Inkokeli Yethu Ixakekile Nanamhlanje
“Waphuma esoyisa nokuze akuphelelise ukoyisa kwakhe.”—ISITYHI. 6:2.
1, 2. (a) IBhayibhile ikuchaza njani ukumiselwa kukaKristu ebukumkanini ngowe-1914? (b) Yintoni ebisenziwa nguKristu ukususela ekubekweni kwakhe etroneni?
UKRISTU wabekwa etroneni njengoKumkani woBukumkani bukaYehova obungoMesiya ngowe-1914. Sicinga ukuba wenza ntoni ngoku? Ngaba sicinga ngaye njengokumkani wexesha elizayo ohleli etroneni yakhe, omane ekhangela emhlabeni ukuze abone indlela eliqhuba ngayo ibandla lakhe? Ukuba sicinga njalo, asichananga. Incwadi yeeNdumiso neyeSityhilelo zimchaza njengokumkani ophalisa ihashe “esoyisa nokuze akuphelelise ukoyisa kwakhe,” de afikelele “empumelelweni.”—ISityhi. 6:2; INdu. 2:6-9; 45:1-4.
2 Into yokuqala eyenziwa nguKristu emva kokuba ebekwe etroneni njengokumkani, yaba kukoyisa “inamba kunye neengelosi zayo.” Njengesiphatha-zingelosi esinguMikayeli, ekunye neengelosi zakhe, uKristu wamkhupha uSathana needemon zakhe kwizulu elingcwele waza wabaphosela emhlabeni. (ISityhi. 12:7-9) Emva koko, ‘njengomthunywa womnqophiso’ kaYehova, uYesu weza kuhlola itempile yokomoya ekunye noYise. (Mal. 3:1) Wagweba iNgqobhoko eyiyeyona nxalenye ‘yeBhabhiloni Enkulu’ ebekek’ ityala ngenxa yophalazo-gazi nokukrexeza ngokomoya nenkqubo yezopolitiko yeli hlabathi.—ISityhi. 18:2, 3, 24.
Ihlambulula Ikhoboka Layo Lasemhlabeni
3, 4. (a) Nguwuphi umsebenzi owenziwa nguKristu ‘njengomthunywa’ kaYehova? (b) Yintoni eyafunyanwayo xa kwakuhlolwa itempile yaye yintoni eyenziwa nguYesu njengeNtloko yebandla?
3 Xa uYehova ‘nomthunywa’ wakhe babehlola intendelezo yasemhlabeni yetempile yokomoya bafumana iqela lamaKristu okwenyaniso, elalingeyonxalenye yeecawa zeNgqobhoko. Noko ke, kwanala maKristu athanjisiweyo, okanye “oonyana bakaLevi,” kwakufuneka ahlanjululwe. Kwaba njengokuba uMalaki waxela kwangaphambili: “[UYehova] umele ahlale njengomsulungekisi nomcoci wesilivere yaye umele abahlambulule oonyana bakaLevi; kwaye umele abacikize njengegolide nanjengesilivere, yaye ngokuqinisekileyo kuYehova baya kuba ngabantu abanikela umnikelo osisipho ngobulungisa.” (Mal. 3:3) UYehova wasebenzisa ‘umthunywa wakhe womnqophiso,’ uKristu uYesu, ukuba ahlambulule uSirayeli wokomoya.
4 Kodwa uKristu wafika amaKristu athanjisiweyo athembekileyo esenza konke okusemandleni ukuze alungiselele amanye amakholwa ukutya kokomoya ngexesha elifanelekileyo. Ukususela ngowe-1879, aye aqhubeka esebenzisa eli phephancwadi epapasha iinyaniso zeBhayibhile eziphathelele uBukumkani bukaThixo. UYesu waxela kwangaphambili ukuba xa ‘efika’ eze kuhlola impahla yendlu yakhe ‘ekuphelisweni kwale nkqubo yezinto,’ uya kufika eli khoboka liyinika ‘ukutya ngexesha elifanelekileyo.’ Wayeza kulichaza njengelinoyolo elo khoboka aze ‘alimisele phezu kwayo yonke impahla yendlu yakhe’ esemhlabeni. (Mat. 24:3, 45-47) NjengeNtloko yebandla lamaKristu, uKristu uye wasebenzisa eli ‘khoboka lithembekileyo neliyingqondi’ ukuba linyamekele izilangazelelo zakhe zoBukumkani ezisemhlabeni. Uye wanikela ulwalathiso ‘kwimpahla yendlu’ ethanjisiweyo nakumaqabane ayo ‘ezinye izimvu’ esebenzisa iQumrhu Elilawulayo.—Yoh. 10:16.
Ivuna Umhlaba
5. Umpostile uYohane wabona uKumkani esenza wuphi umsebenzi?
5 Umpostile uYohane wabona enye into eyayiza kwenziwa nguKumkani onguMesiya ‘ngemini yeNkosi,’ emva kokumiselwa kwakhe etroneni ngowe-1914. UYohane wabhala wathi: “Ndabona ilifu elimhlophe, kulo kuhleli uthile onjengonyana womntu, enesithsaba segolide entlokweni yakhe nerhengqa elibukhali esandleni sakhe.” (ISityhi. 1:10; 14:14) UYohane weva ingelosi evela kuYehova ixelela lo Mvuni ukuba makafake irhengqa lakhe kuba “isivuno somhlaba sivuthwe ngokupheleleyo.”—ISityhi. 14:15, 16.
6. UYesu wathi yintoni eyayiya kwenzeka ekuhambeni kwexesha?
6 Esi ‘sivuno somhlaba’ sisikhumbuza ngomzekeliso owenziwa nguYesu wengqolowa nokhula. UYesu wazifanisa nendoda eyahlwayela ingqolowa entsimini ngenjongo yokuvuna ingqolowa entle, efanekisela ‘oonyana bobukumkani,’ amaKristu okwenyaniso athanjisiweyo aza kulawula naye eBukumkanini bakhe. Kodwa kwafika utshaba, ‘olunguMtyholi,’ ngobusuku lwaza lwahlwayela ukhula kuloo ntsimi, ‘oonyana bongendawo.’ Umlimi wayalela abasebenzi ukuba bayeke ingqolowa nokhula zikhule zombini de kube lixesha lokuvuna, “ekuphelisweni kwenkqubo yezinto.” Ngelo xesha, uya kuthumela iingelosi zakhe ukuba zize kwahlukanisa ingqolowa nokhula.—Mat. 13:24-30, 36-41.
7. UKristu ukwalathisa njani ‘ukuvunwa komhlaba’?
7 Ngokuvisisana nombono owanikwa uYohane, uYesu ebenikela ulwalathiso kumsebenzi wokuvuna owenziwa emhlabeni wonke. ‘Ukuvunwa komhlaba’ kwaqaliswa xa kwakuhlanganiswa intsalela ‘yoonyana bobukumkani’ abali-144 000, “ingqolowa” yomzekeliso kaYesu. Umahluko phakathi kwamaKristu okwenyaniso nawobuxoki wabonakala ngokucacileyo emva kweMfazwe Yehlabathi I, kangangokuba oko kwakhokelela kwinxalenye yesibini ‘yesivuno somhlaba’—ukuhlanganiswa kwezinye izimvu. Aba asingabo ‘oonyana bobukumkani’ kodwa kunoko ‘sisihlwele esikhulu’ sabo bavumayo ukulawulwa bobo buKumkani. Bavunwa phakathi ‘kwezizwana neentlanga neelwimi.’ Bayazithoba kuBukumkani obungoMesiya, obubunjwa nguKristu Yesu nabali-144 000, ‘abangcwele’ abaya kulawula naye kurhulumente wasezulwini.—ISityhi. 7:9, 10; Dan. 7:13, 14, 18.
Ikhokela Amabandla
8, 9. (a) Yintoni ebonisa ukuba uKristu akajongi ukuziphatha kwebandla xa lilonke kuphela kodwa ujonga nokuziphatha kwelungu ngalinye lebandla? (b) Njengoko kuboniswe kwiphepha 26, ziziphi “izinto ezinzulu zikaSathana” esifanele siziphephe?
8 Kwinqaku elandulela eli siye sabona indlela uKristu awayenikel’ ingqalelo ngayo kwimeko yokomoya yamabandla enkulungwane yokuqala yeXesha Eliqhelekileyo. Kumhla wethu, njengoKumkani olawulayo nonikwe “lonke igunya ezulwini nasemhlabeni,” uKristu iNkokeli yethu wongamela amabandla asehlabathini lonke nabaveleli bawo. (Mat. 28:18; Kol. 1:18) UYehova ‘umenze intloko yezinto zonke kwibandla’ labathanjiswa. (Efe. 1:22) Ngenxa yoko, ubona yonke into eyenzeka kuwo onke amabandla amaNgqina kaYehova angaphezu kwe-100 000.
9 Kwibandla laseTiyatira lamandulo, uYesu wathumela esi sigidimi: “Utsho uNyana kaThixo, lowo umehlo akhe anjengedangatye lomlilo, . . . ukuthi, ‘Ndiyazazi izenzo zakho.’” (ISityhi. 2:18, 19) Wakhalimela amalungu elo bandla ngenxa yokuziphatha kwawo kakubi, wathi: “Ndingulowo uphengulula izintso neentliziyo, ndinike elowo ngokwezenzo zenu.” (ISityhi. 2:23) La mazwi abonisa ukuba uKristu akajongi nje indlela eliqhuba ngayo ibandla xa lilonke, kodwa ujonga nendlela lungu ngalinye eliziphatha ngayo. UYesu wawancoma amaKristu aseTiyatira ‘awayengazazi “izinto ezinzulu zikaSathana.”’ (ISityhi. 2:24) Nanamhlanje uyakholiswa ngabo baselula nabakhulileyo, abakuphephayo ukuphengulula “izinto ezinzulu zikaSathana” ngeInternet okanye imidlalo yevidiyo enogonyamelo okanye ukuzondla ngeengcamango zabantu zikavula-zibhuqe. Uvuyiswa gqitha kukubona imigudu nokuzincama okwenziwa ngamaKristu amaninzi ukuze alandele ukhokelo lwakhe kuzo zonke iinkalo zobomi bawo!
10. Abadala bebandla abalathiswa nguKristu bafaniswa nantoni kodwa yintoni abafanele bayiqonde?
10 UKristu ulungiselele ukuba amabandla akhe asemhlabeni anyanyekelwe ngothando ngabadala abamiselweyo. (Efe. 4:8, 11, 12) Ngenkulungwane yokuqala, bonke abaveleli babethanjiswe ngomoya oyingcwele. Kwincwadi yeSityhilelo bachazwa njengeenkwenkwezi ezisesandleni sikaKristu sasekunene. (ISityhi. 1:16, 20) Namhlanje, abadala bebandla abaninzi bayinxalenye yezinye izimvu. Bamiselwa emva kokuba kuthandaziwe naphantsi kokhokelo lomoya oyingcwele, ngoko nabo banokugqalwa njengabaphantsi kolwalathiso lukaKristu okanye isandla sakhe. (IZe. 20:28) Noko ke, bayaqonda ukuba uKristu umisele iqela elincinane lamadoda athanjisiweyo angamaKristu njengeQumrhu Elilawulayo ukuze likhokele abafundi bakhe emhlabeni.—Funda iZenzo 15:6, 28-30.
“Yiza, Nkosi Yesu”
11. Kutheni sikulangazelela ukubona iNkokeli yethu isiza ngokukhawuleza?
11 Kwisityhilelo esanikwa umpostile uYohane, uYesu watsho izihlandlo eziliqela ukuba uyeza ngokukhawuleza. (ISityhi. 2:16; 3:11; 22:7, 20) Akuthandabuzeki ukuba, wayebhekisela ekuzeni kwakhe ukuza kugweba iBhabhiloni Enkulu nayo yonke inxalenye yenkqubo yezinto engendawo kaSathana. (2 Tes. 1:7, 8) Elangazelela ukubona ukuzaliseka kwazo zonke iziganeko ezaxelwa kwangaphambili, umpostile uYohane owalupheleyo wathi: “Amen! Yiza, Nkosi Yesu.” Nathi baphila esiphelweni sale nkqubo yezinto engendawo siyakulangazelela ukubona iNkokeli noKumkani wethu elawula ukuze angcwalise igama likaYise aze athethelele ulongamo lwakhe.
12. Nguwuphi umsebenzi oza kwenziwa nguKristu ngaphambi kokuba kukhululwe imimoya yentshabalalo?
12 Ngaphambi kokuba uYesu atshabalalise intlangano kaSathana ebonakalayo, amalungu okugqibela e-144 000 oSirayeli wokomoya aya kutywinwa okokugqibela. IBhayibhile itsho ngokucacileyo ukuba imimoya eya kutshabalalisa inkqubo kaSathana ayisayi kukhululwa de kugqitywe ukutywinwa kwe-144 000.—ISityhi. 7:1-4.
13. UKristu uya kubenza njani bubonakale ubukho bakhe ebudeni benxalenye yokuqala ‘yembandezelo enkulu’?
13 Abemi behlabathi abaninzi abakhange babuphawule ‘ubukho’ bukaKristu obaqalisa ngowe-1914. (2 Pet. 3:3, 4) Noko ke, kungekudala uza kwenza ukuba ubukho bakhe bubonakale ngokuzisa imigwebo kaYehova kwiinxalenye ezahlukahlukeneyo zenkqubo yezinto kaSathana. Ukutshatyalaliswa ‘komchasi-mthetho,’ abefundisi beNgqobhoko, ngokuqinisekileyo kuya kuba ‘yimbonakaliso yobukho bakhe.’ (Funda eyesi-2 yabaseTesalonika 2:3, 8.) Kuya kunikela ubungqina bokwenene bokuba uKristu unguMgwebi omiselwe nguYehova. (Funda eyesi-2 kuTimoti 4:1.) Ukutshatyalaliswa kweyona nxalenye yeBhabhiloni Enkulu ebekek’ ityala kuya kulandelwa kukutshatyalaliswa ngokupheleleyo kobo bukhosi behlabathi bungendawo bonqulo lobuxoki. UYehova uya kuphembelela iinkokeli zobupolitika ukuba zitshabalalise eli henyukazi lokomoya. (ISityhi. 17:15-18) Leyo iya kuba yinxalenye yokuqala ‘yembandezelo enkulu.’—Mat. 24:21.
14. (a) Kutheni inxalenye yokuqala yembandezelo enkulu iza kunqunyulwa? (b) “Umqondiso woNyana womntu” uya kuthetha ntoni kubantu bakaYehova?
14 UYesu wathi imihla yembandezelo iya kunqunyulwa “ngenxa yabanyuliweyo,” intsalela yamaKristu athanjisiweyo esesemhlabeni. (Mat. 24:22) Xa kutshatyalaliswa unqulo lobuxoki, uYehova akayi kuvumela ukuba kutshatyalaliswe amaKristu athanjisiweyo namaqabane awo ezinye izimvu. UYesu wongezelela wathi “emva kwembandezelo yaloo mihla,” kuya kubakho imiqondiso elangeni, enyangeni nasezinkwenkwezini, ‘wandule ke umqondiso woNyana womntu ubonakale ezulwini.’ Oku kuya kubangela ukuba izizwe zomhlaba “zizimbambazele zisenza isijwili.” Kodwa akuyi kuba njalo kubathanjiswa abanethemba lokuphila ezulwini namaqabane awo anethemba lokuphila emhlabeni. Baya ‘kuma nkqo baze baphakamise iintloko zabo ngenxa yokuba isondela intlangulo yabo.’—Mat. 24:29, 30; Luka 21:25-28.
15. Nguwuphi umsebenzi oya kwenziwa nguKristu xa ebuya?
15 Ngaphambi kokuba oyise ngokupheleleyo, uNyana womntu uza ngenye indlela. Waprofeta: “Xa uNyana womntu efika esebuqaqawulini bakhe, nazo zonke iingelosi zikunye naye, uya kwandula ke ahlale phantsi kwitrone yakhe yobuqaqawuli. Kwaye zonke iintlanga ziya kuhlanganiselwa phambi kwakhe, abahlule abantu omnye komnye, kanye njengokuba umalusi esahlula izimvu ezibhokhweni. Uya kuzibeka izimvu ngasekunene kwakhe, kodwa zona iibhokhwe ngasekhohlo kwakhe.” (Mat. 25:31-33) La mazwi abhekisela ekuzeni kukaKristu njengoMgwebi ukuze ahlule abantu bazo “zonke iintlanga” babe ziindidi ezimbini: “izimvu,” abo baye baxhasa abazalwana bakhe bokomoya (amaKristu athanjisiweyo asemhlabeni) ‘neebhokhwe,’ abo “bangazithobeliyo iindaba ezilungileyo ezingeNkosi yethu uYesu.” (2 Tes. 1:7, 8) Izimvu, ezichazwa ‘njengamalungisa,’ ziya kufumana ‘ubomi obungunaphakade’ emhlabeni, kodwa iibhokhwe ‘ziya kumka ziye kwintshabalalo engunaphakade.’—Mat. 25:34, 40, 41, 45, 46.
UYesu Uphelelisa Ukoyisa Kwakhe
16. UKristu iNkokeli yethu, uya kukuphelelisa njani ukoyisa kwakhe?
16 Xa sele litywiniwe inani labo aza kulawula nabo nezinye izimvu zibekwe ngakwisandla sakhe sokunene sosindiso, uKristu uya ‘kuphelelisa ukoyisa kwakhe.’ (ISityhi. 5:9, 10; 6:2) Ekhokela umkhosi weengelosi ezinamandla nabazalwana bakhe abavusiweyo, uya kutshabalalisa yonke inkqubo kaSathana esemhlabeni, eyezopolitiko, eyomkhosi neyezorhwebo. (ISityhi. 2:26, 27; 19:11-21) UKristu uya koyisa ngokupheleleyo xa etshabalalisa inkqubo kaSathana engendawo. Emva koko uya kuvalela uSathana needemon zakhe enzonzobileni iminyaka eliwaka.—ISityhi. 20:1-3.
17. UKristu uya kuzikhokelela phi ezinye izimvu ebudeni boLawulo lwakhe Lweminyaka Eliwaka, yaye yintoni esifanele sizimisele ukuyenza?
17 Ethetha ‘ngesihlwele esikhulu’ sezinye izimvu, eziya kusinda kwimbandezelo enkulu, umpostile uYohane wathi “iMvana, ephakathi kwetrone, iya kubalusa, ibakhokelele emithonjeni yamanzi obomi.” (ISityhi. 7:9, 17) Ebudeni boLawulo lukaKristu Lweminyaka Eliwaka, uya kuqhubeka ekhokela ezinye izimvu eziya kuphulaphula ilizwi lakhe de zifumane ubomi obungunaphakade. (Funda uYohane 10:16, 26-28.) Ngamana singaqhubeka silandela iNkokeli yethu ngokunyanisekileyo—ngoku de siye kufika kwihlabathi elitsha esilithenjiswe nguYehova!
Impinda
• Yintoni eyenziwa nguKristu emva kokubekwa kwakhe etroneni?
• UKristu usebenzisa bani ukukhokela amabandla?
• UKristu iNkokeli yethu, uza ngaziphi iindlela?
• UKristu uya kuqhubeka njani esikhokela kwihlabathi elitsha?
[Umfanekiso okwiphepha 29]
Ubukho bukaKristu buya kubonakala ngokutshatyalaliswa kwenkqubo kaSathana engendawo