Imibuzo Evela Kubafundi
Ekubeni uYehova ekulungele ukuxolela izono ngelungiselelo ledini lentlawulelo, kutheni kuyimfuneko ngamaKristu ukuba avume izono zawo kubadala bebandla?
Njengoko kunokubonwa kwimeko kaDavide noBhatshebha, uYehova wasixolela isono sikaDavide, nangona sasinzulu, kuba uDavide waguquka ngokunyanisekileyo. Xa umprofeti uNatan wathetha naye, uDavide wasivuma ngokuphandle isono sakhe wathi: “Ndonile kuYehova.”—2 Samuweli 12:13.
Noko ke, uYehova akaneli nje ukuva umoni evuma izono aze amxolele kodwa wenza nelungiselelo lothando lokuba lowo wenza okuphosakeleyo ancedwe enze inkqubela aze aphile ngokomoya. Kwimeko kaDavide, uncedo lwaza ngomprofeti uNatan. Namhlanje, ebandleni lamaKristu, kukho amadoda amakhulu aqolileyo ngokomoya, okanye abadala. Umfundi uYakobi wathi: “Ngaba kukho nabani na ogulayo [ngokomoya] phakathi kwenu? Makabizele kuye amadoda amakhulu ebandla, aze wona amthandazele, amthambise ngeoli egameni likaYehova. Yaye umthandazo wokholo uya kumphilisa lowo ungaphilanga, uYehova amvuse. Kanjalo, ukuba uye wenza izono, uya kuxolelwa.”—Yakobi 5:14, 15.
Abadala abanobuchule banokwenza lukhulu ukuze baphelise intlungu esentliziyweni yomenzi wobubi oziva enetyala. Xa beqhubana naye bazama ukuxelisa uYehova. Abaze bafune ukuba ngqongqo, nangona kusenokufuneka isohlwayo esiqatha. Kunoko, ngovelwano bajonga iimfuno ezingxamisekileyo zaloo mntu. Ngomoya wobulali bazama ukuguqula isimo sengqondo salowo wenze isiphoso besebenzisa iLizwi likaThixo. (Galati 6:1) Nokuba umntu akasixeli ngokwakhe isono sakhe, unokuguquka xa abadala bethetha naye, njengoko uDavide wenzayo xa uNatan waya kuthetha naye. Inkxaso enikelwa ngabadala inceda lowo unxaxhayo aphephe ingozi yokuphinda enze isono nemiphumo yokuqhelisela eso sono ade angakwazi ukwahlukana naso.—Hebhere 10:26-31.
Ngokuqinisekileyo akulula ukuvuma kwabanye izenzo umntu aneentloni ngazo aze acele ukuba zixolelwe. Kufuna inkalipho. Noko ke, khawucinge ngale meko yahlukileyo. Enye indoda engazange isixele isono sayo esinzulu kubadala ebandleni yathi: “Intliziyo yam yaba buhlungu kakhulu yaye loo ntlungu yayingapheli. Ndazibhokoxa ngakumbi kumsebenzi wokushumayela, kodwa loo mvakalelo igulisayo yathi gqolo.” Le ndoda yayivakalelwa kukuba ukusivuma isono kuThixo ngomthandazo kwakwanele, kodwa ngokuqinisekileyo kwakungenjalo, kuba yavakalelwa ngendlela efanayo naleyo uKumkani uDavide wavakalelwa ngayo. (INdumiso 51:8, 11) Hayi indlela ekulunge ngakumbi ngayo ukwamkela uncedo uYehova alunikela ngabadala!