Imibuzo Evela Kubafundi
Ngaba uAbheli wayesazi ukuba kwakufuneka abingelele ngesilwanyana ukuze amkeleke kuThixo?
Akuthethwa nto ingako kwingxelo yeBhayibhile ngemibingelelo eyenziwa nguKayin noAbheli. KwiGenesis 4:3-5, sifunda oku: “Emva kwexesha elithile uKayin wazisa ezithile kwiziqhamo zomhlaba njengomnikelo kuYehova. Ke yena uAbheli, wazisa athile kumazibulo omhlambi wakhe, kwanamanqatha awo. Ngoxa ke uYehova wambabalayo uAbheli nomnikelo wakhe, akazange ambabale uKayin nomnikelo wakhe.”
IBhayibhile ayilikhankanyi elokuba ngaphambi kwesi siganeko uYehova wayenikele inkcazelo engqalileyo ngemibingelelo okanye ngohlobo lweminikelo eyamkelekileyo kuye. Ngenxa yoko, kucacile ukuba uKayin noAbheli bazikhethela uhlobo lwemibingelelo ababeza kunikela ngayo. Begxothiwe kwikhaya eliyiParadesi lantlandlolo labazali babo, baqalisa ukuva imiphumo yesono, yaye babehlukanisiwe noThixo. Ngenxa yemeko yabo yesono nemaxongo, kumelwe ukuba baziva bekufuna ngamandla ukufumana uncedo lukaThixo. Kusenokwenzeka ukuba ukunikela ngesipho kuThixo bakwenza ngokuzithandela ukuze bamkeleke kuThixo.
Njengokuba ingxelo ibonisa, uThixo wawamkela umnikelo ka-Abheli kodwa akazange awamkele okaKayin. Ngoba? Ngaba kwakungenxa yokuba uAbheli wayenikele ngezinto ezamkelekileyo waza yena uKayin wanikela ngezinto ezingamkelekanga? Asinakuqiniseka ukuba uhlobo lomnikelo lwalungenanto yakwenza kulo mbandela, ekubeni bobabini babengazange baxelelwe uhlobo lomnikelo owamkelekileyo nongamkelekanga. Phofu ke, kusenokwenzeka ukuba yayamkeleke yomibini. KuMthetho uYehova ekugqibeleni awawunika uhlanga lwakwaSirayeli, iminikelo eyamkelekileyo yayiquka kungekuphela nje izilwanyana okanye iinyama ezithile kuzo, kodwa wawuquka nokutya okuziinkozo okugcadiweyo, izithungu zerhasi, umgubo ocoliweyo, izinto ezibhakiweyo newayini. (Levitikus 6:19-23; 7:11-13; 23:10-13) Kuyabonakala ukuba, yayingeyonto ekubingelelwe ngayo kuphela eyayinikelwe nguKayin noAbheli eyamenza uThixo amkele omnye aze angawamkeli omnye.—Thelekisa Isaya 1:11; Amosi 5:22.
Kwiinkulungwane kamva, umpostile uPawulos wathi: “Ngokholo uAbheli wanikela kuThixo umbingelelo oxabiso likhulu ngakumbi kunokaKayin, kholo olo awathi ngalo wangqinelwa ukuba ulilungisa, uThixo enikela ubungqina ngokuphathelele izipho zakhe.” (Hebhere 11:4) Ngaloo ndlela, lukholo olwenza uAbheli abe lilungisa kuThixo. Kodwa ukholo entwenini? Ukholo kwisithembiso sikaYehova sokuba uya kunikela iMbewu, eya ‘kutyumza intloko yenyoka’ ize ibuyisele uxolo olwalukho nemfezeko umntu awayenayo ngaphambili. Ngenxa yamazwi athi iMbewu iya ‘kutyunyuzwa isithende,’ kusenokwenzeka ukuba uAbheli wacinga ukuba kwakufuneka umnikelo wokuphalazwa kwegazi. (Genesis 3:15) Enoba wayecinga ntoni na, enyanisweni yayilukholo uAbheli awalubonakalisayo olwenza ‘umbingelelo wakhe wanexabiso elikhulu ngakumbi kunokaKayin.’
Ngokufanayo, uKayin akazange angamkelwa ngenxa yokuba wanikela ngohlobo olungafanelekanga lombingelelo, kodwa ngenxa yokuba wayengenalukholo, njengoko oko kwaboniswa zizenzo zakhe. UYehova wamxelela ngokuphandle uKayin esithi: “Ukuba uyaguquka wenze okulungileyo, akusayi kuphakanyiswa yini na?” (Genesis 4:7) UThixo akazange angamamkeli uKayin ngenxa yokuba engakholiswa ngumbingelelo wakhe. Kunoko, “kwakungenxa yokuba imisebenzi yakhe yayingendawo”—enomona, intiyo, yaye ekugqibeleni wabulala—nto leyo eyenza uThixo akamamkela uKayin.—1 Yohane 3:12.