Ibali Lobomi
Isikhanyiso Kwiintlanga Ezininzi
IBALI LIKAGEORGE YOUNG NGOKUBALISWA NGURUTH YOUNG NICHOLSON
“Kutheni ke kwathi cwaka kwiipulpiti zethu? . . . Siluhlobo olunjani lwamadoda ukuba siza kuthula emva kokungqina ubunyaniso bezi zinto ndibhale ngazo? Masingayeki abantu babe sebumnyameni, kunoko masivakalise inyaniso yaye singalalanisi okanye sikwenze ngokufihlakeleyo oko.”
LA MAZWI ayinxalenye yeleta kaTata enamaphepha angama-33 awayibhala ecela ukuba kucinywe igama lakhe kwiincwadi zecawa. Kwakungonyaka we-1913. Ukususela ngelo xesha, waqalisa ukuphila ngendlela engenakulibaleka eyamkhokelela ekubeni akhonze njengesikhanyiso kwiintlanga ezininzi. (Filipi 2:15) Kususela ndiseyintwazana encinane, ndaqokelela amabali ngamava kaTata endandiwafumana kwizalamane navela kwimbali, yaye abahlobo bandinceda ndadibanisa amabali angobomi bakhe. Ngeendlela ezininzi ubomi bukaTata bundikhumbuza ngobo bukampostile uPawulos. ‘Njengaloo mpostile weentlanga,’ uTata wayesoloko ekulungele ukuhamba ase isigidimi sikaYehova kubantu bamazwe ngamazwe neziqithi. (Roma 11:13; INdumiso 107:1-3) Mandikuxelele ngotata, uGeorge Young.
Iminyaka Yobutsha Bakhe
UTata wayengoyena nyana umncinane kaJohn noMargaret Young, amaRhabe aseSkotlani. Wazalwa ngoSeptemba 8, 1886, kungekudala emva koko intsapho yafuduka e-Edinburgh, eSkotlani, yaya kwiBritish Columbia kwintshona yeKhanada. Abakhuluwa bakhe abathathu—uAlexander, uJohn, noMalcolm—bazalelwa eSkotlani kwiminyaka embalwa ngaphambilana. UMarion, intombazana eyayiselekela la makhwenkwe nawayesithi nguNellie xa eyiteketisa, wayengemva ngeminyaka emibini kuTata.
Abantwana bakhulela kwifama yaseSaanich, kufuphi neVictoria, eBritish Columbia, yaye kwakumnandi kubo. Kwangaxeshanye, bafunda ukunyamekela iimbopheleleko. Ngoko xa abazali babo bevela eVictoria, babefika imisetyenzana yangaphandle igqityiwe nendlu icocekile.
Ekuhambeni kwexesha, uTata nabantakwabo baba nomdla ekusebenzeni emgodini nangamaplanga. Abafana bakwaYoung bazenzela udumo oluhle njengabantu ababehamba befuna imithi (amadoda awayehlola umhlaba ekwakunokuveliswa kuwo imithi) nababethenga baze bathengise imithi. UTata wayenyamekela imicimbi yemali.
Ekugqibeleni, ukutyekela kukaTata kwizinto zokomoya kwambangela ukuba agqibe kwelokuba abe ngumfundisi waseRhabe. Noko ke, malunga nelo xesha iintshumayelo ezazibhalwe kumaphephandaba zikaCharles Taze Russell, umongameli wokuqala weZion’s Watch Tower Tract Society, zabuchaphazela ngokunzulu ubomi bakhe. Oko kwafundwa nguTata kwamshukumisela ukuba abhale aze athumele ileta yokurhoxa ekhankanywe ekuqaleni.
UTata ngobubele kodwa ngokucacileyo wasebenzisa iindinyana zeBhayibhile ukuze angqine ukungabi yonyani kweemfundiso zecawa zokuba umphefumlo womntu awufi nokuba uThixo uya kuthuthumbisa imiphefumlo yabantu kwisihogo somlilo ngonaphakade. Wabhenca nemfundiso kaBathathu Emnye, engqina ukuba ayizange ivele kumaKristu yaye ayixhaswa ngokupheleleyo ziZibhalo. Ukususela ngoko waqalisa ubulungiseleli bamaKristu exelisa uYesu Kristu, ngokuzithoba esebenzisa ubuchule namandla awayenawo ukuze kuzukiswe uYehova.
Ngowe-1917, phantsi kolwalathiso lweWatch Tower Society, uTata waqalisa ukukhonza njengomhambi ngezonqulo, njengoko abameli abahambahambayo bamaNgqina kaYehova babebizwa njalo ngelo xesha. Kwizixeko needolophu ezikulo lonke elaseKhanada, wayenikela iintetho abonise nemifanekiso eshukumayo neyeslides eyayisaziwa ngokuba yi-“Photo-Drama of Creation.” Iiholo zemidlalo zazizala zime ngeembambo xa uTata etyelele. Ucwangciso lokutyelela kwakhe ngoxa wayehamba ngezonqulo lwalukhutshwa kwiMboniselo de kwaba ngowe-1921.
Iphephandaba laseWinnipeg lanikela ingxelo yokuba uMshumayeli uYoung uthethe kubantu abangama-2 500 nokuba abaninzi abakhange bakwazi ukungena ngenxa yokuba iholo ibixinene kakhulu. EOttawa, wathetha ngomxholo othi “Ukuya Esihogweni Nokubuya.” Apho, enye indoda esele ikhulile yanikela le ngxelo: “Ekupheleni kwaloo ntetho, uGeorge Young wamema iqela labefundisi ababehleli ndawonye ukuba lize eqongeni ukuze lixubushe naye, kodwa akukho namnye kubo owaphakamayo. Ngelo xesha ndaqonda ukuba ndiyifumene inyaniso.”
UTata wayezama ukugubungela imibandela yokomoya kangangoko kunokwenzeka xa etyelele ngezonqulo. Emva koko, wayeleqa uloliwe ukuze aye kwindawo elandelayo. Xa ehamba ngenqwelo-mafutha, ngokufuthi wayedla ngokuba sele ehambile ukuya kwisabelo sakhe esilandelayo ngexesha lesidlo sakusasa. Ukongezelela ekubeni nenzondelelo, uTata wayesaziwa ngokuba nolwazelelelo yaye wayesaziwa ngezenzo zobuKristu nobubele.
Phakathi kweendibano ezininzi zokuqala awaya kuzo, eyona ingalibalekiyo yayise-Edmonton, eAlberta, ngowe-1918. Intsapho yakowabo yonke yayilapho ukuze ibone uNellie xa ebhaptizwa. Yaye kwakhona yayisisihlandlo sokugqibela sokuba amakhwenkwe abe ndawonye. Kwiminyaka emibini kamva, uMalcolm wabulawa yinyumoniya. Njengabantakwabo abathathu noyise, uMalcom wayenethemba lokuphila ezulwini, yaye bonke bahlala bethembekile kuThixo de kwasekufeni kwabo.—Filipi 3:14.
Ukuya Kumasimi Asemzini
Emva kokuba uTata elugqibile uhambo lwakhe lokushumayela eKhanada ngoSeptemba 1921, wafumana ulwalathiso kuJoseph F. Rutherford, owayengumongameli weWatch Tower Society ngelo xesha, lokuba adlulele kwiziqithi zeCaribbean. Kuyo yonke indawo uTata awayebonisa kuyo i-“Photo-Drama of Creation,” yayithandwa. EseTrinidad, wabhala wathi: “Bekuzele ngolona hlobo yaye izihlwele ziye zajikiswa. Ngobusuku besibini eso sakhiwo sasizele ngabantu.”
Kwandula ke ngowe-1923, uTata wabelwa eBrazil. Apho wayethetha kwizihlwele zabantu, maxa wambi esebenzisa iitoliki eziqeshiweyo. IMboniselo [yesiNgesi] kaDisemba 15, 1923 yathi: “Ukususela ngoJuni 1 ukusa kuSeptemba 30 uMzalwan’ uYoung uye waqhuba iintlanganiso zesidlangalala ezingama-21, ebekukho kuzo abangama-3 600; iintlanganiso zeklasi ezingama-48, ebekuze abali-1 100 kuzo; wasasaza ngesisa imibhalo yoncwadi lwesiPhuthukezi engama-5 000 xa iyonke.” Abantu abaninzi babonisa umdla xa uTata wayenikela intetho ethi “Izigidi Eziphilayo Ngoku Azisayi Kuze Zife.”
Xa kwakunikezelwa izakhiwo ezitsha eBrazil ngoMatshi 8, 1997, incwadana yonikezelo yathi: “Ngowe-1923: UGeorge Young uyafika eBrazil. Ulungiselela ukuba kubekho iofisi yesebe kumbindi weRio de Janeiro.” Nangona uncwadi lweBhayibhile lwalufumaneka ngeSpanish, lwalufuneka nangesiPhuthukezi, ulwimi oluphambili eBrazil. Ngaloo ndlela, ngo-Oktobha 1, 1923, IMboniselo yaqalisa ukupapashwa ngesiPhuthukezi.
EBrazil uTata wadibana nabantu abangenakulibaleka. Omnye yayiyindoda yasePortugal eyayimi kakuhle egama linguJacintho Pimentel Cabral, eyanikela ngekhaya layo ukuba kuqhutyelwe kulo iintlanganiso. Kungekudala uJacintho wayamkela inyaniso yeBhayibhile waza kamva waba ngomnye wamalungu esebe. Omnye yayinguManuel da Silva Jordão, umlimi oselula wasePortugal. Weva intetho yesidlangalala eyayinikelwa nguTata neyamshukumisela ukuba abuyele ePortugal aye kukhonza njengecolporteur, njengoko abalungiseleli bexesha elizeleyo bamaNgqina kaYehova babebizwa njalo ngelo xesha.
UTata wahamba kakhulu ngololiwe kulo lonke elaseBrazil, yaye wakwazi ukufumana abantu abanomdla. Kolunye uhambo lwakhe wadibana noBony noCatarina Green, yaye wahlala nabo kangangeeveki ezimbini, ebacacisela ngeZibhalo. Malunga namalungu asixhenxe aloo ntsapho afuzisela uzahlulelo lwawo kuYehova ngokubhaptizwa emanzini.
Omnye umntu awadibana naye nguSarah Bellona Ferguson, ngowe-1923. Ngowe-1867, ngoxa wayeseyintwazana, yena kunye nomntakwabo uErasmus Fulton Smith nentsapho iphela, bafuduka eUnited States baya eBrazil. Ukususela ngowe-1899 wayefumana iphephancwadi iMboniselo rhoqo ngeposi. Ngotyelelo lukaTata kwafika ithuba lokubhaptizwa ekwakukudala lilindelwe nguSarah, abantwana bakhe abane, nomnye umntu uTata awayembiza ngokuthi nguMam’ uSallie. KwakungoMatshi 11, 1924.
Kungekudala, uTata wayeshumayela kwamanye amazwe akuMzantsi Merika. NgoNovemba 8, 1924, wabhala esePeru esithi: “Ndisandul’ ukusasaza amaphecana angama-17 000 eLima naseCallao.” Ngokulandelayo waya kusasaza amaphecana eBolivia. Ngokuphathelele olo tyelelo, wabhala: “UBawo wethu uyawusikelela umgudu. Ndincedwe ngumIndiya othile. Ikhaya lakhe lingakumlambokazi waseAmazon. Uthabathe amaphecana ali-1 000 neencwadi ezithile wahamba nazo.”
Ngemigudu kaTata, imbewu yenyaniso yeBhayibhile yasasazeka kumazwe amaninzi akuMbindi noMzantsi Merika. IMboniselo kaDisemba 1, 1924, yathi: “UGeorge Young ngoku ubekuMzantsi Merika kangangeminyaka emibini. . . . Bekulilungelo ngalo mzalwana uthandekayo ukuthwala isigidimi senyaniso asise ePunta Arenas, kwiStraits of Magellan.” UTata wakhokela nakumsebenzi wokushumayela kumazwe afana neCosta Rica, iPanama, neVenezuela. Waqhubeka nangona wasulelwa sisifo seengcongconi yaza impilo yakhe yachaphazeleka.
Emva Koko Uya EYurophu
NgoMatshi 1925, uTata wanduluka esiya eYurophu, apho wayenethemba lokusasaza amaphecana eBhayibhile angama-300 000 eSpeyin nasePortugal aze alungiselele uMzalwan’ uRutherford ukuba anikele iintetho zesidlangalala. Noko ke, emva kokuba efikile eSpeyin, uTata wavakalisa ukuba mathidala ukuba uMzalwan’ uRutherford anikele ezo ntetho ngenxa yemeko eyayikho apho yokunganyamezelani ngonqulo.
Ekuphenduleni, uMzalwan’ uRutherford wabhala, ecaphula uIsaya 51:16: “Ndiwabekile amazwi am emlonyeni wakho, yaye ndikugubungele ngesithunzi sesandla sam, ukuze ndityale amazulu, ndibeke isiseko somhlaba, ndize ndithi kwiZiyon, Ningabantu bam.” (King James Version) Akuva oko, uTata wafikelela kwesi sigqibo: “Ngokuqinisekileyo kukuthanda kweNkosi ukuba ndiqhubeke namalungiselelo ndize ndiyiyekele kuyo imiphumo yoku.”
NgoMeyi 10, 1925, uMzalwan’ uRutherford wanikela intetho yakhe etolikelwa eNovedades Theater eBarcelona. Kwakuze abantu abangaphezu kwama-2 000, kuquka igosa likarhulumente yaye kwakukho nomkhuseli okhethekileyo eqongeni. Kwenziwa inkqubo efanayo eMadrid, yaye apho kwakuze abali-1 200. Umdla owabakho ngenxa yezi ntetho wabangela ukuba kumiselwe iofisi yesebe eSpeyin, njengoko INcwadi Yonyaka YamaNgqina KaYehova Yowe-1978 isitsho “phantsi kokhokelo lukaGeorge Young.”
NgoMeyi 13, 1925, uMzalwan’ uRutherford wanikela intetho eLisbon, ePortugal. Nalapho utyelelo lwakhe lwaphumelela kakhulu, nangona abefundisi babezama ukuphazamisa intlanganiso bengxola yaye besaphula nezitulo. Emva kokuba uMzalwan’ uRutherford enikele iintetho eSpeyin nasePortugal, uTata waqhubeka ebonisa i-“Photo Drama,” yaye walungiselela ukuba kushicilelwe uncwadi lweBhayibhile luze lusasazwe kwezo ndawo. Ngowe-1927 wanikela ingxelo yokuba iindaba ezilungileyo “zivakaliswe kuzo zonke izixeko needolophu zaseSpeyin.”
Ukushumayela KwiSoviet Union
Isabelo esilandelayo sikaTata sobuvangeli basemazweni sasikwiSoviet Union, apho wafika ngoAgasti 28, 1928. Ileta awayibhalayo, yomhla kaOktobha 10, 1928, ithi ngokuyinxenye:
“Ekubeni ndifikile eRashiya, ndingathandaza ngokunyanisekileyo ndithi, ‘Mabufike ubukumkani bakho’ ngentliziyo enyanisekileyo. Ndifunda ukuthetha ulwimi lwalapha, kodwa akulula. Itoliki yam yindoda ekhetheke gqitha, ingumYuda, kodwa iyakholelwa kuKristu yaye iyayithanda iBhayibhile. Ndifumene amava abangel’ umdla kodwa andazi ukuba ndiya kuvunyelwa ukuhlala apha ithuba elingakanani na. Kwiveki ephelileyo ndiye ndayalelwa ukuba ndiphume ndiphele apha zingaphelanga iiyure ezingama-24 kodwa kuye kwalunga oko yaye ndinokuhlala ithuba elidana.”
Kwadityanwa nabanye aBafundi beBhayibhile eKharkov, ngoku esisixeko esikhulu eUkraine, yaye ukhuthazo olwaba lapho lwabangela iinyembezi zovuyo. Busuku ngabunye kwakuqhutywa indibano encinane de kube sezinzulwini zobusuku. Kamva, ebhala ngale ntlanganiso awayenayo kunye nabazalwana, uTata wathi: “Abazalwana, iincwadi zabo ezimbalwa zihluthiwe ngabasemagunyeni abangenabuhlobo, ukanti abazalwana bonwabile.”
Ubulungiseleli bukaTata kwiSoviet Union babalaseliswa kwincwadana ekhethekileyo eyanikwa abo babeze kunikezelo lwesakhiwo esitsha eSt. Petersburg, eRashiya, ngoJuni 21, 1997. Le ncwadana ithi uTata wathunyelwa eMoscow, yaye ithi wafumana imvume “yokuvelisa imibhalo engama-15 000 yencwadana ethi Freedom for the Peoples nethi Baphi Abafi? ukuze zisasazwe eRashiya.”
Ekubuyeni kwakhe eRashiya, uTata wafumana isabelo sokuba ngumhambi ngezonqulo eUnited States. KuMzantsi Dakota watyelela ekhayeni likaNellena noVerda Pool, umntu nodade wabo abathi kamva baba ngabavangeli basemazweni ePeru. Bavakalisa uxabiso ngokuqhubeka kukaTata nobulungiseleli engadinwa baza bathi: “Ngezo mini zamandulo abazalwana ngokuqinisekileyo babenomoya wobuvulindlela njengoko babesiya kumazwe asemzini benezinto ezimbalwa zeli hlabathi kodwa intliziyo yabo izele luthando ngoYehova. Nantso ke into eyabashukumisela ukuba bafeze oko bakufezayo.”
Ukutshata Notyelelo Lwesibini
Ukutyhubela iminyaka uTata wayebhalelana noClara Hubbert waseManitoulin Island, eOntario. Bobabini babeye kwindibano eyayiseColumbus, eOhio, ngoJulayi 26, 1931, xa aBafundi beBhayibhile bamkela igama elithi amaNgqina kaYehova. (Isaya 43:10-12) Emva kweveki batshata. Kungekudala emva koko, uTata wahamba kwakhona, uhambo lwakhe lobuvangeli basemazweni kwiziqithi zeCaribbean. Yaye apho wanceda ukulungiselela iintlanganiso nasekuqeqesheni abanye kubulungiseleli bendlu ngendlu.
UMama wayefumana iifoto, amakhadi neeleta ezivela eSuriname, eSt. Kitts, nakwezinye iindawo ezininzi. Ezi leta zazichaza ngenkqubela yomsebenzi wokushumayela yaye maxa wambi zaziquka inkcazelo ethile ngeentaka, izilwanyana nezityalo zelo lizwe wayekulo. NgoJuni 1932, uTata wasigqiba isabelo sakhe kwiCaribbean yaye njengesiqhelo ekhwele kwindawo engasemva enqanaweni, wabuyela eKhanada. Emva koko, yena kunye noMama baba nesabelo kumsebenzi wokushumayela ixesha elizeleyo, bechitha ubusika bowe-1932/33 kummandla waseOttawa bekunye neqela elikhulu labanye abalungiseleli bexesha elizeleyo.
Ingxelo Emfutshane Ngobomi Bentsapho
Ngowe-1934 kwazalwa uDavid, umntakwethu. Esengumntwana, wayesima kwibhokisi kaMama yokufaka umnqwazi aze aqhelisele ukunikela “iintetho” zakhe. Ubomi bakhe bonke, uye wabonisa inzondelelo ngoYehova njengoyise. Bobathathu babehamba ngenqwelo-mafutha, kubotshelelwe isandisi-lizwi eluphahleni lwayo, njengoko babetyelela amabandla ukusuka kunxweme olukwimpuma yeKhanada ukuya kunxweme olukwintshona. Ndazalwa ngowe-1938 ngoxa uTata wayekhonza kwiBritish Columbia. UDavid usakhumbula xa uTata wandibeka phezu kwebhedi waza uTata, uMama noDavid baguqa ecaleni kwayo, uTata wathandaza ebulela ngokuzalwa kwam.
Ngobusika bowe-1939, sasihlala eVancouver ngoxa uTata wayetyelela amabandla kuloo mmandla. Phakathi kweeleta ezininzi esiye saziqokelela ukutyhubela iminyaka kukho ebhalwe ngoJanuwari 14, 1939, awayibhala ngoxa wayeseVernon, kwiBritish Columbia. UTata wayeyibhalela uClara, uDavid noRuth, esithi: “Ingathi ndinganincamisa ndize ndinange nje kancinane.” Kuloo leta kwakukho umyalezo oza kuye ngamnye wethu. Wayethetha ngobukhulu besivuno nokuba mbalwa kwabasebenzi.—Mateyu 9:37, 38.
Kwiveki emva kokuba ebuyele eVancouver evela kwisabelo sakhe, uTata wawa entlanganisweni. Emva kokuba exilongiwe kwafunyaniswa ukuba wayenomhlaza ebuchotsheni. NgoMeyi 1, 1939, waligqiba ikhondo lakhe lasemhlabeni. Ndandineenyanga ezisithoba ndizelwe, yaye uDavid wayemalunga neminyaka emihlanu ubudala. Umama wethu esimthandayo, naye owayenethemba lokuphila ezulwini, wahlala ethembekile kuThixo de kwasekufeni kwakhe ngoJuni 19, 1963.
Indlela awayevakalelwa ngayo uTata ngelungelo lakhe lokusa iindaba ezilungileyo kumazwe amaninzi ichazwe kakuhle kwenye yeeleta zakhe awayezibhalela uMama. Wathi ngokuyinxenye: “UYehova ngenceba uye wandivumela ukuba ndiye kula mazwe njengesikhanyiso sokuthwala isigidimi soBukumkani. Igama lakhe elingcwele malidunyiswe. Abantu abangenamandla nabangenabuchule nababuthathaka, mabalwenze luqaqambe uzuko lwakhe.”
Ngoku abantwana, abazukulwana nabantwana babazukulwana bakaGeorge noClara Young nabo bakhonza uThixo wethu onothando, uYehova. Ndiye ndaxelelwa ukuba uTata wayethanda ukucaphula amaHebhere 6:10, athi; “UThixo akanantswela-bulungisa ukuba angawulibala umsebenzi wenu nothando enalubonisayo ngegama lakhe.” Nathi asiwulibalanga umsebenzi kaTata.
[Umfanekiso okwiphepha 23]
UTata, ngasekunene, nabantakwabo abathathu
[Imifanekiso ekwiphepha 25]
UTata (umile) noMzalwan’ uWoodworth, uRutherford noMacmillan
Ngezantsi: UTata (ngasekhohlo) ekwiqela elalinoMzalwan’ uRussell
[Imifanekiso ekwiphepha 26]
UTata noMama
Ngasezantsi: Umhla womtshato wabo
[Umfanekiso okwiphepha 27]
Ndikunye noDavid noMama kwiminyaka ethile emva kokufa kukaTata