Usijonga Njani Isono?

“WENA akunasono, akunantlungu; ungumthombo wamandla onke.” La mazwi athethwa sisithandi sobulumko esaziwayo samaHindu uVivekananda xa sasicacisa indinyana ethile kwincwadi engcwele yamaHindu, iBhagavad Gita. Ecaphula iVedanta, lo mfo wathi: “Eyona mpazamo yakha yankulu kukuthi ubuthathaka, ungumoni.”a

Phofu ke, ngaba liyinyaniso elokuba umntu akanasono? Ibe yintoni umntu awayizuza njengelifa ekuzalweni, ukuba ikho kwaukubakho? Kuphela “ziimpawu zobuntu ezilawulwa yimfuza,” watsho uNikhilananda, inkcuba-buchopho yamaHindu. Ezinye iimpawu zilawulwa ‘zizinto ezazisenziwa ngumntu lowo kubomi awayebuphila ngaphambili.’ Ngokutsho kokaVivekananda, “ikamva lakho lixhomekeke kuwe.” UbuHindu abufundisi nto kwaphela ngesono esizuzwe njengelifa.

Kwanakubalandeli bakaZoroaster, kumaShinto, kubuConfucius nakumaBhuda ayikho kwaphela ingcamango yesono esizuzwe njengelifa. Kanti neenkonzo zamaYuda nezamaKristu, ngokwesithethe ezakha zafundisa imfundiso yesono esizuzwe njengelifa, isimo sengqondo sazo ngesono siyaguquka. Inkungu nelanga yabantu namhlanje ayicingi nokucinga ngento yokuba inesono.

“Ukhanyo lwezi mini alukukhuthazi ukugxeka; ubukhulu becala, alukukhuthazi ukuzigxeka,” satsho isazi ngezakwalizwi uCornelius Plantinga, Omnci. Neecawa zeNgqobhoko zibekek’ ityala ngokusiyayaza isono. “Ukuba ufuna ukuva ngesono sukuya ecaweni,” watsho njalo umfundisi weDuke University. Yaye ngokutsho kokaPlantinga, ngokuqhelekileyo ezinye iicawa zithetha ngesono kuphela xa kufikelelwa kwimibandela edla umzi.

Kuyavunywa ukuba, namhlanje iingxaki ezidla umzi zingangoboya benja. Ugonyamelo, ulwaphulo-mthetho, iimfazwe, ungquzulwano lobuhlanga, ukusetyenziswa kakubi kweziyobisi, ukunganyaniseki, ingcinezelo nogonyamelo nxamnye nabantwana luyagqugqisa. Enyanisweni, le nkulungwane yama-20 iye yabizwa ngokuba yenye yeenkulungwane ekuye kwaphalazwa izantyalantyala zegazi kwezakha zabonwa luluntu. Koku sinokongezelela intlungu nokubandezeleka okubangelwa kukugula, ukwaluphala nokufa. Ngubani ongakulangazeleliyo ukukhululeka kwiingxaki ezinkulu kangaka ezigqugqisayo ehlabathini namhlanje?

Ngoko ke, iyintoni imbono yakho ngesono? Ngaba isono sazuzwa njengelifa? Ngaba siya kuze sikhululeke kwintlungu nokubandezeleka? Inqaku elilandelayo liza kuxubusha ngale mibuzo.

[Imibhalo esemazantsi]