Kutheni Umele Ubuxele Ububi?
BAMBI eMpuma Afrika bathi, “Lowo uzisa umcimbi ekuhleni uzenza utshaba lwabantu.” Oku koko kwenzeka kuOlu xa wabek’ ityala umkhuluwa wakhe ngokwenza umbulo nodadewabo. “Ulimenemene!” watsho umnakwabo. Yaye ngomsindo wabetha uOlu, waza wamgxotha ekhaya, watshisa zonke iimpahla zikaOlu. Abahlali bale dolophana bamxhasa umnakwabo. Engasathandwa kule dolophana, uOlu kwanyanzeleka ukuba ahambe. Kuphela kuxa kwabonwa ukuba intombazana ikhulelwe apho abantu baqonda ukuba uOlu wayenyanisile. Umnakwabo wacela uxolo, yaye uOlu wabuya wathandwa. Izinto ngezazimbi ngokwenene. UOlu ngewayebulewe.
Kuyacaca ukuba, abo bangenaluthando ngoYehova abathandi xa iimpazamo zabo zisiziswa ekuhleni. Utyekelo lomntu onesono kukusixhathisa isiluleko aze amcaphukele lowo usinikelayo. (Thelekisa uYohane 7:7.) Akumangalisi ukuba abaninzi bethula njengamatye xa kufuneka bebhence okubi kwabo banegunya phezu kwabo lokubalungisa.
Ukuxabisa Ukubaluleka Kwesohlwayo
Noko ke, phakathi kwabantu bakaYehova, kukho isimo sengqondo esahlukileyo ngokuphathelele ukohlwaywa. Amadoda nabafazi ahlonel’ uThixo balixabisa ngokwenene ilungiselelo alenzileyo uYehova lokunceda abo bonayo ngaphakathi ebandleni lobuKristu. Uqeqesho balugqala njengendlela yokubonisa ububele.—Hebhere 12:6-11.
Oku kusenokucaciswa ngesiganeko esenzeka ebomini boKumkani uDavide. Nangona wayeyindoda elilungisa kwasebutsheni bakhe, kwafika ixesha apho wagaxeleka kwisono esinzulu. Okokuqala, wakrexeza. Emva koko, ezama ukufihla ububi bakhe, walungiselela ukuba kubulawe indoda yaloo mfazi. Kodwa uYehova wasibhenca kuNatan umprofeti isono sikaDavide, owaba nenkalipho waza wambuza uDavide ngalo mbandela. Esebenzisa umzekeliso ocacileyo, uNatan wabuza uDavide ngoko kumelwe kwenziwe kwindoda eyayineegusha ezininzi kodwa yaya kuthabatha yaza yaxhela itakane ekuphela kwalo, isilwanyana esixatyisiweyo sendoda elihlwempu ukuze yonwabise izihlobo zayo. UDavide, owayengumalusi, wacaphuka waza wanomsindo. Wathi: “Ngumfo wokufa loo ndoda yenze le nto.” UNatan wasebenzisa loo mzekeliso kuDavide, esithi: “Loo ndoda nguwe.”—2 Samuweli 12:1-7.
UDavide akazange abe nomsindo kuNatan; engazange azame nokuzikhusela engazange abe neenkani. Kunoko, ukohlwaywa kwakhe nguNatan kwasishukumisa isazela sakhe. UDavide enentliziyo ebuhlungu wathi: “Ndonile kuYehova.”—2 Samuweli 12:13.
Ukusityhila kukaNatan isono sikaDavide, kulandelwa kukohlwaywa ngokobuthixo, kwaba nemiphumo emihle. Nangona uDavide engazange akhuselwe kwimiphumo yobubi bakhe, waguquka waza waxolelaniswa noYehova. UDavide wavakalelwa njani sisohlwayo esinjalo? Wabhala: “Malindibethe ilungisa linenceba, lindohlwaye; ioli enjalo yentloko ayingeyali intloko yam.”—INdumiso 141:5.
Kwanakulo mhla wethu, abakhonzi bakaYehova basenokubandakanyeka kwisenzo sobubi esinzulu, kwanabo bebethembeke kangangeminyaka emininzi. Iqonda ukuba abadala banokubanceda, inkoliso yabo ithabatha inyathelo lokuqala ngokuya kubo ukuze icele uncedo. (Yakobi 5:13-16) Kodwa maxa wambi umenzi-bubi usenokuzama ukusifihla isono sakhe, njengokuba wenjenjalo uKumkani uDavide. Simele senze ntoni ukuba sazi ngobubi obunzulu obenziweyo ebandleni?
Yimbopheleleko Kabani?
Xa abadala bevile ngesenzo sobubi esinzulu, baye bathethe nalowo ubandakanyekileyo ukuze banikele uncedo olufunekayo baze bamlungise. Yimbopheleleko yabadala ukugweba abanjalo ebandleni lamaKristu. Bekuphaphele ukunikela ingqalelo kwimeko yokomoya, banceda baze baluleke nabani na othabatha indlela engeyoyabulumko okanye ephosakeleyo.—1 Korinte 5:12, 13; 2 Timoti 4:2; 1 Petros 5:1, 2.
Kodwa kuthekani ukuba akungomdala kuze kwenzeke wazi ngesenzo sobubi esinzulu esenziweyo ngomnye umKristu? Ukhokelo lufumaneka kuMthetho uYehova awawunikela kuhlanga lwakwaSirayeli. UMthetho wawusithi ukuba umntu ubone izenzo zomwexuki, ukuqhwaywa kwemvukelo ukubulala okanye naluphi na ulwaphulo-mthetho yayiyimbopheleleko yakhe ukuxela oko akwaziyo. ILevitikus 5:1 ithi: “Ke ubani xa athe wona ngokuthi, elivile izwi lesifungo sokuzishwabulela, elingqina ke, nokuba ubonile nokuba uyazi angaxeli: wobuthwala ubugwenxa bakhe.”—Thelekisa iDuteronomi 13:6-8; Estere 6:2; IMizekeliso 29:24.
Nangona engasekho phantsi koMthetho kaMoses, amaKristu namhlanje anokukhokelwa yimigaqo efumaneka kuwo. (INdumiso 19:7, 8) Ngoko ukuba uva ngesenzo sobubi esinzulu somKristu, yintoni omele uyenze?
Ukusingatha Umbandela
Okokuqala, kubalulekile ukuba kubekho isizathu esiqinisekileyo sokukholelwa ukuba ngokwenene kwenziwe isenzo sobubi esinzulu. Indoda esisilumko yathi: “Musa ukuba lingqina ngommelwane wakho ngaphandle kwesizathu; ungasuka uthomalalise na nangomlomo wakho?”—IMizekeliso 24:28.
Usenokugqiba kwelokuba uye ngqo kubadala. Akuphosakalanga oko. Noko ke, ngokuqhelekileyo, olona phawu lothando kukuya kumntu obandakanyekileyo. Mhlawumbi izinto azikho ngendlela ezibonakala ngayo. Okanye mhlawumbi imeko sele isezandleni zabadala. Ngokuzolileyo wuxubushe lo mbandela naloo mntu. Ukuba zikho izizathu zokukholelwa ukuba ububi obunzulu benziwe, mkhuthaze ukuba afune uncedo kubadala, uze umcacisele nobulumko bokwenza oko. Musa ukuthetha nabanye ngalo mbandela, kuba oko kuya kuba kukuhleba.
Ukuba loo mntu akayi kubadala emva kwexesha elithile elisengqiqweni, ngoko umele uye. Emva koko umdala okanye abadala ababini baya kuwuxubusha loo mbandela nomntu lowo ubekwa ityala. Abadala kufuneka ‘baphengulule, bagocagoce, babuzisise baze bacokise’ ukuze babone enoba ububi benziwe ngokwenene. Ukuba benziwe, baya kulisingatha elo tyala ngokhokelo lweZibhalo.—Duteronomi 13:12-14.
Ubuncinane kufuneka amangqina amabini ukuze amisele isimangalo sokwenziwa kobubi. (Yohane 8:17; Hebhere 10:28) Ukuba loo mntu uyasikhanyela isityholo yaye nguwe kuphela onobungqina, umcimbi uya kushiyelwa kuYehova. (1 Timoti 5:19, 24, 25) Oku kwenziwa ngenxa yokwazi ukuba “zonke izinto zibhenceke ekuhleni” kuYehova yaye ukuba umntu unetyala, ekugqibeleni izono zakhe ziya ‘kumfumana.’—Hebhere 4:13; Numeri 32:23.
Kodwa masithi loo mntu uyasikhanyela eso sityholo yaye nguwe kuphela onikela ubungqina ngaso. Ngaba ubuya kubekwa ityala ngokuba ngumhlebi? Akunjalo, ngaphandle kokuba uye wahleba kwabo bangabandakanyekanga kuloo mcimbi. Asikokuhleba ukuchaza izinto ezichaphazela ibandla kwabo banegunya nembopheleleko yokuvelela baze balungise imicimbi. Eneneni, ivisisana nomnqweno wethu wokusoloko sisenza okulungileyo nokuhlala sinyanisekile.—Thelekisa uLuka 1:74, 75.
Ukugcina Ibandla Lingcwele
Esinye isizathu sokuxela isenzo sobubi sikukuba kugcina ibandla licocekile. UYehova unguThixo ococekileyo, uThixo ongcwele. Ufuna bonke abo bamnqulayo bacoceke ngokomoya nangokuziphatha. ILizwi lakhe eliphefumlelweyo liyasiluleka: “Njengabantwana abathobekileyo, yekani ukumilisa ngokweminqweno enaninayo ngaphambili ekungazini kwenu, kodwa, ngokuvumelana naLowo uNgcwele wanibizayo, kanjalo yibani ngcwele nani kuyo yonke ihambo yenu, ngenxa yokuba kubhaliwe kwathiwa: ‘Nimele nibe ngcwele, ngenxa yokuba mna ndingcwele.’” (1 Petros 1:14-16) Abathile abenza ukungcola okanye isenzo sobubi banokuzisa ugculelo nokungakholiseki kuYehova kulo lonke ibandla ngaphandle kokuba kuthatyathwa amanyathelo okubalungisa okanye okubasusa.—Thelekisa uYoshuwa, isahluko 7.
Iileta zikampostile uPawulos ezazisiya kwibandla lamaKristu laseKorinte zibonisa indlela ukuxela ukwenziwa kwesenzo sobubi okwasebenza ngayo ekucoceni abantu bakaThixo apho. Kwileta yakhe yokuqala, uPawulos wabhala: “Okunene kukho ingxelo engohenyuzo oluphakathi kwenu, yaye uhenyuzo olunjalo olungekho naphakathi kweentlanga, olokuba umntu othile abe nomfazi kayise.”—1 Korinte 5:1.
IBhayibhile ayisixeleli ukuba umpostile wayifumana phi le ngxelo. Kusenokwenzeka ukuba uPawulos wakuva oko kuStefano, kuFortunato nakuAkhayiko, ababehambe ukusuka eKorinte besiya e-Efese apho uPawulos wayehlala khona. Kwakhona uPawulos wayefumene ileta eyayinemibuzo ngoku kwibandla lamaKristu laseKorinte. Enoba yayisuka kuwuphi na umthombo, emva kokuba imeko ichazwe kuPawulos ngamangqina athembekileyo, wakwazi ukunikela ulwalathiso kulo mbandela. Wabhala: “Mshenxiseni umntu ongendawo phakathi kwenu.” Loo mntu wagxothwa ebandleni.—1 Korinte 5:13; 16:17, 18.
Ngaba isiluleko sikaPawulos sabangela imiphumo emihle? Ngokwenene sayibangela! Kuyabonakala ukuba umenzi-bubi wabuyela ezingqondweni. Kwileta yakhe yesibini eya kwabaseKorinte, uPawulos walibongoza ibandla ukuba ‘lifanele liyixolele ngobubele lize liyithuthuzele’ le ndoda iguqukayo. (2 Korinte 2:6-8) Ngaloo ndlela ukuxela isenzo sobubi kwakhokelela ekucoceni ibandla nasekubuyiseleni inkoliseko kaThixo kumntu obelonakalisile ulwalamano lwakhe noThixo.
Sifumana omnye umzekelo kwileta yokuqala kaPawulos eya kwibandla lamaKristu eKorinte. Ngeli xesha lo mpostile uyawachaza amagama ala mangqina awuxelayo lo mbandela. Wabhala: “Kuye kwatyhilwa kum ngani, bazalwana bam, ngabo bendlu kaKlowe, ukuba kukho iingxwabangxwaba phakathi kwenu.” (1 Korinte 1:11) UPawulos wayesazi ukuba oku kungavisisani kuquka nokunikela imbeko egqithiseleyo kubantu, kwabangela isimo sengqondo sokuba namahlelo awayesongela ukutshabalalisa ubunye bebandla. Ngenxa yoko, exhalabe gqitha ngempilontle yokomoya yabo wayekhonza kunye nabo, uPawulos ngokukhawuleza wabhala isiluleko esasifuneka ebandleni.
Namhlanje, uninzi lwabazalwana noodade emabandleni emhlabeni wonke lusebenza nzima ukuze lugcine ibandla licocekile ngokuba ngamnye ahlale enokuma okuhle phambi koThixo. Abanye baye babandezeleke xa besenza oko; bambi bade bafa ngenxa yokugcina ingqibelelo. Ngokwenene ukusithethelela nokusifihla isenzo sobubi kuya kubonisa ukungayixabisi le migudu.
Uncedo Kwabo Banxaxhayo
Kutheni abanye abaye babandakanyeka esonweni esinzulu bengafuni ukuya kubadala bebandla? Ngokufuthi kungenxa yokuba abaziqondi iingenelo zokuya kubadala. Bambi bengazi bakholelwa kwelokuba ukuba bayavuma, isono sabo siya kubhencwa kulo lonke ibandla. Abanye bayazikhohlisa ngobunzulu bobubi ababenzileyo. Sekunjalo bambi bacinga ukuba basenokuguqula ukucinga kwabo ngaphandle koncedo lwabadala.
Kodwa abenzi bobubi abanjalo bafuna ukuncedwa ngothando oluvela kubadala bebandla. UYakobi wabhala: “Ngaba kukho nabani na ogulayo phakathi kwenu? Makabizele kuye amadoda amakhulu ebandla, yaye wona makamthandazele, amthambise ngeoli egameni likaYehova. Yaye umthandazo wokholo uya kumenza aphile lowo ungaphilanga, ibe uYehova uya kumvusa. Kanjalo, ukuba uye wenza izono, uya kuxolelwa.”—Yakobi 5:14, 15.
Elinjani ukuba lihle ilungiselelo lokunceda abo bonayo ukuba babuyele kwimeko efanelekileyo ngokomoya! Ngokusebenzisa isiluleko esithuthuzelayo esisuka eLizwini likaThixo nangokubathandazela, abadala basenokunceda abo bagulayo ngokomoya ukuba babuye ezindleleni zabo ezinxaxhileyo. Ngaloo ndlela, kunokuziva begwetyiwe, abo baguqukayo ngokufuthi baziva behlaziyekile yaye bekhululekile xa bedibana nabadala abanothando. Indoda eselula yaseMpuma Afrika yahenyuza yaza yasifihla isono sayo kangangeenyanga ezithile. Emva kokuba isono sayo sibhenciwe, yathi kubadala: “Hayi indlela endandikunqwenela ngayo ukuba abadala bandibuze ngento eqhubekayo phakathi kwam nala ntombazana! Kusisiqabu ukukutyhila ekuhleni oku.”—Thelekisa INdumiso 32:3-5.
Isenzo Sothando Olunomgaqo
Abakhonzi bakaThixo ababhaptiziweyo ‘baye badlula ekufeni baya ebomini.’ (1 Yohane 3:14) Kodwa ukuba benza isono esinzulu, babuyela endleleni yokufa. Ukuba abancedwa, basenokunamathela ekwenzeni okubi, bengafuni nokuguquka baze babuyele kunqulo loThixo oyinyaniso.—Hebhere 10:26-29.
Ukuxela isenzo sobubi kubonisa inkxalabo yokwenene ngomenzi-bubi. UYakobi wabhala: “Bazalwana bam, ukuba nabani na phakathi kwenu ulahlekisiwe enyanisweni aze omnye ambuyise, yazini ukuba lowo ubuyisa umoni kwimposiso yendlela yakhe uya kuwusindisa umphefumlo wakhe ekufeni yaye uya kugubungela inkitha yezono.”—Yakobi 5:19, 20.
Ngoko, kutheni umele ukuxele oko kubi? Kungenxa yokuba kuba nemiphumo emihle. Ngokwenene, ukuxela oko kubi sisenzo sothando olunomgaqo lobuKristu olubonakaliswa kuThixo, ebandleni, nakumenzi-bubi. Njengokuba lungu ngalinye lebandla ngokunyaniseka liphakamisa iindlela zikaThixo zobulungisa, uYehova uya kulisikelela ibandla liphela. Umpostile uPawulos wabhala: ‘Uya [uYehova] kuniqinisa kuse esiphelweni, ukuze ningabi nakumangaleleka ngemini yeNkosi yethu uYesu Kristu.’—1 Korinte 1:8.
[Umfanekiso okwiphepha 26]
Kuluphawu lothando ukukhuthaza iNgqina elonileyo ukuba lithethe nabadala
[Umfanekiso okwiphepha 28]
Abadala bayanceda ekubuyiseleni abo bonileyo kuThixo