IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w99 11/1 iphe. 4-6
  • Liqalisa Nini Iwaka Leminyaka Lesithathu

No video available for this selection.

Sorry, there was an error loading the video.

  • Liqalisa Nini Iwaka Leminyaka Lesithathu
  • IMboniselo Evakalisa UBukumkani BukaYehova—1999
  • Imixholwana
  • Amanqaku Afanayo
  • Wazalwa Nini UYesu?
  • Ngaba Amathemba Abo Ewaka Leminyaka Aya Kukatyiswa?
  • Ngaba Ixesha Liselihle Okanye Lixhatshwe Yinja?
    Vukani!—1999
  • Owama​—2000 Ngaba Ngunyaka Okhethekileyo?
    IMboniselo Evakalisa UBukumkani BukaYehova—1999
  • Ubaluleke Kangakanani Unyaka Wama-2000?
    Vukani!—1998
  • Iwaka Leminyaka Elizukileyo Lisondele
    IMboniselo Evakalisa UBukumkani BukaYehova—1990
Khangela Okunye
IMboniselo Evakalisa UBukumkani BukaYehova—1999
w99 11/1 iphe. 4-6

Liqalisa Nini Iwaka Leminyaka Lesithathu

NGABA ukhe weva kusithiwa iwaka leminyaka lesithathu aliyi kuqalisa ngonyaka wama-2000, kunoko liya kuqalisa ngowama-2001? Elo bango lichanile​—⁠ukusa kwinqanaba elithile. Ukuba sithi uYesu Kristu wazalwa ngonyaka owaziwa ngokuthi ngowoku-⁠1 B.C.E., njengoko bambi babecinga, ngoko uDisemba 31, 2000 (kungekhona owe-1999), ngokwenene uya kuphawula ukuphela kwewaka lesibini leminyaka, yaye uJanuwari 1, 2001, uya kuba kukuqalisa kwelesithathu.a Noko ke, namhlanje phantse bonke abaphengululi bayavuma ukuba uYesu Kristu akazange azalwe ngowoku-⁠1 B.C.E. Ngoko ke, wazalwa nini?

Wazalwa Nini UYesu?

IBhayibhile ayiwuchazi umhla othe ngqo awazalwa ngawo uYesu. Noko ke, iyatsho ukuba wazalwa “ngemihla kaHerode ukumkani.” (Mateyu 2:⁠1) Abaphengululi beBhayibhile abaninzi bakholelwa ukuba uHerode wafa ngonyaka we-⁠4 B.C.E., yaye uYesu wazalwa ngaphambi kwelo xesha​—⁠mhlawumbi ngowe-⁠5 okanye ngowe-⁠6 B.C.E. Bafikelela kwezo zigqibo ngokufa kukaHerode ngenxa yoko kwathethwa ngumbhali-mbali uFlavius Josephus.b

Ngokutsho kukaJosephus, ngaphambi nje kokufa kukaKumkani uHerode, ilanga lasithwa yinyanga ngokuyinxenye. Abaphengululi beBhayibhile balatha ekusithweni ngokuyinxenye kwelanga yinyanga okwenzeka ngoMatshi 11, 4 B.C.E., njengobungqina bokuba uHerode umele ukuba wafa ngaloo nyaka. Noko ke, ngonyaka woku-⁠1 B.C.E., ilanga lasithwa yinyanga ngokupheleleyo ngoJanuwari 8, laza lasithwa ngokuyinxenye ngoDisemba 27. Akakho owaziyo ukuba lo kaJosephus wayebhekisela kwesiphi kwezo ziganeko zokusithwa kwelanga yinyanga kukho esowoku-⁠1 B.C.E. okanye esowe-⁠4 B.C.E. Ngenxa yoko, asinakusebenzisa amazwi kaJosephus xa sithetha ngowona nyaka uchanileyo wokufa kukaHerode. Enoba besinokwenjenjalo, besingenakwazi ukuba uYesu wazalwa nini ngaphandle kokuba sifumane inkcazelo eyongezelelekileyo.

Obona bungqina bunamandla esinabo ngomhla wokuzalwa kukaYesu sibufumana eBhayibhileni. Ingxelo ephefumlelweyo ithi umzala kaYesu uYohane uMbhaptizi waqalisa umsebenzi wakhe njengomprofeti ngonyaka we-15 woMlawuli waseRoma uTibheriyo Kesare. (Luka 3:​1, 2) Imbali iyangqina ukuba uTibheriyo wamiselwa njengomlawuli ngoSeptemba 15, 14 C.E., ngoko unyaka wakhe we-15 ubuya kususela ngasekupheleni kowama-28 C.E. ukusa ngasekupheleni kowama-29 C.E. UYohane wabuqalisa ngelo xesha ubulungiseleli bakhe, yaye kubonakala ukuba uYesu waqalisa obakhe ubulungiseleli kwiinyanga ezintandathu emva koko. (Luka 1:​24-31) Oku, kuquka nobunye ubungqina, kuya kuthetha ukuba ubulungiseleli bukaYesu baqalisa ekwindla lowama-29 C.E.c IBhayibhile ithi uYesu “wayemalunga namashumi amathathu eminyaka ubudala” ukuqalisa kwakhe ubulungiseleli bakhe. (Luka 3:​23) Ukuba wayeneminyaka engama-30 ubudala ekwindla lowama-29 C.E., umele ukuba wazalwa ekwindla lowe-⁠2 B.C.E. Ngoko, ukuba sibala siye phambili iminyaka engamawaka amabini ukususela ekwindla lowe-⁠2 B.C.E. (sikhumbule ukuba kwakungekho nyaka we-⁠0; ngenxa yoko, ukususela ngowe-⁠2 B.C.E. ukusa kowoku-⁠1 C.E. yiminyaka emibini), siphawula ukuba iwaka leminyaka lesibini liphele ekwindla lowe-1999 kwaza kwaqala elesithathu!

Ngaba oko kubalulekile? Ngokomzekelo, ngaba ukuqala kwewaka leminyaka lesithathu kungaphawula ukuqala koLawulo Lweminyaka Eliwaka lukaYesu Kristu, ekuthethwe ngalo kwincwadi yeSityhilelo? Akunjalo. Ayikho indawo eBhayibhileni enxulumanisa iwaka leminyaka lesithathu noLawulo Lweminyaka Eliwaka lukaKristu.

UYesu walumkisa abalandeli bakhe ngokuthelekelela imihla. Wabaxelela abafundi bakhe oku: “Asikokwenu ukufumana ulwazi ngamaxesha okanye amathuba uBawo awabeke ngegunya lakhe.” (IZenzo 1:⁠7) Ngaphambilana, uYesu wachaza ukuba ngelo xesha naye wayengalazi ixesha uThixo awayeya kuwuphumeza ngalo umgwebo kule nkqubo ingendawo, ohlahl’ indlela yoLawulo Lweminyaka Eliwaka lukaKristu. Wathi: “Ngokuphathelele loo mhla nelo lixa akukho bani waziyo, azazi neengelosi zamazulu engazi noNyana, kodwa nguBawo kuphela.”​—⁠Mateyu 24:⁠36.

Ngaba kusengqiqweni ukulindela ukuba uKristu uya kubuya kanye kwiminyaka engama-2000 ukususela kumhla wokuzalwa kwakhe njengomntu? Nakanye. Kumele ukuba uYesu wayewazi umhla wokuzalwa kwakhe. Yaye ngokuqinisekileyo wayekwazi ukubala iminyaka engama-2000 ukususela ngaloo mhla. Ukanti wayengawazi umhla neyure yokuza kwakhe. Ngokucacileyo, bekungayi kuba lula ngolo hlobo ukuchaza umhla wokubuya kwakhe! ‘Amaxesha namathuba’ ayekwigunya likaBawo​—⁠nguye yedwa oyaziyo indlela alicwangcise ngayo ixesha.

Ngaphezu koko, uYesu akazange ayalele abalandeli bakhe ukuba bamlindele kwindawo ethile emhlabeni. Wabaxelela ukuba, bangaqokelelani ndawonye balinde, kodwa basasazeke “nakwezona nxalenye zikude zomhlaba” benze abafundi abantu bazo zonke iintlanga. Akakawurhoxisi loo myalelo.​—⁠IZenzo 1:⁠8; Mateyu 28:​19, 20.

Ngaba Amathemba Abo Ewaka Leminyaka Aya Kukatyiswa?

Sekunjalo, abanye abaphambili kwezonqulo banamathemba amangalisayo ngonyaka wama-2000. Bakholelwa ukuba ebudeni beenyanga ezimbalwa ezizayo, iinxalenye ezithile zencwadi yeSityhilelo ziya kuzaliseka ngokoqobo. Eneneni, bakholelwa ukuba baya kuba yinxalenye yaloo nzaliseko. Ngokomzekelo, balatha kwisiprofeto esikwiSityhilelo 11:​3, 7, 8, esithetha ngamangqina amabini aprofeta ‘ekwisixeko esikhulu eso ngengqiqo yokomoya sibizwa ngokuba yiSodom neYiputa, apho neNkosi yawo yabethelelwa khona.’ Xa egqiba ukunikela ubungqina, la mangqina mabini abulawa lirhamncwa elineengcwangu eliphuma enzonzobileni.

Ngokutsho kwengxelo ekwiphephancwadi iThe New York Times kaDisemba 27, 1998, inkokeli yelinye iqela lonqulo “ixelele abalandeli bayo ukuba ilelinye lamangqina amabini amiselwe ukuvakalisa ngokutshatyalaliswa komhlaba nokuza kweNkosi​—⁠ize ibulawe nguSathana kwizitrato zeYerusalem.” Siyaqondakala isizathu sokuba abasemagunyeni kwaSirayeli baxhalabe. Banoloyiko lokuba abantu abathile abanenzondelelo yempambano basenokuzama “ukuzalisekisa” esi siprofeto ngokwabo​—⁠kwanokuba oko kuya kuthetha ukuxhokonxa ungquzulwano olungaphumela ekusetyenzisweni kwezigalo! Noko ke, uThixo akafuni “ncedo” luvela ebantwini ukuze aphumeze iinjongo zakhe. Zonke iziprofeto eziseBhayibhileni ziya kuzaliseka ngexesha likaThixo nangendlela kaThixo.

Incwadi yeSityhilelo yabhalwa “ngemiqondiso.” Ngokutsho kweSityhilelo 1:⁠1, uYesu wayefuna ukutyhilela “amakhoboka akhe” (kungekhona ihlabathi ngokubanzi) izinto ezimele zenzeke kamsinya. Ukuze aqonde incwadi yeSityhilelo, amakhoboka kaKristu, okanye abalandeli bakhe, babeya kufuna umoya oyingcwele kaThixo, lowo uYehova awunika abo bamkholisayo. Ukuba incwadi yeSityhilelo ithetha ngokoqobo, nabantu abangenalukholo bebeya kuyifunda baze bayiqonde. Ngoko bekungayi kuba yimfuneko ukuba amaKristu athandazele umoya oyingcwele ukuze ayiqonde.​—⁠Mateyu 13:​10-⁠15.

Siye saphawula ukuba ngokobungqina obuphuma eBhayibhileni, iwaka leminyaka lesithathu ukususela ekuzalweni kukaYesu liqalisa ekwindla lowe-1999 nokuba olo suku okanye uJanuwari 1, 2000, okanye uJanuwari 1, 2001, akukho nalunye kuzo olunentsingiselo ebalulekileyo. Sekunjalo, kukho iwaka leminyaka elibangela umdla ngokukhethekileyo kumaKristu. Ukuba asilowaka leminyaka lesithathu, liliphi? Impendulo yalo mbuzo siza kuyifumana kwinqaku lokugqibela kolu ngcelele.

[Imibhalo esemazantsi]

a Bona ibhokisi enomxholo othi “Ngaba Ngowama-2000 okanye ngowama-2001?” kwiphepha 5.

b Ngokobalo-maxesha lwaba baphengululi, iwaka leminyaka lesithathu limele ukuba laqalisa ngowe-1995 okanye ngowe-1996.

c Ukuze ufumane iinkcukacha ezingakumbi, nceda ubone incwadi ethi Insight on the Scriptures, epapashwe yiWatchtower Bible and Tract Society of New York, Inc., Umqulu 1, iphepha 1094-⁠5.

[Ibhokisi ekwiphepha 6]

Ngaba Ngowama-2000 Okanye Ngowama-2001?

Ukuze usiqonde isizathu sokuba abanye besithi iwaka leminyaka lesithathu ukususela ekuzalweni kukaYesu liya kuqalisa ngoJanuwari 1, 2001, phawula lo mzekeliso. Masithi ufunda incwadi enamaphepha angama-200. Xa uqalisa ukufunda iphepha lama-200, ugqibile ukufunda amaphepha ali-199, kusele iphepha elinye omele ulifunde. Akuyi kuyigqiba incwadi de ube ufike ekupheleni kwephepha lama-200. Ngokufanayo, kuya kube kuphela iminyaka engama-999 yeli waka leminyaka sikulo ngoDisemba 31, 1999, njengoko kusaziwa ngokuqhelekileyo, kusale unyaka omnye kuze kuphele iwaka leminyaka. Xa siqiqa ngolo hlobo, iwaka leminyaka lesithathu liya kuqalisa ngoJanuwari 1, 2001. Noko ke, oku akuthethi ukuba, ngaloo mini kuya kube kuphele iminyaka engama-2000 ngokuthe ngqo ukususela ekuzalweni kukaYesu, njengoko eli nqaku libonisa.

[Ibhokisi ekwiphepha 6]

Indlela Okwaqaliswa Ngayo Ukubala Ngo-B.C.-A.D.

Ekuqaleni kwenkulungwane yesithandathu yeXesha Eliqhelekileyo, uPope John I wayalela imonki eyayibizwa ngokuba nguDionysius Exiguus ukuba yenze inkqubo yokubala eyayiza kwenza ukuba iicawa zikwazi ukuba nomhla omiselweyo weIsta.

UDionysius waqalisa umsebenzi wakhe. Wabala esusela emva, wadlula kwixesha lokufa kukaYesu, waya kufikelela kunyaka awayecinga ukuba uYesu wazalwa ngawo; waza wabala nyaka ngamnye wabhekisa phambili ukususela apho. UDionysius wamisela ixesha elisusela ekuzalweni kukaYesu ngokuthi “A.D.” (othetha Anno Domini​—⁠“kunyaka weNkosi yethu.”) Ngoxa injongo yakhe yayikukwenza indlela enokuthenjwa yokubala i-Ista nyaka ngamnye, uDionysius engaqondanga wavelisa ingcamango yokubala iminyaka ukususela ekuzalweni kukaKristu ukusa phambili.

Nangona abaphengululi abaninzi bevuma ukuba uYesu akazange azalwe ngonyaka owasetyenziswa nguDionysius ekubaleni kwakhe, indlela yakhe yokubala isenza sazi iziganeko size sikwazi nokubona indlela ezinxulumana ngayo nezinye.

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share