Xa Ubuhlungu Kakhulu Ude Uxolele Ukufa

UAdriana waseBrazil uthi: “Ndandingayeki ukuba buhlungu. Ngoko ndazixelela ukuba kubhetele ndife.”

NGABA wakha waziva ubuhlungu kangangokuba uxolele ukufa? Umele ukuba uyayiqonda indlela uAdriana awaziva ngayo. Wayehlala enexhala, ebuhlungu kakhulu ibe eziva ngathi ungungantweni. UAdriana wayenesigulo esimenza akhathazake ngalo lonke ixesha.

Cinga nangenye indoda yaseJapan, uKaoru, owayenceda abazali bakhe abalupheleyo nabagulayo. Uthi: “Ngamanye amaxesha, izinto zasemsebenzini zazindihlala emagxeni kuba wawumninzi kakhulu umsebenzi. Ndandiye ndingabi namdla wokutya ibe ndingalali nakakuhle. Ndandiye ndicinge ukuba kungabhetele xa ndinokufa.”

Enye indoda yaseNigeria, uOjebode, ithi, “Ndandihlala ndibuhlungu ngalo lonke ixesha ndide ndilile, ngoko ndakhangela iindlela endinokuzibulala ngazo.” Into evuyisayo kukuba uOjebode, uKaoru noAdriana abazange bazibulale. Kodwa qho ngonyaka, baninzi kakhulu abantu abazibulalayo.

UNGALUFUMANA PHI UNCEDO?

Abantu abaninzi abazibulalayo ngamadoda ibe loo nto ibangelwa kukuba baneentloni zokucela uncedo. UYesu wathi abantu abagulayo badinga ugqirha. (Luka 5:31) Ukuba nawe ukhe uzive ngendlela efanayo, cela uncedo. Abantu abaninzi abanesigulo esibenza bakhathazeke baye bancedwa ngoogqirha ukuze bakwazi ukuba bhetele. UOjebode, uKaoru noAdriana nabo bancedwa ngoogqirha ukuze bakwazi ukuba bhetele.

Umntu onesigulo esimenza akhathazeke, oogqirha banokumnika amayeza, bathethe naye okanye bazisebenzise zombini ezi zinto ukuze bamncede. Abantu abanesi sigulo bayidinga kakhulu intsapho kunye nabahlobo abaza kubakhathalela, babe nomonde kubo baze bayiqonde imeko yabo. Oyena mhlobo umntu anokuba naye nguYehova uThixo, onokumnceda ngeLizwi lakhe iBhayibhile.

NGABA IKHO INDLELA YOKUZIPHELISA TU IINTLUNGU?

Abantu abanesi sigulo sibenza bakhathazeke ixesha elide baphila ngamayeza ibe baye batshintshe nendlela abaphila ngayo. Ukuba nawe unesi sigulo, yiba nethemba njengoOjebode lokuba izinto ziza kutshintsha. Uthi: “Ndilindele ixesha laxa kusenzeka into ethethwa kuIsaya 33:24, le vesi ithi kuza kubakho ixesha xa apha emhlabeni kungasekho umntu uthi ‘Ndiyagula.’” Nawe, cinga ngesithembiso sikaThixo esithuthuzelayo esithi kuza kubakho ‘umhlaba omtsha’ apho kungasayi kuphinde kubekho ‘ntlungu.’ (ISityhilelo 21:1, 4) Esi sithembiso sikwathetha ukuba akusoze kuphinde kubekho mntu ucinga izinto ezibuhlungu okanye ukhathazeka ixesha elide. Iintlungu ozivayo ziza kuphela, ‘awuyi kuzikhumbula, zinganyuki zithi qatha entliziyweni.’—Isaya 65:17.

Iivesi ZeBhayibhile Ezinokukunceda

UThixo uyayazi intlungu yakho.

“Mna, Yehova uThixo wakho, ndibamba isandla sakho sasekunene, ndithi kuwe, ‘Musa ukoyika. Mna ngokwam ndiza kukunceda.’”—Isaya 41:13.

Akakho omnye umntu oyiqondayo intlungu yethu ngaphezu koYehova ibe ufuna ukusinceda.

Cinga ngezinto ezikwiLizwi LikaThixo.

“[UEliya] wacela ukuba umphefumlo wakhe ufe kwaye wathi: ‘ . . . Owu Yehova, wuthabathe umphefumlo wam.’”—1 Kumkani 19:4.

UOjebode uthi: “Ukucinga ngezinto ezikwiLizwi LikaThixo kwandinceda. Ndafumanisa ukuba noEliya wakha wabuhlungu njengam.”

Funda kubantu abaseBhayibhileni.

“Ndiye [uYesu] ndenza isikhungo ngenxa yakho [Petros] ukuze ungatyhafi elukholweni.”—Luka 22:32.

Emva kokuba umpostile uPetros eye wakhanyela uYesu kathathu, wakhathazeka kakhulu de walila kakhulu. UKaoru uthi: “Ukucinga ngento eyenziwa nguPetros nendlela uYesu awamphatha ngayo, kwandinceda ndabona ukuba uYehova noYesu babeyikhathalele intlungu kaPetros. Loo nto yandithuthuzela.”

Iintlungu ozivayo ‘awuyi kuzikhumbula, zinganyuki zithi qatha entliziyweni.’—Isaya 65:17.