Ngaba Uwaphaphele Amaxesha Ethu?
UKUHLALA uphaphele ingozi kunokwenza umahluko phakathi kobomi nokufa. Oku kunokuzekeliswa noko kwenzeka kwiziqithi ezibini ezinentaba-mlilo.
INtaba iPelée, eyona ntaba-mlilo iyingozi kwinkulungwane yama-20, eyaqhambuka ngoMeyi 8, 1902, kwisiqithi seCaribbean eMartinique. Yabulala phantse bonke abahlali abangama-30 000 ngaphandle nje kwabambalwa baseSaint Pierre, isixeko esasikufuphi nentaba-mlilo.
NgoJuni 1991, kwiNtaba iPinatubo kwabakho olona gqabhuko-dubulo lwakhe lwalukhulu kule nkulungwane. Lwenzeka kummandla owawuxinene kakhulu wakwiiPhilippines lwaza lwabulala abantu abanokuba ngama-900. Noko ke, ngeli xesha kwakukho iinkalo ezimbini ezanceda ekusindiseni ubomi babantu abangamakhulu: (1) ukuyiphaphela ingozi (2) ukukulungela ukwenza ngokuvisisana nezilumkiso.
Isenzo Esifanelekileyo Sasindisa Ubomi
INtaba yasePinatubo yayizolile kangangeminyaka eliqela xa ngoAprili 1991, yabonakalisa imiqondiso yokuba iza kudubula. Yaqalisa ukukhupha ulophu nesulfur dioxide encochoyini. Abahlali baqalisa ukuva ukushukuma komhlaba izihlandlo ezininzi yaye kwaqala ukuphuma udaka oluqinileyo kuloo ntaba. Izazinzulu ezisuka kwiPhilippine Institute of Volcanology and Seismology zahlala zibeke iliso yaye ekuhambeni kwexesha zabaqinisekisa abasemagunyeni ngemfuneko yokufuduswa kwabantu abangama-35 000 beedolophu needolophana ezikufuphi.
Ngokuqhelekileyo abantu abakuthandi ukushiya amakhaya abo ngaphandle kwesizathu, kodwa ukuthandabuza kwabo kwaphela xa umboniso wevidiyo wabonisa ngokucacileyo ngeengozi ezenzekayo xa kukho ugqabhuko-dubulo. Loo mfuduko yenzeka ngexesha elifanelekileyo. Kwiintsuku ezimbini kamva, kwabakho ukudubula okukhulu komsi emoyeni owagubungela iikyubhiki khilomitha ezisibhozo. Kamva, udaka oluninzi lwabulala abantu abaninzi. Noko ke, kusenokwenzeka ukuba amawaka asinda, ngenxa yokuba abantu babelunyukisiwe ngengozi yaye benza ngokuvisisana nezo zilumkiso.
Ukusinda Kwintlekele Ebangelwe Ngabantu
Ngenkulungwane yokuqala yeXesha lethu Eliqhelekileyo, amaKristu awayehlala eYerusalem kwafuneka agqibe enoba amele awashiye amakhaya awo. Ukusaba kweso sixeko ngowama-66 C.E. kwawasindisa ekutshatyalalisweni nto leyo eyenzeka kwabanye abahlali namawaka amaYuda awayeze eYerusalem kwiPasika yowama-70 C.E. Abantu abangaphezu kwesigidi babengaphakathi kweso sixeko sasibiyelwe ngodonga beze kwiPasika, xa imikhosi yaseRoma yavala naliphi na ithuba lokusaba. Indlala, izixholoxholo, nokuhlasela kwamaRoma ngolunya kwaphumela ekufeni kwabantu abangaphezu kwesigidi.
Intlekele eyaphelisa imvukelo yamaYuda ngokuchasene namaRoma ayizange iqubule. Kumashumi eminyaka ngaphambilana, uYesu Kristu waxela kwangaphambili ukuba iYerusalem yayiya kurhangqwa. Wathi: “Xa niyibona iYerusalem ingqongwe yimikhosi emise iintente, nandule ke nazi ukuba ukuphanziswa kwayo kusondele. Mabandule ke abo bakwelakwaYuda baqalise ukusabela ezintabeni, nabo baphakathi kuyo mabemke, nabo bakwiindawo ezisemaphandleni mabangangeni kuyo.” (Luka 21:20, 21) Loo miyalelo yayicacile, yaye abalandeli bakaYesu bayithabathela ingqalelo.
Umbhali-mbali wenkulungwane yesine uEusebius waseKesareya unikela ingxelo yokuba onke amaKristu akwaYuda asiphulaphula isilumkiso sikaYesu. Xa amaRoma arhangqa iYerusalem ngowama-66 C.E., uninzi lwamaKristu angamaYuda lwaya kuhlala neNtlanga kwisixeko sasePella, kummandla waseRoma ePereya. Ngokuhlala ephaphile ixesha lawo nangokwenza ngokuvisisana nesilumkiso sikaYesu, akwazi ukusinda koko kwakubizwa ngokuba “lolona ngqingo olwakhe lwalukhulu kuyo yonke imbali.”
Kufuneka ukuphapha okunjalo nanamhlanje. Kunjalo kwanangesenzo esingqalileyo. Inqaku elilandelayo liza kucacisa isizathu soko.
[Inkcazelo Ngomfanekiso okwiphepha 3]
Godo-Foto, West Stock