambi kokuza negazi lamadini ezono. Ukuzalisekisa oko, indoda enguYesu yayigcina ngokupheleleyo ingqibelelo yayo kuYehova uThixo ngaphambi kokunikela ngobomi bayo njengokuphela kwedini elihlala lihleli lezono zethu. Ngaloo ndlela wabonakalisa ukuba umntu ofezekileyo unokuyigcina ingqibelelo yakhe kuThixo kungakhathaliseki ukuba uSathana umcinezela ngayiphi na indlela. (IMizekeliso 27:11) Xa wayevavanywa, uYesu wathandaza “ngezikhalo ezinamandla neenyembezi, yaye waviwa ngokukholekileyo ngenxa yoloyiko lwakhe lobuthixo.” (Hebhere 5:7) Ngokwenjenjalo wamzukisa uYehova njengoMongami wendalo iphela olungileyo nosesikweni. UThixo wamvuza uYesu ngokumvusela kubomi bokungafi ezulwini. Ekule ndawo iphakamileyo, uYesu unikela ingqalelo kwisizathu sesibini sokuza kwakhe emhlabeni, oko kukuthi, ukuxolelanisa abantu abangaboni abaguqukayo noThixo.—Hebhere 4:14-16.
Uzuko Olungakumbi Lwetempile KaThixo Yokomoya
18. UYehova uyizukise njani ngendlela ebalaseleyo itempile yakhe yokomoya?
18 UYehova waxela kwangaphambili: “Buya kuba bukhulu ubuqaqawuli bamva bale ndlu, ngaphezu kobokuqala.” (Hagayi 2:9) Ngokuvusa uYesu njengoKumkani noMbingeleli Omkhulu ongafiyo, uYehova wayizukisa ngendlela ebalaseleyo itempile yakhe yokomoya. Ngoku uYesu ukulungele ukuzisa ‘usindiso olungunaphakade kubo bonke abo bamthobelayo.’ (Hebhere 5:9) Abokuqala ukubonakalisa intobelo enjalo yayingabafundi abali-120 abafumana umoya oyingcwele ngePentekoste yowama-33 C.E. Incwadi yeSityhilelo yaxela kwangaphambili ukuba aba nyana bakaSirayeli bokomoya babeya kuba li-144 000 ekugqibeleni. (ISityhilelo 7:4) Ekufeni kwabo, inkoliso yabo kwafuneka ilale emangcwabeni, ilinde ixesha lobukho bukaYesu esemandleni obukumkani. Ubalo-maxesha lwesiprofeto olukuDaniyeli 4:10-17, 20-27 lwalatha kowe-1914 njengexesha lokuqalisa kukaYesu ukulawula phakathi kweentshaba zakhe. (INdumiso 110:2) Kangangamashumi eminyaka ngaphambi koko, amaKristu athanjisiweyo ayewulangazelela loo nyaka. Imfazwe yehlabathi yokuqala nooyeha abajoliswe kuluntu abalandelayo banikela ubungqina bokuba uYesu wayebekwe etroneni njengoKumkani ngokwenene ngowe-1914. (Mateyu 24:3, 7, 8) Kungekudala emva koko, ekubeni lalifikile ixesha lokuba “umgwebo uqale ngendlu kaThixo,” uYesu wayeza kuzalisekisa isithembiso sakhe kubafundi bakhe abathanjisiweyo ababelele ukufa: “Ndiyeza kwakhona ibe ndiza kunamkelela kum ekhaya.”—1 Petros 4:17; Yohane 14:3.
19. Intsalela ye-144 000 iya kungena njani kwiNgcwele kaNgcwele yasezulwini?
19 Amalungu ali-144 000 ababingeleli abangcwele awakatywinwa onke aze ahlanganiselwe kwikhaya lawo lasezulwini. Intsalela yawo isaphila apha emhlabeni kwimeko yokomoya eyayifanekiselwa yiNgcwele, eyahlulwe kwindawo engcwele enoThixo ‘ngumkhusane,’ okanye umqobo, wemizimba yawo yenyama. Xa aba besifa bethembekile, bavuswa kwangoko njengezidalwa zokomoya ezingafiyo ukuze bathelele abo be-144 000 abasele besezulwini.—1 Korinte 15:51-53.
20. Nguwuphi umsebenzi obalulekileyo owenziwa yintsalela yababingeleli abangcwele namhlanje, yaye uyintoni umphumo wawo?
20 Ngenxa yokuba kukho ababingeleli abaninzi ngolo hlobo abakhonza noMbingeleli Omkhulu ezulwini, itempile kaThixo yokomoya izuze uzuko olungakumbi. Okwangoku, intsalela yababingeleli abangcwele yenza umsebenzi obalulekileyo emhlabeni. Ngokushumayela kwabo, uThixo ‘unyikimisa zonke iintlanga’ ngokuvakalisa umgwebo wakhe, njengoko kwaxelwa kwangaphambili kuHagayi 2:7. Kwangaxeshanye, izigidi zabanquli ezichazwe ‘njengezinto ezinqwenelekayo zeentlanga zonke’ ziyathontelana ukungena kwiintendelezo zasemhlabeni zetempile kaYehova. Aba banayiphi indima kwilungiselelo likaThixo lonqulo, yaye luluphi olunye uzuko esinokulindela ukuba lubekho kwitempile yakhe enkulu yokomoya? Le mibuzo iza kuxutyushwa kwinqaku elilandelayo.
Imibuzo Yempinda
◻ Nguwuphi umzekelo obalaseleyo owamiselwa nguYesu ngowama-29 C.E.?
◻ Liliphi ilungiselelo elaqalisa ukusebenza ngowama-29 C.E.?
◻ Ifanekisela ntoni iNgcwele neNgcwele kaNgcwele?
◻ Ilufumene njani uzuko olungakumbi itempile enkulu yokomoya?
[Umfanekiso okwiphepha 17]
Ekuthanjisweni kukaYesu ngomoya oyingcwele ngowama-29 C.E., itempile kaThixo yokomoya enkulu yaqalisa ukusebenza