Ukulinda “Ngolindelo Lwentumekelelo”

“Ngolindelo lwentumekelelo indalo ilindele ukutyhilwa koonyana bakaThixo.”—ROMA 8:19.

1. Imeko yamaKristu anamhlanje ifana njani neyamaKristu enkulungwane yokuqala?

IMEKO yamaKristu anamhlanje ifana twatse neyamaKristu enkulungwane yokuqala. Yayisisiprofeto esasincede abakhonzi bakaYehova baloo mihla ukuba baqonde ixesha uMesiya awayefanele abonakale ngalo. (Daniyeli 9:24-26) Kwaesi siprofeto sinye saxela kwangaphambili ngokutshatyalaliswa kweYerusalem kodwa asawachazela kusengaphambili loo maKristu ngexesha esasiya kutshatyalaliswa ngalo eso sixeko. (Daniyeli 9:26b, 27) Ngendlela efanayo, sikho isiprofeto esiye sabagcina bejonge enkalweni abafundi beBhayibhile benkulungwane ye-19. Ekubeni ayenxibelelanisa ‘amaxesha asixhenxe’ achazwe kuDaniyeli 4:25 kunye ‘namaxesha eentlanga,’ alindela ukuba uKristu wayeza kufumana amandla oBukumkani ngowe-1914. (Luka 21:24; Hezekile 21:25-27) Ngoxa incwadi kaDaniyeli iqulethe intlaninge yeziprofeto, akukho nasinye kuzo esinika abafundi beBhayibhile bale mihla umnyinyiva wokuba iya kutshatyalaliswa nini na inkqubo yezinto kaSathana iphela. (Daniyeli 2:31-44; 8:23-25; 11:36, 44, 45) Noko ke, oko kuza kwenzeka kungekudala, kuba sele siphila ‘kwixesha lokuphela.’—Daniyeli 12:4.a

Ukuhlala Silindile Ebudeni Bobukho BukaKristu

2, 3. (a) Yintoni eyila obona bungqina bubambekayo bokuba siphila ebudeni bobukho bukaKristu ekumandla obukumkani? (b) Yintoni ebonisa ukuba amaKristu ayemele ahlale ekhangele ebudeni bobukho bukaYesu Kristu?

² Kuyinyaniso ukuba, sisiprofeto esenza amaKristu alindela ukuba uKristu abe semandleni oBukumkani ngowe-1914. Kodwa “umqondiso” uKristu awayethethe ngawo wobukho bakhe nowokuqosheliswa kwale nkqubo yezinto ubalaselisa iziganeko. Yaye inkoliso yazo yayiza kubonakala sele buqalisile ubukho bakhe. Ezo ziganeko—iimfazwe, ukunqongophala kokutya, iinyikima, iindyikityha zokufa, ukwanda kolwaphulo-mthetho nokutshutshiswa kwamaKristu, nokushunyayelwa kweendaba ezilungileyo zoBukumkani ehlabathini lonke—zibobona bungqina bubambekayo bokuba ngoku siphila ebudeni bobukho bukaKristu ekumandla obukumkani.—Mateyu 24:3-14; Luka 21:10, 11.

³ Ukanti, owona mongo wesiluleko sikaYesu esasisiya kubafundi bakhe wawusithi: “Hlalani nikhangele, hlalani nivukile, . . . Hlalani nilindile.” (Marko 13:33, 37; Luka 21:36) Xa uwufunda ngenyameko umongo wezi zibongozo zokuhlala silindile uya kufumanisa ukuba uKristu wayengabhekiseli ngokuyintloko ekuqwalaseleni umqondiso wokuqalisa kobukho bakhe. Kunoko, wayeyalela abafundi bakhe bokwenyaniso ukuba bahlale belindile ebudeni bobukho bakhe. Yintoni le yayiza kukhangelwa ngamaKristu okwenyaniso?

4. Wawuza kufeza yiphi injongo umqondiso owawunikelwe nguYesu?

⁴ Ngesi siprofeto sakhe sibalaseleyo, uYesu wayephendula umbuzo othi: “Ziya kubakho nini na ezi zinto, kwaye uya kuba yintoni na umqondiso wobukho bakho nowokuqosheliswa kwenkqubo yezinto?” (Mateyu 24:3) Ngenxa yalo mqondiso wawuxelwe kwangaphambili kwakungayi kubonakala ubukho bukaKristu nje kuphela kodwa kwakuya kubonakala neziganeko ezikhokelela ekuphelisweni kwale nkqubo ingendawo ikhoyo yezinto.

5. UYesu wabonisa njani ukuba nangona ekho ngokomoya, wayeza kuphinda ‘eze’?

⁵ UYesu wabonisa ukuba ebudeni “bobukho” (pa·rou·siʹa, ngesiGrike) bakhe wayeya kuza enamandla nozuko. Ethetha ngoko “kuza” (okuchazwa ngamagama anengcambu yegama lesiGrike elithi erʹkho·mai), wavakalisa oku: “Uya kwandula ke umqondiso woNyana womntu ubonakale ezulwini, zandule zonke izizwe zomhlaba zimbambazele zisenza isijwili, ibe ziya kumbona uNyana womntu esiza esemafini ezulu enamandla nozuko olukhulu. . . . Ke kaloku fundani kuwo umkhiwane le ngongoma njengomzekeliso: Kwakamsinya nje lakuba isetyana lawo lithamba lize livelise amagqabi, niyazi ukuba ihlobo likufuphi. Ngokunjalo kwanani, xa nizibona zonke ezi zinto, yazini ukuba [uKristu] ukufuphi eminyango. . . . Ngoko ke, hlalani nilindile, ngenxa yokuba aniwazi umhla eza ngawo iNkosi yenu. . . . Zingqineni nilungile, ngenxa yokuba uNyana womntu uza ngelixa eningacinganga ukuba lilo.”—Mateyu 24:30, 32, 33, 42, 44.

Siyintoni Isizathu Sokuza KukaYesu Kristu?

6. Iza kutshatyalaliswa njani ‘iBhabhiloni Enkulu’?

⁶ Nangona ebekho njengoKumkani ukususela ngowe-1914, uYesu Kristu usamele agwebe iinkqubo kunye nabantu ngabanye ngaphambi kokuba azise umgwebo kwabo abafumanisa bengendawo. (Thelekisa eyesi-2 kwabaseKorinte 5:10.) Kungekudala uYehova uza kwenza abalawuli bezobupolitika bavunukele baze batshabalalise “iBhabhiloni Enkulu,” ubukhosi behlabathi bonqulo lobuxoki. (ISityhilelo 17:4, 5, 16, 17) Umpostile uPawulos walikhupha latsola elokuba nguYesu Kristu oya kutshabalalisa ‘umntu wokuchas’ umthetho’—abefundisi abangabawexuki beNgqobhoko, abayinxalenye enkulu ‘yeBhabhiloni Enkulu.’ UPawulos wabhala: “Lowo uchas’ umthetho uya kutyhilwa, lowo iNkosi uYesu eya kumbhangisa ngomoya womlomo wayo ize imtshitshise ngembonakaliso yobukho bayo.”—2 Tesalonika 2:3, 8.

7. Xa uNyana womntu efika ekuzuko lwakhe, nguwuphi umgwebo aya kuwuphumeza?

⁷ Kungekudala, uKristu uya kugweba abantu beentlanga ngokwendlela abaye babaphatha ngayo abazalwana bakhe abasesemhlabeni. Sifunda oku: “Xa uNyana womntu efika ekuzuko lwakhe, nazo zonke iingelosi zikunye naye, uya kwandula ke ahlale phantsi kwitrone yakhe ezukileyo. Kwaye zonke iintlanga ziya kuhlanganiselwa phambi kwakhe, yaye uya kwahlula abantu omnye komnye, kanye njengokuba umalusi esahlula izimvu ezibhokhweni. Yaye uya kubeka izimvu ngakwisandla sakhe sasekunene, kodwa iibhokhwe ngasekhohlo kwakhe. . . . Ukumkani uya kuthi [kwizimvu], ‘Enyanisweni ndithi kuni, Ngokomkhamo eningazange nikwenze ngawo komnye waba bangabona bancinane, anikwenzanga kum.’ . . . Kwaye aba [baziibhokhwe] baya kumka baye kunqunyulo lukanaphakade, kodwa bona abangamalungisa baye ebomini obungunaphakade.”—Mateyu 25:31-46.

8. UPawulos ukuchaza njani ukuza kukaKristu eze kuphumeza umgwebo kwabangahloneli Thixo?

⁸ Njengoko kuboniswe kumzekeliso wezimvu neebhokhwe, nguYesu ozisa umgwebo wokugqibela kwabo bangahloneli Thixo. UPawulos waqinisekisa amanye amakholwa abandezelekileyo awayekhonza nawo ‘ngokukhululeka kunye nathi ekutyhilekeni kweNkosi uYesu ivela ezulwini kunye neengelosi zayo ezinamandla isemlilweni odangazelayo, njengoko izisa impindezelo kwabo bangamaziyo uThixo nakwabo bangazithobeliyo iindaba ezilungileyo ezingeNkosi yethu uYesu. Kanye aba baya kuva isohlwayo sesigwebo sentshabalalo engunaphakade bemke phambi kweNkosi nakuzuko lwamandla ayo, ngexesha eza ukuze izukiswe ngokunxibelelene nabo bangcwele bayo.’ (2 Tesalonika 1:7-10) Ekubeni sisalindele ezi ziganeko zibangel’ imincili, ngaba asifanele sibe nokholo yaye sihlale sikulinde ngolangazelelo ukuza kukaKristu?

Ukukulindela Ngentumekelelo Ukutyhileka KukaKristu

9, 10. Kutheni abathanjiswa abasesemhlabeni bekulindele ngentumekelelo ukutyhileka kukaYesu Kristu?

⁹ ‘Ukutyhileka kweNkosi uYesu ivela ezulwini’ akuyi kwenzeka ukuze kutshatyalaliswe abangendawo kuphela kodwa kuya kuza nomvuzo kwabangamalungisa. Intsalela esesemhlabeni yabazalwana abathanjisiweyo bakaKristu isenokubandezelwa ngaphambi kokutyhileka kukaKristu, kodwa iyavuya kwithemba layo lasezulwini. Ebhalela amaKristu athanjisiweyo, umpostile uPetros wathi: “Qhubekani ninemihlali njengoko ninesabelo kwiimbandezelo zikaKristu, ukuze nibe nemihlali yaye nivuye ngokugqithiseleyo nasebudeni bokutyhileka kozuko lwakhe.”—1 Petros 4:13.

¹⁰ Abathanjiswa bazimisele ukuhlala bethembekile de uKristu ‘abahlanganisele ndawonye kuye’ ukuze “umlinganiselo ovavanyiweyo” wokholo lwabo “ufunyanwe ungunobangela wendumiso nozuko nembeko ekutyhilekeni kukaYesu Kristu.” (2 Tesalonika 2:1; 1 Petros 1:7) Ngokuphathelele loo maKristu athembekileyo azelwe ngomoya, kunokutshiwo ukuba: “Ubungqina obungoKristu buye benziwa baqina phakathi kwenu, kangangokuba anisileli nakwisiphi na isiphiwo konke konke, ngoxa nilinde ngentumekelelo ukutyhileka kweNkosi yethu uYesu Kristu.”—1 Korinte 1:6, 7.

11. Yintoni eyenziwa ngamaKristu athanjisiweyo logama esalinde ukutyhilwa kukaYesu Kristu?

¹¹ Intsalela ivakalelwa ngendlela efanayo nekaPawulos, owabhala esithi: “Iimbandezelo zeli xesha langoku ndizibalela ekuthini azilingani nayo nantoni na xa zithelekiswa nozuko oluza kutyhilwa kuthi.” (Roma 8:18) Ukholo lwayo aluxhomekekanga kubalo-maxesha ukuze luhlale lukho. Izigcina ixakekile enkonzweni kaYehova, imisela umzekelo omhle koogxa bayo, “ezinye izimvu.” (Yohane 10:16) Aba bathanjiswa bayazi kananjalo ukuba isiphelo sale nkqubo sisemnyango, ibe bathobela isibongozo sikaPetros esithi: “Iingqondo zenu ziqiniseleni umsebenzi, gcinani iingqiqo zenu ngokupheleleyo; bekani ithemba lenu kububele obungasifanelanga obuza kuziswa kuni ekutyhilekeni kukaYesu Kristu.”—1 Petros 1:13.

‘Ulindelo Lwentumekelelo Lwendalo’

12, 13. Indalo engabantu iye “yathotyelwa kokuphuthileyo” ngayiphi indlela, yaye yintoni elangazelelwa ngabezinye izimvu?

¹² Ngaba nezinye izimvu zinento ezinokuyilindela ngentumekelelo? Ngokuqinisekileyo zinayo. Emva kokuthetha ngethemba elizukileyo labo bamkelwe ‘njengoonyana’ abazelwe ngomoya bakaYehova ‘neendlalifa ezimanyene noKristu’ kuBukumkani basezulwini, uPawulos wathi: “Ngolindelo lwentumekelelo indalo ilindele ukutyhilwa koonyana bakaThixo. Kuba indalo yathotyelwa kokuphuthileyo, kungengakuthanda kwayo kodwa ngalowo wayithobelayo, ngesizinzi sethemba lokuba nayo indalo ngokwayo iya kukhululwa ekukhotyokisweni kukonakala ize ibe nenkululeko ezukileyo yabantwana bakaThixo.”—Roma 8:14-21; 2 Timoti 2:10-12.

¹³ Yonke inzala ka-Adam “yathotyelwa kokuphuthileyo” ngenxa yesono sakhe, ngaloo ndlela izalelwa kubukhoboka besono nokufa. Ayikhange ikwazi ukuzikhulula kobo bukhoboka. (INdumiso 49:7; Roma 5:12, 21) Kwowu, hayi indlela ezinye izimvu ezikulangazelela ngayo ‘ukukhululwa ekukhotyokisweni kukonakala’! Kodwa ke ngaphambi kokuba kwenzeke oko, kukho izinto ezithile ezimele zenzeke ngokwamaxesha namathuba kaYehova.

14. Kuza kubandakanya ntoni ‘ukutyhilwa koonyana bakaThixo,’ yaye oku kuya kuphumela njani ekubeni uluntu ‘lukhululwe ekukhotyokisweni kukonakala’?

¹⁴ Okokuqala kumele ‘kutyhilwe’ intsalela ‘yoonyana bakaThixo.’ Kuya kubandakanya ntoni oku? Ngexesha elifanelekileyo likaThixo, abezinye izimvu baya kubona ukuba abathanjiswa sele ‘betywinwe’ ngokusisigxina baza bazukiswa ukuze balawule noKristu. (ISityhilelo 7:2-4) Kwakhona aba “nyana bakaThixo” bavusiweyo baya ‘kutyhilwa’ xa besiba negalelo noKristu ekutshabalaliseni inkqubo yezinto engendawo kaSathana. (ISityhilelo 2:26, 27; 19:14, 15) Baya kwandula ke, ebudeni boLawulo Lwewaka Leminyaka lukaKristu, ‘batyhilwe’ ngokubhekele phaya njengamajelo angababingeleli asasaza iingenelo zedini lentlawulelo likaYesu ‘kwindalo’ engabantu. Umphumo woku uya kuba ‘kukukhululwa koluntu ekukhotyokisweni kukonakala’ baze ekugqibeleni bangene ‘kwinkululeko ezukileyo yabantwana bakaThixo.’ (Roma 8:21; ISityhilelo 20:5; 22:1, 2) Ekubeni benala mathemba azukileyo, ngaba kungumnqa ukuba abezinye izimvu ‘bakulindele ngentumekelelo ukutyhilwa koonyana bakaThixo’?—Roma 8:19.

Umonde KaYehova Uthetha Usindiso

15. Yintoni esingafanele siyilibale ngokuphathelele ixesha leziganeko elimiselwa nguYehova?

¹⁵ UYehova nguMgcini Wexesha Ozukileyo. Ixesha alimisele iziganeko ezithile liya kungqineka ligqibelele. Izinto zisenokungasoloko zihamba ngendlela esizilindela ngayo. Noko ke, sinokuba nokholo olupheleleyo lokuba onke amadinga kaThixo aya kuzalisekiswa. (Yoshuwa 23:14) Usenokuvumela izinto zithabathe ixesha elidana kunokuba abantu abaninzi bebelindele. Kodwa masizame ukuziqonda iindlela zakhe yaye sincome indlela alumke ngayo. UPawulos wabhala: “Owu hayi ubunzulu bobutyebi nobobulumko nobolwazi lukaThixo! Hayi indlela engaphengululeki ngayo imigwebo yakhe nendlela ezingalandeki ngayo iindlela zakhe! Kuba ‘ngubani na ofikelele ekuyazini ingqondo kaYehova, okanye ngubani na oye waba ngumcebisi wakhe?’”—Roma 11:33, 34.

16. Ngoobani abafanelekela ukungenelwa kumonde kaYehova?

¹⁶ UPetros wabhala: “Zintanda, ekubeni nilindele ezi zinto [ukutshatyalaliswa ‘kwamazulu’ “nomhlaba” omdala aze athatyathelw’ indawo ‘ngamazulu amatsha nomhlaba omtsha’ othenjiswe nguThixo], yenzani unako-nako ukuze ekugqibeleni nifunyanwe nguye ningenabala kwaye ningenasiphako yaye niseluxolweni. Ngapha koko, wugqaleni umonde weNkosi yethu njengosindiso.” Ngenxa yomonde kaYehova, izigidi zabantu zinikwa ithuba lokusindiswa ‘kwimini kaYehova,’ eza kufika ngebhaqo “njengesela.” (2 Petros 3:9-15) Umonde wakhe ukwavumela ngamnye wethu ukuba ‘asebenzele usindiso lwakhe ngoloyiko nangokungcangcazela.’ (Filipi 2:12) UYesu wathi simele ‘sinikele ingqalelo kuthi ngokwethu’ size ‘sihlale sivukile’ ukuba sifuna ukufanelekela yaye siphumelele “ekumeni phambi koNyana womntu.”—Luka 21:34-36; Mateyu 25:31-33.

Qhubeka Ulinde Ngonyamezelo

17. Ngawaphi amazwi kampostile uPawulos esifanele siwathobele?

¹⁷ UPawulos wabongoza abazalwana bakhe bokomoya ukuba bagcine amehlo abo, “kungekhona kwizinto ezibonwayo, kodwa kwizinto ezingabonwayo.” (2 Korinte 4:16-18) Wayefuna kungabikho nto isitha umvuzo wabo wasezulwini owawubekwe phambi kwabo. Enoba singamaKristu athanjisiweyo okanye singawezinye izimvu, masigcine iingqondo zethu zikwithemba elizukileyo elibekwe phambi kwethu size singatyhafi. ‘Masihlale silinde ngonyamezelo,’ ukuze kucace ukuba “thina asilulo uhlobo lwabo barhwaqelela emva entshabalalweni, kodwa siluhlobo olunokholo olugcina umphefumlo uphila.”—Roma 8:25; Hebhere 10:39.

18. Kutheni sinokuyekela amaxesha namathuba ezandleni zikaYehova ngomzimb’ ongenaxhala?

¹⁸ Sinako ukuwayekela ezandleni zikaYehova amaxesha namathuba sinomzimb’ ongenaxhala. Ukuzaliseka kwamadinga akhe ngexesha alimiseleyo ‘akuyi kubuya umva.’ (Habhakuki 2:3) Kwangaxeshanye, isibongozo sikaPawulos esasisiya kuTimoti sitsho sabaluleka nangakumbi kuthi. Wathi: “Ndiyakuyala ngokunzulu phambi koThixo noKristu Yesu, omiselwe ukugweba abaphilayo nabafileyo, nangembonakaliso yakhe nobukumkani bakhe, lishumayele ilizwi, ube kulo ngokungxamisekileyo ngexesha elilungileyo, ngexesha lenkathazo . . . Yenza umsebenzi womvangeli, bufeze ngokuzeleyo ubulungiseleli bakho.”—2 Timoti 4:1-5.

19. Yintoni abantu bakaYehova abasenexesha lokuyenza, yaye ngoba?

¹⁹ Ubomi bethu nobabamelwane bethu busemngciphekweni. UPawulos wabhala: “Nikela ingqalelo rhoqo kuwe nakwimfundiso yakho. Hlala kwezi zinto, kuba ngokwenza oku uya kusindisa kokubini wena nabo bakuphulaphulayo.” (1 Timoti 4:16) Ixesha lale nkqubo ingendawo yezinto sele lixhatshwe yinja. Ngoxa sizilindele ngentumekelelo iziganeko eziza kuhla, masihlale sikhumbula ukuba eli lixesha nethuba elimiselwe nguYehova lokuba abantu bakhe bashumayele iindaba ezilungileyo zoBukumkani. Loo msebenzi umele wenziwe de aneliseke. “Kwandule ke” njengoko uYesu watshoyo, “kufike ukuphela.”—Mateyu 24:14.

[Imibhalo esemazantsi]

Makhe Senze Impinda

◻ Ngokuphathelele ubalo-maxesha, imeko yethu ifana njani neyamaKristu enkulungwane yokuqala?

◻ Kutheni amaKristu emele ‘ahlale ekhangele,’ kwanasebudeni bobukho bukaKristu?

◻ Kutheni indalo engabantu ikulindele ngentumekelelo ‘ukutyhilwa koonyana bakaThixo’?

◻ Kutheni sinokuyekela amaxesha namathuba ezandleni zikaYehova ngomzimb’ ongenaxhala?

[Umfanekiso okwiphepha 17]

AmaKristu amele ahlale ethe qwa elindele ukuza kukaKristu

[Umfanekiso okwiphepha 18]

Intsalela ethanjisiweyo izigcina ixakekile enkonzweni kaYehova, ukholo lwayo ayilusekeli kubalo-maxesha