Kutheni Sonke Sifanele Simdumise UThixo?

HALELUYA! Eli gama liqheleke gqitha kwinkoliso yamarhamente eNgqobhoko. Amanye alikhwaza xa eye enkonzweni ngeCawa. Noko ke, mangaphi alaziyo ukuba lithetha ukuthini kanye kanye eli gama? Eneneni, eli ligama lesiHebhere elithetha ukuthi “Dumisani uYa!” Liyindlela yokudumisa uMdali ngovuyo nangokupheleleyo, ogama lakhe linguYehova.a

Igama elithi “Haleluya” lixhaphakile eBhayibhileni. Kutheni kunjalo? Kungokuba zininzi kakhulu izizathu zokudumisa uThixo. UYa (uYehova) unguMdali noMxhasi wendalo iphela. (INdumiso 147:4, 5; 148:3-6) Wadala iimekobume ezenza ubomi bukwazi ukuqhubeka emhlabeni. (INdumiso 147:8, 9; 148:7-10) Yaye unomdla okhethekileyo kuluntu. Ukuba senza ukuthanda kwakhe, uyasisikelela aze asixhase kobu bomi yaye usinika ithemba eliqinisekileyo lobomi obuzayo obulunge ngakumbi. (INdumiso 148:11-14) NguYa (uYehova) owaphefumlela la mazwi: “Amalungisa aya kulidla ilifa ilizwe, ahlale kulo ngonaphakade.”—INdumiso 37:29.

Ngenxa yoko, kubongozwa wonke umntu kusithiwa: “Haleluya!” “Dumisani uYa, nina bantu!” (INdumiso 104:35; umbhalo osemazantsi weNW) Noko ke, okudanisayo kukuba asingabo bonke abantu abasabelayo. Namhlanje, abantu bayabandezeleka. Abaninzi bathwaxwa yindlala, bayagula okanye bacinezelekile. Uninzi lunyamezela intlungu engakumbi ngenxa yokusetyenziswa kakubi kweziyobisi okanye utywala okanye ngenxa yokuziphatha kwabo kakubi okanye imvukelo. Ngaba abantu abanjalo banaso isizathu sokumdumisa uThixo?

‘NguYehova Kuphela Owayenokundenza Ndibe Nethemba’

Ewe, banaso. UYehova umema wonk’ ubani ngaphandle kokukhetha ubuso ukuba aziqhelanise naye, afunde ukwenza ukuthanda kwakhe, aze anandiphe iintsikelelo ezenza abantu bafune ukumdumisa. Ibe abaninzi bayasabela. Ngokomzekelo, khawucinge ngoAdriana waseGuatemala. Xa uAdriana wayeneminyaka esixhenxe ubudala, unina wafa. Kamsinya emva koko uyise walishiya ikhaya. Xa wayeneminyaka elishumi, waqalisa ukusebenza ukuze aziphilise. Ekubeni unina wayemxelele ukuba akhonze uThixo necawa, uAdriana wazinxulumanisa namaqela awahlukahlukeneyo amaKatolika, kodwa wathi efika kwiminyaka eli-12 ubudala, waba sele ephelelwe ngumdla ibe wazinxulumanisa namaqela eendlavini zasesitratweni. Waqalisa ukutshaya, ukusebenzisa iziyobisi nokuba. Kwakutheni ukuze intwazana eselula kangako ifune ukudumisa uThixo?

Udade boAdriana waqalisa ukufundisisa iBhayibhile namaNgqina kaYehova, kodwa uAdriana wayemhleka. Emva koko umakazi wabo wafa. Emngcwabeni kamakazi wakhe, uAdriana waphazanyiswa yimibuzo engaphendulekiyo. Wayeye phi umakazi wakhe? Ngaba wayesezulwini? Ngaba wayeye kwisihogo esivuthayo? Wayedideke gqitha, ibe uAdriana waya kwindlu yokuthandaza esemangcwabeni ukuze athandazele ukufumana uncedo, esebenzisa igama likaThixo elithi Yehova, njengoko udadewabo wayemfundisile.

Kungekudala wayefundisisa iBhayibhile namaNgqina kaYehova yaye esiya ezintlanganisweni zawo zamaKristu. Oku kwamenza wabujonga ngendlela eyahluke ngokupheleleyo ubomi, ibe ngenkalipho waqhawula ulwalamano lwakhe namaqela eendlavini zasesitratweni. UAdriana, ngoku osele ephakathi kwiminyaka yama-20 ubudala, uthi: “Kukuthanda uYehova kuphela okwandenza ndayishiya indlela embi endandiphila ngayo. NguYehova nenceba yakhe ebalaseleyo kuphela owayenokundinika ithemba lobomi obungunaphakade.” UAdriana, phezu kwako nje ukubuqala kakubi ubomi, unezizathu ezihle zokudumisa uThixo.

Umzekelo wemeko enganiki themba nangakumbi ngovela eUkraine. Indoda ethile ihleli entolongweni ilindele ukuxhonywa. Ngaba iyazisizela? Ngaba idandathekile? Hayi, akunjalo. Ekubeni iye yadibana namaNgqina kaYehova kutshanje yaza yafumana ulwazi ngoYehova, iye yawacela ukuba atyelele unina. Ngoku iyawabhalela ekubeni ivile ukuba asiphumezile isicelo sayo. Ithi: “Enkosi ngokutyelela umama. Zezona ndaba zivuyisayo endiye ndazifumana kulo nyaka ophelileyo.”

Ithetha ngayo kunye nabo iye yanikela ubungqina kubo esiseleni, ibhala yenjenje: “Ngoku sinokholo kuThixo yaye sizama ukwenza ngokuvisisana nokholo lwethu.” Iqukumbela ileta yayo ngokuthi: “Sibamba ngazibini ngokusinceda sifunde oko uthando lukuko nokuze sibe nokholo. Ukuba ndiyaqhubeka ndiphila, nam ndiya kunincedisa. Enkosi Thixo ngobukho bakho nangokunceda abanye bathande uThixo baze bakholelwe kuye.” Le ndoda iye yenza isibheno ngesigwebo sayo sokufa. Kodwa enoba iyabulawa okanye ichitha iminyaka emininzi entolongweni, kucace mhlophe ukuba inesizathu sokudumisa uThixo.

‘Nangona Ndiyimfama, Ndiyabona’

Ngoku, khawucinge ngentwazana ekwishumi elivisayo engumqabaqaba eyathi ngequbuliso yaba yimfama. Oku kwenzeka kuGloria waseArgentina. UGloria waba yimfama ngequbuliso xa wayeneminyaka eli-19 ubudala, ibe akazange abone kwakhona. Xa wayeneminyaka engama-29 ubudala wahlalisana nendoda ethile ibe kungekudala wakhulelwa. Ngoku wayevakalelwa kukuba ubomi bakhe babunentsingiselo. Kodwa xa wafelwa ngumntwana wakhe, waqalisa ukubuza imibuzo. Wazibuza, ‘Kutheni oku kusenzeka kum nje? Ndenze ntoni? Ngaba uThixo ukho ngokwenene?’

Ngeli xesha, kwafika amaNgqina kaYehova amabini ekhayeni lakhe. Waqalisa ukufundisisa iBhayibhile waza wafunda ngesithembiso sayo sokuba kwihlabathi elitsha, iimfama ziya kubona kwakhona. (Isaya 35:5) Elinjani ukumangalisa ithemba uGloria awayenalo! Wayevuye gqitha, ngakumbi xa umyeni wakhe wavumayo ukubhalisa umtshato wabo ngokusemthethweni. Emva koko umyeni wakhe wahlelwa yingozi waza akakwazi kuzenzela nto, ehlala kwisitulo esinamavili sabagulayo. Namhlanje lo mfazi uyimfama kufuneka asebenze nzima ukuze aphile. Ngaphezu koko, wenza wonke umsebenzi wasendlwini, kuquka nokunyamekela iintswelo zobuqu zomyeni wakhe. Sekunjalo uGloria udumisa uYehova! Encedwa ngabazalwana noodade abangamaKristu, ufunda iBhayibhile yeBraille, ibe ukhuthazwa kakhulu ziintlanganiso zamaKristu kwiHolo yoBukumkani. Uthi: “Kunzima ukuchaza, kodwa nangona ndiyimfama, iba ngathi ndiyabona.”

Maxa wambi abantu bayatshutshiswa xa bedumisa uThixo. Umfazi othile waseCroatia wavuya akufunda ngoThixo, kodwa umyeni wakhe wayeluchasile olu nqulo lwakhe lutsha waza wamgxotha, ethabathela kuye intwazana yabo enonyaka ubudala. Esesitratweni, elahlwe ngumyeni nayintsapho, engenakhaya, engenamsebenzi okanye oku komntwana wakhe ke, ekuqaleni waziva edimazekile. Kodwa ukuthanda kwakhe uThixo kwamxhasa, nangona wayeyibona manqaphanqapha intombi yakhe de yakhula. Lo mfazi wayefumene “iperile . . . yexabiso eliphakamileyo” ibe wayengenakuphulukana nayo. (Mateyu 13:45, 46) Wahlala njani evuya ukutyhubela la maxesha anzima? Uthi: “Uvuyo sisiqhamo somoya kaThixo. Lunokuhlakulelwa kungakhathaliseki ukuba zinjani na iimeko ezikungqongileyo, kanye njengokuba izityalo zinokukhula kwindlu yezityalo enoba injani na imozulu ngaphandle.”

EFinland, uMarkus oneminyaka emithandathu ubudala waxilongwa waza wafunyaniswa enesifo sezihlunu esinganyangekiyo. Kungekudala wayehamba ngesitulo esinamavili sabagulayo. Kwiminyaka embalwa kamva, unina wamsa kumntu othile owayehamba icawa yamaPentekoste owayenendumasi ngenxa yokuzibanga enyanga abantu abagulayo. Kodwa akazange anyangeke. Ngoko uMarkus waphelelwa ngumdla kuThixo waza waqalisa izifundo zenzululwazi nezinye izinto zehlabathi. Kwandula ke kwiminyaka emalunga nemihlanu edluleyo, ibhinqa elithile elalihamba ngesitulo esinamavili sabagulayo latyelela ekhayeni likaMarkus lihamba nomnye umfana. La yayingamaNgqina kaYehova. Ngoku uMarkus wayengakholelwa kubukho bukaThixo, kodwa akazange akuchase ukuxubusha ngonqulo ibe wawangenisa ngaphakathi.

Kamva, esinye isibini esitshatileyo samtyelela, ibe kwaqaliswa isifundo seBhayibhile. Ekugqibeleni, amandla enyaniso yeBhayibhile ayiguqula indlela uMarkus awayezijonga ngayo izinto, ibe waphawula ukuba phezu kwaso nje isiphene anaso, ngokwenene wayenezizathu zokumdumisa uThixo. Wathi: “Ndivuya gqitha kuba ndiye ndayifumana inyaniso nentlangano esetyenziswa nguYehova. Ngoku ndiphila ubomi obunenjongo. Enye imvu elahlekileyo iye yafunyanwa ibe ayifuni kuwushiya umhlambi kaYehova!”—Thelekisa uMateyu 10:6.

Bonke ‘Mabadumise UYa’

La ngambalwa nje kumava amaninzi anokubaliswa ukuze kuboniswe ukuba abantu namhlanje, enoba zinjani na iimeko zabo, banokuba nesizathu sokudumisa uThixo. Umpostile uPawulos wakuchaza oku ngolu hlobo: “Uzinikelo lobuthixo luyingenelo kuzo zonke izinto, njengoko lunesithembiso sobomi ngoku nesobo buza kuza.” (1 Timoti 4:8) Ukuba senza ukuthanda kukaThixo, uya kuzalisekisa ‘isithembiso sobomi bangoku.’ Kakade ke, akayi kwenza amahlwempu abe zizityebi okanye abagulayo baphile kule nkqubo yezinto. Kodwa abo bamkhonzayo ubanika umoya wakhe ukuze bafumane uvuyo nokwaneliseka enoba injani na imeko ebangqongileyo. Ewe, ‘kwanakubomi bangoku,’ abagulayo, abacinezelekileyo nabangamahlwempu banokuba nesizathu sokudumisa uThixo.

Kodwa kuthekani ngobomi ‘obuza kuza’? Kaloku, kwaukucinga ngabo nje kufanele kusenze sidumise uThixo ngelona hlombe likhulu! Siyachwayita sakucinga ngexesha indlala engasayi kubakho ngalo; xa ‘engasayi kuthi ummi wakhona, Ndiyafa’; naxa uYehova uThixo ‘eya kuzisula zonke iinyembezi emehlweni abo, yaye ukufa kungasayi kubakho, kungasayi kubakho nakukhedama nasikhalo nantlungu kwakhona. Izinto zangaphambili zoba sezidlule.’ (Isaya 33:24; ISityhilelo 21:3, 4; INdumiso 72:16) Uzijonga njani ezi zithembiso zivela kuThixo?

Umfana othile wase-El Salvador wamkela iphecana leBhayibhile elalichaza ezinye zezi zinto. Ebhekisa kwiNgqina elalimnike elo phecana wathi, “Sisi, okuthethwa leli phecana kuyintsomi nje.” Baninzi abasabela ngolo hlobo. Kodwa, ezo zizithembiso zaLowo wadala indalo iphela, owayila imijikelo yemvelo yomhlaba wethu, nonceda kwanabangamahlwempu nabagulayo ukuba bafumane uvuyo. Sinokukukholelwa oko akutshoyo. Lo mfana uchazwe ngasentla wafundisisa iBhayibhile namaNgqina kaYehova waza wakufumanisa kuyinyaniso oku. Ukuba akukakwenzi oku, sikukhuthaza ukuba wenze okufanayo. Ngoko, ngamana ungakho xa le nkqubo ikhoyo yezinto iya kuba idlule, yaye indalo yonke ithelela ekumemeleleni isithi: “Haleluya!” “Dumisani uYa, nina bantu!”—INdumiso 112:1; 135:1, thelekisa iNW.

[Imibhalo esemazantsi]

[Umfanekiso okwiphepha 5]

Ngamana ungakho xa yonke indalo iya kuthelela ekumemeleleni isithi: “Haleluya!”