Ngaba Ukho Umntu Okhathala Ngokwenene?
“Iinyembezi zabacudisiweyo” ziye zaba sisikhukula. Ziphalazwa ngamaxhoba angenakubalwa ngenxa ‘yokucudiswa okwenziwayo’ kulo lonke ihlabathi. Ngokufuthi abo baye baxhatshazwa bavakalelwa kukuba abanaye ‘umthuthuzeli’—yaye akakho umntu obakhathalele ngokwenene.—INtshumayeli 4:1.
PHEZU kwaso nje esi sikhukula seenyembezi, abanye abakhathali xa abanye abantu bebandezeleka. Abazikhathazi ngentlungu yabanye abantu, njengokuba wenzayo umbingeleli nomLevi kumzekeliso kaYesu Kristu ngendoda eyahlaselwayo, yaphangwa, yaza yashiywa ingathi iza kufa ngasendleleni. (Luka 10:30-32) Ukuba izinto zibahambela kakuhle bona neentsapho zabo, ababi nankxalabo ngabanye abantu. Eneneni, bathi, “Ngubani okhathalayo?”
Asimele simangaliswe koku. Umpostile uPawulos waxela kusengaphambili wathi “ngemihla yokugqibela” abantu abaninzi babengayi kuba nawo “umsa wemvelo.” (2 Timoti 3:1, 3) Omnye umakhi-mkhanya wakhalazela isimo sengqondo sokungakhathali esikhoyo. Wathi: “Enye intanda-bulumko yaseIreland nesithethe sokukhathalela nokwabelana, sithatyathelw’ indawo sesithi singazenzela okanye sizithabathele ngokwethu.” Ehlabathini lonke, abantu benza baze bazithabathele izinto, bengakhange bacinge nokucinga ngabanye.
Imfuneko Yokuba Kubekho Umntu Okhathalayo
Ngokuqinisekileyo kukho imfuneko yokuba kubekho umntu okhathalayo. Ngokomzekelo, cinga ngenye indoda eyayililolo eJamani “eyafunyanwa ihleli phambi komabonwakude wayo—kwiminyaka emihlanu emva kokufa kwayo ngeKrismesi.” “Lo mntu ulilolo uqhawule umtshato,” ngenxa yokujamelana nezinto ezibuhlungu ebomini, akazange akhunjulwe de iakhawunti yasebhankini eyayihlawula irenti yakhe yaphelelwa yimali. Kwakungekho mntu wayemkhathalele ngokwenene.
Kwakhona, cinga ngamaxhoba angakwaziyo ukuzinceda, abangelwe ngabantu abanegunya nababawayo. Komnye ummandla, abantu abamalunga nama-200 000 (ikota yabemi) “bafa kukucinezeleka nayindlala” emva kokuba ilizwe labo lihluthwe kubo. Okanye cinga ngabantwana abaye bachanabeka ekubulaweni ngokunengcwangu. Enye ingxelo yathi: “Umlinganiselo othile ekhulwini wabantwana [kwilizwe elinye] ababona izenzo ezoyikekayo—ukubulawa, ukubethwa, ukudlwengulwa, maxa wambi okwenziwa ngabanye abafikisayo, kuyoyikeka.” Unokusiqonda isizathu sokuba ixhoba lokungabikho kokusesikweni okunjalo libuze likhal’ iinyembezi lisithi, “Ngaba ngokwenene ukho umntu ondikhathaleleyo?”
Ngokutsho kwengxelo yeZizwe Ezimanyeneyo, abantu abamalunga nesi-1,3 sewaka lesigidi kumazwe asakhasayo banyanzeleka ukuba baphile ngemali engaphantsi kwe-R5 ngemini. Inokuba bayazibuza ukuba ukho na umntu othile okhathalayo. “Bafana namawaka eembacu ngokutsho kweThe Irish Times, ajamelene nokhetho olunzima lokuhlala kwinkampu eyingxushungxushu okanye kwilizwe lobunzima okanye azama ukubuyela kwilizwe lawo elidlavulwe [okanye, elidlakazwe] yimfazwe okanye iingxwabangxwaba zobuhlanga.” Ingxelo efanayo yayiquka la mazwi amangalisayo: “Vala amehlo akho, ubale kathathu, kukho umntwana ofileyo. Omnye kubantwana abangama-35 000 uya kufa ngenxa yokungondleki okanye isifo esinokuthintelwa.” Akumangalisi ke ngoko ukuba abanye babe bayakhala ngenxa yokunxunguphala nokuba buhlungu!—Thelekisa uYobhi 7:11.
Ngaba konke oku kwakumele kube nje? Ngokusengqiqweni, ngaba kukho umntu okhathalayo nonamandla okuphelisa ukubandezeleka nokunyanga zonke iintlungu abanazo abanye abantu?
[Inkcazelo Ngomfanekiso okwiphepha 3]
A. Boulat/Sipa Press