Iminyaka Engaphezu Kwama-40 Yokuvalwa Komsebenzi Ngamakomanisi
NGOKUBALISWA NGUMIKHAIL VASILEVICH SAVITSKII
IMboniselo (yesiNgesi) ka-Aprili 1, 1956, yachaza ukuba “intshabalaliso enkulu” yamaNgqina kaYehova yabakho ngoAprili 1, 7 nangowesi-8, 1951. Le Mboniselo yacacisa yathi: “Ezi ziintsuku ezingenakulityalwa ngamangqina kaYehova eRashiya. Kwezi ntsuku zintathu onke amangqina kaYehova aseNtshona Ukraine, eWhite Russia [eBelarus], eBessarabia, eMoldavia, eLatvia, eLithuania nase-Estonia—ngaphezu kwamadoda namabhinqa angamawaka asixhenxe . . . afakwa kwiinqwelwana, asiwa kwisikhululo sikaloliwe aza afakwa kumakhareji eenkomo, athunyelwa kude.”
NGOAPRILI 8, 1951, umfazi wam, unyana wam oneenyanga ezisibhozo ubudala, abazali bam, umninawa wam, namanye amaNgqina amaninzi bathatyathwa kwizindlu zabo eTernopol’, eUkraine. Emva kokukhweliswa kumakhareji eenkomo, bahamba kangangeeveki ezimbini. Ekugqibeleni, bafika kwitaiga (amahlathi akumazantsi eArtiki) yaseSiberia, apho bothulwa khona kwintshona yeChibi iBaikal.
Kwakutheni ukuze ndingaqukwa kule ntshabalaliso? Ngaphambi kokuba ndikuxelele indawo endandikuyo ngelo xesha noko kwenzekayo kamva, mandikuxelele indlela ekwenzeka ngayo ukuba ndibe ngomnye wamaNgqina kaYehova.
Inyaniso YeBhayibhile Ifikelela Kuthi
NgoSeptemba 1947, xa ndandineminyaka eli-15 kuphela ubudala, kwafika amaNgqina kaYehova amabini ekhaya kwidolophana encinane yaseSlaviatin, malunga neekhilomitha ezingama-50 ukusuka eTernopol’. Njengoko mna noMama sasihleli siphulaphule aba bantu baselula—omnye wabo ogama linguMaria—ndafumanisa ukuba olu asilonqulo nje. Bacacisa unqulo lwabo baza bayiphendula ngokucacileyo imibuzo yethu yeBhayibhile.
Ndandikholelwa ukuba iBhayibhile liLizwi likaThixo, kodwa ndadaniswa yicawa. UTat’ omkhulu wayedla ngokuthi: “Abefundisi boyikisa abantu ngokuthetha ngokuthuthunjiswa kwisihogo somlilo, kodwa bona abefundisi aboyiki nto. Kuphela nje baqhatha baze bakhohlise amahlwempu.” Ndisabukhumbula ubundlobongela nokutshiswa kwezindlu zabantu basePoland kwidolophana yethu ekuqaleni kweMfazwe Yehlabathi II. Okothusayo kukuba, olu hlaselo lwaluphenjelelwe ngumfundisi ongumKatolika wamaGrike. Kamva, ndabona inyambalala yamaxhoba abuleweyo, yaye ndandifuna ukwazi unobangela wenkohlakalo enjalo.
Njengoko ndandifundisisa iBhayibhile namaNgqina, ndaqalisa ukuqonda. Ndafunda iinyaniso ezisisiseko zeBhayibhile, kuquka nenyaniso yokuba isihogo somlilo asikho yaye uSathana uMtyholi usebenzisa unqulo lobuxoki ukuze abangele imfazwe nokuphalazwa kwegazi. Ngamaxesha athile, ndandinqumama ebudeni bofundisiso lwam lobuqu ndize ndithandaze ngokusuka entliziyweni ndibulela uYehova ngoko ndandikufunda. Ndaqalisa ukwabelana nomntakwethu uStakh ngezi nyaniso zeBhayibhile, yaye ndavuya kakhulu xa wazamkelayo.
Ukuqhelisela Oko Ndikufundileyo
Ndafumanisa ukuba ndifanele ndenze iinguqulelo ezithile yaye ngokukhawuleza ndayeka ukutshaya. Kwakhona ndayiqonda imfuneko yokuhlanganisana ngokuthe rhoqo nabanye kwilungiselelo ababenalo lesifundo seBhayibhile. Ukuze ndenze oku ndandihamba ndityhubela ehlathini kangangeekhilomitha ezilishumi ukuze ndifike kwindawo efihlakeleyo apho iintlanganiso zaziqhutyelwa khona. Ngamanye amaxesha kwakusiya amabhinqa ambalwa kuphela kwiintlanganiso, yaye nangona ndandingekabhaptizwa ngelo xesha, ndandicelwa ukuba ndiziqhube.
Wawubeka ubomi bakho esichengeni ngokuba noncwadi lweBhayibhile, yaye xa wawunokubhaqwa unalo wawunokugwetywa iminyaka engama-25 entolongweni. Sekunjalo, ndandifuna ukuba nethala lam leencwadi. Omnye wabamelwane bam wayefunde namaNgqina kaYehova, kodwa ngenxa yokoyika, wayeka waza walufihla uncwadi lwakhe kwisitiya sakhe. Hayi indlela endambulela ngayo uYehova xa le ndoda yavumbulula zonke iincwadi namaphephancwadi ayo yaza yandivumela ukuba ndizithabathe! Ndazifihla kwimingxuma yenyosi kaTata, apho abanye babengenakufane bacinge ngokuzikhangela khona.
NgoJulayi 1949, ndabahlulela ubomi bam kuYehova ndaza ndafuzisela uzahlulelo lwam ngobhaptizo. Olu yaba lolona suku lonwabisayo ebomini bam. Eli Ngqina elandibhaptiza ngokufihlakeleyo lagxininisa kwelokuba ukuba ngumKristu wokwenyaniso akuyondlwan’ iyanetha yaye zininzi izilingo eziza kubakho. Kungekudala ndafumanisa indlela awayeyinyaniso ngayo loo mazwi alo! Sekunjalo, ubomi bam njengeNgqina elibhaptiziweyo baqalisa ngendlela evuyisayo. Kwiinyanga ezimbini emva kokubhaptizwa kwam, ndatshata noMaria, omnye wababini ababonisa mna noMama inyaniso.
Isilingo Sam Sokuqala Seza Ngequbuliso
NgoAprili 16, 1950, ekugodukeni kwam ndivela kwidolophu encinane yasePodgaitsi ndaqubisana namajoni aza afumana uncwadi lweBhayibhile endandilusa kwiqela lethu lesifundo. Ndabanjwa. Kwiintsuku ezimbalwa zokuqala ndivalelwe, ndabethwa ngentonga, yaye andizange ndivunyelwe ukuba nditye okanye ndilale. Kwakhona ndayalelwa ukuba ndivove ndibeke izandla entloko kangangezihlandlo ezilikhulu, kodwa ndandidinwe kakhulu ukuba ndingagqiba. Emva koku ndaphoswa kwigumbi elikumgangatho ongaphantsi elibandayo nelifumileyo iiyure ezingama-24.
Injongo yokuphathwa kakubi yayikukundiqoba amandla okuxhathisa ukuze kube lula ukufumana inkcazelo kum. Abuza: “Ulufumene phi uncwadi, yaye ubulusa kubani?” Andizange ndivume ukubaxelela nentw’ encinane. Ngoko ndafundelwa inxalenye yomthetho endandiza kumangalelwa ngawo. Wawusithi xa ubani esasaza yaye egcina uncwadi oluchasene neSoviet wayesohlwaywa ngokufa okanye avalelwe entolongweni iminyaka engama-25.
Abuza: “Ukhetha siphi isohlwayo?”
Ndaphendula ndathi: “Nasinye, kodwa ndithembele kuYehova, yaye ngoncedo lwakhe ndiya kwamkela nantoni na ayivumelayo.”
Ndingalindelanga, emva kweentsuku ezisixhenxe bandikhulula. Loo mava andinceda ndabuqonda ubunyani besithembiso sikaYehova esithi: “Andiyi kuze nangayiphi na indlela ndikushiye, ndingayi kuze nangayiphi na indlela ndikutyeshele.”—Hebhere 13:5.
Ngexesha endabuyela ngalo ekhaya, ndandigula kakhulu, kodwa uTata wandisa kugqirha, yaye kungekudala ndachacha. Nangona uTata wayengenazinkolelo zifanayo nenxalenye yentsapho, wayesixhasa kunqulo lwethu.
Ukuvalelwa Entolongweni Nokugxothelwa Ngaphandle
Kwiinyanga ezithile kamva ndabizelwa emkhosini weSoviet. Ndachaza ngesazela sam esingandivumeliyo ukwenjenjalo. (Isaya 2:4) Sekunjalo, ngoFebruwari 1951, ndagwetywa iminyaka emine ndaza ndathunyelwa entolongweni eTernopol’. Kamva ndathunyelwa kwenye eL’viv, kwidolophu enkudlwana ekwiikhilomitha ezimalunga ne-120 mgama. Ngoxa ndandisentolongweni apho, ndafumanisa ukuba amaNgqina amaninzi agxothelwe eSiberia.
Ngehlobo lowe-1951, iqela lethu lathunyelwa ngaphaya kweSiberia, ukuya kutsho kwiMpuma Ekude. Sahamba ithuba elingangenyanga—iikhilomitha ezinokuba ngama-11 000—sidlula iindawo ezinamaxesha ahlukahlukeneyo ezili-11! Sema nje kwakanye ukuze sivunyelwe ukuba sihlambe, emva kokuba sihambe ixesha elingaphezu kweeveki ezimbini ngololiwe. Leyo yayiyindawo enkulu yokuhlamba kawonke wonke eNovosibirsk, eSiberia.
Apho, phakathi kwesihlwele esikhulu samabanjwa, ndeva indoda ikhwaza isithi: “Ngubani apha oyintsapho kaYonadabhi?” Ibinzana elithi “Yonadabhi” lalisetyenziswa ngelo xesha ukuchaza abo banethemba lokuphila ngonaphakade emhlabeni. (2 Kumkani 10:15-17; INdumiso 37:11, 29) Amabanjwa aliqela azichaza njengamaNgqina. Hayi indlela esasibulisana ngovuyo ngayo!
Umsebenzi Wokomoya Entolongweni
Ngoxa sasiseNovosibirsk savumelana ngegama elifihlakeleyo esasiza kubizana ngalo ukuze sazane xa sifika kuloo ndawo siya kuyo. Sonke saphelela kwinkampu enye yentolongo kuLwandle lwaseJapan, engekude kangako neVladivostok. Apho salungiselela iintlanganiso ezithe rhoqo zesifundo seBhayibhile. Ukuba phakathi kwaba bazalwana baqolileyo nabakhulileyo ababevalelwe entolongweni kangangethuba elide ngokwenene kwandomeleza ngokomoya. Babetshintshisana ekuqhubeni iintlanganiso zethu, besebenzisa iindinyana zeBhayibhile baze banikele amagqabaza abawakhumbulayo asuka kumaphephancwadi IMboniselo.
Kwakubuzwa imibuzo, yaye abazalwana babenikela iimpendulo. Uninzi kuthi lwalusika iziqwengana zamaphepha kwiingxowa zesamente ezingenanto luze lubhale amanqaku kuzo. Sasiwadibanisa size siwagcine la manqaku ukuze siwasebenzise njengethala lethu. Emva kweenyanga ezimbalwa, abo babeza kuvalelwa ithuba elide bathunyelwa kwiinkampu kude lee kumntla Siberia. Abathathu kuthi bazalwana baselula sathunyelwa eNakhodka, kwidolophu ekufuphi ekwiikhilomitha ezingaphantsi kwezingama-650 ukusuka eJapan. Apho ndachitha iminyaka emibini ndisentolongweni.
Kwakuye kwenzeke ukuba ngebhaqo sifumane umbhalo weMboniselo. Wawusiba kukutya kwethu kokomoya kangangeenyanga. Ekuhambeni kwexesha, kwakhona sasifumana iileta. Eyokuqala endayifumanayo eyayivela kwintsapho yam (ngoku ethinjiweyo) yatsho ndalila. Yayisithi, njengoko kuchaziwe kwiMboniselo ekhankanywe kwintshayelelo, izindlu zamaNgqina ziye zahlaselwa yaye iintsapho zanikwa iiyure nje ezimbini ukuba ziphume ziphele.
Ndinentsapho Yam Kwakhona
Ndakhululwa ngoDisemba 1952, emva kokuthothoza iminyaka emibini kwisigwebo sam seminyaka emine. Ndadibana nentsapho yam kwidolophana yaseGadaley kufuphi neTulun, eSiberia, apho yagxothelwa khona. Kakade ke, kwakumnandi ukuba kunye nayo kwakhona—unyana wam uIvan wayeza kuba neminyaka emithathu ubudala, yaye intombi yam uAnna yayiza kuba neminyaka emibini. Noko ke, inkululeko yam, yayilinganiselwe. Incwadi yam yokundwendwela yathinjwa ngabasemagunyeni basekuhlaleni, yaye ndandibekwe esweni. Ndandingakwazi ukuhamba ngaphezu kweekhilomitha ezintathu ukusuka ekhaya. Kamva, ndavunyelwa ukuba ndikhwele ihashe ukuya emarikeni eTulun. Ndisebenzisa ubulumko, ndadibana namanye amaNgqina apho.
Ngelo xesha, sasinamantombazana amabini, uAnna noNadia, namakhwenkwe amabini, uIvan noKolya. Ngowe-1958 saba nomnye unyana, uVolodya. Yaye kamva, ngowe-1961, saba nenye intombi, uGalia.
I-KGB (eyayingumbutho wezokhuselo welizwe) ngokufuthi yayindibamba ize indigocagoce ngemibuzo. Injongo yayo yayingekuko ukuba ndiyinike inkcazelo ngebandla nje kuphela kodwa kwakhona yayikukwenza ndirhanelwe ngokusebenzisana nayo. Ngoko yayindithabatha indise kwindawo yokutyela entle ize izame ukundifota ndincumile ndonwabile kunye nayo. Kodwa ndandikuqonda oko yayifuna ukukwenza, ndaza ngokusengqiqweni ndenza umgudu wokubugcina ubuso bam buntshingintshingi. Ngalo lonke ixesha ndandibanjwa, ndandibaxelela abazalwana ngayo yonke into eye yaqhubeka. Ngaloo ndlela, abazange bakuthandabuze ukunyaniseka kwam.
Ukuqhagamshelana Neenkampu
Ukutyhubela iminyaka, amakhulukhulu amaNgqina afakwa kwiinkampu zentolongo. Ebudeni beli xesha, sasiqhagamshelana ngokuthe rhoqo nabazalwana bethu abasentolongweni, sibathumelela uncwadi. Kwakusenziwa njani oku? Xa abazalwana okanye oodade babekhululwa kwinkampu ethile, sasifumanisa kubo iindlela uncwadi olwalunokungeniswa ngalo ngokufihlakeleyo phezu kwabo nje abalindi abangqongqo. Kangangeminyaka enokuba lishumi, sakwazi ukudlulisela kwaba bazalwana bethu abakwezi nkampu imibhalo yamaphephancwadi neencwadi esasizifumana ePoland nakwamanye amazwe.
Uninzi loodade wethu abangamaKristu lwaluchitha ixesha elide lukhuphela uncwadi ngoonobumba abancinane ukuze iphephancwadi lonke likwazi ukufihlwa kwinto encinane enjengebhokisi yematshisi! Ngowe-1991, xa umsebenzi wawuvuliwe yaye sasifumana amaphephancwadi amahle anemibala emine, omnye woodade wethu wathi: “Ngoku siza kulityalwa.” Wayephazama. Nangona abantu besenokulibala, umsebenzi wabanyanisekileyo awusoze ulityalwe nguYehova!—Hebhere 6:10.
Ukufuduselwa Kwenye Indawo Neentlekele
Ngasekupheleni kowe-1967 indlu yomninawa wam eIrkutsk yagqogqwa. Kwafunyanwa ifilimu nemibhalo yoncwadi lweBhayibhile. Wabanjwa waza wagwetywa iminyaka emithathu entolongweni. Noko ke, ukugqogqwa kwendlu yethu akuzange kubazuzise nto. Sekunjalo, abasemagunyeni babeqinisekile ngokubandakanyeka kwethu, ngoko intsapho yam kwakumele ihambe kuloo mmandla. Safudukela malunga neekhilomitha ezingama-5 000 ngasentshona kwisixeko saseNevinnomyssk eCaucasus. Apho sazigcina sixakekile ngokunikela ubungqina obungacwangciswanga.
Kwenzeka intlekele ngosuku lokuqala lokuvalwa kwezikolo ngoJuni 1969. Ngoxa wayezama ukuthabatha ibhola kufuphi netransformer enamandla amakhulu ombane, unyana wethu oneminyaka eli-12 ubudala, uKolya, wafunyanwa ngumbane. Ngaphezu kwama-70 ekhulwini omzimba wakhe watsha. Esibhedlele, wajika wajonga kum waza wandibuza wathi: “Ngaba siza kuphinda sikwazi ukuya sobabini esiqithini?” (Wayethetha ngesiqithi esasidla ngokukuvuyela ukusityelela.) Ndaphendula ndisithi: “Ewe, Kolya, siza kuphinda sikwazi ukuya kwesa siqithi. Xa uYesu Kristu ekuvusela ebomini, ngokuqinisekileyo siza kuya kwesa siqithi.” Engekho zingqondweni ngokupheleleyo, waqhubeka ecula elinye lamaculo akhe awathandayo oBukumkani, elo wayethanda ukulidlala kwixilongo lakhe kwiokhestra yebandla. Kwiintsuku ezintathu kamva wafa, eqinile kwithemba lovuko.
Kunyaka olandelayo unyana wethu oneminyaka engama-20 ubudala, uIvan, wabizelwa emkhosini. Wathi akungavumi, wabanjwa waza wachitha iminyaka emithathu entolongweni. Ngowe-1971, ndabizelwa emkhosini ndaza kwakhona ndatyityimbiselwa umnwe ngokufakwa entolongweni ngenxa yokungayi. Ityala lam laqhubeka kangangeenyanga eziliqela. Ngelo xesha umfazi wam wagula ngumhlaza yaye wayefuna ingqalelo engakumbi. Ngenxa yoku baliphelisa eli tyala. UMaria wafa ngowe-1972. Ebesoloko eliqabane elithembekileyo, enyanisekile kuYehova de wafa.
Intsapho Yethu Isasazeke Ngokubanzi
Ngowe-1973, ndatshata noNina. Uyise wamgxotha ekhaya ngowe-1960 ngenxa yokuba eliNgqina. Wayengumlungiseleli onenzondelelo owayephakathi kwaba dade basebenza nzima ekukhupheleni amaphephancwadi besenzela abo basezinkampini. Abantwana bam nabo, bamthanda.
Abasemagunyeni baphazanyiswa ngumsebenzi wethu eNevinnomyssk baza basibongoza ukuba sihambe. Ngoko ngowe-1975 umfazi wam, iintombi zam, kwakunye nam safudukela kummandla womzantsi Caucasus eGeorgia. Kwangaxeshanye, oonyana bam uIvan noVolodya bafudukela eDzhambul kumda osemazantsi weKazakstan.
Umsebenzi wamaNgqina kaYehova wawusandula ukuqaliswa eGeorgia. Sanikela ubungqina obungacwangciswanga eGagra naseSukhumi nakwimimandla elapho kuNxweme loLwandle Olumnyama, yaye emva konyaka, amaNgqina alishumi amatsha abhaptizwa kumlambo osentabeni. Kungekudala, abasemagunyeni basinyanzela ukuba sihambe kuloo mmandla, saza safudukela empuma Georgia. Apho sazingisa kwimigudu yethu yokufuna abantu abanjengezimvu, yaye uYehova wasisikelela.
Sasihlanganisana ngamaqela amancinane. Sasinengxaki yolwimi, ekubeni sasingalwazi ulwimi lwaseGeorgia yaye abanye baseGeorgia babengasithethi kakuhle isiRashiya. Ekuqaleni, sasifunda kuphela namaRashiya. Noko ke, kungekudala ukushumayela nokufundisa ngolwimi lwaseGeorgia kwaba nenkqubela, yaye ngoku kukho abavakalisi boBukumkani abangamawakawaka eGeorgia.
Ngowe-1979, phantsi kwengcinezelo ye-KGB umqeshi wam wathi andisamkelekanga kwilizwe lakhe. Ngelo xesha intombi yam uNadia yabandakanyeka kwingozi yenqwelo-mafutha, yaza yona nentombi yayo eselula bafa. Umama wafa ethembekile kuYehova eNevinnomyssk kunyaka ngaphambi koko, eshiya utata nomninawa wam. Ngoko sagqiba kwelokuba sibuyele khona.
Iintsikelelo Ngenxa Yokunyamezela
Saqhubeka sivelisa uncwadi lweBhayibhile ngokufihlakeleyo eNevinnomyssk. Ngenye imini phakathi kwiminyaka yee-1980 xa ndabizwa ngabasemagunyeni, ndabaxelela ukuba ndiphuphe ndifihla amaphephancwadi ethu. Bahleka. Njengoko ndandihamba, omnye wabo wathi kum: “Uze ungaphindi uphuphe ngendlela ofihla ngayo uncwadi lwenu.” Waqukumbela wathi: “Kungekudala uncwadi luza kube lubekwe kwithala lakho, yaye uza kuya kwiintlanganiso nibambene ngezandla nomfazi wakho yaye kwesinye isandla uphethe iBhayibhile yakho.”
Ngowe-1989 sakhathazeka xa intombi yethu uAnna yafa ngenxa yoxinzelelo lwegazi ebuchotsheni. Yayineminyaka engama-38 kuphela ubudala. Kwangaloo nyaka mnye, ngoAgasti, amaNgqina eNevinnomyssk aqesha uloliwe aza aya eWarsaw ePoland, ukuya kwindibano yezizwe ngezizwe. Abantu ababelapho babengama-60 366, kuquka namawakawaka avela eSoviet Union. Eneneni sasicinga ukuba siyaphupha! Ngaphantsi kweminyaka emibini kamva, ngoMatshi 27, 1991, ndaba nelungelo lokuba ngomnye wabadala abahlanu abanexesha elide eSoviet Union ukutyobela olona xwebhu lubalulekileyo eMoscow olwaluvumela amaNgqina kaYehova ukuba abe ngumbutho ongokwasemthethweni wonqulo!
Ndiyavuya kuba abantwana bam abasaphilayo bakhonza uYehova ngokuthembekileyo. Yaye ndikhangele phambili kwihlabathi elitsha likaThixo apho kwakhona ndingabona uAnna, uNadia nentombi yakhe, kwakunye noKolya. Xa evuswa, ndiya kusigcina isithembiso sam sokumsa kwesa siqithi esasikuvuyela ukuya kuso kunye kwiminyaka emininzi eyadlulayo.
Okwangoku, olunjani lona uvuyo ekululo ukubona ukwanda okukhawulezayo kwenyaniso yeBhayibhile kweli lizwe likhulu! Ndivuya ngokwenene ngendlela endiye ndabusebenzisa ngayo ubomi bam, yaye ndiyambulela uYehova ngokundivumela ukuba ndibe ngomnye wamaNgqina akhe. Ndiqinisekile ngobunyaniso beNdumiso 34:8 ethi: “Yivani, nibone ukuba ulungile uYehova. Hayi, uyolo lomfo ozimela ngaye!”
[Umfanekiso okwiphepha 25]
Unyaka endadibana ngawo nentsapho yam eTulun
[Imifanekiso ekwiphepha 26]
Ngasentla: Utata nabantwana bam phambi kwendlu yethu eTulun, eSiberia
Ngasentla ekunene: Intombazana yam uNadia nentombazana yakhe, abafa bobabini kwingozi yenqwelo-mafutha
Ekunene: Umfanekiso wentsapho ngowe-1968