“Beka UYehova Ngobuncwane Bakho”—Njani?

“BEKA uYehova ngobuncwane bakho, nangentlahlela yongeniselo lwakho lonke.” Kula mazwi obulumko awabhalwa kwiminyaka engama-2600 eyadlulayo, kukho isikhokelo esisa ekufumaneni intabalala yeentsikelelo zikaYehova, kuba umbhali wawo uhlabela mgama esithi: “Ozala amaqonga akho bubuninzi, nemikhombe yakho yokukhongozela iphuphume iwayini entsha.”—IMizekeliso 3:9, 10.

Kodwa kuthetha ukuthini ukubeka uThixo? Buyintoni ubuncwane esimele simbeke ngabo uYehova? Ibe sinokukwenza njani oku?

“Beka UYehova”

KwiZibhalo, igama lesiHebhere elisetyenziswa ngokuyintloko elithetha ukubeka, elithi ka·vohdhʹ, ngokoqobo lithetha “ukuba nzima.” Ngoko ukubeka umntu kuthetha ukumgqala njengonzima, obalulekileyo, okanye onguthile. Elinye igama lesiHebhere elisetyenziswa kwelithi ukubeka, elithi yeqarʹ, likwaguqulelwa ngelithi “ukuxabiseka” nelithi “izinto ezixabisekileyo.” Ngokufanayo, igama lesiGrike elithi ti·meʹ, eliguqulelwe ngokuthi “ukubeka” eBhayibhileni, lidlulisela ingcamango yokugqalwa njengothile, obalulekileyo, oxabisekileyo. Ngaloo ndlela omnye ubeka omnye ngokubonakalisa intlonelo enzulu kuloo mntu nokumgqala njengothile.

Ukunikela imbeko kunayo nenye inkalo. Khawucinge ngengxelo ephathelele umYuda othembekileyo uMordekayi, owathi ngesinye isihlandlo wabhenca iyelenqe lokubulala uKumkani uAhaswerosi wePersi yamandulo. Kamva, xa ukumkani wafumanisa ukuba ayikho into eyayenziwe ukubonakalisa imbeko kuMordekayi ngenxa yeso senzo, wabuza inkulumbuso yakhe, uHaman, ngendlela yokubonakalisa imbeko kumntu amthandileyo ukumkani. UHaman wayecinga ukuba loo mbeko yayiza kuza kuye, kodwa watsho phantsi! Phofu ke, uHaman wathi umntu onjalo wayefanele anxitywe “isambatho sobukumkani” akhwele “nehashe akhwela kulo ukumkani.” Waqukumbela ngelithi: “Bayikhwelise ehasheni elo, icande ezitratweni zomzi, badanduluke phambi kwayo, bathi, Kwenjiwa nje, kwindoda athanda ukuyibeka embekweni ukumkani.” (Estere 6:1-9) Ngesi sihlandlo, ukubeka umntu kwakuquka ukumphakamisa esidlangalaleni ukuze agqalwe njengomntu obalulekileyo ngabo bonke abantu.

Ngendlela efanayo, ukubeka uYehova kuneenkalo ezimbini: ukumgqala njengomntu ophakamileyo nokumphakamisa esidlangalaleni ngokuba nesabelo nangokuxhasa umsebenzi wokuvakalisa igama lakhe kuwonke wonke.

“Ngobuncwane Bakho”—Buyintoni?

Ngokuqinisekileyo izinto zethu ezixabisekileyo ziquka ubomi bethu, ixesha lethu, iziphiwo zethu namandla ethu. Kuthekani ngezinto eziphathekayo esinazo? Khawucinge ngamazwi kaYesu xa wayebona umhlolokazi osweleyo efaka iingqekembe ezimbini ezinexabiso elincinane kwisikhongozelo sobuncwane sasetempileni. Wathi: “Lo mhlolokazi, nangona elihlwempu, uphose ngaphezu kokuba bonke benjenjalo. Kuba bonke [abanye abanikelayo] aba baphose izipho ngokuphuma kwintsalela yabo, kodwa lo mfazi ekusweleni kwakhe uphose zonke izinto zokuphila abenazo.” (Luka 21:1-4) UYesu wamncoma lo mhlolokazi ngokusebenzisa izinto eziphathekayo anazo ukuxhasa unqulo lukaYehova.

Ngoko ke, kuyacaca ukuba ubuncwane obukhankanywe nguSolomon bukwaquka naziphi na izinto eziphathekayo esisenokuba nazo. Kwaye ibinzana elithi “ngentlahlela yongeniselo lwakho lonke” libonisa ukuba simele sinikele kuYehova ngobona buncwane bethu bulungileyo.

Noko ke, ukunikela ngezinto eziphathekayo kunokumbeka njani uThixo? Ngaba asizozakhe zonke izinto? (INdumiso 50:10; 95:3-5) “Zivela kuwe zonke izinto,” wavuma ngelitshoyo uKumkani uDavide kumthandazo wakhe osuk’ entliziyweni awayewubhekisa kuYehova. Yaye ngokuphathelele umnikelo omkhulu awayewenzile yena nabantu bakhe ukuze kwakhiwe itempile, uDavide wathi: “Sikunika okuvele esandleni sakho.” (1 Kronike 29:14) Ngoko xa sinikela kuYehova, sibuyisela oko athe, ngokulunga kwentliziyo yakhe, wasinika kona. (1 Korinte 4:7) Kodwa, njengoko kuchazwe ngaphambilana, ukubeka uYehova kuquka ukumphakamisa phambi kwabanye. Kwaye izipho eziphathekayo ezisetyenziswa ekuhambiseleni phambili unqulo lokwenyaniso ziyambeka uThixo. IBhayibhile inemizekelo emihle gqitha yale ndlela yokubeka uYehova.

Imizekelo Yexesha Elidluleyo

Kwiminyaka emalunga nama-3500 eyadlulayo, xa kwafika ixesha lokuba uYehova enze umnquba ube yindawo yokunqula yamaSirayeli entlango, kwafuneka izinto ezixabisekileyo eziziintlobo ngeentlobo ukuze kwenziwe lo msebenzi owawucetywe nguThixo. UYehova wayalela uMoses esithi “bonke abantliziyo zibaqhubayo mabazise umrhumo kaYehova.” (Eksodus 35:5) Le ngxelo ihlabela mgama isithi: “Beza bonke abantu abantliziyo yabavuselelayo, abo bonke bamoya wabaqhubayo, bawuzisa umrhumo kaYehova emsebenzini wentente yokuhlangana, nasenkonzweni yayo yonke, nasezambathweni ezingcwele.” (Eksodus 35:21) Eneneni, umnikelo wabo wokuzithandela waba mninzi kakhulu kunowawufuneka ukuze kwenziwe loo msebenzi kangangokuba kwafuneka abantu ‘bapheze ukuzisa’ izinto!—Eksodus 36:5, 6.

Khawucinge ngomnye umzekelo. Xa umnquba wawuyifezile injongo yawo yaye kusenziwa amalungiselelo okwakha itempile, uDavide wenza umnikelo omkhulu wobuqu kwitempile eyayiza kwakhiwa ngunyana wakhe uSolomon. Kwakhona wahlab’ ikhwelo nakwabanye ukuba bathelele, ibe abantu basabela ngokunikela ngezipho zezinto ezixabisekileyo kuYehova. Isilivere negolide kuphela zazixabisa malunga nama-222 amawaka ezigidi zeerandi ngokwamaxabiso ale mihla. “Bakuvuyela abantu ukunikela kwabo ngokuqhutywa yintliziyo.”—1 Kronike 29:3-9; 2 Kronike 5:1.

‘Ukunikela Ngokuqhutywa Yintliziyo’ Kumhla Wethu

Sinokukuvuyela njani ukwenza iminikelo ngokuqhutywa yintliziyo kwimihla yethu? Owona msebenzi ubalulekileyo owenziwa ehlabathini ngoku ngowokushumayela ngoBukumkani nowokwenza abafundi. (Mateyu 24:14; 28:19, 20; IZenzo 1:8) Kwaye uYehova ukubone kufanelekile ukubeka izilangazelelo zoBukumkani zasemhlabeni emagxeni amaNgqina akhe.—Isaya 43:10.

Kucace mhlophe ukuba kufuneka imali ukuze kuxhaswe umsebenzi owenziwa ngamaNgqina kaYehova namhlanje. Ukwakha nokugcina iiHolo zoBukumkani, iiHolo zeNdibano, iiofisi zamasebe, imizi-mveliso namakhaya aseBheteli esemgangathweni kufuna imali. Ukupapasha nokusasaza iiBhayibhile neempapasho ezisekelwe eBhayibhileni zeelwimi ezahlukeneyo nako kuneendleko ezithile. Zihlangatyezwa njani iindleko ezinjalo zentlangano zokulungelelanisa umsebenzi? Ngeminikelo yokuzithandela!

Inkoliso yale minikelo ivela kwabo—njengomhlolokazi owayebukelwe nguYesu—abangenangeniso ininzi. Ekubeni bengafuni ukuphoswa yile nkalo yokubeka uYehova, banikela izixa ezilingeneyo “ngokwamandla abo okwenene,” yaye maxa wambi, bade badlulele “ngaphaya kwamandla abo okwenene.”—2 Korinte 8:3, 4.

Umpostile uPawulos wathetha la mazwi kumaKristu aseKorinte: “Ngamnye makenze kanye njengoko egqibile entliziyweni yakhe, kungekhona ngokukrokra okanye ngokunyanzelwa, kuba uThixo uthanda umphi ochwayitileyo.” (2 Korinte 9:7) Ukuze ubani aphe ngokuchwayita kufuneka acebe kakuhle. UPawulos wabaxelela oku abaseKorinte: “Usuku ngalunye lokuqala evekini ngamnye wenu endlwini yakhe makabekele bucala okuthile kuvimba njengoko esenokuba uyaphumelela, khon’ ukuze kungathi xa ndifika kwandule ke kuqokelelwe.” (1 Korinte 16:2) Ngendlela efanayo, ngasese yaye beqhutywa ziintliziyo zabo, abo banqwenela ukwenza iminikelo yokuhambisela phambili umsebenzi woBukumkani namhlanje banokubekela ecaleni inxalenye yengeniso yabo ukuze baphumeze loo njongo.

UYehova Uyabasikelela Abo Bambekayo

Ngoxa ukuba nenkqubela ngezinto eziphathekayo kungakhokeleli ekubeni nenkqubela kwizinto zokomoya, ukuzisebenzisa ngesisa izinto zethu ezixabisekileyo—ixesha lethu, amandla ethu nezinto zethu eziphathekayo—ekubekeni uYehova kuzisa iintsikelelo ezityebileyo. Oku kunjalo kuba uThixo, ezizezakhe zonke izinto, uyasiqinisekisa: “Umphefumlo osikelelayo uyatyetyiswa; oseza ahluthise abanye, uyasezwa ahluthe naye.”—IMizekeliso 11:25.

Emva kokufa kukaKumkani uDavide, unyana wakhe uSolomon wasebenzisa iminikelo esuk’ entliziyweni eyayiqokelelwe nguyise ukuze akhe itempile ezukileyo, njengoko uYehova wayeyalele. Kwaye ngexesha uSolomon wayethembekile ekunquleni uThixo, “ahlala amaYuda namaSirayeli ekholosile . . . ethabathela kwaDan esa eBher-shebha.” (1 Kumkani 4:25) Oovimba babezele, imiphanda yewayini yayiphuphuma—xa uSirayeli ‘wayebeka uYehova ngobuncwane bakhe.’

Kamva, esebenzisa umprofeti uMalaki, uYehova wathi: “Nindicikide ngale nto, utsho uYehova wemikhosi, ukuba andisayi kunivulela na iingcango zezulu, ndinithululele iintsikelelo, kude kungasweleki lutho.” (Malaki 3:10) Inkqubela yokomoya abanayo abakhonzi bakaYehova namhlanje ibonisa ukuba uThixo uye wasigcina isithembiso sakhe.

Ngokuqinisekileyo uYehova uyakholiswa xa sisenza indima yethu ekuhambiseleni phambili izilangazelelo zoBukumkani. (Hebhere 13:15, 16) Kwaye uthembisa ukusilondoloza ukuba ‘siqhubeka sifuna kuqala ubukumkani nobulungisa bakhe.’ (Mateyu 6:33) Sinovuyo olukhulu ezintliziyweni zethu, ngamana ‘singabeka uYehova ngobuncwane bethu.’

[Ibhokisi ekwiphepha 29]

Iindlela Abanye Abakhetha Ukunikela Ngazo Iminikelo Eya Kumsebenzi Owenziwa Ehlabathini Lonke

Abaninzi babekela bucala, okanye benze uqingqo-mali, lwemali abaza kuyifaka kwiibhokisi zeminikelo. Nyanga nganye amabandla athumela ezi zixa zemali kwikomkhulu lehlabathi eliseBrooklyn, eNew York, okanye kwiofisi yesebe ekufutshane.

Iminikelo yokuzithandela yemali isenokuthunyelwa ngokungqalileyo kwiTreasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, okanye kwiofisi yoMbutho enyamekela ilizwe lakho. Kusenokunikelwa ngezinto ezenziwe ngamatye anqabileyo okanye ngezinye izinto ezixabisekileyo. Le minikelo imele iphelekwe yileta emfutshane echaza ukuba le yiminikelo.

Ilungiselelo Lomnikelo Woxhomekeko

Imali isenokunikelwa kwiWatch Tower Society ukuze igcinwe de lowo unikeleyo afe, kukho nelungiselelo lokuba xa efuna ukuyisebenzisa, ibuyiselwe kuye. Ukuze ufumane inkcazelo engakumbi, nceda ubhalele iTreasurer’s Office kule dilesi ibhalwe ngezantsi.

Ukunikela Okucetyiweyo

Ukongezelela kwiminikelo yemali neminikelo yemali yoxhomekeko, zikho ezinye iindlela zokunikela eziluncedo kwinkonzo yoBukumkani ehlabathini lonke. Ezi ziquka:

I-Inshorensi: IWatch Tower Society isenokubhaliswa njengeya kufumana imali kwi-inshorensi yobomi okanye kwilungiselelo lemali yomhlala-phantsi. UMbutho umele waziswe ngalo naliphi na ilungiselelo elinjalo.

Imali Eselugcinweni NeeBond: Imali eselugcinweni neebond zinokunikelwa kwiWatch Tower Society njengezipho okanye ngaphantsi kwelungiselelo lokuba ingeniso iqhubeke ihlawulwa kulowo wenze umnikelo.

ISiza Nezindlu Ezikuso: Isiza esinokuthengiswa sinokunikelwa kwiWatch Tower Society njengomnikelo okanye ngokusigcina elungelweni lalowo unikele ngaso, aqhubeke ehlala kuso ebudeni bokuphila kwakhe. Ubani ufanele aqhagamshelane noMbutho ngaphambi kokwenza isivumelwano sokunikela ngomhlaba kuMbutho.

Iminqophiso Yamafa: Imihlaba okanye imali isenokushiyelwa iWatch Tower Society ngokwenziwa komnqophiso welifa ngokwasemthethweni. Umbhalo waloo myolelo ufanele uthunyelwe kuMbutho.

Abo banomdla kulo naliphi na kula malungiselelo acetyiweyo okunikela bamele babhalele iTreasurer’s Office kwidilesi engezantsi okanye kwiofisi yoMbutho enyamekela ilizwe labo. ITreasurer’s Office imele ifumane umbhalo wamaxwebhu afanelekileyo ngokuphathelele naliphi na kula malungiselelo.

TREASURER’S OFFICE Watch Tower Bible and Tract Society of Pennsylvania Private Bag X2067, Krugersdorp, 1740 Inombolo Yemfonomfono: (011) 761-1000