Kutheni Simele Sinikele KuYehova?
NJENGOKO laligqats’ ubhobhoyi kwidolophana yaseTsidon iTsarfati, umhlolokazi othile wayecholachola iinkuni. Kwakufuneka abase umlilo ukuze apheke isidlo esincinane—mhlawumbi isidlo sokugqibela ababeza kusitya nonyana wakhe. Wayetsale nzima ezama ukuzigcina yena nonyana wakhe bephila ukutyhubela imbalela nendlala ezazithabathe ixesha elide, ibe ngoku wayefikelele kwesi siphelo silusizi. Indlala yayibaphathel’ imbengwana.
Kwavela ndoda ithile. Igama layo yayinguEliya, ibe ngokukhawuleza lo mhlolokazi wabona ukuba yayingumprofeti kaYehova. Kubonakala ngathi wayekhe weva ngalo Thixo. UYehova wayengafani noBhahali, onqulo lwakhe olukhohlakeleyo, nolugqwethekileyo lwalwesamele kwilizwe lakowabo laseTsidon. Ngoko xa uEliya wacela amanzi okusela, wayekulungele ukumnceda. Mhlawumbi wayevakalelwa kukuba ukwenjenjalo kwakuya kumenza azuze inkoliseko kaYehova. (Mateyu 10:41, 42) Kodwa uEliya wanyuka nengalo—wacela intwana yokutya. Wamchazela ukuba wayenokutya okulingene isidlo esinye sokugqibela kuphela. Sekunjalo, uEliya waqhubeka emcela, emqinisekisa ukuba uYehova uya kumlungiselela ukutya ngommangaliso de loo mbalela iphele. Wenza ntoni? IBhayibhile ithi: “Waya ke, wenza ngokwelizwi likaEliya.” (1 Kumkani 17:10-15) La mazwi acacileyo achaza isenzo esibonakalisa ukholo olukhulu—olwalulukhulu kangangokuba noYesu Kristu wamncoma loo mhlokazi kwiminyaka engaphezu kwewaka leminyaka kamva!—Luka 4:25, 26.
Nangona kunjalo, isenokubonakala ingumnqa into yokuba uYehova acele okukhulu kangako kwibhinqa elaliswele ngolo hlobo. Oku kunjalo ngokukodwa xa sicinga ngomthandazo owakha wenziwa yenye indoda ebalaseleyo. Ukuqokelela kukaKumkani uDavide iminikelo ukuze unyana wakhe uSolomon akhe itempile kwakhuthaza ukuba nesisa. Ngokwale mihla, izipho ezanikelwayo zazixabisa amawaka ezigidi zeerandi! Noko ke, xa wayethandaza kuYehova uDavide wathi: “Ndingubani na mna, bangoobani na abantu bam, ukuba side sibe namandla okunika ngokuqhutywa yintliziyo njengoku? Ngokuba zivela kuwe zonke izinto; sikunika okuvele esandleni sakho.” (1 Kronike 29:14) Njengoko uDavide watshoyo, yonke into yekaYehova. Ngoko xa sinikela ukuze sihambisele phambili unqulo olunyulu, sinika uYehova okukokwakhe kakade. (INdumiso 50:10) Ngenxa yoko, kukho umbuzo ophakamayo, Kutheni kakade uYehova efuna sinikele?
Inkalo Ebalulekileyo Yonqulo Lokwenyaniso
Eyona mpendulo ilula yeyokuba ukususela kumaxesha amandulo uYehova uye wenza ukunikela kwaba yinkalo ebalulekileyo yonqulo olunyulu. Indoda ethembekileyo uAbheli yanikela ngenxalenye yemfuyo yayo exabisekileyo kuYehova. Usolusapho uNowa, uAbraham, uIsake, uYakobi noYobhi benza iminikelo efanayo.—Genesis 4:4; 8:20; 12:7; 26:25; 31:54; Yobhi 1:5.
UMthetho kaMoses wawuyalela yaye usalathisa ukudluliselwa kweminikelo kuYehova. Ngokomzekelo, onke amaSirayeli ayalelwa ukuba anikele izishumi, okanye anikele inxalenye yeshumi kwimveliso yomhlaba nakwinzala yemfuyo yawo. (Numeri 18:25-28) Eminye iminikelo yayinganyanzelekanga kangako. Ngokomzekelo, umSirayeli ngamnye kwakufuneka anikele kuYehova intlahlela yemfuyo neyemveliso yakhe. (Eksodus 22:29, 30; 23:19) Kodwa, uMthetho wawuyekela kumntu ngamnye ukuba agqibe ukuba uya kunikela intlahlela engakanani na, ukuba nje wayenikela eyona ilungileyo. Kwakhona uMthetho wenza nelungiselelo leminikelo yokubulela nokwenza izifungo, eyayisenziwa ngokuzithandela. (Levitikus 7:15, 16) UYehova wakhuthaza abantu bakhe ukuba banikele ngokomlinganiselo wentsikelelo awayebanike yona. (Duteronomi 16:17) Njengoko kwakunjalo xa kwakusakhiwa umnquba naxa kwakusakhiwa itempile kamva, ngamnye wayenikela ngoko intliziyo yakhe yayimqhubela ukuba anikele ngako. (Eksodus 35:21; 1 Kronike 29:9) Ngokuqinisekileyo iminikelo yokuzithandela enjalo yayimkholisa gqitha uYehova!
Phantsi ‘komthetho kaKristu,’ yonke iminikelo yayimele yenziwe ngokuzithandela. (Galati 6:2; 2 Korinte 9:7) Oko kwakungathethi kuthi abalandeli bakaKristu babeyekile ukunikela okanye benikela okuncinane. Benza okuchaseneyo noko! Njengoko uYesu nabapostile bakhe babeshumayela kwaSirayeli, iqela labafazi lalibalandela yaye libalungiselela ngezinto zalo. (Luka 8:1-3) Nompostile uPawulos wafumana izipho zokumxhasa kumsebenzi wakhe wabuvangeli basemazweni, ibe naye wakhuthaza amanye amabandla ukuba axhase abanye ngemali xa beswele. (2 Korinte 8:14; Filipi 1:3-5) Iqumrhu elilawulayo elaliseYerusalem labela amadoda athile athembekileyo ukuba aqiniseke ukuba izinto ezinikelweyo zazidluliselwa kwabo basweleyo. (IZenzo 6:2-4) Kuyacaca ukuba amaKristu okuqala akugqala njengelungelo ukuxhasa unqulo olunyulu ngezo ndlela.
Sekunjalo, sisenokuzibuza isizathu sokuba uYehova enze ukunikela kube yinxalenye yonqulo lwakhe. Khawuhlole ezi zizathu zine.
Izizathu Zokuba Sinikele
Esokuqala, uYehova ukwenza ukupha kube yinxalenye yonqulo lokwenyaniso kuba ukwenjenjalo kuyingenelo kuthi. Kubonakalisa uxabiso esinalo ngokulunga kukaThixo. Ngokomzekelo, ukuba umntwana uthengela okanye wenzela umzali isipho, kutheni umzali encuma ebonakalisa uvuyo? Ngaba eso sipho sihlangabezana nentswelo ebalulekileyo loo mzali abengakwazi ukuhlangabezana nayo? Mhlawumbi akunjalo. Kunoko, lo mzali uchulumanciswa kukubona umntwana ehlakulela umoya woxabiso nowokupha. Sisizathu esifanayo esibangela ukuba uYehova asikhuthaze ukuba sinikele ibe uyachulumanca xa sisenjenjalo. Le yindlela esimbonisa ngayo ukuba sibuxabisa ngokwenene ububele nesisa sakhe esingasikelwe mda kuthi. Ungumniki waso “sonke isipho esilungileyo naso sonke isipho esigqibeleleyo,” ngoko asinakuze siphelelwe zizizathu zokumbulela. (Yakobi 1:17) Okubaluleke nangakumbi kukuba uYehova wanikela ngoNyana wakhe amthandayo, evumela ukuba afe ukuze siphile ngonaphakade. (Yohane 3:16) Ngaba sinokuze simbulele ngokwaneleyo?
Okwesibini, ukuba ukunikela sikwenza umkhwa, ngokwenjenjalo sifunda ukuxelisa uYehova noNyana wakhe, uYesu Kristu, ngeyona ndlela ibalulekileyo. UYehova usoloko esipha, unesisa ngokuzingisileyo. Njengoko iBhayibhile isitsho, usinika “ubomi nempefumlo nezinto zonke.” (IZenzo 17:25) Sinokumbulela ngokufanelekileyo ngomoya esiwuphefumlayo, ngokutya esikutyayo, ngazo zonke izihlandlo ezonwabisayo nezanelisayo ebomini. (IZenzo 14:17) UYesu, njengoYise, wabonakalisa umoya wokupha. Wanikela ngokupheleleyo ngesiqu sakhe. Ubusazi na ukuba xa uYesu wayesenza imimangaliso, wayelahlekelwa kokuthile ngokwenza oko? Izihlandlo eziliqela iZibhalo zisixelela ukuba xa wayephilisa abagulayo, amandla “ayephuma kuye.” (Luka 6:19; 8:45, 46) UYesu wayenesisa kangangokuba wada wawuminyela ekufeni umphefumlo wakhe, ubomi bakhe.—Isaya 53:12.
Ngoko xa sinikela, enoba kungexesha lethu, amandla ethu, okanye izinto zethu, sixelisa uYehova yaye siyenza ivuye intliziyo yakhe. (IMizekeliso 27:11; Efese 5:1) Kwakhona silandela umzekelo ogqibeleleyo wabantu esawushiyelwa nguYesu Kristu.—1 Petros 2:21.
Okwesithathu, ukunikela kuhlangabezana neentswelo zokwenene nezibalulekileyo. Kuyinyaniso ukuba uYehova ebenokuhlangabezana ngokulula nezilangazelelo zoBukumkani ngaphandle kokufuna uncedo lwethu, kanye njengoko wayenokwenza amatye adanduluke kunokusebenzisa thina ekushumayeleni ilizwi lakhe. (Luka 19:40) Kodwa uye wakhetha ukusijizeka ngala malungelo. Ngoko xa sinikela ngezinto zethu ukuze sihambisele phambili izilangazelelo zoBukumkani, saneliseka kakhulu kukwazi ukuba siphumeza indima yokwenene kowona msebenzi ubalulekileyo owenziwa kweli hlabathi.—Mateyu 24:14.
Kucacile ukuba imali iyafuneka ukuze kuxhaswe umsebenzi wamaNgqina kaYehova owenziwa ehlabathini lonke. Ebudeni bonyaka wenkonzo we-1995, uMbutho uye wachitha malunga nama-260 ezigidi zeerandi ekunyamekeleni oovulindlela abakhethekileyo, abavangeli basemazweni nabaveleli abahambahambayo kwizabelo zabo zenkonzo yasentsimini. Noko ke, loo mali incinane xa ithelekiswa nechithwa ekwakhiweni nakumsebenzi owenziwa kwiiofisi zamasebe nakwizakhiwo zokushicilela ehlabathini lonke. Kodwa, konke oko kwenziwa ngeminikelo yokuzithandela!
Abantu bakaYehova abadli ngakucinga ukuba xa bengemanga kakuhle ngezinto eziphathekayo, banokusuka bayekele abanye ukuba bawuthwale loo mthwalo. Isimo sengqondo esinjalo sinokusenza silahlekelwe yile nkalo yonqulo lwethu. Ngokutsho kompostile uPawulos, amaKristu aseMakedoniya ayethwaxwa ‘bubuhlwempu obunzulu.’ Sekunjalo, ambongoza ukuba awanike ilungelo lokunikela. UPawulos ungqina ukuba oko akunikelayo, ‘kwakungaphaya kwamandla awo okwenene’!—2 Korinte 8:1-4.
Okwesine, uYehova uye wenza ukupha kwayinxalenye yonqulo lokwenyaniso ngenxa yokuba ukupha kuya kusenza sonwabe. UYesu wathi: “Kukho uyolo olungakumbi ekupheni kunokuba lukho ekwamkeleni.” (IZenzo 20:35) Leyo yindlela uYehova awasidala ngayo. Sesinye sezizathu zokuba sivakalelwe kukuba enoba sinikela kangakanani na kuye, asinakuze siluthelekise nanto uxabiso esiba nalo ngaye ezintliziyweni zethu. Noko ke, okuvuyisayo kukuba uYehova akalindeli ukuba sinikele ngaphezu kwamandla ethu. Sinokuqiniseka ukuba uyachulumanca xa sinikela oko sinako sivuya!—2 Korinte 8:12; 9:7.
Ukubonakalisa Umoya Wokunikela Kuzisa Iintsikelelo
Xa sibuyela kumzekelo osekuqaleni, masithi umhlolokazi waseTsarfati wayeqiqe ngelithi uEliya wayenokusifumana nakomnye umntu isidlo. Enjani yona intsikelelo eyayinokumphosa!
Alithandabuzeki elokuba uYehova uyabasikelela abo babonakalisa umoya wokupha. (IMizekeliso 11:25) Umhlolokazi waseTsarfati akazange achaneke ngokunikela ngesidlo sakhe awayecinga ukuba sesokugqibela. UYehova wamvuza ngokumenzela ummangaliso. Njengoko uEliya wayethembisile, izinto awayefaka kuzo umgubo neoli zazala de yadlula loo mbalela. Kodwa wafumana umvuzo ongakumbi kunalowo. Xa unyana wakhe wagula waza wafa, uEliya, umkhonzi kaThixo wokwenyaniso, wamvusa. Hayi indlela okumele ukuba kwamakha ngayo ngokomoya oko!—1 Kumkani 17:16-24.
Kule mihla asilindelanga kusikelelwa ngemimangaliso. (1 Korinte 13:8) Kodwa uYehova uyasiqinisekisa ukuba uya kubalondoloza abo bamkhonza ngomphefumlo uphela. (Mateyu 6:33) Ngoko sinokufana nomhlolokazi waseTsarfati ngaloo ndlela, sinikele ngokukhululekileyo, siqinisekile ukuba uYehova uya kusinyamekela. Nathi ngokufanayo, sinokufumana umvuzo omkhulu wokomoya. Ukuba sinikela ngokuthe rhoqo, kunokunikela manqaphanqapha, sisenza amabona-ndenzile, kuya kusinceda sigcine iliso lethu lingenakumbi yaye lijoliswe kwizilangazelelo zoBukumkani, njengoko uYesu watshoyo. (Luka 11:34; thelekisa eyoku-1 kwabaseKorinte 16:1, 2.) Kwakhona kuya kusinceda sizive sisondelelene ngakumbi noYehova noYesu njengabasebenzi abangamadlelane nabo. (1 Korinte 3:9) Yaye kuya kongeza umoya wesisa, nowokunikela osele ukho kubanquli bakaYehova ehlabathini lonke.
[Ibhokisi ekwiphepha 31]
IINDLELA ABANYE ABAKHETHA UKUNIKELA NGAZO
IMINIKELO EYA KUMSEBENZI OWENZIWA EHLABATHINI LONKE
Abaninzi babeka bucala okanye benze uqingqo-mali lwemali abaza kuyifaka kwiibhokisi zeminikelo ezikwiHolo yoBukumkani. Nyanga nganye amabandla athumela ezi zixa zemali kwikomkhulu lehlabathi eliseBrooklyn, eNew York, okanye kwiofisi yesebe ekufutshane.
Iminikelo yokuzithandela yemali isenokuthunyelwa ngokungqalileyo kwiTreasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, okanye kwiofisi yoMbutho enyamekela ilizwe lakho. Kusenokunikelwa ngezinto ezenziwe ngamatye anqabileyo okanye ngezinye izinto ezixabisekileyo. Le minikelo ifanele iphelekwe yileta emfutshane echaza ukuba le yiminikelo.
ILUNGISELELO LOMNIKELO WOXHOMEKEKO
Imali isenokunikelwa kwiWatch Tower Society ukuze igcinwe de lowo unikeleyo afe, kukho nelungiselelo lokuba ayifumane xa efuna ukuyisebenzisa, ibuyiselwe kuye.
UKUNIKELA OKUCETYIWEYO
Ukongezelela kwiminikelo yemali neminikelo yemali yoxhomekeko, zikho ezinye iindlela zokunikela kwinkonzo yoBukumkani ehlabathini lonke. Ezi ziquka:
I-Inshorensi: IWatch Tower Society isenokubhaliswa njengeya kufumana imali kwi-inshorensi yobomi okanye kwilungiselelo lemali yomhlala-phantsi. UMbutho umele waziswe ngalo naliphi na ilungiselelo elinjalo.
Imali Eselugcinweni NeeBond: Imali eselugcinweni neebond zinokunikelwa kwiWatch Tower Society njengezipho okanye ngaphantsi kwelungiselelo lokuba ingeniso iqhubeke ihlawulwa kulowo wenze umnikelo.
ISiza Nezindlu Ezikuso: Isiza esinokuthengiswa sinokunikelwa kwiWatch Tower Society njengomnikelo okanye ngokusigcina elungelweni lalowo unikele ngaso, aqhubeke ehlala kuso ebudeni bokuphila kwakhe. Ubani ufanele aqhagamshelane noMbutho ngaphambi kokwenza isivumelwano sokunikela ngomhlaba kuMbutho.
IMinqophiso Yamafa: Imihlaba okanye imali isenokushiyelwa iWatch Tower Society ngokwenziwa komnqophiso welifa ngokwasemthethweni. Umbhalo waloo myolelo ufanele uthunyelwe kuMbutho.
Abo banomdla kulo naliphi na kula malungiselelo acetyiweyo okunikela umele abhalele iTreasurer’s Office kule dilesi ingezantsi okanye kwiofisi yoMbutho enyamekela ilizwe labo. ITreasurer’s Office imele ifumane umbhalo wamaxwebhu afanelekileyo ngokuphathelele naliphi na kula malungiselelo.
TREASURER’S Office
Watch Tower Bible and Tract Society of Pennsylvania
Private Bag X2067, Krugersdorp, 1740
Inombolo Yemfonomfono: (011) 761-1000