Ukugcina Iimfihlelo Egameni LeNkosi
UHLASELO lwegesi eyityhefu kwindlela kaloliwe engaphantsi komhlaba eTokyo, eJapan, ngoMatshi 1995, lwabulala abantu abali-12, abanye abaliwaka balala ngandletyana nye, lwaza lwanceda ukutyhila imfihlelo ethile. Ihlelo lonqulo elaziwa ngokuba yiAum Shinrikyo (Inyaniso Eyongamileyo) ngokufihlakeleyo laliqokelele igesi esetyenziswa emfazweni (sarin gas) ukuze liyisebenzise ekufikeleleni usukelo lwalo oluyimfihlelo.
Ukuqhushumba kwebhombu kwinyanga elandelayo kwasidlakaza isakhiwo sikarhulumente kwisiXeko saseOklahoma, eUnited States, kwaza kwasuba ubomi babantu abali-167. Ubungqina babonakala bubonisa ukuba olo hlaselo ngandlel’ ithile lwalunxibelelene nokuchasa kukarhulumente ihlelo lonqulo lwamaBranch Davidian eWaco, eTexas, kanye kwiminyaka emibini ngaphambili. Ngelo xesha kwafa amalungu elo hlelo amalunga nama-80. Kwakhona ukuqhushumba kwaloo bhombu kwatyhila into eyayingaziwa ngabantu abaninzi: Kukho inyambalala yamaqela abanqolobi ngoku kwelaseUnited States, ubuncinane amanye awo arhanelwa ukuba aceba ngokufihlakeleyo ukuvukela urhulumente. Kamva, njengoko owe-1995 wawusiya ngasekupheleni, kwafunyanwa izidumbu ezitshisiweyo zabantu abali-16 kummandla okumahlathi aseGrenoble, eFransi. Babengamalungu eOrder of the Solar Temple, ihlelo lonqulo elincinane elaba ngundaba-mlonyeni eSwitzerland naseKhanada ngo-Oktobha 1994 xa amalungu alo angama-53 azibulala okanye abulawa. Kodwa kwanasemva kweli shwangusha, eli hlelo laqhubeka lisebenza. Ukuza kuthi ga namhlanje iintshukumisa kunye nosukelo lwalo ziseyindaba yakwamkhozi.
Iingozi Zokugcina Iimfihlelo Kunqulo
Ngenxa yezi zihlo, ngaba kuyasimangalisa ukuba abantu abaninzi bewagxelesha ngeliso elibukhali amahlelo onqulo? Ngokuqinisekileyo akakho umntu ofuna ukuxhasa umbutho ofihlakeleyo—enoba ngowonqulo okanye akunjalo—osebenzisa kakubi isibakala sokuba ethembele kuwo nomenza asukele izinto angavumelaniyo nazo. Noko ke, yintoni enokwenziwa ngabantu ukuze kuphetshwe ukungena kumgibe wemibutho efihlakeleyo ethandabuzekayo?
Ngokuqinisekileyo, nabani na ocinga ngokuba lilungu kumbutho ofihlakeleyo uya kuba uyatyapha ukuqiniseka ngeenjongo zawo zokwenene. Umele akuphephe ukunyanzelwa ngabahlobo okanye abo abaqhelileyo, yaye izigqibo azifanele zisekelwe kwiimvakalelo kodwa zifanele zisekelwe kwizibakala. Khumbula ukuba ngokunokwenzeka iba nguloo mntu—kungekhona abanye—oya kujamelana nemiphumo enokubakho.
Ukulandela imigaqo yeBhayibhile kuyeyona ndlela iqinisekileyo yokuwachasa amaqela anobungozi aneentshukumisa ezingentle. (Isaya 30:21) Oku kubandakanya ukuhlala ungundilele kwezobupolitika, ukubonakalisa uthando kwabanye, kwanakwiintshaba, ukuphepha “imisebenzi yenyama,” nokuhlakulela iziqhamo zomoya kaThixo. Ngaphezu kwako konke, amaKristu okwenyaniso awafanele abe yinxalenye yehlabathi, njengokuba uYesu wayengeyiyo, ibe oko kuquka ukuba nenxaxheba kwimibutho yehlabathi efihlakeleyo.—Galati 5:19-23; Yohane 17:14, 16; 18:36; Roma 12:17-21; Yakobi 4:4.
AmaNgqina kaYehova angabafundi abanyanisekileyo beBhayibhile abalugqala njengento enzulu unqulo lwabo, ibe engafihli nto azama ukuphila ngendlela efanelekileyo. Ehlabathini lonke, aziwa ngokuba liqela lonqulo ‘elifuna uxolo lize lilusukele.’ (1 Petros 3:11) Ngokufanelekileyo incwadi yawo ethi AmaNgqina KaYehova—Abavakalisi BoBukumkani BukaThixo ithi: “AmaNgqina kaYehova awayontlangano efihlakeleyo konke konke. Iinkolelo zawo ezisekelwe eBhayibhileni zicaciswa ngokupheleleyo kwiimpapasho zawo ezifumaneka nakubani na. Ukongezelela, enza umgudu okhethekileyo wokumema bonke abantu ukuba babekho kwiintlanganiso ukuze bazibonele baze bazivele okuqhubekayo.”
Unqulo lokwenyaniso alufihli nto tu kwaphela. Abanquli boThixo wokwenyaniso baye bayalelwa ukuba bangazifihli okanye bagubungele injongo yabo njengamaNgqina kaYehova. Abafundi bokuqala bakaYesu bayityhutyha iYerusalem ngemfundiso yabo. Iinkolelo kunye nomsebenzi wabo babewenza elubala. Kunjalo kanye ngamaNgqina kaYehova namhlanje. Ngesizathu esiqondakalayo, xa oorhulumente boozwilakhe ngokuphosakeleyo bebeka imiqathango kwinkululeko yonqulo, amaKristu amele aqhubeke nomsebenzi wawo ngobulumko nangenkalipho, ethobela “uThixo njengomphathi kunabantu,” nto leyo abanyanzeleka ukuba bayenze ngenxa yokunikela kwabo ubungqina ngenkalipho.—IZenzo 5:27-29; 8:1; 12:1-14; Mateyu 10:16, 26, 27.
Ukuba yayikhe yathi qatha engqondweni yakho into yokuba amaNgqina kaYehova alihlelo elifihlakeleyo, oko kusenokuba kwakubangelwa kukuba ungawazi kakuhle. Kusenokuba kwakunjalo ngabantu abaninzi ngenkulungwane yokuqala.
IZenzo isahluko 28 zisixelela ngentlanganiso eyayiqhutywa eRoma eyayiphakathi kompostile uPawulos ‘namadoda aziintloko amaYuda.’ Athi kuye: “Sicinga ukuba kufanelekile ukuva kuwe oko zikuko iingcamango zakho, kuba ngokwenyaniso ngokubhekisele kweli hlelo kuyazeka kuthi ukuba kuyo yonk’ indawo kuthethwa ngokunxamye nalo.” (IZenzo 28:16-22) Ephendula, uPawulos “wabacacisela lo mbandela ngokunikela ubungqina obucokisekileyo ngokuphathelele ubukumkani bukaThixo” ibe ‘bambi baqalisa ukukholwa.’ (IZenzo 28:23, 24) Ngokuqinisekileyo kwakuya kuhlala kuyingenelo kubo ukuzazi kakuhle izibakala ngokuphathelele ubuKristu bokwenyaniso.
Nangona ezinikele kwinkonzo eselubala nesesidlangalaleni kaThixo, amaNgqina kaYehova aya kukuvuyela ukutyhila izibakala ezicacileyo zomsebenzi neenkolelo zawo kuye nabani na onomdla wokuzazi. Kutheni ungaziphandeli ngokwakho, uze ngaloo ndlela ulwazi kakuhle unqulo lwawo?
[Umfanekiso okwiphepha 6]
AmaNgqina KaYehova ayakuvuyela ukuzityhila ukuba angoobani kunye noko akwenzayo