Oko Sinokukufunda Kwizidalwa “Ezinobulumko Bemveli”

IZINTO ezilawula ubushushu nokuphola komoya, isithinteli-kukhenkceka, ukwahlukaniswa kwamanzi netyuwa nesixhobo sokufumana into ephantsi kwamanzi ngamaza esandi zizinto oluzaziyo uluntu lwale nkulungwane yama-20. Ukanti, bezikho kangangamawaka eminyaka ezilwanyaneni. Ewe, uluntu luyangenelwa ngokufunda ngezidalwa “ezinobulumko bemveli” ngolo hlobo. (IMizekeliso 30:24-28, NW; Yobhi 12:7-9) Kubonakala ukuba izilwanyana ezithile ziye zaba ngabahlohli abangathethiyo boluntu, yaye sinokukufumanisa kubangel’ umdla gqitha ukuzihlolisisa.

Ngaba sinokungenelwa ngokuqwalasela imikhwa yezilwanyana ezithile? Kaloku, uYesu Kristu wafanisa abalandeli bakhe nezimvu, iinyoka, amahobe neenkumbi. Wayecinga ntoni xa wayefanisa abalandeli bakhe nezi zidalwa? Makhe sibone.

“Izimvu Zam Ziyaliphulaphula Ilizwi Lam”

Izimvu zikhankanywa izihlandlo ezingaphezu kwama-200 eBhayibhileni. Njengoko iSmith’s Bible Dictionary ichaza, “imvu ifanekisela ubulali, umonde nokuthobela.” KuIsaya isahluko 53, ngokwesiprofeto uYesu wafaniswa nemvu. Hayi indlela ekwakufaneleke ngayo ukuba afanise abalandeli bakhe neso silwanyana! Kodwa ziziphi iimpawu zemvu awayecinga ngazo uYesu?

UYesu wathi: “Izimvu zam ziyaliphulaphula ilizwi lam, kwaye ndiyazazi, ibe ziyandilandela.” (Yohane 10:27) Ngaloo ndlela wabalaselisa ubulali babafundi bakhe nomdla wabo wokumlandela. Izimvu zokoqobo ziyamphulaphula umalusi wazo zize zimlandele ngokuzithandela. Nomalusi uba nolwalamano olusondeleyo nomhlambi.

Umhlambi unokuthi saa ethafeni xa usitya, kodwa imvu nganye ihlala ikufutshane nezinye. Ngaloo ndlela, xa ezi zilwanyana ziziva zinganqabisekanga okanye zisoyika, incwadi ethi Alles für das Schaf (Konke Ngenxa Yezimvu) ithi, “zinokukhawuleza ziqokelelane ndawonye.” Ukuba izimvu zibaleka ingozi, zibaleka zonke njengomhlambi, ziman’ ukuma ngamaxesha athile ukuze ziqonde ukuba imeko injani na. “Ukubaleka ziphumla kwenza amatakane nezinye ezibuthathaka zingashiyeki. Umhlambi ude uzikhusele ngokukhethekileyo.” Sinokufunda ntoni kule mikhwa?

Namhlanje amaKristu okwenyaniso awasasazekanga kwiimvaba nakumahlelo eNgqobhoko. Kunoko, ahlanganiswe aba ngumhlambi omnye. UmKristu ngamnye uziva esondelelene nalo mhlambi kaThixo, ibe oku kufak’ isandla kumanyano lwentlangano yamaNgqina kaYehova. Xa kukho ingxaki—enoba kukugula kakhulu, imfazwe, okanye intlekele yemvelo—umnquli ngamnye ulufuna phi ulwalathiso nokhuseleko? Kwintlangano kaYehova, enikela unqabiseko lokomoya.

Sifumaneka njani isiluleko seBhayibhile? Ngeempapasho ezinjengeMboniselo kunye nolindixesha oliqabane layo, uVukani! La maphephancwadi kunye neentlanganiso zamaKristu ade anikele uncedo olukhethekileyo kwabo bafuna ukunyanyekelwa ngakumbi, njengamatakane nezimvu ezibuthathaka emhlambini. Ngokomzekelo, kunikelwa ingqalelo kubazali abangenamaqabane omtshato nakwabo bathwaxwa kukudandatheka. Ngoko ke, hayi indlela ekububulumko ngayo ukufunda ngalinye kula maphephancwadi, ukuya kuzo zonke iintlanganiso zebandla nokukusebenzisa oko sikufundayo! Ngaloo ndlela sibonakalisa ubulali nokusondelelana gqitha nomhlambi kaThixo.—1 Petros 5:2.

“Nilumkile Njengeenyoka Ukanti Nimsulwa Njengamahobe”

ISmith’s Bible Dictionary ithi: “Kulo lonke elaseMpuma inyoka yayisetyenziswa njengophawu lomgaqo ongendawo, womoya wokungathobeli.” Kwelinye icala, ibinzana elithi “hobe lam” lalisetyenziswa ukuze kubonakaliswe uthando. (INgoma yazo iiNgoma 5:2, NW) Ngelo xesha, wayecinga ntoni uYesu xa wayekhuthaza abalandeli bakhe ukuba ‘balumke njengeenyoka ukanti babe msulwa njengamahobe’?—Mateyu 10:16.

UYesu wayenikela imiyalelo ngokushumayela nokufundisa. Abafundi bakhe babenokulindela ukwamkelwa ngeendlela ezingafaniyo. Abanye babeya kubonakalisa umdla, ngoxa abanye babeya kuzichasa iindaba ezilungileyo. Bambi babeya kude babatshutshise aba bakhonzi bokwenyaniso bakaThixo. (Mateyu 10:17-23) Babefanele basabele njani abafundi kwintshutshiso?

Kwincwadi ethi Das Evangelium des Matthäus (IVangeli kaMateyu), ngokuphathelele uMateyu 10:16, uFritz Rienecker uthi: “Ubulumko . . . bumele budityaniswe nengqibelelo, ukunyaniseka nokuthi tye, hleze iintshaba zibe nesizathu sokukhalaza. Abameli bakaYesu baphila phakathi kweentshaba ezingenasizi, ezingenalwazelelo nezihlasela abapostile ngokungenanceba nangaliphi na ithuba ezilifumanayo. Ngenxa yoko, kufuneka—njengeenyoka—babeke iliso elibukhali kwiintshaba, yaye bayiqwalasele ngenyameko imeko; bayilawule imeko ngaphandle kokuqhatha okanye ukukhohlisa, babe nyulu yaye banyaniseke koko bakuthethayo nakoko bakwenzayo baze ngaloo ndlela bazingqine benjengamahobe.”

Abakhonzi bakaThixo banamhlanje banokufunda ntoni kumazwi kaYesu afumaneka kuMateyu 10:16? Namhlanje, abantu basabela ngendlela efana neyabo benkulungwane yokuqala kwiindaba ezilungileyo. Xa ejamelene nentshutshiso, amaKristu okwenyaniso kufuneka adibanise ubulumko benyoka nokuba msulwa kwehobe. AmaKristu akasebenzisi kukhohlisa okanye ukungathembeki kunoko anyanisekile, angawokwenyaniso yaye athembekile ekuvakaliseni isigidimi soBukumkani kwabanye.

Ngokomzekelo: Abahlobo emsebenzini, ulutsha esikolweni, okanye namalungu entsapho yakho asenokuthetha amazwi okukudimaza ngeenkolelo zakho njengeNgqina likaYehova. Ngokukhawuleza usenokusabela ngokulugxeka ngokufanayo unqulo lwabo. Kodwa ngaba oku kumsulwa? Akunjalo. Ukuba uyababonisa abo bakugxekayo ukuba amagqabaza abo awayiguquli ihambo yakho ethandekayo, basenokude bakuyeke. Ngoko unokuba ngolumkileyo nongabekeki bala—‘ulumke njengenyoka ukanti umsulwa njengehobe.’

“Imfano Yeenkumbi Yayinentsobi Yamahashe Alungiselwe Idabi”

Iphephancwadi iGEO libika ukuba ngowe-1784, uMzantsi Afrika wathwaxwa “lelona bubu [leenkumbi] likhulu embalini ebhaliweyo.” Eli bubu laligubungela ummandla oziiskwe khilomitha ezingama-5 200, ophantse uyiphindaphinde kahlanu iHong Kong ngobukhulu. ISmith’s Bible Dictionary ithi inkumbi “izonakalisa kanobom izityalo kummandla welizwe ethe yawutyelela.”

Kwisityhilelo sakhe sezinto eziza kwenzeka “kwimini yeNkosi” awasinikwa nguThixo, uYesu wasebenzisa umbono webubu leenkumbi. Kwathiwa ngazo: “Imfano yeenkumbi yayinentsobi yamahashe alungiselwe idabi.” (ISityhilelo 1:1, 10; 9:3-7) Yayiyintoni intsingiselo yaloo mfuziselo?

Kudala amaNgqina kaYehova esazi ukuba iinkumbi zeSityhilelo isahluko 9 zifanekisela abakhonzi abathanjisiweyo bakaThixo abasemhlabeni kule nkulungwane.a La maKristu aye abelwa umsebenzi othile—wokuvakalisa isigidimi soBukumkani emhlabeni wonke aze enze abafundi. (Mateyu 24:14; 28:19, 20) Oku kufuna ukuba oyise imiqobo aze anamathele kumsebenzi wawo. Yintoni abenokufaniswa nayo ngaphandle kwenkumbi engoyiswa bani?

Nangona inobude obungaphezulu kancinane kwiisentimitha ezintlanu, ngokuqhelekileyo inkumbi ihamba umgama ophakathi kweekhilomitha ezili-100 nezingama-200 ngosuku. Inkumbi yasentlango inokude ihambe umgama oziikhilomitha ezili-1 000. IGEO ithi “iimpiko zayo ziphaphazela izihlandlo ezili-18 ngomzuzwana yaye ziphaphazela kangengeeyure ezili-17 ngosuku—nto leyo engenakwenziwa zezinye izinambuzane.” Onjani wona ukuba mkhulu umsebenzi kwesi sidalwa sincinane!

Njengeqela, amaNgqina kaYehova azingisile ekusasazeni iindaba ezilungileyo zoBukumkani. Ngoku ashumayela kumazwe angaphezu kwama-230. Aba bakhonzi bakaThixo boyisa iingxaki ezininzi ukuze babe nesabelo ekwenzeni lo msebenzi. Hlobo luni lweengxaki abajamelana nazo? Ezinye zazo likhethe, ukubekelwa imiqathango ngabasemagunyeni, ukugula, ukutyhafa nenkcaso evela kwizalamane. Kodwa ayikho into eye yakwazi ukuthintela inkqubela yawo. Anamathela kumsebenzi wawo awunikwe nguThixo.

Qhubekani Nibonakalisa Iimpawu ZamaKristu

Ewe, uYesu wafanisa abalandeli bakhe nezimvu, iinyoka, amahobe neenkumbi. Oku kufaneleke ngokwenene kule mihla yethu. Ngoba? Ngenxa yokuba isiphelo sale nkqubo yezinto sikufuphi, yaye iingxaki zicinezela kakhulu kunanini na ngaphambili.

Ecinga ngamazwi omzekelo kaYesu, amaKristu okwenyaniso anamathela ngokusondeleyo kumhlambi kaThixo yaye asamkela ngobulali isiluleko esivela kwintlangano kaYehova. Ahlala ethe qwa yaye azilumkele iimeko ezinokuthintela umsebenzi wawo wobuKristu, ngoxa engagculelwa kuzo zonke izinto. Ukongezelela, ayaqhubeka esenza ukuthanda kukaThixo phezu kwayo nje imiqobo. Yaye ayaqhubeka efunda kwizidalwa “ezinobulumko bemveli.”

[Umbhalo osemazantsi]