Ukuphunyezwa Komgwebo Entilini Yesigqibo
‘Mazinyuke iintlanga, ziye entilini yakwaYehoshafati; ngokuba ndiya kuhlala phantsi khona, ukuze ndizigwebe zonke iintlanga.’—YOWELI 3:12.
1. Kutheni uYoweli ebona imbuthumbuthu ehlanganisene “entilini yesigqibo”?
“YIMBUTHUMBUTHU, yimbuthumbuthu entilini yesigqibo!” La mazwi ahlab’ umxhelo siwafunda kuYoweli 3:14. Yeyantoni le mbuthumbuthu? UYoweli uyaphendula: “Isondele imini kaYehova.” Yimini enkulu yokuthethelelwa kukaYehova—imini yokuphunyezwa komgwebo kwinyambalala yabantu abaye babuchasa uBukumkani bukaThixo obumiselwe phantsi kukaKristu uYesu. Ekugqibeleni, “iingelosi ezine” zeSityhilelo isahluko 7 ziza kuyeka “imimoya yomine yomhlaba,” nto leyo ephumela ‘kwimbandezelo enkulu ekungazange kubekho injengayo ukususela ekuqaleni kwehlabathi de kube ngoku, nekungasayi kubakho injengayo kwakhona.’—ISityhilelo 7:1; Mateyu 24:21.
2. (a) Kutheni kufanelekile ukuba indawo uYehova aphumeza kuyo umgwebo ibizwe ngokuba ‘yintili yakwaYehoshafati’? (b) Yiyiphi indlela efanelekileyo awasabela ngayo uYehoshafati xa wayehlaselwa?
2 KuYoweli 3:12, indawo ophunyezwa kuyo lo mgwebo ibizwa ngokuba ‘yintili yakwaYehoshafati.’ Ngokufanelekileyo, ebudeni bexesha lamahla-ndinyuka kwimbali yelakwaYuda, uYehova waphumeza umgwebo ngenxa kaKumkani uYehoshafati olungileyo, ogama lakhe lithetha ukuthi “UYehova NguMgwebi.” Ukuqwalasela okwakusenzeka ngelo xesha kuya kusinceda sikuqonde ngakumbi okuza kwenzeka kungekudala kwixesha lethu. Le ngxelo ifumaneka kweyesi-2 yeziKronike isahluko 20. Kwindinyana 1 yesi sahluko, sifunda ukuba “oonyana bakaMowabhi noonyana baka-Amon, benamaMahun, beza kulwa noYehoshafati.” Wasabela njani uYehoshafati? Wenza oko abakhonzi bakaYehova badla ngokukwenza xa kunyembelekile. Wabhenela kuYehova ecela uncedo, ethandaza ngokusuka entliziyweni esithi: “Thixo wethu, akuyi kubagweba na? Ngokuba asinamandla okumelana nale ngxokolo ininzi isizelayo; thina asazi ukuba sothini na, kodwa amehlo ethu akuwe.”—2 Kronike 20:12.
UYehova Uphendula Umthandazo
3. Yiyiphi imiyalelo uYehova awayidlulisela kumaYuda xa ayejamelene nokuxatyelwa ziintlanga ezingabamelwane bawo?
3 Xa ‘onke amaYuda ayemi phambi koYehova, neentsana zawo, nabafazi bawo, noonyana bawo,’ uYehova waphendula. (2 Kronike 20:13) Kanye ngendlela namhlanje asebenzisa ngayo “ikhoboka elithembekileyo neliyingqondi,” uMphulaphuli wemithandazo ozukileyo wanika umprofeti ongumLevi uYahaziyeli amandla okudlulisela impendulo Yakhe kwabo babehlanganisene. (Mateyu 24:45) Sifunda oku: “Utsho uYehova ukuthi kuni, Musani ukoyika, musani ukuqhiphuka umbilini ngenxa yale ngxokolo inje ukuba ninzi; ngokuba imfazwe le asiyeyenu, yekaThixo. . . . Le yanamhla asiyeyenu; zimiseni nime, nilubone usindiso lukaYehova onani, . . . Musani ukoyika, musani ukuqhiphuka umbilini. Phumani ngomso nibahlangabeze; uYehova unani.”—2 Kronike 20:15-17.
4. UYehova ufuna abantu bakhe benze ntoni ukubonisa ukuba abahlelanga nje, xa babejamelene nocelomngeni lotshaba?
4 UYehova wayefuna uKumkani uYehoshafati nabantu bakhe bafak’ isandla nabo kunokuba bahlale nje besonge izandla, belindele ukuhlangulwa ngokungummangaliso. Kwakufuneka bathabathe amanyathelo kuqala ekuhlangabezaneni nocelomngeni lotshaba. Ukumkani ‘nawo onke amaYuda, neentsana zawo, nabafazi bawo, noonyana bawo,’ babonakalisa ukholo olomeleleyo njengoko ngentobelo bavuka ngenj’ ixukuxa baza bahamba besiya kuhlangabeza imikhosi ehlaselayo. Endleleni esinge apho, ukumkani waqhubeka enikela ulwalathiso nokhuthazo olungokobuthixo, ebabongoza esithi: “Kholwani kuYehova uThixo wenu, nozimaseka; kholwani kubaprofeti bakhe, noba nempumelelo.” (2 Kronike 20:20) Ukukholwa kuYehova! Ukukholwa kubaprofeti bakhe! Nazo izinto ezazifuneka ukuze baphumelele. Ngokufanayo namhlanje, njengoko siqhubeka sizixakekisa ngenkonzo kaYehova, ngamana singangaze sithandabuze ukuba uya kulwenza luphumelele ukholo lwethu!
5. AmaNgqina kaYehova akukhuthalele njani ukudumisa uYehova namhlanje?
5 NjengamaYuda omhla kaYehoshafati, simele ‘sibulele kuYehova, ngokuba ingunaphakade inceba yakhe.’ Sinokuwudlulisela njani lo mbulelo? Ngokukhuthalela kwethu ukushumayela ngoBukumkani! Njengoko loo maYuda ‘amemelela yaye amdumisa,’ nathi masongezelele imisebenzi kukholo lwethu. (2 Kronike 20:21, 22) Ewe, masibonakalise ukholo lokwenene olufanayo njengoko uYehova elungiselela ukuthabatha inyathelo nxamnye neentshaba zakhe! Nangona le ndlela isenokubonakala ingumntyangampo ongapheliyo, masizimisele ukunyamezela, sikhuthale elukholweni, nanjengoko besenza abantu bakhe abakwiindawo ezineenkxwaleko kulo mhlaba namhlanje. Bethwaxwa kanobom yintshutshiso, ugonyamelo, indlala kunye neemeko ezingentle zezoqoqosho, kwamanye amazwe abakhonzi bakaThixo baye banemiphumo encumisayo, njengoko ibonisa ingxelo yeNcwadi Yonyaka YamaNgqina KaYehova Yowe-1998.
UYehova Uyabasindisa Abantu Bakhe
6. Ukholo olomeleleyo lusinceda njani sihlale sinyanisekile namhlanje?
6 Iintlanga ezingahloneli Thixo ezazingqonge elakwaYuda zazama ukufunz’ esiqwini kubantu bakaThixo, kodwa abakhonzi bakaYehova basuka bazivumel’ iindumiso zakhe bemisela umzekelo wokholo. Nathi sinokubonakalisa ukholo olufanayo namhlanje. Ngokuzalisa ubomi bethu ngemisebenzi edumisa uYehova, someleza izikrweqe zethu zokomoya, singaziniki mtyhi iintolo zikaSathana zobuqhophololo. (Efese 6:11) Ukholo olomeleleyo luya kuzoyisa izilingo zokuphazanyiswa kukuzonwabisa okuthob’ isidima, ukuthanda izinto eziphathekayo nokungabi namdla kwabantu okugquba kwihlabathi elitshabalalayo esiphila kulo. Olu kholo lungenakoyiswa mntu luya kusigcina sikhonza ngokunyaniseka ‘nekhoboka elithembekileyo neliyingqondi’ njengoko sisondliwa ngokuqhubekayo ngokutya kokomoya okulungiselelwe “ngexesha elifanelekileyo.”—Mateyu 24:45.
7. Aye asabela njani amaNgqina kaYehova kwiintlaselo ezahlukeneyo ebezijoliswe kuwo?
7 Ukholo lwethu olumiliselwe eBhayibhileni luya kusomeleza ukuze sihlale siqinile nxamnye namaphulo okubonakalisa intiyo antyontyelwa ngabo babonakalisa umoya ‘wekhoboka elinobubi’ ekuthethwa ngalo kuMateyu 24:48-51. Bezalisekisa esi siprofeto ngendlela ebalaseleyo, abawexuki bakhuthalele ukuhlwayela ubuxoki neengcamango ezilahlekisayo kumazwe amaninzi namhlanje, bade basebenzisane nabo basemagunyeni ezintlangeni. Apho kuyimfuneko, amaNgqina kaYehova aye asabela, njengoko kuchazwe kweyabaseFilipi 1:7, ‘ngokuzithethelela nangokuzimisela ngokusemthethweni iindaba ezilungileyo.’ Ngokomzekelo, ngoSeptemba 26, 1996, kwelinye lamatyala enkundla aseGrisi, iijaji ezisithoba zeNkundla Yamalungelo Abantu YaseYurophu, eStrasbourg, zavumelana zonke ukuba “amaNgqina kaYehova amele agqalwe njengenye ‘yeenkonzo ezaziwayo,’” ezifanele zifumane inkululeko yokucinga, yesazela neyeenkolelo, nelungelo lokwazisa unqulo lwazo. Ukanti ngokuphathelele abawexuki, umgwebo kaThixo uthi: “Amazwi omzekeliso oyinyaniso aye enzeka kubo: ‘Inja ibuyele emhlanzweni wayo, nehagukazi ehlanjwe umzimba ibuye yaqika-qikeka eludakeni.’”—2 Petros 2:22.
8. Ngomhla kaYehoshafati, uYehova wawuphumeza njani umgwebo nxamnye neentshaba zabantu Bakhe?
8 Xa sibuyela emva ngomhla kaYehoshafati, uYehova wabagweba abo babefuna ukwenzakalisa abantu Bakhe. Sifunda oku: “UYehova wabafikisela abalaleli oonyana baka-Amon, nabakaMowabhi, nabasentabeni yakwaSehire, ababeze kumaYuda; babulawa. Ngokuba oonyana baka-Amon nabakaMowabhi besuka balwa nabemi bentaba yakwaSehire, ukuba babasingele phantsi, babatshabalalise. Bakubagqiba abemi bakwaSehire, babulalana kwabodwa.” (2 Kronike 20:22, 23) AmaYuda ayithiya loo ndawo igama lokuba yiNtili yeBheraka, igama elithi Bheraka lithetha “Intsikelelo.” Nakule mihla, ukuphunyezwa komgwebo kaYehova kwiintshaba zakhe kuya kuphumela kwiintsikelelo ezinkulu kubantu bakhe.
9, 10. Ngoobani abaye bazibonakalisa befanelwe ngumgwebo kaYehova oqatha?
9 Sisenokubuza, Ngoobani kule mihla abaza kufumana umgwebo oqatha ovela kuYehova? Ukuze sifumane impendulo yalo mbuzo, simele sibuyele kwisiprofeto sikaYoweli. UYoweli 3:3 uthetha ngeentshaba zabantu bakhe ‘ezivuza ihenyukazi ngenkwenkwe; zithengise intombi ngewayini.’ Ewe, zibajongela phantsi abakhonzi bakaThixo, zigqala abantwana babo njengabanexabiso elilingana nelehenyukazi okanye ibhekilana yobhelu lomsele. Ziseza kuthi shu zingabaselwanga ngenxa yaloo nto.
10 Abanye abafanelwe ngumgwebo olinganayo ngabo bangamahenyukazi okomoya. (ISityhilelo 17:3-6) Ibe abona babekek’ ityala nangakumbi kulo mba ngabo bantyontyela amagunya ezobupolitika ukuba atshutshise amaNgqina kaYehova aze athintele umsebenzi wawo, njengoko iinkokeli zonqulo ezixhokonxa amahlokondiba zisenza mvanje kwelaseMpuma Yurophu. UYehova uvakalisa ukuzimisela kwakhe ukuthabatha amanyathelo anxamnye nabasebenzi bobungendawo abanjalo.—Yoweli 3:4-8.
“Ngcwalisani Imfazwe”!
11. UYehova uzicel’ umngeni njani iintshaba zakhe ukuba ziye emfazweni?
11 Emva koku, uYehova uthuma abantu bakhe ukuba bacel’ umngeni iintlanga esithi: “Ngcwalisani imfazwe; xhoxhani amagorha; makafike enyuke onke amadoda okulwa.” (Yoweli 3:9) Apha kuvakaliswa uhlobo olungaqhelekanga lwemfazwe—imfazwe yobulungisa. AmaNgqina anyanisekileyo kaYehova akholose ngezixhobo zokomoya njengoko ephendula iingcamango ezilahlekisayo ezithethwayo, ebetha ubuxoki ngenyaniso. (2 Korinte 10:4; Efese 6:17) Kungekudala, uThixo uza kungcwalisa “imfazwe yemini enkulu kaThixo uSomandla.” (ISityhilelo 16:14) Iza kushenxisa bonke abachasi bolongamo lukaThixo kulo mhlaba. Abantu bakhe abasemhlabeni abayi kufaka sandla ngokoqobo kule nquleqhu. Baye ‘bawakhanda amakrele abo aba ngamakhuba, nezikhali zabo zaba zizitshetshe zeediliya’ ngokoqobo nangokomfuziselo. (Isaya 2:4) Ngokuchaseneyo noko, uYehova ucel’ umngeni iintlanga eziziintshaba zakhe ukuba zenze into eyahlukileyo: “Khandani amakhuba enu abe ngamakrele, nezitshetshe zenu zemidiliya zibe zizikhali.” (Yoweli 3:10) Uyazimema ukuba zixhobe zif’ amacala ngezigadla zazo zemfazwe nangezixhobo zokulwa zale mihla kweli dabi. Kodwa soze zilunge, kuba lo mlo kunye noloyiso zezikaYehova!
12, 13. (a) Phezu kwako nje ukuphela kweMfazwe Yomlomo, iintlanga ezininzi ziye zabonakalisa njani ukuba zisengoophuma-silwe? (b) Yintoni ezingayilungelanga iintlanga?
12 Ngasekuqaleni kweminyaka yee-1990, iintlanga zavakalisa ukuba iMfazwe Yomlomo yayiphelile. Ngaba, ngenxa yoko, usukelo oluphambili lweZizwe Ezimanyeneyo lokudala uxolo nonqabiseko luye lwafikelelwa? Nakanye! Zisixelela ntoni iziganeko ezenzeke eBurundi, kwiDemocratic Republic of Congo, eIraq, eLiberia, eRwanda, eSomalia, nakwebelifudula liyiYugoslavia? Ngokwamazwi kaYeremiya 6:14, zithi: “Luxolo, luxolo; kungekho luxolo.”
13 Nangona imfazwe yokoqobo iye yee nqum kwezinye iindawo, iintlanga ezingamalungu eZizwe Ezimanyeneyo zisashiyiselana ngotyefezo ekuveliseni izixhobo zemfazwe ezisemcimbini. Zimbi zisankonye imfumba yezixhobo zenyukliya. Ezinye zenza izixhobo zemichiza okanye ezihlasela amalungu omzimba nezinokutshabalalisa inyambalala yabantu. Njengoko ezo ntlanga zihlanganisana kwindawo yokomfuziselo ekuthiwa yiArmagedon, uzicel’ umngeni esithi: “Oswele amandla makathi, Ndiligorha. Khawulezani nize, nonke zintlanga zangeenxa zonke, nibuthelane.” UYoweli umbeth’ emlonyeni esithi: “Wahlisele khona amagorha akho, Yehova.” (Akekeliswe sithi.)—Yoweli 3:10, 11.
UYehova Uyabakhusela Abakhe
14. Ngoobani amagorha kaYehova?
14 Ngoobani amagorha kaYehova? IBhayibhile ibiza uThixo oyinyaniso ngokuthi “uYehova wemikhosi” izihlandlo ezimalunga nama-280. (2 Kumkani 3:14) Le mikhosi zizithunywa eziziingelosi zasezulwini ezisoloko zikulungele ukuthunywa nguYehova. Xa amaSiriya ayemfuna aph’ ebekho uElisha, ekugqibeleni uYehova wawavula amehlo omlindi kaElisha ukuze abone isizekabani sokungaphumeleli kwawo: “Nantso intaba izele ngamahashe neenqwelo zokulwa zomlilo, zimjikelezile uElisha.” (2 Kumkani 6:17) UYesu wathi ngewayebhenele kuYise ukuba amthumelele ‘imikhosi yeengelosi engaphezu kweshumi elinesibini.’ (Mateyu 26:53) Xa sichaza uYesu ekhwele ihashe esiya kuphumeza umgwebo eArmagedon, ISityhilelo sithi: “Imikhosi eyayisezulwini yayimlandela ngamahashe amhlophe, ibe yayambethe ilinen emhlophe, ecocekileyo, ecikizekileyo. Nasemlonyeni wakhe kuphuma ikrele elide elibukhali, ukuze azixabele ngalo iintlanga, ibe uya kuzalusa ngentonga yentsimbi. Uxovula nesixovulelo sewayini yomsindo wengqumbo kaThixo uSomandla.” (ISityhilelo 19:14, 15) Eso sixovulelo sewayini sokomfuziselo sichazwa ngokucacileyo ‘njengesixovulelo esikhulu sewayini yomsindo kaThixo.’—ISityhilelo 14:17-20.
15. UYoweli uyichaza njani imfazwe kaYehova nxamnye neentlanga?
15 Ngoko ke, uYehova usiphendula njani isicelo sikaYoweli sokuba ahlise amagorha kaThixo? Uphendula ngala mazwi acacileyo: “Mazixhoxhwe zinyuke iintlanga, ziye entilini yakwaYehoshafati; ngokuba ndiya kuhlala phantsi khona, ukuze ndizigwebe zonke iintlanga zangeenxa zonke. Fakani irhengqa, kuba ukudla kuvuthiwe; yizani nixovule, ngokuba isixovulelo sewayini sizele, iyaphalala imikhombe yokukhongozela; kuba bukhulu ububi bazo. Yimbuthumbuthu, yimbuthumbuthu entilini yesigqibo! Kuba isondele imini kaYehova entilini yesigqibo. Ilanga nenyanga zenziwe mnyama, iinkwenkwezi zikufinyezile ukukhanya kwazo. UYehova ubharula eZiyon, ukhupha ilizwi lakhe eYerusalem, linyikime izulu nehlabathi.”—Yoweli 3:12-16.
16. Ngoobani abaza kuqukwa phakathi kwabo baza kugwetywa nguYehova?
16 Kanye njengokuba igama elithi Yehoshafati lithetha ukuthi “UYehova Ngumgwebi,” ngokuqinisekileyo uThixo, uYehova, uya kuluthethelela ngokupheleleyo ulongamo lwakhe xa ephumeza umgwebo. Esi siprofeto sichaza abo bafumana umgwebo oqatha ‘njengembuthumbuthu, imbuthumbuthu ekwintili yesigqibo.’ Nabani na oseleyo omela unqulo lobuxoki uya kube ephakathi kwaloo mbuthumbuthu. Phakathi kwabo iya kube ingabo bachazwa yiNdumiso yesibini—iintlanga, izizwe, ookumkani bomhlaba nezidwangube—abaye bakhetha inkqubo yezinto eyonakeleyo yeli hlabathi ‘kunokukhonza uYehova besoyika.’ Aba bantu abafuni ‘kumanga unyana.’ (INdumiso 2:1, 2, 11, 12) Abamamkeli uYesu njengoKumkani osebenzisana kunye noYehova. Ngaphezu koko, imbuthumbuthu ephawulelwe intshabalalo iza kuquka bonke abantu abaya kugwetywa ngulo Kumkani uzukileyo ‘njengabaziibhokhwe.’ (Mateyu 25:33, 41) Xa kufike ixesha lokuba uYehova abhavumle ekwiYerusalem yasezulwini, uKumkani wookumkani ammiseleyo uya kukhwela ihashe aye kuphumeza loo mgwebo. Ngokuqinisekileyo liya kunyikima izulu nomhlaba! Noko ke, siyaqinisekiswa ukuba: “UYehova ulihlathi kubantu bakhe, uligwiba koonyana bakaSirayeli.”—Yoweli 3:16.
17, 18. Ngoobani abachazwa njengabasindi kwimbandezelo enkulu, ibe ziziphi iimeko abaza kuphila phantsi kwazo?
17 ISityhilelo 7:9-17 sichaza abo basinda kwimbandezelo enkulu ‘njengesihlwele esikhulu’ esibunjwe ngabo banokholo kumandla okuhlawulela egazi likaYesu. Aba bantu bayakhuselwa ngemini kaYehova, ngoxa imbuthumbuthu yesiprofeto sikaYoweli ifumana umgwebo oqatha. Kwabo basindileyo uYoweli uthi: “Niya kwazi ke ukuba mna Yehova ndinguThixo wenu, ohleli eZiyon, entabeni yam engcwele,” indawo uYehova ahlala kuyo ezulwini.—Yoweli 3:17a.
18 Ngoko esi siprofeto sisixelela ukuba ibhotwe loBukumkani bukaThixo basezulwini ‘loba ngcwele, abasemzini bangabi sacanda phakathi kwalo.’ (Yoweli 3:17b) Ezulwini nakummandla womhlaba wobo Bukumkani basezulwini, akuyi kubakho bantu basemzini, kuba wonke umntu uya kube emanyene kunqulo olunyulu.
19. UYoweli uluchaza njani ulonwabo olubuparadesi lwabantu bakaThixo lwanamhlanje?
19 Ukanti nanamhl’ oku, uxolo luninzi phakathi kwabantu bakaYehova abalapha emhlabeni. Bavakalisa imigwebo yakhe ngaxhatha linye kumazwe angama-230 nangeelwimi ezahlukeneyo ezingaphezu kwama-300. UYoweli uprofeta kamnandi ngenkqubela yabo esithi: “Kuya kuthi ngaloo mini, iintaba zivuze incindi yeediliya, iinduli ziphalale amasi, imijelo yonke yakwaYuda iphalale amanzi.” (Yoweli 3:18) Ewe, uYehova uya kuqhubeka ethulula kubadumisi bakhe basemhlabeni intabalala yeentsikelelo nenkqubela evuyisayo kunye nomjelo okhulayo wenyaniso exabisekileyo. Luya kube luthethelelwe ngokupheleleyo ulongamo lukaYehova kwintili yesigqibo, yaye abantu baya kuphuphuma uvuyo njengoko eya kuhlala ngonaphakade nabantu bakhe abacanyagushelweyo.—ISityhilelo 21:3, 4.
Ngaba Usakhumbula?
◻ UYehova wabasindisa njani abantu bakhe ngemihla kaYehoshafati?
◻ Ngoobani abagwetywa nguYehova njengabafanele ukutshatyalaliswa “entilini yesigqibo”?
◻ Ngoobani amagorha kaThixo ibe yiyiphi indima ayiphumezayo kwimfazwe yokugqibela?
◻ Ziziphi izinto ezonwabisa abanquli abathembekileyo?
[Umfanekiso okwiphepha 21]
AmaYuda axelelwa oku: ‘Musani ukoyika, ngokuba imfazwe le asiyeyenu, yekaThixo’
[Umfanekiso okwiphepha 23]
UYehova ucel’ umngeni iintshaba zakhe ukuba ‘zikhande amakhuba azo abe ngamakrele, nezitshetshe zazo zemidiliya zibe zizikhali’
[Umfanekiso okwiphepha 24]
IBhayibhile ichaza isihlwele esikhulu sabasindi bembandezelo enkulu