Imbono YeBhayibhile
Iintlekele—Ngaba Zisisohlwayo Esivela KuThixo?
KWIIPHILIPPINES, ilizwe elithwaxwa ngokuphindaphindiweyo ziintlekele zokwemvelo, abantu abaninzi baye bazibuza oku, ‘Ngaba uThixo ulinga umntu ngeentlekele ezinjalo?’ Ngowe-1991, emva kolona gqabhuko-dubulo lwentaba-mlilo lutshabalalisayo kule nkulungwane, umxholo oyintloko welinye iphephandaba lakwiiPhilippines wabuza oku: “Ugqabhuko-dubulo: Ngaba Lusisohlwayo Esivela KuThixo?”
Umbhali wemihlathi kweloo phephandaba uNelly Favis-Villafuerte wavakalisa imbono enjalo xa wabhala oku: “Noko ke kumaKristu akholelwa eBhayibhileni—kukho inkcazelo nje enye: ugqabhuko-dubulo lwentaba-mlilo olwenzeka kwiNtaba iPinatubo sisibetho sobuthixo kwakhona esisikhumbuza ukuba kukho uThixo owoyikekayo nowongamileyo onamandla okulawula imicimbi aze amisele kwangaphambili okuya kwenzeka ebantwini nakwiintlanga.” Ngokweli bango, sibuza oku:
Ngaba UThixo USomandla Ugweba Uluntu Namhlanje?
Ayinakukhanyelwa into yokuba uThixo wenjenje mandulo. Imizekelo ebhalwe eZibhalweni engoMkhukula womhla kaNowa, intshabalalo yeSodom neGomora, yaye kangangezihlandlo ezibini ukutshatyalaliswa kweYerusalem, isixeko esinxulunyaniswa negama lakhe elikhulu, ibonisa ukuba uThixo uSomandla unokuzisa umgwebo wangabom kwabo basilela ngokuphiphindiweyo ukuphila ngemilinganiselo yakhe.—Genesis 7:11, 17-24; 19:24, 25; 2 Kronike 36:17-21; Mateyu 24:1, 2.
Kodwa kuthekani namhlanje? KuMateyu isahluko 24, kuMarko isahluko 13, nakuLuka isahluko 21 uYesu Kristu waxela kwangaphambili ukuba kwakuya kubakho ixesha lentlekele yehlabathi jikelele. Kwezi zahluko, walumkisa ngokuprofetayo ngeziganeko neemeko ezaziya kunxulunyaniswa nokuqosheliswa kwale nkqubo yezinto ukuze abantu abaqiqayo baqonde ukuba wayelawula ngokungabonakaliyo emazulwini. Ezi ziprofeto ziyazaliseka namhlanje. Noko ke, kufanele kuphawulwe ukuba ngamnye wale migwebo ikhankanywe ngasentla, uYehova uThixo wanikela isilumkiso esicacileyo, nesasiphindaphindwa ngaphambi kokufika kwentshabalalo. (Amosi 3:7) Phofu ke, kwimeko yeentlekele zokwemvelo ezenzeka kwixesha lethu, ngokuqhelekileyo izilumkiso zinikelwa ngamagunya ehlabathi, zisekelwe kwizinto eziphawulwe ngokwenzululwazi.
Ngaphezu koko, umfundi uYakobi usixelela oku kwisahluko sokuqala sencwadi yakhe, indinyana 13: “UThixo akanakuhendeka kokubi, akahendi namnye ke yena.” Ngokwanda kwabemi ehlabathini ngokubanzi, umntu uye wasesichengeni seengozi ezininzi ezinokubakho. Ukufuna indawo yokuhlala neyokulima ukutya kuphumela ekugawulweni kwemithi kwimimandla eyayingamahlathi ngaphambili, maxa wambi kude kufak’ isandla kubukhulu bezinye iintlekele zokwemvelo ezibangelwa zizantyalantyala zemvula nezikhukula ezitshabalalisayo.
Ngoko ke bekungayi kuba kokuchanileyo ukuthi iintlekele zokwemvelo zithunyelwa ngokuthe ngqo nguThixo uSomandla njengesohlwayo kubantu abahlala kwimimandla echaphazelekayo. Enyanisweni, kulula ukubona ukuba abantu abaninzi abamsulwa, njengabantwana abancinane, ngabona babandezelekayo ngamaxesha enkxwaleko. Noko ke, nakubeni uThixo uSomandla engazibangeli iintlekele ezinjalo, sisenokubuza oku:
Ngaba Kukho Esinokukufunda Kuzo?
Ewe. Kwabo bahlala kwimimandla echaphazelekayo, kukho uvavanyo lokuba bazixabisa kangakanani na izinto zabo eziphathekayo xa kuthelekiswa nobomi ngokwabo. Abantu baye bazibeka esichengeni ngokungeyomfuneko nangendlela esongel’ ubomi kumaxesha anjalo ukuze nje basindise izinto zabo ezimbalwa. Kufuneka sikhumbule ukuba uYesu wathi: “Ubomi bomntu abumi ngabuninzi bempahla yakhe.” (Luka 12:15) Izinto eziphathekayo zisenokubuyiswa, kodwa akukho mntu unokubuyisa ubomi bakhe.—Mateyu 6:19, 20, 25-34.
intlekele zokwemvelo zikwabangela ukuba abantu ngabanye baqwalasele indlela abaphila ngayo ubomi babo. Umpostile uPawulos wabongoza amaKristu ukuba ayinyamekele indlela aziphatha ngayo esithi: “Ngoko yihlolisise ngenyameko indlela ohamba ngayo, kungekhona ngokungenabulumko kodwa ngobulumko, ulisebenzisa kakuhle kangangoko unako ixesha lamanqam, ngokuba le mihla ingendawo.” (Efese 5:15, 16, Byington) Uvavanyo ngalunye umntu ajamelana nalo ebomini bakhe lusikhumbuzo sendlela ekubaluleke ngayo ukuba nokholo olomeleleyo.
Isifundo sesithathu esisifunda kwiintlekele zokwemvelo sikukuba kufuneka sikhulise ulwazelelelo olungakumbi, okanye uvelwano ngabanye. Kummandla wentlekele, inkxalabo enothando kufuneka iboniswe kwizihlobo ezichaphazelekayo zikabani kunokuba nesimo sengqondo sokuba umntu ngamnye ufanele aziphandele. Oku kunjalo ngokukodwa kwabo banikwe imbopheleleko yokunyamekela abanye. Umprofeti uIsaya wabachaza abo wayebabiza ngokuba ‘ngabathetheli’ njengabo ‘banjengendawo yokuzimela umoya, neyokusithela esiphangweni; nabanjengemijelo yamanzi emqwebedwini, nabanjengomthunzi wengxondorha enkulu ezweni elibharhileyo.’—Isaya 32:1, 2.
Ekubonakaliseni uvelwano ebudeni beentlekele, kukho izihlandlo ezininzi zokwabelana nabanye ngoko umntu anako, ngamazwi nangezenzo. Ngokomzekelo, ugqabhuko-dubulo lwentaba-mlilo kwiNtaba iPinatubo neentlekele ezaba ngumphumo wayo lwavulela amathuba amaninzi okuba nesabelo ekuncedeni abo kwafuneka basabe kuloo ntlekele. Abaninzi babengenazindlela zokufumana kwanokutya kwemihla ngemihla. Ngaloo ndlela, abantu ngabanye bakwazi ukubonakalisa ukungazicingeli bona bodwa ngokunikela uncedo kwabanye. Sekunjalo, abaninzi baye bazibuza oku:
Ngaba Uya Kubakho Umgwebo Wokugqibela Woluntu?
Ewe, uya kubakho, njengoko kuboniswe ngokucacileyo eLizwini likaThixo. (Mateyu 24:37-42; 2 Petros 3:5-7) Ngaphambi kokuba loo mgwebo ufike, umsebenzi wokunikela isilumkiso ehlabathini lonke ufanele wenziwe, njengokuba uYesu wahlabela mgama eprofeta esithi: “Kumele ukuthi ke ukuqala kuvakaliswe iindaba ezilungileyo ezi kuzo zonke iintlanga.”—Marko 13:10.
Ngaloo ndlela, ngamnye wethu kufuneka azibuze oku, ‘Yintoni endiya kuyenza?’ Sikubongoza ukuba uzinike ixesha lokuphengulula oko iBhayibhile ibongoza ngamnye wethu ukuba akwenze ukuze asinde kuloo ntlekele yomhlaba wonke.