Ungaqalisa Ukumkhonza UThixo Enoba Umdala Kangakanani
Omnye umama waseMálaga, kumazantsi eSpeyin, kunye nentombi yakhe, ababizwa ngokuba ngooAna bobabini, babhaptizwa ngoDisemba 19, 2009. Babephakathi kwabantu abamalunga nama-2 352 ababhaptizwa eSpeyin ngowama-2009. Kodwa kukho into ebangel’ umdla ngalo mama nale ntombi yakhe—yiminyaka yabo. Umama wayeneminyaka eli-107 ubudala yona intombi yayineminyaka engama-83 ubudala!
Yintoni eyabangela ukuba bafuzisele uzahlulelo lwabo kuYehova ngobhaptizo? Ekuqaleni kweminyaka yee-1970, intombi yalo mama yayidla ngokumenywa ngummelwane wayo ukuba iye kwiSifundo Sencwadi Sebandla esasiqhutyelwa kwikhaya lelinye iNgqina. UAna wayedla ngokuya ngamathub’ athile. Noko ke, ngenxa yomsebenzi wakhe wempangelo akazange enze nkqubela.
Malunga neminyaka elishumi kamva, abanye babantwana baka-Ana baqalisa ukufunda iBhayibhile baza baba ngabakhonzi bakaYehova. Omnye wabo, uMari Carmen wavuselela umdla kanina ngenyaniso yeBhayibhile waza wamnceda ukuba aqhutyelwe isifundo seBhayibhile. Emva koko, noAna uninakhulu kaCarmen waqalisa ukubonakalisa umdla eBhayibhileni. Ekugqibeleni, kwabhaptizwa amalungu alishumi ale ntsapho.
Ngosuku lokubhaptizwa kwabo, bobabini ooAna, unina nentombi yakhe, babezele yimincili. UAna oneminyaka eli-107 ubudala wathi: “UYehova undenzele inceba ngokundinika ithuba lokuba ndifunde ngaye.” Intombi yakhe yongezelela yathi: “Ngaphambi kokuba iParadesi ifike, ndifuna ukukhonza uYehova, ndenze ukuthanda kwakhe, ndishumayele iindaba ezilungileyo kangangoko kusemandleni.”
Enye into evuyisa aba bahlolokazi babini, kukuya kwiintlanganiso. Omnye wabadala bebandla abakulo uthi: “Akukho nenye intlanganiso ebaphosayo. Basoloko bekulungele ukugqabaza kwiSifundo SeMboniselo.”
Umzekelo wabo wokuthembeka usikhumbuza ngomhlolokazi ogama linguAna ‘owayengaphoswa kukuba setempileni, enikela inkonzo engcwele ubusuku nemini ngokuzila ukutya nezikhungo.’ Ngenxa yoko, waba nelungelo lokubona uYesu eselusana. (Luka 2:36-38) UAna wayeneminyaka engama-84 ubudala, kodwa akazange acinge ukuba akanakukwazi ukukhonza uYehova kuba emdala kakhulu yaye banjalo naba kuthethwa ngabo apha.
Ngaba unezalamane ezinomdla wokuphulaphula isigidimi seBhayibhile? Okanye ngaba kukho umntu owalupheleyo okhe wadibana naye kumsebenzi wendlu ngendlu noye waba nomdla wokukuphulaphula? Loo mntu usenokufana naba Ana kuthethwa ngabo apha, kuba nabani na angaqalisa ukukhonza uThixo oyinyaniso onguYehova, enoba mdala kangakanani.
[Amagama acatshulweyo akwiphepha 25]
“UYehova undenzele inceba”
[Amagama acatshulweyo akwiphepha 25]
“Ngaphambi kokuba iParadesi ifike, ndifuna ukukhonza uYehova”