Kutheni Umele Uzigcine Izithembiso Zakho?
“VOTELA umntu onezithembiso ezimbalwa; akayi kukudanisa kakhulu,” watsho umcebisi kamongameli ongasekhoyo uBernard Baruch. Kwihlabathi lanamhlanje kubonakala ngathi izithembiso zenzelwa ukuqhawulwa. Zisenokuba zizifungo zomtshato, izivumelwano kwezoshishino, okanye izithembiso zokuchitha ixesha elingakumbi nabantwana. Ngokubanzi kutyeshelwa oko kuthethwa sisaci esiqhelekileyo esithi, “Umntu onyanisekileyo ubonwa kwizithembiso zakhe.”
Kakade ke, abantu abaninzi abazimiseli ukuzigcina izithembiso zabo. Abanye benza izifungo ngokungxama abangenakukwazi ukuphila ngokuvisisana nazo okanye abakugcini oko bebekuthethile ngenxa yokuba leyo yindlela elula abanokuyilandela.
Kuyavunywa ukuba, ukugcina isithembiso kusenokuba nzima xa kuvela imeko engalindelekanga. Kodwa ngaba isithembiso esaphulweyo sibangela umonakalo omkhulu? Ngaba umele uzigqale njengezibalulekileyo izithembiso zakho? Ukukhangela umzekelo kaYehova uThixo kuya kusinceda ukuba sibone isizathu sokuba siwuhlolisise ngokunzulu lo mbandela.
UYehova Uyazizalisekisa Izithembiso Zakhe
Sinqula uThixo ogama lithetha ukuzalisekisa iziprofeto zakhe. Ngamaxesha okubhalwa kweBhayibhile ngokufuthi igama lalichaza okuthile ngomntu. Oku kuyinyaniso nangegama elithi Yehova, elithetha “Ubangela Kubekho.” Ngaloo ndlela igama likaThixo liquka ingcamango yokuba uThixo uya kuwazalisekisa amadinga akhe aze afezekise injongo yakhe.
Ezalisekisa igama lakhe, uYehova wagcina zonke izithembiso awayezenze nohlanga lwakwaSirayeli. Ngokuphathelele ezi zithembiso, uKumkani uSolomon wavuma wathi: “Makabongwe uYehova, obanike ukuphumla abantu bakhe amaSirayeli, njengoko konke wakuthethayo; akwaphalala nalinye ilizwi kuwo onke amazwi akhe alungileyo awawathethayo ngoMoses umkhonzi wakhe.”—1 Kumkani 8:56.
UYehova uthembeke kangangokuba umpostile uPawulos wathi: “Xa uThixo wenza isithembiso sakhe kuAbraham, ekubeni kungekho nabani na omkhulu ngakumbi kunaye awayenokufunga ngaye, wafunga ngaye ngokwakhe.” (Hebhere 6:13) Ewe, igama nje likaYehova nobuntu bakhe liqinisekisa ukuba akayi kurhoxa kwizithembiso zakhe, nangona zisenokuthetha ukuncama okukhulu. (Roma 8:32) Isibakala sokuba uYehova uyazizalisekisa izithembiso zakhe sisinika ithemba eliyiankile yomphefumlo, okanye ubomi.—Hebhere 6:19.
Izithembiso ZikaYehova Nekamva Lethu
Ithemba lethu, ukholo lwethu, kwanobomi bethu zonke ezo zinto zixhomekeke ekuzalisekeni kwezithembiso zikaYehova. Liliphi ithemba esilixabisayo? “Kukho amazulu amatsha nomhlaba omtsha esiwulindeleyo ngokwesithembiso [sikaThixo], yaye kwezi kuza kuhlala ubulungisa.” (2 Petros 3:13) Kwakhona iZibhalo zisinika isiseko sokholo lokuba “kuza kubakho uvuko kokubini olwamalungisa nabangengomalungisa.” (IZenzo 24:15) Yaye sinokuqiniseka ukuba kukho into elunge ngakumbi kunobu bomi sibuphilayo. Enyanisweni, oko umpostile uYohane ukubiza ngokuba “yinto ethenjisiweyo” ‘bubomi obungunaphakade.’ (1 Yohane 2:25) Kodwa izithembiso zikaYehova eziseLizwini lakhe azipheleliselwanga kwixesha elizayo kuphela. Zisinika intsingiselo kubomi bethu bemihla ngemihla kwanangoku.
Umdumisi wacula: “Usondele uYehova kubo bonke abamnqulayo, . . . akuve ukuzibika kwabo, abasindise.” (INdumiso 145:18, 19) Kwakhona uThixo usiqinisekisa ukuba “umnika otyhafileyo amandla, ongenakomelela amandisele ukuqina.” (Isaya 40:29) Yaye hayi indlela ekuthuthuzela ngayo ukwazi ukuba ‘uThixo akayi kusiyekela sihendwe ngaphaya koko sinokukuthwala, kodwa kunye nesihendo eso uya kwenza kwanendlela yokuphuma ukuze sikwazi ukusinyamezela’! (1 Korinte 10:13) Ukuba sasibona sizaliseka kuthi esinye sezi ziprofeto, siyazi ukuba uYehova unokuthenjwa ngokupheleleyo. Ngokuphathelele iingenelo esizifumana kwizithembiso ezininzi ezenziwa nguThixo aze azigcine, simele sizigqale njani izithembiso esizenza kuye?
Ukugcina Izithembiso Esizenza KuThixo
Alithandabuzeki elokuba ukuzahlulela kwethu kuThixo sesona sithembiso sibalulekileyo esinokusenza. Ngokuthabatha eli nyathelo, sibonisa ukuba sifuna ukukhonza uYehova ngonaphakade. Ngoxa imithetho kaThixo ingengomthwalo, kusenokungabi lula ukwenza ukuthanda kwakhe, njengokuba siphila kule nkqubo yezinto ingendawo. (2 Timoti 3:12; 1 Yohane 5:3) Kodwa sakuba ‘sibeke isandla sethu ekhubeni’ saza sangabakhonzi bakaYehova abazinikeleyo nabafundi boNyana wakhe, uYesu Kristu, asimele sikhangele emva kwizinto zehlabathi esizishiye ngasemva.—Luka 9:62.
Xa sithandaza kuYehova, sisenokuziva sikulungele ukumthembisa ukuba siya kulwela ukuboyisa ubuthathaka obuthile, sihlakulele uphawu lobuKristu, okanye sandise inkalo ethile yomsebenzi wethu wobuthixo. Yintoni eya kusinceda ukuba sizabalazele ukuzifeza ezi zithembiso?—Thelekisa INtshumayeli 5:2-5.
Izithembiso zokwenene zisuka entliziyweni nasengqondweni. Ngoko ke, masimqinisekise uYehova ngezithembiso zethu ngokuthulula izifuba zethu kuye, ngokunyanisekileyo simchazele uloyiko lwethu, iminqweno yethu nobuthathaka bethu. Ukuthandaza ngesithembiso esisenzileyo kuya kusenza sizimisele ukusigcina. Sisenokuzijonga izithembiso esizenze kuThixo njengamatyala. Xa amatyala emakhulu, amelwe ahlawulwe ngokuthe ngcembe. Ngokufanayo, izithembiso ezininzi esizenza kuYehova kuya kuthabatha ixesha ukuze sizizalisekise. Kodwa ngokunikela kuye rhoqo oko sinako, sibonisa ukuba sizimisele ukukwenza oko sikuthethayo, yaye uya kusisikelela ngokufanelekileyo.
Sinokubonisa ukuba izithembiso esizenzayo sizigqala njengezibalulekileyo ngokuzithandazela ngokufuthi, mhlawumbi yonke imihla. Oku kuya kubonisa uBawo wethu wasezulwini ukuba sinyanisekile. Kwakhona kuya kusikhumbuza rhoqo. Ngokuphathelele lo mba, uDavide wasishiya nomzekelo omhle. Kwiculo lakhe, wambongoza uYehova esithi: “Kuve Thixo ukuhlahlamba kwam; wubazele indlebe umthandazo wam . . . Ndiya kulibethela uhadi igama lakho ngonaphakade, ndizizalise izibhambathiso zam imihla ngemihla.”—INdumiso 61:1, 8.
Ukugcina Izithembiso Zethu Komeleza Ithemba
Ukuba izithembiso esizenza kuThixo azimele zithatyathwe lula kuyafana nangezo sizenza kwamanye amaKristu. Asimele simphathe ngendlela ethile uYehova size sibaphathe ngenye indlela abazalwana bethu. (Thelekisa eyoku-1 kaYohane 4:20.) KwiNtshumayelo yakhe yaseNtabeni, uYesu wathi: “Ke ilizwi lenu elithi Ewe malithethe uEwe, uHayi wenu, athethe uHayi.” (Mateyu 5:37) Ukuqiniseka ukuba ilizwi lethu lisoloko lithembekile yenye indlela ‘yokwenza okulungileyo kwabo bahlobene nathi elukholweni.’ (Galati 6:10) Zonke izithembiso esizigcinayo zikhulisa intembelo.
Ngokufuthi uba mkhulu umonakalo owenziwa kukwaphula isithembiso xa kubandakanyeke imali. Enoba kukuhlawula imali esiyibolekileyo, ukwenza umsebenzi othile, okanye isivumelwano sezorhwebo, umKristu umele akuzalise oko akuthethileyo. Oku kuyamkholisa uThixo yaye komeleza intembelo efuneka gqitha ukuze abazalwana “bahlale bemxhelo mnye.”—INdumiso 133:1.
Noko ke, ukungakwazi ukuphila ngesivumelwano kunokulenzakalisa ibandla kwanabantu ababandakanyekileyo. Umveleli ohambahambayo uthi: “Iimpikiswano kwezoshishino—ngamaxesha onke ezibangelwa zizivumelwano mhlawumbi elinye icala elizigqala njengezingakhange zigcinwe—ngokufuthi ziye zaziwe luluntu ngokubanzi. Ngenxa yoko, abazalwana bathabatha amacala, yaye kubakho ukujongana ngezikhondo zamehlo kwiHolo yoBukumkani.” Hayi indlela ekubaluleke ngayo ukusijonga njengesibalulekileyo nasiphi na isivumelwano esisenzayo yaye sisibhale phantsi!a
Kufuneka ulumke xa uthengisa izinto ezinexabiso eliphezulu okanye uncomela utyalo-mali oluthile, ingakumbi ukuba uza kungenelwa kulo. Ngokufanayo, kukho imfuneko yokuba ungazibaxi iingenelo zezinto ezithile okanye amayeza okanye uthembise inzuzo engekho ngqiqweni kutyalo-mali oluthile. Uthando lumele lukhuthaze amaKristu ukuba acacise ngokupheleleyo naziphi na iingozi ezibandakanyekileyo. (Roma 12:10) Ekubeni abazalwana abaninzi benolwazi oluncinane ngezoshishino, basenokulithemba icebiso lethu ngenxa nje yokuba sihlobene nabo elukholweni. Hayi indlela ekuya kuba buhlungu ngayo ukuba le ntembelo siyijongela phantsi!
NjengamaKristu, asinakulandela iindlela zoshishino zokunganyaniseki okanye sityeshele iimfuno ezifanelekileyo zabanye. (Efese 2:2, 3; Hebhere 13:18) Ukuze uYehova akholiswe sithi ‘njengabaphambukela ententeni yakhe,’ simele sithembeke. Size ‘sifunge singajiki, nokuba kubi kuthi.’—INdumiso 15:1, 4.
Umgwebi uYifeta wakwaSirayeli wafunga wathi ukuba uThixo umenze wawoyisa ama-Amori, wayeza kunikela kuYehova njengesiqhumiso umntu wokuqala adibene naye emva kwedabi. Yaba ngumntwana okuphela kwakhe kuYifeta, kodwa akazange asaphule isithembiso sakhe. Emva kokuba evumelene nentombi yakhe, wavuma ukuba iye kukhonza endlwini kaThixo ngokusisigxina—ngokungathandabuzekiyo ukuzincama okubuhlungu yaye okwakuthetha ukulahlekelwa zizinto ezininzi ngeendlela ezahlukahlukeneyo.—ABagwebi 11:30-40.
Abaveleli bebandla banembopheleleko yokubambelela kwizivumelwano abazenzileyo. Ngokutsho kweyoku-1 kuTimoti 3:2, umveleli ufanele “abe ngongenakukhalazeleka.” Le yinguqulelo yegama lesiGrike elithetha “ongenakubekwa tyala, ongenakukhalazeleka, ongenakumangalelwa.” “Libonisa ukuba indoda ayaziwa nje ngokuba ngumntu olungileyo, kodwa injalo ngokwenene.” (A Linguistic Key to the Greek New Testament) Ekubeni umveleli efanele abe ngongenakukhalazeleka, izithembiso zakhe zimele zithenjwe ngamaxesha onke.
Ezinye Iindlela Zokugcina Izithembiso Zethu
Simele sizijonge njani izithembiso esizenza nabo bangengawo amaKristu? UYesu wathi: “Makukhanye ukukhanya kwenu phambi kwabantu, ukuze babone imisebenzi yenu emihle base uzuko kuYihlo osemazulwini.” (Mateyu 5:16) Ngokuzingqina sikuzalisekisa oko sikuthethileyo, sisenokwenza abanye batsaleleke kwisigidimi sethu sobuKristu. Phezu kwako nje ukuwohloka kwemilinganiselo yokuthembeka yehlabathi lonke, inkoliso yabantu isakuxabisa ukugcinwa kwengqibelelo. Ukugcina izithembiso esizenzileyo yenye indlela esibonakalisa ngayo uthando ngoThixo nangommelwane nokuze samkeleke kubathandi bobulungisa.—Mateyu 22:36-39; Roma 15:2.
Ebudeni bonyaka wenkonzo wowe-1998, amaNgqina kaYehova achithe iiyure eziliwaka lezigidi evakalisa ekuhleni iindaba ezilungileyo zoBukumkani bukaThixo. (Mateyu 24:14) Mhlawumbi ukushumayela kwethu akukhange kuvakale ukuba siye asakwenza oko besikuthembisile okanye kweminye imibandela. Ekubeni simela uThixo wenyaniso, ngokufanelekileyo abantu balindele ukuba sinyaniseke. Ngokuthembeka nangokunyaniseka, ‘sihombisa imfundiso yoMsindisi wethu, uThixo, ezintweni zonke.’—Tito 2:10.
Kubulungiseleli bethu, sinamathuba okugcina oko sikuthethileyo xa sibuyela kwabo baye babonakalisa umdla kwisigidimi soBukumkani. Ukuba sithe siza kubuya, sifanele senjenjalo. Ukubuyela njengokuba besithembisile yindlela ‘yokungali nento elungileyo kwabo kuselungelweni labo ukuyifumana.’ (IMizekeliso 3:27) Omnye udade wawuchaza ngale ndlela lo mbandela: “Izihlandlo eziliqela, ndiye ndadibana nabantu abanomdla abathi amaNgqina ayebathembise ukuba aza kubuya kodwa akakhange enjenjalo. Kakade ke, ndiyazi ukuba kusenokwenzeka ukuba abaninimzi bebengekho ekhaya okanye awakhange akwazi ukubuyela. Kodwa andifuni ukuba kubekho umntu oya kuthetha njalo ngam, ngoko ndenza konke okusemandleni am ukuze ndimfumane loo mntu ekhaya. Ndikholelwa ukuba xa kukho umntu endimdanisayo, loo nto iya kuba kukummela kakubi uYehova nabo bonke abazalwana bam.”
Kwezinye iimeko, sisenokungathandi ukubuyela sigqibe kwelokuba akanamdla ngokwenene loo mntu. Lo dade uphinda athi: “Andizami ukumgweba ngobungakanani bomdla anawo. Amava endinawo aye andifundisa ukuba maxa wambi abantu ekuqaleni abasabeli ngendlela abaya kusoloko beyiyo. Ngoko ndizama ukuba nesimo sengqondo esifanelekileyo, wonke umntu ndimjonga njengalowo unokuba ngumzalwana okanye udade.”
Kubulungiseleli bamaKristu nakwezinye iinkalo, kufuneka sibonise ukuba oko sikuthethileyo kunokuthenjwa. Liyinyaniso elokuba, kwezinye izinto kulula ukuthetha kunokwenza. Indoda esisilumko yathi: “Uninzi lwesintu luyayihlangabeza indoda enenceba kulo, ke yona indoda enyanisileyo, ngubani na ongayifumanayo?” (IMizekeliso 20:6) Ngokuzimisela, sinokuthembeka size sinyaniseke koko sikuthethileyo.
Iintsikelelo Ezininzi Ezivela KuThixo
Ukwenza isithembiso ongayi kusigcina kukunganyaniseki yaye kunokufaniswa nokubhala itsheki ungenayo imali eyaneleyo yokuyihlawula ebhankini. Kodwa hayi indlela emininzi ngayo imivuzo neentsikelelo esizifumanayo xa sigcine izithembiso zethu! Enye intsikelelo yokuthembeka kukuba nesazela esilungileyo. (Thelekisa IZenzo 24:16.) Kunokuba sizive sizisola, siziva sanelisekile yaye sinoxolo. Ukongezelela, ngokugcina oko sikuthethileyo, sifak’ isandla kubunye bebandla, obuxhomekeke ekuthembaneni. Kwakhona ‘intetho yethu eyinyaniso’ isenza sibonakale njengabalungiseleli bakaThixo oyinyaniso.—2 Korinte 6:3, 4, 7.
UYehova unyanisekile elizwini lakhe, yaye uluthiyile ‘ulwimi oluxokayo.’ (IMizekeliso 6:16, 17) Ngokuxelisa uBawo wethu osezulwini, sisondela ngakumbi kuye. Ngoko ke, ngokuqinisekileyo sinesizathu sokuzigcina izithembiso zethu.
[Imibhalo esemazantsi]
a Bona inqaku elithi “Put It in Writing!” kuVukani (wesiNgesi) kaFebruwari 8, 1983, iphepha 13-15.
[Imifanekiso ekwiphepha 10]
UYifeta wasigcina isithembiso sakhe, nangona ukwenjenjalo kwakubuhlungu
[Imifanekiso ekwiphepha 11]
Ukuba uthembise ukubuyela, lungiselela kakuhle ukwenjenjalo