Beka UNyana, UMmeli OyiNtloko KaYehova
“Lowo ungambekiyo uNyana, akambeki uYise owamthumayo.”—YOHANE 5:23.
1. Inkolelo yeNgqobhoko kaBathathu emnye imhlazisa njani uYesu?
NAMHLANJE abaninzi kwiNgqobhoko bathi bayambeka uYesu Kristu, kanti benza kanye okuchasene noko. Njani? Kaloku, abaninzi bathi uYesu unguThixo uSomandla, nokuba uThixo, uMdali weento zonke, weza emhlabeni ibe waphila waza wafa njengomntu. Eli bango liqulethwe yimfundiso kaBathathu Emnye, eyimfundiso esisiseko yeNgqobhoko. Kodwa ukuba uBathathu Emnye ububuxoki, enyanisweni, ukuba uYesu mncinane yaye ungaphantsi kuThixo, ngaba oku kumelwa phosakeleyo kolwalamano lwakhe noThixo bekungayi kumenza uYesu angonwabi? Eneneni, ebeya kukujonga ukumelwa phosakeleyo okunjalo njengokumhlazisayo yena nako konke awakufundisayo.
2. IZibhalo zikubonisa njani ngokucacileyo ukuba uYesu ungomncinane kunoThixo kwaye ungaphantsi kwakhe?
2 Inyaniso ikukuba, uYesu akazange athi unguThixo, kodwa ngokuphindaphindiweyo wathetha ngaye ‘njengoNyana kaThixo.’ Kwaneentshaba zakhe zakuvuma oku. (Yohane 10:36; 19:7) UYesu wayesoloko ekuphaphele ukuphakamisa uYise nokuzithoba Kuye, njengoko wathi: “UNyana akanakwenza nto ngokwakhe, engathanga abone uYise eyenza; kuba izinto asukuba ezenza yena, ezo uyazenza uNyana kwangokunjalo; mna ngokwam andinakwenza nto . . . ngokuba andifuni kuthanda kwam, ndifuna ukuthanda kukaBawo awandithumayo.” Kwakhona, wathi: “Ndivela kuye, waye yena endithumile.” Wakwathi: “Ndaphuma kuThixo, ndifikile ke.” (Yohane 5:19, 30; 7:28, 29; 8:42) UYesu akazange abonise ukuba wayenguThixo okanye wayelingana naye. Ngoko ukufundisa into enjalo kukuhlazisa uYesu.
Ezinye Iindlela Abamhlazisa Ngazo Abanye UYesu
3. (a) Kungokukhanyela ntoni emayela noYesu abathi bambi kwiNgqobhoko bamhlazise? (b) Bubuphi ubungqina uYesu awabunikelayo bobukho bakhe bangaphambi kokuba ngumntu?
3 Kwakhona, okumangalisayo kukuba, kukho abathile kwiNgqobhoko namhlanje abamhlazisayo uYesu ngokukhanyela ukuba wayekho ngaphambi kokuba abe ngumntu. Noko ke, kuphela kuxa sikuqonda ukuba uYesu wehla ngokoqobo esuka ezulwini weza emhlabeni esinokuthi siqalise ukumbeka ngokufanelekileyo. Ngokuphindaphindiweyo uYesu wathi wayekho ngaphambi kokuba abe ngumntu. Wathi, “Akukho namnye unyukileyo waya emazulwini, ngulowo yedwa wehla ephuma emazulwini, uNyana woMntu.” Kamva wathi: “Ndim isonka esiphilileyo, esi sehlayo emazulwini . . . Hi na ke, ukuba nithe nambona uNyana womntu enyukela apho ebefudula ekhona?” Yaye kwakhona wathi: “Nina ningabangaphantsi, mna ndingowangaphezulu; . . . Inene, inene, ndithi kuni, Engekabikho uAbraham, mna ndikho kade.” (Yohane 3:13; 6:51, 62; 8:23, 58) Kwakhona uYesu wabhekisela kubukho bakhe bangaphambi kokuba ngumntu emthandazweni wakhe kuYise wasemazulwini ngobusuku bangaphambi kokungcatshwa kwakhe.—Yohane 17:5.
4. (a) Kungayiphi enye indlela abathi abaninzi bamhlazise uYesu? (b) Bubuphi ubungqina obufanele bube bobaneleyo ukubonisa ukuba uYesu wakha wangumntu okhoyo ngokwenene, yaye ngoba?
4 Bambi kwiNgqobhoko bade bakubaxe oku ngokukhanyela ukuba uYesu wayengumntu okhoyo ngokwembali, ukuba wakha waphila njengomntu. Bathi akazange abekho ngokwenene, bekungayi kuba nantsingiselo ukuxubusha kwethu ngesizathu nendlela esifanele simbeke ngayo. Ukanti ubungqina obuninzi bamangqina okuzibonela obulondolozwe eZibhalweni bufanele bube bobaneleyo ukumisela ngaphandle kwamathandabuzo ukuba uYesu wakhe waphila ngokwenene emhlabeni. (Yohane 21:25) Oku kuyinyaniso ngokukhethekileyo ekubeni amaKristu okuqala ngokufuthi ayebeka ubomi bawo nenkululeko yawo esichengeni ngokufundisa kwawo ngoYesu. (IZenzo 12:1-4; ISityhilelo 1:9) Noko ke, ngaphandle koko abalandeli bakhe bakubhalayo ngaye, ngaba kukho ubungqina obunokunikelwa ukucacisa ukuba wayekho uYesu?
5, 6. Ubungqina bembali, ngaphandle kobo beZibhalo, bubonisa ntoni ngobukho bokwenene bukaYesu Kristu?
5 IThe New Encyclopædia Britannica (yowe-1987) ithi: “Iingxelo ezibhalwe ngokwahlukeneyo zingqina ukuba kumaxesha amandulo kwanabachasi bobuKristu abazange babuthandabuze ubukho bukaYesu obungokwembali.” Ziziphi ezinye zezi ngxelo zibhalwe ngokwahlukeneyo? Ngokutsho komphengululi ongumYuda uJoseph Klausner, kukho ubungqina bemibhalo yamandulo yeTalmud. (Jesus of Nazareth, iphepha 20) Kukwakho nobungqina bombhali-mbali ongumYuda uJosephus wenkulungwane yokuqala. Ngokomzekelo, uchaza ukuxulutywa kukaYakobi, emchaza “njengomntakwabo Yesu owayebizwa ngokuba unguKristu.”—Jewish Antiquities, XX, [ix, 1].
6 Ukongezelela, kukho ubungqina bababhali-mbali bamaRoma bamandulo, ingakumbi obo bukaTacitus owayehlonelwa kakhulu. Ekuqaleni kwenkulungwane yesibini wabhala “ngodidi olwaluthiyiwe ngenxa yezinto olwaluzicekisa, abantu ngokubanzi ababelubiza ngokuba ngamaKristu. UChristus [uKristu], elisuka kuye eli gama [umKristu], wafumana isohlwayo esiqatha ebudeni bolawulo lukaTibheriyo ngesigwebo esawiswa lelinye lamabamba ethu.” (The Annals, XV, XLIV) Siqwalasela ubungqina bokuba uYesu wayengumntu okhoyo ngokwembali njengobeyisayo, isithandi sobulumko esikhuthaza ukuziphatha okuhle saseFransi senkulungwane ye-18, uJean-Jacques Rousseau, sathi: “Imbali kaSocrates, ekungekho mntu ucinga ngokuyithandabuza, ayinabungqina buninzi njengaleyo kaYesu Kristu.”
Izizathu Zokubeka UNyana
7. (a) Bubuphi ubungqina obungokweZibhalo obusibonisa ukuba sinembopheleleko yokubeka uYesu Kristu? (b) UYehova uye wambeka njani ngokubhekele phaya uNyana wakhe?
7 Ngoku sifikelela kumbandela wokubeka uYesu Kristu. Isibakala sokuba abalandeli bakhe banembopheleleko yokumbeka sinokubonwa kumazwi akhe akuYohane 5:22, 23 athi: “Kuba kananjalo uYise akagwebi namnye; uthe umgwebo wonke wawunikela kuNyana, ukuze bonke bambeke uNyana, kwanjengoko bambekayo uYise. Lowo ungambekiyo uNyana, akambeki uYise owamthumayo.” Ukususela ekuvusweni kukaKristu, uYehova uye wambeka uNyana wakhe ngomlinganiselo omkhulu ngakumbi, ‘ethe ngenxa yeentlungu zokufa wamthwesa uzuko nembeko.’ (Hebhere 2:9; 1 Petros 3:22) Ngokusisiseko, sinezizathu zokumbeka uYesu ngenxa yalowo anguye nangenxa yoko akwenzileyo.
8. Kungenxa yaziphi izibakala ezikhethekileyo mayela noYesu Kristu athi afanelwe yimbeko?
8 UYesu Kristu ufanelwe yimbeko ngenxa yokuba yena, njengoLogos okanye uLizwi, usisithethi esibalaseleyo sikaYehova. Ngokusuka eZibhalweni kuyacaca ukuba isibizo esithi “uLizwi” sibhekisela kuYesu ngaphambi kokuba eze emhlabeni nasemva kokunyukela kwakhe ezulwini. (Yohane 1:1; ISityhilelo 19:13) KwiSityhilelo 3:14 uthetha ngaye ‘njengengqalo yayo indalo kaThixo.’ Akapheleli nje ngokuba ‘ngowamazibulo kwindalo yonke’ kodwa ‘njengoNyana okuphela kwamzeleyo’ nguye kuphela owadalwa nguYehova uThixo ngokungqalileyo. (Kolose 1:15; Yohane 3:16) Ukongezelela, “izinto zonke zabakho ngaye; engekho yena, akubangakho nanye into ethe yabakho.” (Yohane 1:3) Ngoko ke, xa kwiGenesis 1:26 sifunda ukuba uThixo wathi, “Masenze umntu ngokomfanekiselo wethu ngokufana nathi,” igama elithi “masenze” liquka uLogos, okanye uLizwi. Ngokuqinisekileyo, isibakala sokuba uYesu ngaphambi kobukho bakhe njengomntu wayenelungelo elimangalisayo lokuba nesabelo kunye noThixo ekudaleni simenza afanelwe yimbeko enkulu.
9. Kutheni sifikelela kwisigqibo sokuba uYesu usisiphatha-zithunywa uMikayeli, yaye uMikayeli wambeka njani uYehova ngokuphathelele umzimba kaMoses?
9 Ngokubhekele phaya uYesu Kristu ufanelwe yimbeko ngenxa yokuba usisithunywa sikaYehova esiyintloko, okanye isiphatha-zithunywa. Kungenxa yasiphi isizinzi esithi sifikelele kweso sigqibo? Kaloku, igama elithi “umphathi,” elithetha “intloko” okanye “ophambili,” linikela ingcamango yokuba kukho isiphatha-zithunywa esinye kuphela. ILizwi likaThixo lithetha ngaso xa libhekisela kwiNkosi uYesu Kristu evusiweyo. Sifunda oku: “INkosi ngokwayo iya kuhla emazulwini inendanduluko, inelizwi lesiphatha-zithunywa, inexilongo likaThixo, baze abafele kuKristu bavuke kuqala.” (1 Tesalonika 4:16) Esi siphatha-zithunywa sinegama, njengoko sifunda kuYuda 9: “UMikayeli, isiphatha-zithunywa zezulu, oko wayebambene naye uMtyholi, bebangisana ngawo umzimba kaMoses, akabanga nabuganga bakumzisela mgwebo wakunyelisa; wesuka wathi, iNkosi mayikukhalimele.” Ngaloo ndlela ngokungathabathi umsebenzi kaYehova ngokuthi amgwebe uMtyholi, uYesu ngolo hlobo wanikela imbeko kuYise wasezulwini.
10. (a) UMikayeli ukhokela njani ekulweleni uBukumkani bukaThixo? (b) UMikayeli wayenayiphi indima ngokunxulumene nohlanga lwakwaSirayeli?
10 Isiphatha-zithunywa uMikayeli silwela uBukumkani bukaThixo, siyakhokela ekukhupheleni ngaphandle kwamazulu uSathana nemikhosi yakhe yeedemon. (ISityhilelo 12:7-10) Yaye umprofeti uDaniyeli uthi uMikayeli ‘umela abantu bakaThixo.’ (Daniyeli 12:1) Ngoko ke, kubonakala ukuba uMikayeli ‘usisithunywa sikaThixo, esibe sihamba phambi kwemfuduko yamaSirayeli’ yaye ungulowo uThixo wamsebenzisayo ukungenisa abantu bakhe kwiLizwe Ledinga. UThixo wawayalela, “Silumkele, uliphulaphule izwi laso. Musa ukusiphikisa; . . . kuba igama lam likuso.” (Eksodus 14:19; 23:20, 21) Ngokungathandabuzekiyo isiphatha-zithunywa sikaYehova simele ukuba sasinomdla omkhulu kubantu ababemela igama likaThixo. Ngokufaneleke ngokwenene sanceda esinye isithunywa esasithunywe ukuya kuthuthuzela umprofeti uDaniyeli, nesasiphazanyiswe endleleni yidemon enamandla. (Daniyeli 10:13) Ngoko ke kunokuba sengqiqweni ukugqiba kwelokuba isithunywa esatshabalalisa amajoni kaSaneribhe angama-185 000 sasinguMikayeli isiphatha-zithunywa.—Isaya 37:36.
11. Kungenxa yokulandela liphi ikhondo lobomi emhlabeni athi uYesu afanelwe yimbeko yethu?
11 UYesu Kristu akafanelwanga yimbeko nje kuphela ngenxa yalowo anguye kodwa ukwafanelwe yimbeko yethu ngenxa yoko akwenzileyo. Ngokomzekelo, ungokuphela komntu owakhe waphila ubomi obufezekileyo. UAdam noEva babedalwe befezekile, kodwa imfezeko yabo ayizange ihlale thuba lide. Noko ke, uYesu Kristu wahlala ‘engenabubi, engenabala, ahlukile kubo aboni’ phezu kwazo nje izilingo neentshutshiso uSathana awayenokumzisela zona. Kuko konke ‘akenzanga sono, akwafunyanwa nkohliso emlonyeni wakhe.’ Wayenokubacela umngeni ngokufanelekileyo abachasi bakhe bonqulo esithi: “Ngubani na kuni ondohlwayayo ngenxa yesono?” Kwakungekho namnye kubo owayenokwenjenjalo! (Hebhere 7:26; 1 Petros 2:22; Yohane 8:46) Yaye ngenxa yokuba wagcina ingqibelelo yakhe engenasono, uYesu wathethelela uYise wasemazulwini njengoMongami wendalo iphela ofanelekileyo waza wamngqina uMtyholi elixoki elibi.—IMizekeliso 27:11.
12. (a) Wayeluhlobo olunjani lomntu uYesu, yaye wenza ntoni waza wabandezeleka kangakanani ngenxa yabanye? (b) Kutheni unokuthi uYesu ufanelwe yimbeko yethu ngenxa yoko wakwenzayo nangenxa yembandezelo awayifumanayo?
12 UYesu Kristu ufanelwe yimbeko yethu, kungekuphela nje kuba waphila ubomi obufezekileyo nobungenasono, kodwa nangenxa yokuba wayengumntu olungileyo, ongazingciyo nozincamayo. (Thelekisa amaRoma 5:7.) Akazange adinwe kukulungiselela iintswelo zabantu zokomoya nezokwenyama. Enjani yona inzondelelo awayibonakalisayo ngendlu kaYise, yaye onjani wona umonde awawubonakalisayo ekuqhubaneni nabafundi bakhe! Ezinjani zona iintlungu awakuvumayo ukuzinyamezela ekwenzeni ukuthanda kukaYise! Ngokubandezeleka kwakhe kumyezo waseGetsemane, iBhayibhile ithi: “Eneminzunzu, kwaba kukhona athandaza enyamekile. Kwathi ke ukubila kwakhe kwanga kungamathontsi amakhulu egazi, esiwa emhlabeni.” Ewe, “wayesondeze izikhungo kwanezibongozo . . . kunye nodanduluko olunamandla, neenyembezi.” (Luka 22:44; Hebhere 5:7) Hayi indlela umprofeti uIsaya awakuchaza ngokuchanileyo ngayo kusengaphambili ukubandezeleka kwakhe kuIsaya 53:3-7!
13. Nguwuphi umzekelo omhle uYesu awasimisela wona wokubeka uYise wasemazulwini?
13 Kwakhona uYesu ufanelwe yimbeko yethu ngenxa yomzekelo omhle awasimisela wona ekunikeleni imbeko kuYise wasezulwini. Ngokufanelekileyo wayenokuthi: “Ndibeka uBawo.” (Yohane 8:49) Ngamaxesha onke wambeka uYehova uThixo ngamazwi nangezenzo zakhe. Ngaloo ndlela, xa waphilisa umntu, ingxelo yeBhayibhile ayithi abantu bazukisa uYesu, kodwa ithi “[bamzukisa] uThixo.” (Marko 2:12) Ngoko ke, ekupheleni kobulungiseleli bakhe basemhlabeni, ngokufanelekileyo uYesu wayenokuthetha oku xa wayethandaza kuYise wasezulwini: “Ndikuzukisile emhlabeni, ndiwufezile umsebenzi obundinikile ukuba ndiwenze.”—Yohane 17:4.
Oko Asenzele Kona
14. Ukufa kukaYesu kwafeza ntoni ngenxa yethu nto leyo emenza afanelwe yimbeko?
14 Yaye hayi indlela uYesu Kristu afanelwe ngokukhulu ngayo yimbeko yethu ngenxa yako konke oko aye wakufeza ngenxa yethu! Wafela izono zethu ukuze sixolelaniswe noYehova uThixo. UYesu wathi ngaye: “UNyana woMntu engezanga kulungiselelwa; weza kulungiselela, nokuncama ubomi bakhe, bube yintlawulelo yokukhulula abaninzi.” (Mateyu 20:28) Ngaloo ndlela, ukufa kwakhe kwenza kwaba nokwenzeka konke oko kuya kufezwa buBukumkani ngenxa yethu bantu: ubomi bokungafi ezulwini kwabali-144 000 ababumba umtshakazi wakhe nobomi obungunaphakade kumhlaba oyiparadisi kwizigidi zabanye ezizingqina zinokholo nentobelo phantsi kweemvavanyo.—INdumiso 37:29; ISityhilelo 14:1-3; 21:3, 4.
15. Nguwuphi omnye umzekelo wokutyhila kukaYesu ubuntu bukaYise kuthi?
15 UYesu Kristu ukwafanelwe yimbeko ngenxa yokuba, njengoMfundisi Omkhulu, uye wakutyhila ngokugqibeleleyo ukuthanda nobuntu bukaYise kuthi. Ngokomzekelo, kwiNtshumayelo yakhe yaseNtabeni, walatha kububele bukaYise ngokukhupha ilanga nemvula kwabalungileyo nababi ngokufanayo waza ke waphawula oku: “Ngoko yibani ngabafezekileyo, njengokuba uYihlo wasemazulwini efezekile.”—Mateyu 5:44-48.
16. Umpostile uPawulos walishwankathela njani ikhondo likaYesu elifanelwe yimbeko?
16 Umpostile uPawulos walishwankathela kakuhle ikhondo likaYesu elifanelwe yimbeko xa wabhala oku: “Wathi, esebumeni bukaThixo, akathi ukulingana kwakhe oku noThixo kulixhoba; usuke wazihluba, wathabatha ubume bomkhonzi, enziwe wafana nabantu; wathi ngemo efunyenwe enjengomntu, wazithoba, waba ngolulamileyo, wada wesa ekufeni, ukufa ke [kwasemthini wentuthumbo, NW].”—Filipi 2:5-8.
Indlela Esinokumbeka Ngayo UNyana
17, 18. Ziziphi iindlela ezahlukahlukeneyo esinokuthi ngazo sinikele imbeko kuYesu Kristu?
17 Ekubeni ngokungathandabuzekiyo uYesu Kristu efanelwe yimbeko yethu, sifikelela kulo mbuzo: Sinokumbeka njani uNyana? Senjenjalo ngokubonakalisa ukholo kwidini lakhe lentlawulelo, ibe olo kholo silungqina ngokuthabatha amanyathelo ayimfuneko enguquko, ukubuya, uzahlulelo nobhaptizo. Ngokusondela kuYehova ngomthandazo egameni likaYesu, siyambeka ke uYesu. Ngokubhekele phaya, siyambeka xa sithobela la mazwi akhe: “Ukuba kukho othanda ukundilandela, makazincame ngokwakhe, awuthwale [“umthi wakhe wentuthumbo,” NW], andilandele.” (Mateyu 16:24) Siyambeka uYesu Kristu xa sithobela imiyalelo yakhe yokuqhubeka sifuna kuqala uBukumkani bukaThixo nobulungisa bakhe, yaye siyambeka xa sithobela umyalelo wakhe wokuba nesabelo kumsebenzi wokwenza abafundi. Kwakhona, siyambeka uYesu xa sibonakalisa uthando lobuzalwana awathi lwaluya kuba luphawu olufanisa abalandeli bakhe bokwenyaniso.—Mateyu 6:33; 28:19, 20; Yohane 13:34, 35.
18 Ngokubhekele phaya, sinikela imbeko kuNyana ngokulithabathela kuthi igama lakhe, sizibiza ngokuba singamaKristu, nangokuphila ngokuvisisana nelo gama ngehambo yethu entle. (IZenzo 11:26; 1 Petros 2:11, 12) Umpostile uPetros wathi sifanele silandele emanyathelweni kaYesu ngokusondeleyo. (1 Petros 2:21) Ngokumxelisa ngaloo ndlela kuyo yonke ihambo yethu, sikwanikela imbeko kuye. Yaye ngokuqinisekileyo, xa sisenza iSikhumbuzo sokufa kukaKristu minyaka le, simnika imbeko ekhethekileyo.—1 Korinte 11:23-26.
19, 20. (a) Yiyiphi imivuzo uYesu ayigcinele abalandeli bakhe ngoku nakwixesha elizayo ngenxa yokuba bembeka? (b) Sinokuqiniseka ngantoni ngoNyana?
19 Yiyiphi imivuzo uYesu ayigcinele abafundi bakhe ngenxa yokulandela ikhondo lokumbeka? Wathi: “Inene ndithi kuni, akukho namnye ushiye indlu, nokuba ngabazalwana, nokuba ngoodade, nokuba nguyise, nokuba ngunina, nokuba ngumfazi, nokuba ngabantwana, nokuba ngamasimi, ngenxa yam nangenxa yeendaba ezilungileyo ezi, ongayi kuthi amkeliswe kalikhulu: ngoku ngeli xesha, izindlu, nabazalwana, noodade, noonina, nabantwana, namasimi, ndawonye neentshutshiso; nakwelizayo iphakade, ubomi obungunaphakade.”—Marko 10:29, 30.
20 Oko kuthetha ukuba ukuba siyazincama ngenxa kaYesu, uya kuqinisekisa ukuba sifumana umvuzo. UYesu uyasiqinisekisa: “Wonke umntu ngoko oya kundivuma phambi kwabantu, ndiya kumvuma nam phambi koBawo osemazulwini.” (Mateyu 10:32) Ngoko kanye njengokuba uBawo wasemazulwini ebabeka abo bambekayo, sinokuqiniseka ukuba uNyana kaYehova ekuphela kwamzeleyo uya kuxelisa uYise kule nkalo, kanye njengokuba uNyana esenza kweminye imibandela.
Ubuya Kuphendula Njani?
◻ Abaninzi kwiNgqobhoko bakubonisa njani ukungambeki uNyana?
◻ Bubuphi ubungqina uYesu awabunikelayo bobukho bakhe bangaphambi kokuba ngumntu?
◻ Ziziphi ezinye zezizathu esinazo zokumbeka uYesu?
◻ Ziziphi ezinye zeendlela esinokumbeka ngazo uYesu?
◻ Ukubeka uYesu Kristu kuphumela kweziphi iingenelo?