Indlela Yokuqonda Uze Woyise Nabuphi Na Ubuthathaka Bokomoya
NGOKWENTSOMI YAMAGRIKE, UACHILLES WAYELELONA GORHA LAMA-Grike kwiMfazwe yaseTrojan, ehlasela isixeko saseTroy. Imbali ithi xa wayeselusana uAchilles, unina wamntywilisela kumanzi oMlambo iStyx, ngaloo ndlela esenzela ukuba angaze onzakaliswe ngaphandle kwakuloo ndawo wayebanjwe kuyo ngunina—ngokutsho kwesaci isithende sika-Achilles. Kwaba kuloo ndawo kanye utolo olubulalayo, awatolwa ngalo nguParis unyana kaKumkani uPriam waseTroy, lwamchana khona lwambulala uAchilles.
AmaKristu ngamajoni kaKristu, alwa idabi lokomoya. (2 Timoti 2:3) Umpostile uPawulos ucacisa athi: “Sizamazamana, kungekhona ngokunxamnye negazi nenyama, kodwa ngokunxamnye noorhulumente, ngokunxamnye namagunya, ngokunxamnye nabaphathi behlabathi bobu bumnyama, ngokunxamnye nemikhosi yomoya engendawo kwezasezulwini iindawo.” Ewe, iintshaba zethu nguSathana uMtyholi needemon.—Efese 6:12.
Ngokucacileyo, ubuya kuba calanye lo mlo ukuba besingancedwa nguYehova uThixo, ochazwa ‘njengendoda elwayo.’ (Eksodus 15:3) Ukuze sizikhusele kwezi ntshaba zethu zineengcwangu, sinikwe isikrweqe sokomoya. Kungenxa yoko lo mpostile wasibongozayo esithi: “Yambathani isikrweqe siphela sikaThixo ukuze nikwazi ukuma niqinile nxamnye namaqhinga kaMtyholi.”—Efese 6:11.
Ngokungathandabuzekiyo, isikrweqe esisinikwe nguYehova uThixo, sesowona mgangatho uphezulu, sinokumelana nayo nayiphi na intlaselo yokomoya. Khawukhangele nje kuludwe oluchazwa nguPawulos: umbhinqo wasesinqeni inyaniso, isigcina-sifuba sobulungisa, iinyawo zifakwe isixhobo seendaba ezilungileyo, ikhaka elikhulu lokholo, isigcina-ntloko sosindiso nekrele lomoya. Ziziphi izixhobo ezingaphezu kwezi ubani anokuba nethemba lokuzifumana? Xa linezi zikrweqe, ijoni elingumKristu limele libe namathuba amaninzi okoyisa, phezu kwabo nabuphi na ubunzima.—Efese 6:13-17.
Nakubeni isikrweqe sokomoya esisifumana kuYehova sikowona mgangatho uphezulu yaye sikhusela thina, asimele sizithabathe lula izinto. Xa sicinga ngendlela ekuthiwa woyiswa ngayo uAchilles, ngaba kusenokwenzeka ukuba nathi sinobuthathaka obuthile, isithende sika-Achilles sokomoya? Oko kusenokuthetha ukufa ukuba sinokufunyanwa singalindelanga.
Hlolisisa Isikrweqe Sakho Sokomoya
Owagqwesa kabini kwiOlimpiki waza wafumana imbasa yegolide ngokutyibiliza emkhenkceni, nowayekhangeleka ephile qete, ngequbuliso wayoba waza wafa ngoxa wayesaqhelisela. Kungekudala emva koko, iThe New York Times yavakalisa iindaba ezothusayo isithi: “Isiqingatha sabantu abangama-600 000 baseMerika abahlaselwa sisifo sentliziyo nyaka ngamnye ababonakalisi zimpawu zaso kwangaphambili.” Kucacile ukuba, impilo yethu ayinakufunyaniswa ngendlela esiziva ngayo.
Kuyafana nangemeko yethu yokomoya. Isiluleko seBhayibhile sithi: “Lowo ucinga ukuba umile makalumke angawi.” (1 Korinte 10:12) Nakubeni isikrweqe sethu sokomoya sikowona mgangatho uphakamileyo, sisenokuba buthathaka. Oku kungenxa yokuba sizalelwe esonweni, yaye imeko yethu yesono nokungafezeki inokusongamela lula size sinikezele kuzimiselo lwethu lokwenza ukuthanda kukaThixo. (INdumiso 51:5) Phezu kwazo nje iinjongo zethu ezintle, intliziyo yethu enenkohliso inokusikhohlisela ekubeni siqiqe phosakeleyo okanye sizithethelele, size ngokulula sibubethe ngoyaba ubuthathaka bethu yaye sizikhohlise ngokucinga ukuba izinto zihamba kakuhle.—Yeremiya 17:9; Roma 7:21-23.
Ukongezelela koko, siphila kwihlabathi apho okulungileyo nokuphosakeleyo kusoloko kubhidaniswa yaye kugqwethwa. Enoba into ilungile okanye iphosakele isenokuchazwa ngendlela umntu avakalelwa ngayo. Ukucinga ngolu hlobo kukhuthazwa kwizibhengezo, kwiindlela zokuzonwabisa ezithandwayo nangamajelo eendaba. Ngokucacileyo, ukuba asilumkanga, sinokukhohliselwa ekubeni sicinge ngaloo ndlela, yaye isikrweqe sethu sokomoya sisenokuqalisa ukuba buthathaka.
Kunokuba siwele kwimeko eyingozi ngolo hlobo, simele sinikele ingqalelo kwisiluleko seBhayibhile esithi: “Hlalani nizivavanya enoba niselukholweni kusini na, hlalani nizicikida oko nikuko nina ngokwenu.” (2 Korinte 13:5) Xa sisenjenjalo, siya kukwazi ukuphawula nabuphi na ubuthathaka esisenokuba sinabo size sithabathe amanyathelo ayimfuneko sibulungise ngaphambi kokuba iintshaba zethu zibuphawule zize ziqalise ukusihlasela. Noko ke, silwenza njani olo vavanyo? Ziziphi ezinye zeempawu esimele sizikhangele xa sizivavanya?
Ukuqonda Iimpawu
Olunye uphawu oluqhelekileyo olusenokubonisa ubuthathaka ngokomoya kukuyekelel’ umxakatho kumkhwa wesifundo sobuqu. Abanye bavakalelwa kukuba bamele bafundisise ngakumbi, kodwa abade bakwazi ukwenjenjalo. Kobu bomi buxakekileyo banamhlanje, kulula ukuwela kubugxwayiba obunjalo. Noko ke, okubi ngakumbi kukuba ngokufuthi abantu bazithethelela ngelithi abenzi nto imbi kangako, ekubeni bezifunda iimpapasho zeBhayibhile nanini na xa benako yaye bayakwazi ukuzifumana ezinye iintlanganiso zamaKristu.
Ukuqiqa ngolo hlobo kukuzikhohlisa. Kufana nomntu oziva exakeke gqitha ukuba angahlala phantsi atye isidlo esifanelekileyo, ngoko ufumana ithamo libe linye ngelo xesha njengoko egxabhagxabhisa ezama ukwenza le naleya. Nangona esenokungafi yindlala, kungekudala usenokugula. Ngokufanayo, ngaphandle kokuzondla ngokuthe ngcembe ngokutya okunesondlo kokomoya, kungekudala kusenokubonakala iimpawu zobuthathaka kwisikrweqe sethu sokomoya. Ngokusoloko sixhinxwa ngeengcamango ezibubuvuvu nezimo zengqondo zehlabathi, ngokulula sinokuyekelela kwiintlaselo ezibulalayo zikaSathana.
Olunye uphawu lokuba buthathaka ngokomoya kukulahlekelwa yimbono yokungxamiseka kwidabi lethu lokomoya. Xa kukho uxolo ijoni alibi naxhala yaye aliziva lisengozini yedabi. Ngaloo ndlela lisenokungakuboni kubalulekile ukuhlala lilungile. Ukuba ngequbuliso kuthiwa izwe lifile, lisekunokufunyanwa lingalungisanga. Kwenzeka okufanayo nakwicala lokomoya. Ukuba siyazivumela sozele, sinokusuka singakulungeli ukuxhathisa kwiintlaselo ezinokusivelela.
Ngoko ke, sinokuzazi njani ukuba sikwimeko enjalo? Sinokuzibuza imibuzo esenokutyhila eyona meko sikuyo: Ngaba ndiyakulangazelela ukuya kubulungiseleli njengoko ndinjalo xa ndisiya kubethwa ngumoya? Ngaba ndiba nomdla wokuchitha ixesha ndilungiselela iintlanganiso njengaxa ndisiya kuthenga okanye ndibukele umabonwakude? Ngaba ndisalulangazelela usukelo okanye amathuba endawayekayo xa ndandisiba ngumKristu? Ngaba ndinomona ngoko kufane kuthiwe bubomi obubhetele obuphilwa ngabanye? Le mibuzo ixhokonxa iingcinga, kodwa iluncedo ekuphawuleni nabuphi na ubuthathaka kwisikrweqe sethu sokomoya.
Ekubeni isikrweqe sethu sokuzikhusela isesokomoya, kubalulekile ukuba umoya kaThixo usebenze ngokukhululekileyo ebomini bethu. Oku kuboniswa ngumkhamo esisibonakalisa ngawo isiqhamo somoya kaThixo kuyo yonke imisebenzi yethu. Ngaba ucaphuka msinya okanye uphazamiseke xa abanye besenza okanye bethetha into ongayithandiyo? Ngaba ukufumanisa kunzima ukwamkela isiluleko, okanye ngaba uvakalelwa kukuba abanye basoloko bekusukela? Ngaba ubamonela ngokunzulu abanye ngeentsikelelo abazifumanayo okanye ngezinto abazifezayo? Ngaba ukufumanisa kunzima ukuqhubana nabanye, ingakumbi oontanga bakho? Ukuzigocagoca ngokunyanisekileyo kuya kusinceda sibone enoba ubomi bethu buzaliswe sisiqhamo somoya kaThixo okanye ngokuchuliweyo imisebenzi yenyama iyazibonakalisa.—Galati 5:22-26; Efese 4:22-27.
Amanyathelo Aluncedo Okoyisa Ubuthathaka Bokomoya
Kuyenye into ukuqonda iimpawu zobuthathaka bokomoya; ikwayenye ukujamelana nabo uze uthabathe amanyethelo okulungisa izinto. Okubuhlungu kukuba, abaninzi banotyekelo lokuzithethelela, bechaza izizathu, ukuze bayenze ibonakale incinane ingxaki okanye bakhanyele ukuba ikho. Hayi indlela ekuyingozi ngayo oko—kunjengokuya edabini unesikrweqe esingaphelelanga! Ikhondo elinjalo liya kusibeka esichengeni sikaSathana. Kunoko, simele sikhawulezise sithabathe amanyathelo okulungisa nabuphi na ubuthathaka esisenokubuphawula. Yintoni esinokuyenza?—Roma 8:13; Yakobi 1:22-25.
Ekubeni sikwidabi lokomoya—idabi eliquka ukulawula ingqondo nentliziyo yomKristu—simele senze konke esinako ukulondoloza amandla ethu engqondo. Simele sikhumbule ukuba phakathi kwezinto eziyila isikrweqe sethu sokomoya kukho “nesigcina-sifuba sobulungisa,” esikhusela intliziyo yethu, ‘nesigcina-ntloko sosindiso,’ esikhusela ingqondo yethu. Xa sinokufunda ukuwasebenzisa ngokuphumelelayo la malungiselelo oko kunokwenza umahluko phakathi koloyiso nokoyiswa.—Efese 6:14-17; IMizekeliso 4:23; Roma 12:2.
Ukunxiba “isigcina-sifuba sobulungisa” ngendlela efanelekileyo kufuna ukuba sisoloko sizihlolisisa ngokuphathelele uthando lwethu ngobulungisa nokukuthiya kwethu ukuchas’ umthetho. (INdumiso 45:7; 97:10; Amosi 5:15) Ngaba imilinganiselo yethu ihlile njengeyehlabathi? Ngaba ngoku siyonwatyiswa—enoba kukubomi bokwenene okanye kwimifanekiso kamabonwakude, ziincwadi namaphephancwadi—zizinto ngaphambili ezisenokuba zazisothusa okanye zisikhubekisa? Ukuthanda ubulungisa kuya kusinceda sibone ukuba oko kuzukiswa lihlabathi njengenkululeko nempucuko kusenokuba kukugqwethwa kwezinto nekratshi elifihlakeleyo.—Roma 13:13, 14; Tito 2:12.
Ukuthwala “isigcina-ntloko sosindiso” kubandakanya ukuhlala sicacelwe gca ziintsikelelo ezimangalisayo ezingaphambili, singavumeli sityekiswe bubunewunewu nobuqheleqhele behlabathi. (Hebhere 12:2, 3; 1 Yohane 2:16) Ukuba nale mbono kuya kusinceda sibeke izilangazelelo zokomoya ngaphambi kokuzizuzela izinto eziphathekayo okanye iingenelo zobuqu. (Mateyu 6:33) Ngaloo ndlela, ukuze siqiniseke ukuba sinesi sikrweqe sifanelekileyo sokomoya, ngokunyaniseka simele sizibuze: Ndinoluphi usukelo ebomini? Ngaba ndinosukelo oluthile lokomoya? Ndenza ntoni ukuze ndilufikelele? Enoba singabentsalela yamaKristu athanjisiweyo okanye abendimbane ‘yesihlwele esikhulu,’ simele sixelise uPawulos, owathi: “Andizigqali njengosele elubambile; kodwa kukho into enye ngalo: Ndiyazilibala izinto ezingasemva ndize ndolulele phambili kwizinto ezingaphambili, ndisukela ibhaso.”—ISityhilelo 7:9; Filipi 3:13, 14.
Inkcazelo kaPawulos ngesikrweqe sethu sokomoya uyiqukumbela ngesi siluleko sithi: “Ngalo lonke uhlobo lomthandazo nesikhungo nikuwo umoya. Yaye ngenxa yoko hlalani nivukile rhoqo kwaye nikhunga ngenxa yabo bonke abo bangcwele.” (Efese 6:18) Oku kubonisa amanyathelo amabini aluncedo esinokuwathabatha ukuze soyise okanye sithintele nabuphi na ubuthathaka bokomoya: Ukukhulisa ulwalamano oluhle noThixo, sakhe ulwalamano olusondeleyo namaKristu esikhonza nawo.
Xa kungumkhwa wethu ukuphethukela kuYehova ngomthandazo walo “lonke uhlobo” (simchazela izono zethu, sicela ukuba asixolele, sicele ulwalathiso lwakhe, simbulele ngeentsikelelo zakhe, simdumise ngokusuk’ entliziyweni) yaye “ngaso sonke isihlandlo” (esidlangalaleni, ngasese, ngokobuqu, ngokuzenzekelayo), sizuza ulwalamano olusenyongweni noYehova. Leyo yeyona ndlela ibalaseleyo yokuzikhusela.—Roma 8:31; Yakobi 4:7, 8.
Kwelinye icala, sibongozwa ukuba sithandaze “ngenxa yabo bonke abo bangcwele,” okuthetha ukuba, ngenxa yamaKristu esikhonza nawo. Kwimithandazo yethu sisenokukhumbula abazalwana bethu bokomoya abakumazwe akude ababandezeleka ngenxa yokutshutshiswa okanye obunye ubunzima. Kodwa kuthekani ngamaKristu esisebenza nawo nesinxulumana nawo yonke imihla? Kufanelekile ukuba siwathandazele, kanye njengokuba uYesu wayebathandazela abafundi bakhe. (Yohane 17:9; Yakobi 5:16) Imithandazo enjalo iyasimanyanisa yaye isomeleze ukuze simelane nentlaselo zalowo “ungendawo.”—2 Tesalonika 3:1-3.
Okokugqibela, sifanele sisoloko sikhumbula isiluleko sothando sompostile uPetros esithi: “Isiphelo sezinto zonke sisondele. Yibani ngabaphilileyo engqondweni, ke ngoko, yaye yibani ngabaphaphileyo ngokubhekisele emithandazweni. Ngaphezu kwezinto zonke, yibani nothando olukhulu omnye ngomnye, ngenxa yokuba uthando lugubungela inkitha yezono.” (1 Petros 4:7, 8) Kulula gqitha ukuvumela ukungafezeki—okwabanye abantu nokwethu—kulawule iintliziyo neengqondo zethu yaye kube yimiqobo, nezikhubekiso. USathana ubazi kakuhle obu buthathaka babantu. Ukusahlula ukuze asoyise ngamanye amaqhinga akhe. Ngoko ke, sifanele sikhawuleze ukuzigubungela izono ezinjalo ngothando olunzulu omnye ngomnye ‘singamvuleli indawo uMtyholi.’—Efese 4:25-27.
Hlala Womelele Ngoku Ngokomoya
Xa uphawula ukuba iinwele zakho zidlakadlaka okanye iqhina lakho lijijekile, yintoni oyenzayo? Udla ngokuzilungisa ezo zinto ngokukhawuleza kangangoko unako. Bambalwa abantu abadla ngokuziyeka, becinga ukuba leyo yinto nje engenamsebenzi. Masisabele ngokukhawuleza ngolo hlobo xa kufikelelwa kubuthathaka bokomoya. Iziphako ezinjalo ngokwasemzimbeni zisenokubangela ukuba abantu bakujonge kakubi, kodwa iziphene zokomoya ezingalungiswayo zinokukwenza ulahlekelwe yinkoloseko kaYehova.—1 Samuweli 16:7.
Ngothando uYehova usinike konke esikufunayo ukusinceda siphelise nabuphi na ubuthathaka bokomoya yaye sihlale somelele ngokomoya. Esebenzisa iintlanganiso zamaKristu, iimpapasho ezisekelwe eBhayibhileni, amanye amaKristu aqolileyo nanenyameko, usinika izinto ezisoloko zisikhumbuza nezisibonisa oko simele sikwenze. Kuxhomekeke kuthi ukuba sizamkele yaye sizisebenzise. Oku kufuna umgudu nokuzeyisa. Kodwa khumbula oko umpostile uPawulos wakutsho ngokunyaniseka: “Indlela endibaleka ngayo asiyiyo eyokungaqiniseki; indlela endalathisa ngayo izithonga zam yeyokuze ndingabethi umoya; kodwa ndiyawuqoba umzimba wam ndize ndiwuphathe njengekhoboka, ukuze, emva kokuba ndishumayele kwabanye, mna ngokwam ndingabi ngongakholekileyo ngandlel’ ithile.”—1 Korinte 9:26, 27.
Yibani ngabaphaphileyo, yaye ningaze nivumele ukuba nesithende sika-Achilles sokomoya. Kunoko, ngokuzithoba nangenkalipho simele senze oko kufunekayo ngoku ukuze sibuqonde yaye sibeyise nabuphi na ubuthathaka esinabo.
[Caption on page 19]
“HLALANI NIZIVAVANYA ENOBA NISELUKHOLWENI KUSINI NA, HLALANI NIZICIKIDA OKO NIKUKO NINA NGOKWENU.”—2 Korinte 13:5.
[Caption on page 21]
“YIBANI NGABAPHAPHILEYO NGOKUBHEKISELE EMITHANDAZWENI. NGAPHEZU KWEZINTO ZONKE, YIBANI NOTHANDO OLUKHULU OMNYE NGOMNYE, KUBA UTHANDO LUGUBUNGELA INKITHA YEZONO.”—1 Petros 4:7, 8.
6[Ibhokisi/Umfanekiso okwiphepha 20]
ZIBUZE . . .
◆ Ngaba ndiba nomdla wokuchitha ixesha ndilungiselela iintlanganiso njengaxa ndisiya ezivenkileni okanye ndibukele umabonwakude?
◆ Ngaba ndinomona ngoko kufane kuthiwe bubomi obubhetele obuphilwa ngabanye?
◆ Ngaba ndicaphuka msinya xa abanye besenza okanye bethetha into endingayithandiyo?
◆ Ngaba ndikufumanisa kunzima ukwamkela isiluleko, okanye ndivakalelwa kukuba abanye basoloko bendisukela?
◆ Ngaba ndikufumanisa kunzima ukuqhubana nabanye?
◆ Ngaba imilinganiselo yam yokuphila iye yehla njengeyehlabathi?
◆ Ngaba ndinosukelo oluthile lokomoya?
◆ Yintoni endiyenzayo ukuze ndifikelele usukelo lwam lokomoya?
[Caption on page 18]
Achilles: From the book Great Men and Famous Women; Roman soldiers and page 21: Historic Costume in Pictures/Dover Publications, Inc., New York