Eyona Nto Ndiyixhalabeleyo—Ukuhlala Ndinyanisekile
NGOKUBALISWA NGUALEXEI DAVIDJUK
Unyaka yayingowe-1947; indawo, ziikhilomitha ezimbalwa ukusuka kwidolophana yaseLaskiv, eUkraine, kufuphi nomda wasePoland. Umhlobo wam omdala uStepan wayesebenza njengomthunywa ethubelezisa uncwadi lweBhayibhile ukusuka ePoland ukuya eUkraine. Ngobunye ubusuku umlindi wasemdeni wambona, wamleqa, waza wamdubula. Kwiminyaka eli-12 kamva ukufa kukaStepan kwaba negalelo elikhulu kubomi bam, njengoko ndiza kukutyebisela kamva.
UKUZALWA kwam eLaskiv ngowe-1932, iintsapho ezilishumi kwidolophana yethu yayingaBafundi BeBhayibhile, njengoko ayesaziwa njalo amaNgqina kaYehova. Phakathi kwabo kwakukho abazali bam, ababengumzekelo omhle wokunyaniseka kuYehova de bafa phakathi kweminyaka yee-1970. Kubo bonke ubomi bam, ukunyaniseka kuThixo ibiyeyona nto ndiyixhalabeleyo.—INdumiso 18:25.
Ngowe–1939, unyaka eyaqalisa ngawo iMfazwe Yehlabathi II, ummandla esasihlala kuwo empuma Poland waqukwa kwiSoviet Union. Sasilawulwa yiSoviet de kwangoJuni wowe-1941, xa amaJamani ahlasela aze athimba ummandla wethu.
Ebudeni beMfazwe Yehlabathi II, kwakunzima kum esikolweni. Abantwana babefundiswa ukucula imihobe yesizwe baze babe nesabelo ekuziqeqesheleni imfazwe. Enyanisweni, inxalenye yoqeqesho lwethu yayiquka ukufunda indlela yokugibisela iziqhushumbisi. Kodwa andizange ndivume ukucula iingoma zokuthand’ izwe nokubandakanyeka nakuluphi na uqeqesho lwemfazwe. Ukufunda ndisemncinane ukuzimela iimfundiso zeBhayibhile endandizikholelwa kwandinceda ukuba ndihlale ndinyanisekile kuThixo kwiminyaka eyalandelayo.
Babebaninzi abantu ababenomdla kwinyaniso yeBhayibhile kwintsimi yebandla lethu, kangangokuba oovulindlela ababini, njengoko abalungiseleli bexesha elizeleyo bamaNgqina kaYehova bebizwa njalo, babelwa kummandla wethu ukuncedisa ukubafundisa. Omnye woovulindlela, uIlja Fedorovitsch, wafundisisa iBhayibhile nam waza wandiqeqesha kubulungiseleli. Ebudeni bolawulo lwamaJamani, uIlja wagxothwa waza waya kuphoswa kwenye yeenkampu zoxinaniso zamaNazi, apho wafela khona.
Umzamo KaTata Wokuhlala Engundilele
Ngowe-1941 amagosa aseSoviet azama ukunyanzela uTata ukuba atyobele uxwebhu ethembisa ukuba uya kuhlawula imali ukunceda ukuxhasa imfazwe. Wawaxelela ukuba akanakuxhasa nalinye icala emfazweni yaye njengomkhonzi kaThixo oyinyaniso, wayeza kuhlala engundilele. UTata wabekw’ amabala kusithiwa ulutshaba waza wagwetywa iminyaka emine entolongweni. Kodwa wahlala nje iintsuku ezine. Ngoba? Kuba ngeCawa yasemva kokuvalelwa kwakhe entolongweni, umkhosi wamaJamani wawuthimba ummandla walapho sasihlala khona.
Xa abalindi bentolongo beva ukuba amaJamani ayekufuphi, bavula iminyango yentolongo baza babaleka. Ngaphandle, inkoliso yamabanjwa yadutyulwa ngamajoni aseSoviet. UTata akazange ahambe ngoko nangoko kodwa kamva wabalekela kwikhaya labahlobo bakhe. Apho wathumela umyalezo kuMama ukuba athumele amaxwebhu akhe, awayengqina ukuba wabanjwa ngenxa yokungavumi ukuxhasa umkhosi waseSoviet emfazweni. Xa uTata wabonisa oku kumagosa aseJamani, akazange ambulale.
AmaJamani ayefuna ukwazi amagama abo bonke abantu abaye basebenzisana nabantu baseSoviet. Banyanzela uTata ukuba abachaze, kodwa wala. Wabacacisela ngokuba ngundilele kwakhe. Ukuba wayechaze omnye wabo, lowo wayenokudutyulwa. Ngenxa yoko, ubundilele bukaTata basindisa ubomi babanye abantu, abambulela kakhulu.
Ukusebenza Ngokufihlakeleyo
Abantu baseSoviet babuyela eUkraine ngoAgasti 1944, yaye ngoMeyi 1945 iMfazwe Yehlabathi II yaphela eYurophu. Emva koko oko kufane kubizwe ngokuba nguMda Wokwahlukanisa Amazwe kwasigcina thina bakwiSoviet Union sahlukanisiwe nehlabathi lonke. Kwakunzima nokunxibelelana namaNgqina kaYehova ayengaphaya komda wasePoland. AmaNgqina anenkalipho ayethubeleza ngaphaya komda aze abuye namaphephancwadi IMboniselo ambalwa axabisekileyo. Ekubeni umda wawukwiikhilomitha ezisibhozo ukusuka ekhaya eLaskiv, ndandisiva ngomngcipheko ababezifaka kuwo aba bathunywa.
Ngokomzekelo, iNgqina elinguSilvester lawela kabini laza labuya ngaphandle kwengxaki. Kodwa kuhambo lwesithathu, labhaqwa ngabalindi basemideni nezinja zabo. Amajoni amkhwaza esithi makame, kodwa uSilvester wabalekela ukusindisa ubomi bakhe. Ekuphela kwendlela yokuphepha izinja yayikukuziphosa kwichibi elikufuphi. Wachitha ubusuku bonke esemanzini kuvele nje intloko nentamo kuphela, ezimele kwingca ende. Ekugqibeleni, xa abalindi bencama, uSilvester wagxadazela ukugoduka, edinwe eyiloo nto.
Njengoko sendichazile ngaphambilana, umtshana kaSilvester uStepan wabulawa ngoxa wayezama ukunqumla. Sekunjalo, kwakubalulekile ukuba siqhubeke siqhagamshelana nabantu bakaYehova. Ngemigudu yabathunywa abanenkalipho, sakwazi ukufumana ukutya kokomoya nolwalathiso olwasincedayo.
Kunyaka olandelayo, ngowe-1948, ndabhaptizwa ebusuku kwichibi elincinane kufuphi nasekhaya. Abo babeza kuntywiliselwa badibana ekhaya, kodwa ndandingazi ukuba ngoobani na, ekubeni kwakumnyama yaye yonke into yayisenziwa ngokufihlakeleyo. Abo babhaptizwayo babengathethisani. Andimazi umntu owayenikela intetho yokubhaptizwa, owandibuza imibuzo yokubhaptizwa njengoko sasimi kufuphi nechibi, okanye owandintywiliselayo. Kwiminyaka kamva, xa sasithelekisa amanqaku nomhlobo wam, safumanisa ukuba sobabini sasiphakathi kwabo babebhaptizwa ngobo busuku!
Ngowe-1949 amaNgqina aseUkraine afumana incwadi evela eBrooklyn ekhuthaza ukuba abongoze iMoscow ukuba iwamkele ngokusemthethweni umsebenzi wethu kwiSoviet Union. Kulandelwa olo lwalathiso, kwenziwa isibongozo kwiKomiti Elawulayo yeSupreme Soviet yeU.S.S.R. kusetyenziswa umphathiswa wezangaphakathi. Emva koko uMykola Pyatokha noIlya Babijchuk bacelwa ukuba baye eMoscow ukuze bafumane impendulo evela kurhulumente kwisibongozo sethu. Bavuma baza baya eMoscow ngelo hlobo.
Igosa laseburhulumenteni elamkela aba bantu babethunyiwe laphulaphula njengoko babenikela isizathu esisekelwe eBhayibhileni ngomsebenzi wethu. Bacacisa ukuba umsebenzi wethu wawusenziswa uzalisekisa isiprofeto sikaYesu sokuba “ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga.” (Mateyu 24:14) Noko ke, eli gosa lathi uRhulumente akasoze asamkele ngokwasemthethweni.
La maNgqina agoduka aza aya kwikomkhulu laseUkraine iKiev eye kucela imvume yokuba umsebenzi wethu wamkelwe ngokusemthethweni apha eUkraine. Kwakhona abasemthethweni basala esi sicelo. Bathi amaNgqina kaYehova akasayi kuphazanyiswa kuphela xa exhasa uRhulumente. Bathi kwakufuneka amaNgqina afak’ isandla emkhosini aze abe nenxaxheba kunyulo. Kwakhona ukuma kwethu kobundilele kwacaciswa, oko kukuthi, sixelisa iNkosi yethu, uYesu Kristu, asimele sibe yinxalenye yehlabathi.—Yohane 17:14-16.
Kungekudala emva koko, uMzalwan’ uPyatokha noBabijchuk babanjwa, bamangalelwa, baza bagwetywa iminyaka engama-25 entolongweni. Malunga nelo xesha, ngowe-1950, amaNgqina amaninzi, kuquka notata, bathatyathwa ngabasemagunyeni. Wagwetywa iminyaka engama-25 entolongweni waza wathunyelwa eKhabarovsk, kwimpuma yeSoviet Union ekumgama ophantse ube ziikhilomitha ezingama-8 000 ukusuka apho!
Ukugxothelwa ESiberia
Kwandula ke ngoAprili 1951, uRhulumente weSoviet walungiselela ukuwagqebha uduma amaNgqina akwiiriphabliki zayo zasentshonalanga ngoku ezaziwa ngokuba yiLatvia, iEstonia, iLithuania, iMoldova, iBelarus neUkraine. Ebudeni baloo nyanga malunga nabangama-7 000 kuthi, kuquka mna noMama, sagxothelwa eSiberia. Amajoni asuka nje afika ekhaya ebusuku aza asithabatha asisa kwisikhululo sikaloliwe. Apho savalelwa kumakhareji kaloliwe eenkomo—malunga nabangama-50 kwikhareji ngalinye—malunga neeveki ezimbini kamva, sashiywa kwindawo ekuthiwa yiZalari, ekufuphi neChibi iBaikal kwisithili saseIrkutsk.
Ndime kwikhephu kumoya obanda njengomkhenkce yaye ndirhangqwe ngamajoni axhobileyo, ndazibuza enoba oku kwakuza kuphelela phi na. Ndandiza kuhlala njani ndinyanisekile kuYehova apha? Saqalisa ukucula iingoma zoBukumkani ukuze singacingi kakhulu ngengqele. Kamva kwafika abaphathi bamashishini karhulumente basekuhlaleni. Abanye babefuna amadoda ukuba enze umsebenzi onzima, ukanti abanye babefuna amabhinqa ukuze enze izinto ezinjengokwalusa izilwanyana. Mna noMama sasiwa kwindawo ekwakusakhiwa kuyo iTagninskaya Hydroelectric Power Station.
Ukufika kwethu, sabona imikrozo yezindlu zamajoni ezazakhiwe ngamaplanga, apho kwakuhlala khona iimbacu. Ndabelwa ukuba ndisebenze njengomqhubi wetrekta negcisa kwezombane, yaye uMama wabelwa ukuba asebenze emasimini. Ngokusemthethweni sasigqalwa njengabagxothiweyo, kungekhona amabanjwa. Ngoko ke sasikhululekile ukuba sihambahambe kodwa singahambeli kude neli ziko lombane, nangona sasingavunyelwanga ukuba sityelele ilokishi eyayikumgama oziikhilomitha ezingama-50 ukusuka apho. Abasemagunyeni basinyanzela ukuba sityobele sithi siza kuhlala apho ngonaphakade. Oko kwakuvakala kulixesha elide kakhulu kum, umntu oneminyaka eli-19 ubudala, ngoko ndala ukutyobela. Sekunjalo, sahlala kuloo mmandla iminyaka eli-15.
Apho eSiberia umda wasePoland wawungekho kumgama weekhilomitha ezisi-8 kuphela kodwa iziikhilomitha ezingama-6 000 ukusuka apho! Thina maNgqina senza konke okusemandleni ethu ukuze sibe namabandla kwakhona, sinyula amadoda ukuba akhokele. Ekuqaleni, sasingenaluncwadi lweBhayibhile ngaphandle nje kwezinto ezimbalwa amanye amaNgqina akwazi ukuza nazo esuka eUkraine. Ezi zakhutshelwa ngesandla, yaye sabelana ngazo.
Kungekudala saqalisa ukuba neentlanganiso. Ekubeni uninzi lwethu lwaluhlala kwizindlu zamajoni, sasihlanganisana ngeengokuhlwa. Ibandla lethu lalinabantu abanokuba ngama-50, yaye ndabelwa ukuba ndiqhube Isikolo Sobulungiseleli Sobuthixo. Ayembalwa amadoda ebandleni lethu, ngoko namabhinqa ayenikela iintetho zabafundi, nto leyo eyaqalwa kumabandla amaNgqina kaYehova kwezinye iindawo ngowe-1958. Bonke babezijonga nzulu izabelo zabo, bejonga isikolo njengendlela yokudumisa uYehova nokukhuthaza abanye ebandleni.
Ubulungiseleli Bethu Basikelelwa
Ekubeni sasihlala nabantu ababengengawo amaNgqina kwizindlu zamajoni, kwakungafane kudlule usuku singakhange sithethe nabanye ngokholo lwethu, nangona oku kwakungavumelekanga. Emva kokufa kukaJoseph Stalin, umphathi weSoviet ngowe-1953, iimeko zaphucuka. Savunyelwa ukuba sithethe ngokukhululekileyo nabanye ngeenkolelo zethu ezisekelwe eBhayibhileni. Ngokubhalelana nabahlobo eUkraine, saye sayazi indawo akuyo amanye amaNgqina kummandla wethu saza saqhagamshelana nawo. Oku kwasenza salungelelanisa amabandla ethu ngokweziphaluka.
Ngowe-1954, ndatshata no-Olga, naye owayegxothwe eUkraine. Kangangeminyaka emininzi wandixhasa kakhulu kwinkonzo yam kuYehova. Ngumntakwabo-Olga, uStepan, owabulawa kumda ophakathi kweUkraine nePoland ngowe-1947. Kamva saba nentombi, uValentina.
Mna no-Olga sanandipha iintsikelelo ezininzi kubulungiseleli bethu bobuKristu eSiberia. Ngokomzekelo, sadibana noGeorge, owayeyinkokeli kwiqela lamaBhaptizi. Sasisiya kuye rhoqo size sifundisise naziphi na iiMboniselo ezazikho. Kungekudala uGeorge waqonda ukuba oko abakhonzi bakaYehova bakushumayelayo kuvela eBhayibhileni yinyaniso. Sakwaqalisa ukufundisisa nabahlobo bakhe abahlukahlukeneyo abangamaBhaptizi. Hayi indlela ekwakuchulumancisa ngayo kuthi sonke xa uGeorge nabahlobo bakhe babhaptizwa baza baba ngabazalwana bethu bokomoya!
Ngowe-1956, ndamiselwa njengomveleli ohambahambayo, nto leyo eyayifuna ukuba ndityelele ibandla kummandla wethu veki nganye. Ndandisebenza imini yonke ndize emva koko ngokuhlwa ndikhwele isithuthuthu ndiye ebandleni. Ekuseni kusuku olulandelayo, ndandibuya ndize ndiye emsebenzini. UMykhailo Serdinsky, owamiselwa ukuba andincedise kumsebenzi wokuhambahamba, wafa kwingozi yenqwelo-mafutha ngowe-1958. Wafa ngoLwesithathu, kodwa sawuhlehlisa kancinane umngcwabo wakhe de kwangeCawa ukuze sinike amaNgqina amaninzi ithuba lokubakho.
Xa iqela elikhulu kuthi laqalisa ukuya emangcwabeni, salandelwa ngamalungu eZokhuseleko lweLizwe. Ukunikela intetho ethetha ngethemba lethu elisekelwe eBhayibhileni ngovuko sasizibeka emngciphekweni wokubanjwa. Kodwa ndanyanzeleka ukuba ndithethe ngoMykhailo nangethemba lakhe elihle lekamva. Nangona ndandisebenzisa iBhayibhile, abeZokhuseleko lweLizwe abazange bandibambe. Kuyabonakala ukuba baqonda ukuba kwakungekho nto ababenokuyizuza, yaye babendazi kakhulu, ekubeni “ndandilityelela” kakhulu ikomkhulu labo ukuze ndibuzwe imibuzo.
Ukungcatshwa Nguntamnani
Ngowe-1959 abeZokhuseleko lweLizwe babamba amaNgqina ali-12 awayekhokela kumsebenzi wokushumayela. Amanye abizwa ukuze abuzwe imibuzo, yaye ndandiphakathi kwawo. Xa kwafika ixesha lokuba ndibuzwe, ndothuka kukuva la magosa ethetha izinto eziyimfihlo ngomsebenzi wethu. Ayezazi njani ezi zinto? Ngokucacileyo kwakukho untamnani, umntu owayesazi okuninzi ngathi nobesebenzela uRhulumente kangangethuba.
Abali-12 ababebanjiwe babekwizisele ezidibeneyo, yaye bavumelana ukuba abasayi kutsho nelimdaka kwabasemagunyeni. Ngaloo ndlela kwakuza kufuneka loo ntamnani avele yena enkundleni ukunikela ubungqina obunxamnye nabo. Nangona ndingazange ndimangalelwe, ndaya enkundleni ukuze ndibone oko kuza kwenzeka. Ijaji yabuza imibuzo, yaye aba bali-12 abazange baphendule. Emva koko iNgqina elinguKonstantyn Polishchuk, endandilazi kangangeminyaka, lanikela ubungqina obunxamnye naba bali-12. Ekupheleni kweli tyala, amanye amaNgqina agwetyelwa entolongweni. Esitratweni ngaphandle kwesakhiwo senkundla, ndadibana noPolishchuk.
Ndambuza: “Kutheni usingcatsha nje?”
Waphendula: “Kuba andisakholelwa.”
Ndambuza: “Yintoni le ungasayikholelwayo?”
Waphendula esithi: “Andisayikholelwa kwaphela iBhayibhile.”
UPolishchuk wayesenokundingcatsha nam, kodwa xa wayenikela ubungqina akazange alikhankanye igama lam. Ngoko ndambuza isizathu sokuba engakhange akwenze oko.
Wacacisa esithi: “Andifuni uye entolongweni. Ndisaziva ndinetyala ngomntakwabomfazi wakho, uStepan. Ndim omthume ngaphaya komda ngobusuku awabulawa ngabo. Ndicela uxolo.”
Amazwi akhe andothusa. Hayi indlela esasonakele ngayo isazela sakhe! Wayebuhlungu ngokufa kukaStepan, ukanti ngoku ungcatshe abakhonzi bakaYehova. Andizange ndiphinde ndimbone uPolishchuk. Wafa kwiinyanga ezithile kamva. Ukubona umntu endandimthembile iminyaka emininzi engcatsha abazalwana bethu kwandishiya ndibuhlungu kakhulu. Kodwa la mava andifundisa isifundo esibalulekileyo: UPolishchuk akazange anyaniseke kuba wayeka ukuyifunda nokuyikholelwa iBhayibhile.
Eneneni simele sisikhumbule esi sifundo: Ukuba sifuna ukunyaniseka kuYehova, simele sifundisise iZibhalo Ezingcwele rhoqo. IBhayibhile ithi: “Londoloza intliziyo yakho, kuba iphuma kuyo imithombo yobomi.” Ngaphezu koko, umpostile uPawulos waxelela amaKristu ukuba alumke. Ngoba? “Kungaveli nakuwuphi na kuni onentliziyo engendawo eswele ukholo ngokuthi imke kuThixo ophilayo.”—IMizekeliso 4:23; Hebhere 3:12.
Ukubuyela EUkraine
Xa laphelayo ixesha lokugxothelwa kwethu eSiberia ngowe-1966, mna no-Olga sabuyela eUkraine, kwidolophu yaseSokal, malunga neekhilomitha ezingama-80 ukusuka eL’viv. Kwakukuninzi esasifanele sikwenze, ekubeni kwakukho amaNgqina angama-34 kuphela eSokal nakwiidolophu ezikufuphi iCervonograd neSosnivka. Kulo mmandla namhlanje, kukho amabandla ali-11!
UOlga wafa ethembekile ngowe-1993. Kwiminyaka emithathu kamva ndatshata noLidiya, yaye ukususela ngoko ebesoloko endomeleza kakhulu. Ngapha koko, intombi yam, uValentina, nentsapho yakhe bangabakhonzi bakaYehova abanenzondelelo yaye nabo bandikhuthaza kakhulu. Noko ke, eyona nto endenza ndihlale ndonwabe kakhulu kukuba ndiye ndanyaniseka kuYehova, uThixo owenza ngokunyaniseka.—2 Samuweli 22:26.
UAlexei Davidjuk wafa enyanisekile kuYehova ngoFebruwari 18, 2000, njengoko eli nqaku lalisalungiselelwa ukupapashwa.
Ukuba ungayivuyela inkcazelo engakumbi okanye ungathanda ukuba uthile eze kuwe ukuze akuqhubele isifundo seBhayibhile sekhaya sesisa, nceda ubhalele kwiWatch Tower, Private Bag X2067, Krugersdorp, 1740, South Africa, okanye kwikhelingi efanelekileyo kwezidweliswe kwiphepha 5.
[Umfanekiso okwiphepha 28]
Ibandla lethu elalihlanganisana kwizindlu zamajoni ngowe-1952 empuma eSiberia
[Umfanekiso okwiphepha 31]
ISikolo Sobulungiseleli Sobuthixo sethu ngowe-1953
[Umfanekiso okwiphepha 31]
Umngcwabo kaMykhailo Serdinsky ngowe-1958
[Umfanekiso okwiphepha 32]
Ndinomfazi wam uLidiya