Ukubiza Ikhazi Elisengqiqweni

NAMHLANJE, njengakumaxesha okubhalwa kweBhayibhile, kwiindawo ezithile xa indoda ifun’ umfazi kufuneka ihlawule ikhazi. “Ndokukhonza iminyaka esixhenxe ngenxa kaRakeli, intombi yakhe enci,” watsho njalo uYakobi ethetha nomkhwe wakhe, uLabhan. (Genesis 29:18) Ngangendlela uYakobi awayemthanda ngayo uRakeli, wathembisa ngekhazi elixhome kunene—elilingana nomvuzo weminyaka esixhenxe! ULabhan wavumela phezulu kwesi sithembiso sikaYakobi kodwa wamqhatha wamtshatisa nomafungwashe wakhe kuqala, uLeya. Emva koko uLabhan wahlalela ukuqhathana noYakobi. (Genesis 31:41) Ukuthi swii kukaLabhan zizinto eziphathekayo kwayinciphisa intlonelo yeentombi zakhe ngaye. “Akuthiwa singabasemzini kuye yini na? Kuba uthengise ngathi wamana eyidla nemali yethu,” zabuza zatsho.—Genesis 31:15.

Intlungu ke yile, kweli hlabathi lanamhlanje lithe phatsh’ iingqondo zizinto eziphathekayo, abazali abaninzi bangumgub’ engxow’ enye noLabhan. Abanye bade bathi chatha. Ngokutsho kwelinye iphephandaba laseAfrika, eminye imitshato izakuzelelwa “kuba abakhwe benyolukele imali.” Enye into enegalelo koku ziingxaki zezoqoqosho ezenza abazali bangene esilingweni sokuba xa bebona iintombi zabo babone into yokugxoth’ ikat’ eziko.a

Bambi abazali abazivumeli zende iintombi zabo belinde umfana onesipaji esingathi sifufumele. Le ke yona into ingakuthezel’ olunenkume. Enye intatheli yephephandaba yasempuma Afrika yabhala: “Ulutsha luthe rhuthu umkhwa wokugcagca kuba lusoyika ukuqongqothw’ izipaji ngabakhozi abaqin’ okwenyengane ngekhazi.” Ukuziphatha okubi yenye yeengxaki ezidalwa kukufunwa kwekhazi elingaphaya kwengqondo. Ngaphezu koko, abanye abafana baye baphumelela ukuthenga umfazi kodwa basala bedad’ ematyaleni. Omnye unontlalo-ntle waseMzantsi Afrika walamla esithi: “Abazali mabakhe babe netarhu. Makhe bathi xha ngokubiza inkuntyula yemali. Esi sibini sigqib’ ukutshata kufuneka sibe nento esiza kuphila ngayo . . . Yini na ukuba nisiqongqothe de nisijongis’ ezantsi isipaji sikamkhwenyana?”

Abazali abangamaKristu banokuwumisela njani umzekelo wokuba sengqiqweni xa bezakuzela okanye bemele bafumane ikhazi? Asimele siwuthabathe lula lo mbandela, kuba iBhayibhile iyalela yenjenje: “Ukuba nengqiqo kwenu makwazeke kubantu bonke.”—Filipi 4:5.

Imigaqo YeBhayibhile Esengqiqweni

Into yokuba abazali abangamaKristu babize ikhazi okanye baliyeke yeyabo leyo. Ukuba bayakwenza oko, bamele balandele imigaqo yeBhayibhile. “Uhlobo lwenu lobomi malube lolukhululekileyo kuthando lwemali,” litsho iLizwi likaThixo. (Hebhere 13:5) Ukuba lo mgaqo uphoswa kwelokulibala xa bebiza ikhazi, loo mzali ungumKristu uya kuba uyazibhenca ukuba akangomzekelo mhle. Amadoda asingatha iimbopheleleko kwibandla lamaKristu amele abe ‘nengqiqo,’ angabi ‘ngabathandi bemali’ okanye ‘angabaweli nzuzo yokunganyaniseki.’ (1 Timoti 3:3, 8) UmKristu othi ngokubawa yaye engaguquki afune ngetshova ikhazi elixhomileyo usenokude asuswe kubudlelane ebandleni.—1 Korinte 5:11, 13; 6:9, 10.

Ngenxa yeengxaki eziye zabangelwa kukubawa, abanye oorhulumente baye babeka umda emakungadlulwa kuwo xa kubizwa ikhazi. Ngokomzekelo, umthetho welizwe laseNtshona Afrika iTogo uthi ikhazi “linokuhlawulwa ngempahla okanye ngemali okanye ngezi zinto zombini.” Lo mthetho wongezelela uthi: “Le ayimele iqabele ngaphaya kwee-10 000 F CFA [R100].” Ngokuthe rhoqo, iBhayibhile iyalela amaKristu ukuba athobele umthetho. (Tito 3:1) Kwanaxa urhulumente engawunyanzelisi loo mthetho, umKristu wokwenene ufanele awuthobele. Ngaloo ndlela uya kuhlala enesazela esicocekileyo phambi kukaThixo yaye akayi kuba ngunobangela wesikhubekiso kwabanye.—Roma 13:1, 5; 1 Korinte 10:32, 33.

Ngubani Omele Abe Ngunozakuzaku?

Kwezinye iindawo, indlela eliququzelelwa ngayo ikhazi isenokungqubana nomnye umgaqo obalulekileyo. Ngokutsho kweBhayibhile, ubawo nguye onembopheleleko ngemicimbi yentsapho yakhe. (1 Korinte 11:3; Kolose 3:18, 20) Ngoko ke, abo basingatha iimbopheleleko ebandleni bamele ‘babongamele kakuhle abantwana nezindlu zabo.’—1 Timoti 3:12.

Noko ke, kusenokuba kuqhelekile ukuba imicimbi ebalulekileyo yomtshato isingathwe zizalamane zentloko-ntsapho. Yaye ezi zalamane zidla ngokufuna ukusikelwa kweli nqatha liza kufumaneka kweli khazi. Oku kubeka iintsapho ezingamaKristu esilingweni. Ngenxa yesithethe, zimbi iintloko-ntsapho zivumela izalamane zehlabathi zifune ikhazi elingaphaya kwengqondo. Oku kuye maxa wambi kwabangela loo ntombazana ingumKristu iye kwendela emntwini ongakholwayo. Oko kungqubana mpela nesiluleko samaKristu sokuba kumele kutshatwe ‘kuphela eNkosini.’ (1 Korinte 7:39) Intloko-ntsapho evumela izalamane zehlabathi ziyenzele izigqibo ezinokuba yingozi ngokomoya akunakutshiwo ukuba ‘iyongamela kakuhle indlu yayo.’—1 Timoti 3:4.

Kuthekani ukuba ubawo ongumKristu akazi kumzakuzela ngokwakhe omnye wabantwana bakhe, exelisa usolusapho owayesoyika uThixo uAbraham? (Genesis 24:2-4) Ukuba ucele omnye unozakuzaku, ubawo ongumKristu umele aqiniseke ukuba ulandela yonke imiyalelo evisisana nemigaqo esengqiqweni yeBhayibhile. Ngaphezu koko, ungekaphathwa umba wekhazi, abazali abangamaKristu bafanele bayiphendle kakuhle yonke imibandela yaye bangazivumeli balahlekiswe ngamasiko okanye bafune izinto ezingekho ngqiqweni.—IMizekeliso 22:3.

Ukuphepha Imikhwa EngeyoyabuKristu

IBhayibhile iyaligweba ikratshi ‘nokuqhayisa ngezinto ubani anazo.’ (1 Yohane 2:16; IMizekeliso 21:4) Ukanti, abantu abathile abanxulumana nebandla lamaKristu baye babonakalisa ezi mpawu xa kubizwa ikhazi. Bambi balinganisa ihlabathi ngokuqhayisa ngesityhwentywe semali yekhazi abayikhuphileyo okanye abayifumeneyo. Kwelinye icala, enye iofisi yesebe yeWatch Tower Society yaseAfrika inikela le ngxelo: “Abanye abayeni babhok’ is’cuku xa intsapho ibiza imali esengqiqweni, besithi bona abafuni kunikw’ umfazi ngathi bathenga ‘ibhokhwe.’”

Ukunyolukela ixabiso lekhazi elixhomileyo kuye kwawarhwebesha amanye amaKristu kwaza oko kwabangel’ intlekele. Ngokomzekelo, cinga nje ngale ngxelo ivela kwenye iofisi yesebe yeWatch Tower Society: “Sele kunzima ngabazalwana abangatshatanga ukutshata yaye oodade abafumani maqabane. Oku kuzele inkumbula yabantu abasuswayo kubudlelane ngenxa yokuziphatha okubi ngokwesini. Bambi abazalwana baya emigodini beye kuzama igolide okanye idayimani abanokuyithengisa ukuze batshate. Kuphela unyaka kuye kowesibini nangaphezulu, yaye badla ngokuba buthathaka ngokomoya kuba bekude nabazalwana abasebandleni.”

Ukuze baphephe imiphumo emibi ngolo hlobo, abazali abangamaKristu bafanele balandele umzekelo wabo baqolileyo ebandleni. Nangona wayengengomzali, umpostile uPawulos wayenengqiqo kwindlela awaphatha ngayo amanye amakholwa. Wayekulumkele ukuthi zinzi uxanduva lwemithwalo kwabanye. (IZenzo 20:33) Ngokuqinisekileyo, abazali abangamaKristu bafanele balandele umzekelo wakhe wokungazingci xa bebiza ikhazi. Enyanisweni, uPawulos waphefumlelwa nguThixo ukuba athi: “Ngokumanyeneyo nibe ngabaxelisa mna, bazalwana, nize niphose iliso kwabo bahamba ngendlela evumelana nomzekelo esinimisele wona.”—Filipi 3:17.

Imizeko Yabantu Abanengqiqo

Kumba wokubiza ikhazi, abazali abangamaKristu abaninzi bamisela umzekelo omhle wokuba nengqiqo. Cinga nje ngoJoseph nowakwakhe uMae, abangabahambisi bevangeli bexesha elizeleyo.b Bahlala kwiiSolomon Islands apho umba wokubizwa kwekhazi udla ngokuba yingxaki. Ukuze bazikhuphe kuyo yonke le nyula, uJoseph noMae balungiselela ukuba intombi yabo uHelen itshatele kwisiqithi esiselumelwaneni. Benza okufanayo nakwenye intombi yabo, uEsther. Kwakhona uJoseph wavuma ukuba umkhwenyana wakhe uPeter ahlawule ikhazi elincinane kakhulu kwelo kunokuthiwa lisengqiqweni. Xa wayebuzwa ukuba uyenziswe yintoni le nto, uJoseph waphendula wathi: “Andifuni kuthi zinzi umthwalo omkhulu emagxeni omkhwenyana wam onguvulindlela.”

Abaninzi kumaNgqina kaYehova aseAfrika nabo baye bamisela umzekelo omhle wokuba nengqiqo. Kwezinye iindawo, izalamane zidla ngokulindela ukuhlawulwa isityhwentywe semali yehamb’ idlani ngaphambi kokuba kubizwe ikhazi. Yaye ukuze aqiniseke ukuba uyamfumana loo mfazi, umyeni kusenokufuneka athembise ukuba uza kulobolela umfana oza emva kwalowo uza kuba ngumfazi wakhe.

Ngokwahlukileyo koko, cinga ngomzekelo kaKossi, nowakwakhe uMara. Intombi yabo, uBeboko, kutshanje itshate nomveleli ohambahambayo wamaNgqina kaYehova. Ngaphambi komtshato, izalamane zazibamele aba bazali zifuna bamthi nka isiwuntyu semali yekhazi kuba zinyeke ukucuntsulelwa. Noko ke, esi sibini sem’ entla saza sakukhaba ngaw’ omane oko. Kunoko, sathetha nomfana lo uza kuba ngumkhwenyana, sacela umnconwana nje ngentombi yaso saza sayibuyisela kwakwesi sibini esisiqingatha sayo ukuze senze amalungiselelo omtshato.

Omnye umzekelo okwakwelo lizwe ngowelinye iNgqina eliselula elibizwa ngokuba nguItongo. Ekuqaleni, intsapho yakule ntombi yacela ikhazi elisengqiqweni. Kodwa izalamane zafuna inyuswe loo mali. Kwakunzima ngokwenene apho, kangangokuba kwakungathi ezo zalamane zingaphumelela. Nangona yena entloni, uItongo wala kwema ngaye yaye ngentlonelo wazixelela ukuba wayezimisele ukutshata nomKristu okhutheleyo ogama linguSanze, ngokwendlela ekwakucetywe ngayo. Emva koko wathi, “Mbi ke” (okuthetha ukuthi, “Qha ke”) waza wahlala phantsi. Unina ongumKristu, uSambeko, wayengakwicala lakhe. Yavalw’ ingxoxo, yaye eso sibini satshata ngendlela ebekucetywe ngayo.

Kukho izinto ezingakumbi abazixhalabeleyo abazali abangamaKristu ngaphezu kokufumana ikhazi. Omnye umfana owayeza kutshata waseCameroon uthi: “Umkhwekazi uxhakamfula naliphi na ithuba aze andixelele ukuba nantoni na endandifuna ukumnika yona njengekhazi, mandisele ndiyinika intombi yakhe.” Abazali abanothando bakwaxhalabele nempilo-ntle yokomoya yabantwana babo. Ngokomzekelo, cinga nje ngoFarai noRudo, abahlala eZimbabwe nabachitha ixesha elininzi besenza umsebenzi wokushumayela iindaba ezilungileyo zoBukumkani bukaThixo. Nangona bengafumani mvuzo, bacela nje intwana kwikhazi eliqhelekileyo elidla ngokubizwa apho ngeentombi zabo ezimbini. Kwakutheni? Babefuna iintombi zabo zonwabe kumtshato wazo namadoda amthanda ngokwenene uYehova. Bathi: “Eyona nto yayibalulekile kuthi yimeko yokomoya yeentombi nabakhwenyana bethu.” Intle gqitha loo nto! Simele sibaqhwabel’ izandla abakhozi abazikhathaza beqhutywa luthando ngempilo-ntle yokomoya neyokwenyama yabantwana babo abatshatileyo.

Iingenelo Zokusebenzisa Ingqiqo

UJoseph noMae bakwiiSolomon Islands basikelelwa ngesisa nangendlela ababenenkathalo ngayo kwimitshato yeentombi zabo. Ngaloo ndlela, abakhwenyana babo bashiyeka bengekho matyaleni. Kunoko, ezi zibini ziye zakwazi ukuchitha iminyaka emininzi kwinkonzo yexesha elizeleyo ekuhambiseleni phambili isigidimi soBukumkani. Xa ekhumbula, uJoseph uthi: “Izigqibo endazenzayo nentsapho yam ziye zasizuzisa iintsikelelo. Liyinyaniso elokuba, maxa wambi ndandimiswe kakubi ngabo babengayiqondi kakuhle le nto, kodwa ndinesazela esihle yaye ndanelisekile kukubona abantwana bam bexakekile yaye bomelele enkonzweni kaYehova. Nabo bonwabile, yaye mna nowakwam sonwabe sada sagqithisa.”

Enye into entle ebangelwe koku lulwalamano oluhle nabakhozi. Ngokomzekelo, uZondai noSibusiso bakhonza njengabasebenzi bokuzithandela namakhosikazi abo, alekelanayo, kwiofisi yesebe yeWatch Tower Society yaseZimbabwe. Umkhwe wabo, uDakarai ungumhambisi wevangeli wexesha elizeleyo yaye akafumani mvuzo wemali. Xa kwakuxoxwa ngekhazi, wabiza nje loo nto banayo. UZondai noSibusiso bathi: “Simthanda ngokungazenzisiyo umkhwe wethu, yaye siya kuzijul’ ijacu simncede mhla wasengxakini.”

Ewe, ukuba sengqiqweni xa kuxoxwa ngekhazi kufak’ isandla kulonwabo lwentsapho. Ngokomzekelo, aba basandul’ ukutshata abayi kuba sematyaleni, ukuze bahambe lula kubomi babo bomtshato. Oku kuye kwenza izibini eziselula eziliqela zenza imisebenzi eyintsikelelo, njengokukhonza ixesha elizeleyo kumsebenzi ongxamisekileyo wokushumayela nokwenza abafundi. Ngenxa yoko, oku kuzisa uzuko kuMsunguli oluthando womtshato, uYehova uThixo.—Mateyu 24:14; 28:19, 20.

[Imibhalo esemazantsi]

[Ibhokisi ekwiphepha 27]

BALIBUYISA IKHAZI

Kwiindawo ezithile, umtshakazi nabazali bakhe bayanyenjwa ukuba babize ikhazi elincinane. Ngaloo ndlela, maxa wambi ikratshi nokuzifunel’ igama ezo zinto ziye zibe ngunobangela wokubiza ikhazi elixhomileyo. Enye intsapho yaseLagos, eNigeria, yenza into entle neyahluke mpela kule. Umkhwenyana wabo, uDele, uthi:

“Ebukhweni bandiphungulel’ iindleko ezinokuthanani nomcimbi wokulobola, njengokuthenga engayiwayo impahla. Kwanaxa babenikwa imali yekhazi, unozakuzaku wabo wabuza: ‘Ngaba niza kuyithabatha le ntombi njengomendi okanye njengomntwana wenu?’ Intsapho yakowethu yaphendula: ‘Siza kuyithabatha njengomntwana wethu.’ Emva koko, sabuyiselwa loo mvulophu ibinekhazi njengokuba injalo.

“Andikayilibali nanamhlanje indlela abantu basebukhweni abawusingatha ngayo umcimbi womtshato wethu. Yandenza ndabahlonela ngokwenene. Ukuxabisa kwabo izinto zokomoya kundenza ndisondele ngakumbi kubo. Kwakhona kube negalelo kwindlela endimjonga ngayo umkam. Andiziva ngaye ngenxa yendlela endaphathwa ngayo kowabo. Xa singavisisani, andivumeli loo nto ibe yingxaki. Ndithi ndakukhumbula intsapho aphuma kuyo, isuke ibe ncinci naloo nto singavisisani ngayo.

“Intsapho yakowethu nabakhozi bayo ingabahlobo bokwenene. Unanamhla oku, kwiminyaka emibini emva komtshato wethu, utata usathumela izipho nezinto ezityiwayo kubakhozi bakhe.”