Ukulizukisa Ngokunyaniseka ILizwi LikaThixo Eliphefumlelweyo

“Siye sazilahla izinto ezinyebeleziswayo ezibangela iintloni, singahambi ngobuqhokolo, singalingxengi nelizwi likaThixo.”—2 KORINTE 4:2.

1. (a) Yintoni eye yafuneka ukuze kuphunyenzwe umsebenzi owamiselwa kuMateyu 24:14 nesahluko 28:19, 20? (b) IBhayibhile yayifumaneka ukusa kuwuphi umlinganiselo ngeelwimi zabantu ekuqaliseni kwemihla yokugqibela?

KWISIPROFETO sakhe esibalaseleyo esiphathelele ixesha lobukho bakhe njengokumkani nelokuqosheliswa kwenkqubo endala yezinto, uYesu Kristu waxela kwangaphambili esithi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.” Kwakhona wayalela abalandeli bakhe esithi: “Nenze abafundi abantu beentlanga zonke, . . . nibafundisa ukuba bagcine zonke izinto endiye ndaniyalela zona.” (Mateyu 24:14; 28:19, 20) Ukuzalisekiswa kwezo ziprofeto kubandakanya umsebenzi omkhulu wokuguqulela nokushicilela iBhayibhile, owokufundisa abantu oko ikuthethayo nowokubanceda bakusebenzise ebomini babo. Elinjani ilungelo ekulilo ukuba nesabelo kuloo msebenzi! Ngowe-1914 iBhayibhile okanye iinxalenye zayo zazisele zipapashwe ngeelwimi ezingama-570. Kodwa ukususela ngoko kuye kongezelelwa iilwimi ezingamakhulu neziyelelane ezininzi, ibe kwiilwimi ezininzi kuye kwafumaneka iinguqulelo ezingaphezu kwenye.a

2. Ziziphi iintshukumisa ezahlukeneyo eziye zaphembelela umsebenzi wabaguquleli nabapapashi beBhayibhile?

² Kulucelomngeni kuye nawuphi na umguquleli ukuthabatha umbandela obhalwe ngolwimi oluthile awenze uqondwe ngabo bafunda nabaphulaphula olunye ulwimi. Abanye abaguquleli beBhayibhile baye bawenza umsebenzi wabo beqonda ukuba oko babekuguqulela kwakuliLizwi likaThixo. Abanye baye babangelw’ umdla nje lucelomngeni lophengululo olubangelwa nguloo msebenzi. Basenokuba baye bakujonga oko kuqulethwe yiBhayibhile njengelifa elixabisekileyo lenkcubeko. Kwabanye, unqulo lishishini labo, yaye ukushicilela incwadi ebhalwe igama labo njengabaguquleli okanye abapapashi kuyinxalenye yendlela yokuziphilisa. Ngokucacileyo iintshukumisa zabo ziphembelela indlela abawenza ngayo umsebenzi wabo.

3. INew World Bible Translation Committee iye yawujonga njani umsebenzi wayo?

³ Phawula la mazwi alandelayo awathethwa yiNew World Bible Translation Committee: “Ukuguqulela iZibhalo Ezingcwele kuthetha ukudlulisela iingcamango namazwi kaYehova uThixo ngolunye ulwimi . . . Leyo yingcamango esengqiqweni gqitha. Abaguquleli bale ncwadi, abamoyikayo nabamthandayo uThixo onguMbhali weZibhalo Ezingcwele, bavakalelwa kukuba banembopheleleko ekhethekileyo Kuye yokudlulisela iingcamango zakhe noko akuvakalisayo ngendlela echane kangangoko kunokwenzeka. Kwakhona bavakalelwa kukuba banembopheleleko kubafundi abaphandayo abaxhomekeke kwinguqulelo yeLizwi eliphefumlelweyo loThixo Osenyangweni ukuze bafumane usindiso olungunaphakade. Yiloo mvakalelo yokuba nembopheleleko enkulu eye yenza ukuba ukutyhubela iminyaka emininzi le komiti yamadoda azinikeleyo ivelise iNew World Translation of the Holy Scriptures.” Usukelo lwale komiti yayikukuguqulela iBhayibhile eyayiza kucaca yaye iqondakale neyayiza kunamathela ngokusondeleyo kwisiHebhere nesiGrike santlandlolo kangangokuba iyile isiseko sokwanda okuqhubekayo kolwazi oluchanileyo.

Kuye Kwenzeka Ntoni Kwigama LikaThixo?

4. Libaluleke kangakanani igama likaThixo eBhayibhileni?

⁴ Enye yezona njongo ziphambili zeBhayibhile kukunceda abantu bazi uThixo wokwenyaniso. (Eksodus 20:2-7; 34:1-7; Isaya 52:6) UYesu Kristu wafundisa abalandeli bakhe ukuba bathandazele ukuba igama likaYise “lingcwaliswe,” okanye liphathwe njengelingcwele. (Mateyu 6:9) UThixo wabangela ukuba igama lakhe liqukwe eBhayibhileni kangangezihlandlo ezingaphezu kwama-7000. Ufuna abantu balazi elo gama kunye neempawu zoMninilo.—Malaki 1:11.

5. Abaguquleli abahlukeneyo baye balibhala njani igama likaThixo?

⁵ Abaguquleli abaninzi beBhayibhile baye babonisa intlonelo enzulu ngegama likaThixo baza balisebenzisa ngokunyaniseka kwiinguqulelo zabo. Abanye abaguquleli bakhetha ukusebenzisa igama elithi Yahweh. Abanye baye bakhetha indlela yokubhala igama likaThixo esetyenziswa kulwimi lwabo logama nje icaca ukuba iyelele kwelo lisetyenziswa kumbhalo wesiHebhere, ekusenokwenzeka ukuba yindlela eqhelekileyo ngenxa yokuba kukudala isetyenziswa. INew World Translation of the Holy Scriptures isebenzisa igama elithi Yehova kangangezihlandlo ezingama-7210 kumbhalo wayo.

6. (a) Kwiminyaka yakutshanje, yintoni eye yenziwa ngabaguquleli ngokuphathelele igama likaThixo? (b) Luye lwanda kangakanani olu qheliselo?

⁶ Kwiminyaka yakutshanje, nangona abaguquleli beBhayibhile bewalondoloza amagama ezithixo zabahedeni ezinjengoBhahali noMoleki, kuya kusiba yinto eqhelekileyo ukushenxiswa kwegama likaThixo wokwenyaniso kwiinguqulelo zeLizwi lakhe eliphefumlelweyo. (Eksodus 3:15; Yeremiya 32:35) Kwiindinyana ezinjengoMateyu 6:9 noYohane 17:6, 26, inguqulelo esasazwe kakhulu yesiAlbania iguqulela ibinzana lesiGrike elithi “igama lakho” (oko kukuthi, igama likaThixo) ngokuthi “wena,” ngokungathi ezo ndinyana azilikhankanyi igama lakhe. KwiNdumiso 83:18, iThe New English Bible neToday’s English Version ziyalikhupha igama likaThixo zize zisuse nayiphi na imbekiselo ebonisa ukuba uThixo unalo igama. Nangona igama likaThixo lalivela kwiinguqulelo zakudala zeZibhalo zesiHebhere kwiilwimi ezininzi, iinguqulelo zakutshanje ngokufuthi ziyalikhupha okanye zilibhale kwiimbekiselo eziseludinini. Oku kuye kwenziwa kwiinguqulelo zesiNgesi, nakwiilwimi ezininzi zaseYurophu, eAfrika, eMzantsi Merika, eIndiya nezeziqithi zePasifiki.

7. (a) Abaguquleli bezinye iiBhayibhile zeelwimi zaseAfrika baye baliguqulela njani igama likaThixo? (b) Uvakalelwa njani wena ngaloo nto?

⁷ Abaguquleli beBhayibhile bezinye iilwimi zaseAfrika baya bethabath’ unyawo kule nto. Kunokufaka isibizo esingokweZibhalo, esinjengoThixo okanye uNkosi endaweni yegama likaThixo, bafaka amagama athatyathwe kwiinkolelo zonqulo zasekuhlaleni. KwiThestamente eliSha namaHubo ngesiZulu (uhlelo lowe-1986), endaweni yesibizo esithi Thixo (uNkulunkulu) ngamanye amaxesha kwakusetyenziswa igama elithi (uMvelinqangi), gama elo amaZulu akholelwa ukuba libhekisela ‘kwisinyanya sakudala esasinqulwa ngookhokho bawo.’ Inqaku elithile lephephancwadi iThe Bible Translator, likaOktobha 1992, lanikela ingxelo yokuba xa bekulungiselelwa iBhayibhile yesiChichewa eza kubizwa ngokuba yiBuku Loyera, abaguquleli bebesebenzisa igama elithi Chauta njengegama eliza kuthabathel’ indawo elithi Yehova. Eli nqaku lachaza lisithi uChauta “nguThixo ekukudala bemazi yaye bemnqula.” Ukanti, uninzi lwaba bantu lunqula oko lukholelwa kukuba yimimoya yabafi. Ngaba kuyinyaniso ukuba ukuba abantu benza izicelo “kuMntu Ophakamileyo,” naliphi na igama abalisebenzisayo ukubiza loo “Mntu Ophakamileyo” lifanelekile ukuthabathel’ indawo igama elithi Yehova kungakhathaliseki ukuba unqulo lwabo lubandakanya ntoni na? Ngokuqinisekileyo akunjalo! (Isaya 42:8; 1 Korinte 10:20) Ukuthabathel’ indawo igama likaThixo ngegama elenza abantu bavakalelwe kukuba iinkolelo zabo ezingokwesithethe zilungile akubancedi ukuba basondele kuThixo wokwenyaniso.

8. Kutheni ingakhange iphazamiseke injongo kaThixo yokwazisa igama lakhe?

⁸ Iyonke le nto ayikhange iyiguqule okanye iyiphazamise injongo kaYehova yokwazisa igama lakhe. Kwiilwimi zaseYurophu, eAfrika, ezamazwe aseMerika, ezaseMpuma nezeziqithi zolwandle, kusekho iiBhayibhile ezininzi ezisasazwayo ezinegama likaThixo. Kwakhona kukho amaNgqina kaYehova angaphezu kwezi-5400 000 kumazwe nakwimihlaba engama-233 athi ewonke achithe iiyure ezingaphezu kwewaka lezigidi ngonyaka exelela abanye ngegama nangenjongo kaThixo wokwenyaniso. Ashicilela aze asasaze iiBhayibhile—ezisebenzisa igama likaThixo—ngeelwimi ezithethwa ngabemi bomhlaba abamalunga nama-3600 000 000, eziquka isiNgesi, isiTshayina, isiRashiya, isiSpanish, isiPhuthukezi, isiFrentshi nesiDatshi. Akwashicilela iincwadi zokunceda ekufundisiseni iBhayibhile ngeelwimi ezaziwa yinkoliso yabemi bomhlaba. Kungekudala uThixo uza kuthabatha amanyathelo ngendlela eya kuzalisekisa oko wakuvakalisayo esithi iintlanga ‘ziya kwazi ukuba yena unguYehova.’—Hezekile 38:23.

Xa Inguqulelo Iphenjelelwa Ziinkolelo Zobuqu

9. IBhayibhile iyibonisa njani imbopheleleko enzulu ephezu kwabo basebenzisa iLizwi likaThixo?

⁹ Abo baguqulela iLizwi likaThixo nabo balifundisayo bathwele imbopheleleko enzulu. Ethetha ngobulungiseleli bakhe nobamaqabane akhe, umpostile uPawulos wathi: “Siye sazilahla izinto ezinyebeleziswayo ezibangela iintloni, singahambi ngobuqhokolo, singalingxengi nelizwi likaThixo, kodwa ngokuyenza ibonakale inyaniso siyazincomela kuso sonke isazela sabantu emehlweni kaThixo.” (2 Korinte 4:2) Ukungxenga kuthetha ukulonakalisa ngokulixuba nezinto elingadibaniyo nazo okanye ezikumgangatho ophantsi. Umpostile uPawulos wayengafani nabalusi bakwaSirayeli bomhla kaYeremiya ababengathembekanga abakhalinyelwa nguYehova ngenxa yokuba babeshumayela iingcamango zabo kunoko kwakuthethwe nguThixo. (Yeremiya 23:16, 22) Kodwa yintoni eye yenzeka kule mihla yethu?

10. (a) Iintshukumisa ezingenanto yakwenza nokunyaniseka kuThixo ziye zabaphembelela njani abanye abaguquleli kule mihla? (b) Yiyiphi indima abaye bayithabatha ngokungafanelekanga?

¹⁰ Ebudeni beMfazwe Yehlabathi II, ikomiti ethile eyayiyilwe ngabefundisi yasebenzisana norhulumente wamaNazi waseJamani ekuveliseni “iTestamente Entsha” ehlaziyiweyo eyayizikhuphe zonke iimbekiselo ezazithetha kakuhle ngamaYuda kunye nazo zonke izinto ezazibonisa ukuba uYesu Kristu wayengumYuda. Kutshanje, abaguquleli abavelise iThe New Testament and Psalms: An Inclusive Version baye batyekela kwicala elahlukileyo, bezama ukususa zonke izinto ezibonisa ukuba amaYuda ayebekek’ ityala ngokufa kukaKristu. Kwakhona aba baguquleli bavakalelwa kukuba abo balwela amalungelo abafazi babeya kuvuya ngakumbi ukuba uThixo kwakunokubhekiselwa kuye njengoBawo-Mama, kungekhona uBawo, naxa uYesu enokubizwa ngokuba nguMntwana kaThixo, kungekhona uNyana wakhe. (Mateyu 11:27) Ngoxa babesenza oku, bawushenxisa umgaqo wokuba abafazi bathobele amadoda nabantwana bathobele abazali babo. (Kolose 3:18, 20) Kuyacaca ukuba abavelisi bezo nguqulelo babengazimiselanga ‘ukungalingxengi ilizwi likaThixo’ njengompostile uPawulos. Babeyilibala indima yomguquleli, baze bathabathe isikhundla sombhali, bebhala iincwadi ezisebenzisa igama iBhayibhile ezenzele lona ukuze bavakalise iimbono zabo.

11. Iimfundiso zeNgqobhoko zingqubana njani noko kuthethwa yiBhayibhile ngomphefumlo nangokufa?

¹¹ Ngokuqhelekileyo iicawa zeNgqobhoko zifundisa ukuba umphefumlo womntu ungumoya oshiya umzimba xa esifa, uze wona ungafi. Ngokwahlukileyo koko, iinguqulelo zeBhayibhile ezindala zenkoliso yeelwimi ziyichaza ngokucacileyo into yokuba abantu bayimiphefumlo, nezilwanyana ziyimiphefumlo, nokuba umphefumlo uyafa. (Genesis 12:5; 36:6; Numeri 31:28; Yakobi 5:20) Loo nto iye yabafaka engxakini abefundisi.

12. Iinguqulelo zakutshanje ziye zazenza azacaca njani iinyaniso ezisisiseko zeBhayibhile?

¹² Ngoku iinguqulelo zakutshanje ziye zazenza azacaca ezo nyaniso. Njani? Ziyaliphepha igama elingqalileyo eliguqulela isibizo sesiHebhere esithi neʹphesh (umphefumlo) kwiindinyana ezithile. KwiGenesis 2:7, zisenokuthi umntu wokuqala “waqalisa ukuphila” (kunokuthi “waba ngumphefumlo ophilayo”). Okanye xa zithetha ngesilwanyana zisenokubhekisela “kwisidalwa” kunokuthi “umphefumlo.” (Genesis 1:21) Kwiindinyana ezifana noHezekile 18:4, 20, zibhekisela “kumntu” okanye “kubani” (kunokubhekisela “kumphefumlo”) ofayo. Mhlawumbi ukuguqulela ngolo hlobo kufanelekile emehlweni aloo mguquleli. Kodwa lungakanani uncedo alunikela kumntu oyifuna ngokunyanisekileyo inyaniso ongcamango yakhe esele yonakaliswe ziimfundiso zeNgqobhoko ezingasekelwanga kwizibhalo?b

13. Yiyiphi indlela eziye ezinye iinguqulelo zeBhayibhile zayifihla ngayo injongo kaThixo ngomhlaba?

¹³ Bezama ukuxhasa inkolelo yabo yokuba bonke abantu abalungileyo baya ezulwini, abaguquleli—okanye abefundisi abahlola umsebenzi wabo—basenokude bazame ukufihla oko iBhayibhile ikuthethayo ngenjongo kaThixo ngomhlaba. KwiNdumiso 37:11, uninzi lweenguqulelo luthi abathobekileyo baya kuzuza “ilizwe.” Igama elithi “ilizwe” kusenokwenzeka ukuba liyinguqulelo yegama elithi (ʼeʹrets) elisetyenziswe kumbhalo wesiHebhere. Noko ke, iToday’s English Version (ezisekelwe kuyo iinguqulelo zeelwimi ezininzi) ide iyibaxe le nto. Nangona le nguqulelo iguqulela igama lesiGrike elithi ge ngokuthi “umhlaba” kangangezihlandlo ezili-17 kwincwadi yeVangeli kaMateyu, kuMateyu 5:5 ifaka ibinzana elithi “oko uThixo akuthembisileyo” endaweni yegama elithi “umhlaba.” Ngokuzenzekelayo amarhamente acinga ngezulu. Akayixelelwa inyaniso yokuba, kwiNtshumayelo yaseNtabeni, uYesu Kristu wathi abathozamileyo, abalulamileyo okanye abathobekileyo baya “kuwudla ilifa umhlaba.”

14. Ziziphi iintshukumisa zokuzingca ezibonakala kwiinguqulelo ezithile zeBhayibhile?

¹⁴ Kakade ke, ezinye iinguqulelo zeZibhalo zibhalwe ngenjongo yokunceda abashumayeli bafumane umvuzo oncumisayo. Kuyinyaniso ukuba iBhayibhile ithi: “Umsebénzi ufanelwe ngumvuzo wakhe.” (1 Timoti 5:18) Kodwa kweyoku-1 kuTimoti 5:17, apho ithi amadoda amakhulu awongamela ngendlela entle “afanelwe yimbeko ephindiweyo,” ekuphela kwembeko ezinye zazo eziyigqala njengefanelwe kukukhankanywa yimali. (Thelekisa eyoku-1 kaPetros 5:2.) Ngaloo ndlela, iThe New English Bible ithi aba badala “bafanelwe ngumvuzo ophindiweyo,” ibe iContemporary English Version ithi “bafanele bahlawulwe ngokuphindwe kabini.”

Ukulizukisa Ngokunyaniseka ILizwi LikaThixo

15. Sinokuyiqonda njani eyona nguqulelo yeBhayibhile esimele siyicaphule?

¹⁵ Iyonke le nto ithetha ntoni kumntu ofunda iBhayibhile nakwabo basebenzisa iBhayibhile ukufundisa abanye? Kwinkoliso yeelwimi ezisetyenziswa kakhulu, kukho iinguqulelo zeBhayibhile ezingaphezu kwenye ekunokukhethwa kuzo. Sebenzisa ingqiqo xa ukhetha iBhayibhile oza kuyisebenzisa. (IMizekeliso 19:8) Ukuba inguqulelo ayinyanisekanga ekuchazeni uThixo—iyalisusa igama lakhe kwiLizwi lakhe eliphefumlelweyo phantsi kwaso nasiphi na isizathu—ngaba abaguquleli bayo abanakuba baye baziguqula iinxalenye ezithile zombhalo waloo Bhayibhile? Xa ukuthandabuza ukuchana kwendlela eguqulelwe ngayo, zama ukuyithelekisa nezinye iinguqulelo ezindala. Ukuba ufundisa iLizwi likaThixo, khetha iinguqulelo ezinamathela ngokusondeleyo kumbhalo wantlandlolo wesiHebhere nowesiGrike.

16. Ngamnye wethu unokubonakalisa njani ukuba unyanisekile ekusebenziseni iLizwi eliphefumlelweyo likaThixo?

¹⁶ Ngamnye kuthi ufanele anyaniseke kwiLizwi likaThixo. Oko sikwenza ngokukukhathalela oko likuquletheyo kangangokuba, ukuba kunokwenzeka, sichithe ixesha elithile suku ngalunye sifunda iBhayibhile. (INdumiso 1:1-3) Oko sikwenza ngokukusebenzisa ngokupheleleyo kubomi bethu oko likutshoyo, sifunde ukusebenzisa imigaqo nemizekelo yalo njengesiseko sokwenza izigqibo ezisengqiqweni. (Roma 12:2; Hebhere 5:14) Sibonisa ukuba singabameli abanyanisekileyo beLizwi likaThixo ngokulishumayela ngenzondelelo kwabanye. Kwakhona sikwenza oko ngokuyisebenzisa ngobulumko iBhayibhile xa sifundisa, singayigqwethi okanye songezelele kuyo ukuze sixhase iingcamango zethu. (2 Timoti 2:15) Oko kwaxelwa kwangaphambili nguThixo ngokuqinisekileyo kuza kwenzeka. Unyanisekile ekuzalisekiseni iLizwi lakhe. Ngamana singanyaniseka ekulizukiseni.

[Imibhalo esemazantsi]

Ngaba Uyakhumbula?

◻ Ziziphi iintshukumisa eziye zaphembelela umsebenzi wabaguquleli beBhayibhile kule mihla?

◻ Kutheni utyekelo lwale mihla lokuguqulela lungayiphazamisanga injongo kaThixo ngokuphathelele igama lakhe?

◻ Ezinye iinguqulelo zizigubungela njani iinyaniso zeBhayibhile ngokuphathelele umphefumlo, ukufa nomhlaba?

◻ Ziziphi iindlela esinokubonisa ngazo ukuba silizukisa ngokunyaniseka iLizwi likaThixo?

[Umfanekiso okwiphepha 16]

Yiyiphi inguqulelo yeBhayibhile ofanele uyisebenzise?