Zizithembiso Zikabani Onokuzithemba?
“WATHEMBISA ngezinto ezinkulu, njengoko naye wayemkhulu; kodwa akazange azalisekise nesinye kwezo zithembiso.”—La mazwi acatshulwe kwi-King Henry the Eighth, ebhalwe nguWilliam Shakespeare.
UShakespeare wayethetha ngezithembiso zikakhadinali oliNgesi uThomas Wolsey, owayenegunya kwezobupolitika eNgilani ngenkulungwane ye-16. Bambi basenokuthi amazwi kaShakespeare anokusetyenziswa nakwizithembiso ezininzi ezenziwa namhlanje. Abantu bathenjiswa le naleya, kodwa zimbalwa kakhulu izithembiso ezifezwayo. Ngoko, siyaqondakala isizathu sokuba bangathembi nasinye isithembiso.
Ukuphoxeka Kwabantu
Xa kwakukho iingxwabangxwaba kwiiBalkans ebudeni beminyaka yee-1990, iUnited Nations Security Council yathi idolophu yaseBosnia iSrebrenica, yeyona “ndawo ikhuselekileyo.” Esi sithembiso sasikhangeleka sinokuthenjwa. Amawaka eembacu zamaSilamsi awayeseSrebrenica ayesikholelwa eso sithembiso. Noko ke, elo themba lonqabiseko lathi shwaka. (INdumiso 146:3) NgoJulayi 1995, imikhosi yotshaba yahlasela amajoni eUnited Nations yaza yatshabalalisa loo dolophu. AmaSilamsi angaphezu kwama-6 000 abhaca ukanti angaphezu kwe-1 200 abulawa.
Zininzi izithembiso eziye zaphelel’ emoyeni. Abantu badiniwe kukuqhathwa “zizibhengezo ezikhohlisayo” abasoloko beziva namhlanje. Kudala bephoxwa “ngamawaka ezithembiso ezenziwa ngabezopolitiko.” (IThe New Encyclopædia Britannica, uMqulu 15, iphepha 37) Iinkokeli zonqulo ezaziwayo ezidla ngokuthembisa ngokukhusela amarhamente azo ziyawaxhaphaza ngendlela engathethekiyo. Abanye abafundisi-ntsapho nabasebenzi bezonyango—ebebefanele ukuba banovelwano nenkxalabo—baye bazingqina bengenakuthenjwa kuba baye babaxhaphaza de kwezinye iimeko, bababulala abo baphantsi kwabo. Akumangalisi ke ngoko ukuba iBhayibhile isilumkisa ukuba singabi nokholo kuwo onke amazwi!—IMizekeliso 14:15.
Izithembiso Ezinokuthenjwa
Kakade ke, abantu abaninzi bayazigcina izithembiso zabo, maxa wambi bade bancame izinto abazithandayo ukuze bafeze ezo zithembiso. (INdumiso 15:4) Bazigqala njengezibalulekileyo izithembiso zabo, yaye bayazigcina. Abanye bayafuna ngokunyanisekileyo ukuzigcina izithembiso zabo. Bazama konke okusemandleni ukuba bazizalisekise kodwa bangaphumeleli. Iimeko zicinezela nabantu abaneenjongo ezintle.—INtshumayeli 9:11.
Kungakhathaliseki ukuba kungenxa yasiphi isizathu, abantu abaninzi bakufumanisa kunzima ukuthemba nasiphi na isithembiso. Umbuzo ngulo: Ngaba zikho izithembiso ezinokuthenjwa? Ewe zikho. Izithembiso ezifumaneka eLizwini likaThixo iBhayibhile zinokuthenjwa. Kutheni ungahloli inqaku elilandelayo uze uve ukuba lithini ngalo mbandela? Njengezigidi zabantu esele zikubonile oko, nawe uya kubona ukuba izithembiso zikaThixo zinokuthenjwa.
[Inkcazelo Ngomfanekiso okwiphepha 3]
AP Photo/Amel Emric