Ngubani Owabhala IBhayibhile?
“IBHAYIBHILE iyonke iyaphikisana. Ngaphandle koko, inengcamango yabantu. Ngoko ke, omnye umntu unokuyamkela njani iBhayibhile njengokhokelo oluthembekileyo ebomini?” lawo ngamazwi athethwa ngabantu abayithandabuzayo.
Ngaba uyavumelana neembono zabo bayithandabuzayo ezibonisa ukuba iBhayibhile iyincwadi nje evakalisa ingcinga yabantu engafezekanga? Bambi abefundisi bayavumelana noko. Umfi uKarl Barth owayengumfundisi ongumProtestanti waseSwitzerland, kwincwadi yakhe ethi Kirchliche Dogmatik (Iimfundiso Ezisisiseko Zecawa) wabhala wathi: “Abaprofeti nabapostile babezenza iimpazamo ekuthetheni nasekubhaleni.” Enyanisweni, umahluko ekusetyenzisweni kwamagama usenokufunyanwa xa kubaliswa isiganeko ngababhali beBhayibhile abahlukeneyo. Yaye kunokufunyaniswa ukuba iingxelo ezithile, xa zigwengulwa, zibonakala zahluke ngokupheleleyo kwiingxelo ezifumaneka kwenye indawo eBhayibhileni. Kodwa ngaba ezi zizinto eziphikisana ngokwenene? Ngaba iBhayibhile yinto nje eyilwe ngabantu? Kanye kanye, ngubani owabhala iBhayibhile?
Impendulo ecacileyo ithi: “Abantu abangcwele bakaThixo bathetha [ngokusuka kuThixo, NW].” Kodwa bayazi njani into ababemele bayithethe nebabemele bayibhale? Indoda emazwi ayo asandul’ ukucatshulwa, umpostile uSimon Petros, uhlabela mgama ecacisa ukuba bathetha “beqhutywa nguMoya oyiNgcwele.”—2 Petros 1:21.
Enyanisweni, amaxesha ngamaxesha iBhayibhile igxininisa ukuba “ililizwi likaThixo.” Kwiindinyana ezili-176 zeNdumiso 119 le ngongoma kuthethwe ngayo yodwa kangangezihlandlo ezili-176! Okuyenza ibaluleke le ngongoma kukuba ngokuqhelekileyo ababhali banomdla ekuyenzeni yaziwe into yokuba bona babhale incwadi ethile. Kodwa abantu ababhala iBhayibhile abazange babenjalo. Yonke indumiso yayiza kuya kuThixo. Yayiyincwadi yakhe, ingeyiyo eyabo.—1 Tesalonika 2:13; 2 Samuweli 23:2.
“Beqhutywa NguMoya OyiNgcwele”—Njani?
Aba bantu ‘babeqhutywa njani nguMoya oyiNgcwele’? Incwadi eyabhalelwa umKristu wenkulungwane yokuqala, uTimoti isinika impendulo: “Sonke isibhalo, siphefumlelwe nguThixo.” Ibinzana elithi, “siphefumlelwe nguThixo” liyinguqulelo yegama leBhayibhile lantlandlolo kumbhalo wesiGrike elithi the·oʹpneu·stos, ngokoqobo elithetha ukuba “uThixo waphefumlela.” UThixo wasebenzisa amandla akhe angabonakaliyo—umoya wakhe oyingcwele—“ukuphefumlela” iingcinga zakhe ezingqondweni zababhali. Ngaloo ndlela, uYehova uThixo unguMthombo noMyili weBhayibhile. Ngeengcinga zakhe wagunyazisa ukubhalwa kwayo kanye njengokuba usomashishini esebenzisa unobhala ekubhaleni iileta zakhe.—2 Timoti 3:16.
Kwakhona, le ngcamango ebonisa ukuba “uThixo waphefumlela kubo” ifana nqwa nebinzana leBhayibhile elithi, ‘babeqhutywa nguMoya oyiNgcwele.’ Ifana njani? ‘Ukuqhuba’ ligama elisetyenziswa kwisiGrike ukubhekisela kwiinqanawa eziqhutywa kwindlela ethile ngumoya. (Thelekisa IZenzo 27:15, 17.) Ngaloo ndlela, njengoko umoya uvuthuza uze uqhube inqanawa, ngokunjalo nababhali beBhayibhile bacinga, bathetha baza babhala bephenjelelwa nguThixo, beqhutywa ngumoya wakhe oyingcwele njengoko “waphefumlela” kubo.
Abantu UThixo Awabasebenzisayo Ekubhaleni
Sineenkcukacha ezimbalwa zembali ngobomi bababhali beBhayibhile. Bengazijongi konke konke njengababaluleke kakhulu, babesoloko bezabalazela ukuzukisa uThixo ngokungazibalaselisi. Phofu ke, siyazi ukuba, kubo kwakukho kwanamagosa aseburhulumenteni, abagwebi, abaprofeti, ookumkani, abalusi, abalimi nabalobi beentlanzi—abantu abanokuba ngama-40 bebonke. Ngaloo ndlela, iBhayibhile nangona isisigidimi esivela kuThixo, ibangel’ umdla, ixubile yaye inomtsalane kubuchule bomntu.
Ababhali beBhayibhile abaninzi babengazani. Babephila kwiinkulungwane ezahlukeneyo yaye babahluke gqitha ngesimo sengqondo namava nangemvelaphi engokwentlalo nengokwemfundo. Kanti, enoba babeselula okanye bekhulile, imibhalo yabo ibonisa ukumanyana okupheleleyo. Kwithuba elingaphezu kweminyaka enokuba li-1 600, bayibhala le ncwadi yade ekugqibeleni yagqitywa. Emva kokuyihlolisisa ngenyameko, uya kuphawula ukuba iingxelo zeBhayibhile zibonakalisa ukuvisisana ngendlela ephawulekayo. Ngaloo ndlela iBhayibhile ivakalisa iingcinga zoMbhali omnye, nangona kwasetyenziswa ababhali abaninzi.
Ngaba oku akumele kusiqhubele ukuba ‘siyinyamekele ngokugqithisileyo’ le ncwadi ibalaseleyo, iyiBhayibhile? Ngaba asimele sifikelele kwisigqibo esinjengesikaPetros, owabhala wathi: “Kanjalo sinalo nelona lizwi liqinisekileyo elilelobuprofeti, enityaphayo ukulinyamekela, linjengesibane esikhanyisa endaweni emnyama”?—Hebhere 2:1; 2 Petros 1:19.
Kodwa ngoku, kuthekani ngento yokuba kusithiwa iBhayibhile iyaziphikisa? Ngaba injalo? Uphendula njani?
Box on page 4]
“Enjani yona incwadi ukuzuka! Into esuka indimangalise ngaphezu koko ikuquletheyo yindlela eyichaza ngayo imicimbi, apho igama liphantse libe yinto engokwemvelo enjengomthi, njengentyatyambo, njengolwandle, njengeenkwenkwezi nanjengomntu ngokwakhe. Iyahluma, iyaqukuqela, iyakhazimla, iyagigitheka, akukho waziyo ukuba oko kwenzeka njani na, akukho waziyo ukuba siyintoni na isizathu soko, ubani ufumanisa yonk’ into ingumsebenzi wemvelo ngokupheleleyo. Ngenene iliLizwi likaThixo, ngokwahlukileyo kwezinye iincwadi ezingqina kuphela ubulumko babantu.”—Amagqabaza angeBhayibhile kaHeinrich Heine oyimbongi engumJamani yenkulungwane ye-19 nokwayintatheli.
[Umfanekiso okwiphepha 4]
Njengoko umoya uqhuba iinqanawa ezisemanzini, ababhali beBhayibhile ‘babeqhutywa nguMoya oyiNgcwele kaThixo’