Abavakalisi BoBukumkani Bayabalisa

Ukukhululeka Kwimpembelelo Yeedemon

UQHELISELO lokusebenzelana nemimoya kudala lulawula ubomi bezigidi zabantu. Kodwa ubani unokukhululeka kulo! Oku koko kwenzeka kwabaninzi kwisixeko samandulo sase-Efese. Ngokutsho kwengxelo yeBhayibhile, “abaninzi kwabo babeqhelisela ubugcisa bomlingo bazizisa ndawonye iincwadi zabo ukuze bazitshise . . . Ngaloo ndlela ilizwi likaYehova lahlala likhula yaye lisoyisa ngendlela enamandla.”—IZenzo 19:19, 20.

Ibandla lobuKristu namhlanje ngokufanayo linolwando. Njengokuba kwakunjalo e-Efese, phakathi kwabo baba ngamakholwa kukho ababeqhelisela ubudemon. La mava alandelayo avela eZimbabwe angumzekelo woku.

UGogo (Umakhulu) Mthupha wayesaziwa nguwonke wonke ngamandla akhe okusebenzelana nemimoya. Abantu babevela kwiindawo ezikude njengaseZambia, eBotswana naseMzantsi Afrika ukuze abanyange ngamayeza akhe esintu. UGogo Mthupha wayekwafundisa nabanye ukuba zii-n’anga, okanye amagqirha. Yaye ngamanye amaxesha wayenokuqalekisa abanye ngemilingo!

Ngenye intsasa yangeCawa uGogo Mthupha watyelelwa ngamaNgqina kaYehova awayenesabelo kubulungiseleli bendlu ngendlu. Wayinandipha ngokucokisekileyo ingxoxo kunye nawo eyayingedinga leBhayibhile lehlabathi elitsha elinobulungisa, ihlabathi elingenazo kwaphela iimpembelelo ezingendawo. Wamkela incwadi ethi Unokuphila Ngonaphakade KwiParadisi Esemhlabeni ibe wasamkela isifundo sekhaya seBhayibhile.a Ngemva kwezifundo nje ezithathu kuphela, waqalisa ukuya ezintlanganisweni.

Kwisifundo sakhe seBhayibhile, uGogo Mthupha wafunda ukuba amandla akhe akhethekileyo avela kwizidalwa zomoya ezingendawo ezavukela ulongamo lukaYehova. (2 Petros 2:4; Yude 6) Kwakhona wafunda ukuba ezi demon zizimisele ukwenza nabani na ezinokumfumana ukuba achase uYehova nonqulo olunyulu. Ekubeni isonka sakhe wayesifumana ngokungxengxeza kwezi zidalwa zomoya zingendawo, yintoni awayeza kuyenza?

UGogo Mthupha wavakalisa umnqweno wokufuna ukwahlukana namakhubalo akhe neempahla zakhe zobugqi. Oku kwakuquka iqhiya yakhe ekhethekileyo “nophondo lwenkunzi yenkomo oluthethayo,” awayelusebenzisa ekunyangeni kwakhe kobugqirha. UGogo Mthupha wayefuna ukwahlukana nazo zonke izinto ezinjalo ukuze akhonze okuphela koThixo oyinyaniso nophilayo, uYehova.

Noko ke, ezinye zezalamane zakhe zazingavumelani naye kuba wayezixhasa ngemali. Zamcela ukuba adlulisele ezo zinto kuzo, kunye namandla akhe angaqhelekanga, khona ukuze ziqhubeke zifumana inzuzo. UGogo Mthupha akazange avume.

Ngoncedo lwebandla lasekuhlaleni lamaNgqina kaYehova, waqokelela iingxowa ezintathu zezixhobo zemimoya ibe wazitshisa zonke. Njengoko izixhobo zakhe zonqulo lweedemon zazingamadangatye omlilo, uGogo Mthupha wathi: “Khangela! olwa phondo alukwazi ukuzikhusela.”

Ekuhambeni kwexesha, uGogo Mthupha ngovuyo wabonakalisa uzahlulelo lwakhe kuYehova ngokubhaptizwa emanzini. Uziphilisa njani ngoku? Ngokuthengisa imifuno. Ewe, ngamandla eLizwi likaThixo, ubani unokukhululeka kunqulo lweedemon. UGogo Mthupha uthi: “Andizange ndizive ndikhululeke ngolu hlobo.”

[Imibhalo esemazantsi]