Iwaka Leminyaka Elizukileyo Lisondele

“Ndabona iitrone, nabahleli phezu kwazo, banikwa ugwebo. Ndayibona imiphefumlo yababenqunyulwe iintloko ngezembe, ngenxa yobungqina bukaYesu, nangenxa yelizwi likaThixo, abasukuba bengalinqulanga irhamncwa nomfanekiselo walo, abangalwamkelanga uphawu lwalo ebunzini nasesandleni sabo badla ubomi, baba ngookumkani kunye noKristu iminyaka eliwaka.” “Azisule uThixo zonke iinyembezi emehlweni [oluntu], kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile.”—ISityhilelo 20:4; 21:4.

NGALOO mazwi iBhayibhile ixela kwangaphambili ukusondela kwewaka leminyaka elizukileyo—uLawulo Lweminyaka Eliwaka lukaYesu Kristu nequmrhu lezinxulumani ezingookumkani basezulwini. Mhlawumbi utyekele ekusigatyeni esi siprofeto njengenkohliso nje, ukuza kukaNxele. Sekunjalo, unesizathu esivakalayo sokuba ulikhangele eli Waka Leminyaka njengento yokwenene ezayo!

Okokuqala, ufundisiso lweBhayibhile luya kukutyhilela ukuba iye yangqineka ithembeke ngokuphawulekayo kule minyaka ingamawaka amathandathu edluleyo embali yoluntu. Ngaphezu koko, iBhayibhile iyincwadi yesiprofeto, ibe uninzi loko yakuxela kwangaphambili, okanye iziprofeto, sele kuzalisekile ngokweenkcukacha.a Ekubeni oko kunjalo, kutheni iBhayibhile ifanele ibe yengathembekanga ekuxeleni kwangaphambili iWaka Leminyaka elizayo lolawulo lukaKristu? Noko ke, usenokuzibuza ukuba isixelela ntoni na iBhayibhile mayela neso sihlandlo sexesha. Siya kufeza yiphi injongo? Ibe okona kukokomdla okhethekileyo kuwe, siya kubuchaphazela njani ubomi bakho?

Ilifa Elalahlekayo

IBhayibhile ibonisa ukuba uLawulo Lweminyaka Eliwaka lukaKristu luyindlela yakhe yokudlulisela elona lifa lixabisekileyo ‘kubantwana’ bakhe. Kodwa liliphi elo lifa? Ibe ngabaphi aba “bantwana”? Ilifa lisenokuchazwa njengento ethile edluliselwa kwinzala kabani akufa. Xa ukhokho wethu uAdam wazingqina engamthobeli uThixo, wazilahlekanisa nelungelo lobomi obungunaphakade kwiparadisi esemhlabeni, yena nenzala yakhe—lonke uhlanga loluntu. Ngaloo ndlela uAdam wadlulisela ilifa lesono, lokufa nelosizi kwinzala yakhe.—Genesis 3:1-19; Roma 5:12.

UYesu weza emhlabeni esenyameni ukuze abuyisele kuluntu ilifa elalahlwa nguAdam. Oku wakwenza ngokuzingqina ethembekile kuYehova uThixo, ebunikela ngokuvumayo ubomi bakhe ngenxa yoluntu. (Yohane 3:16) Ngokuphila ubomi obufezekileyo, nobungenasono, uYesu wafumana ilungelo lokuphila ubomi obufezekileyo obungunaphakade kwiParadisi esemhlabeni—into kanye uAdam awayilahlayo. Noko ke, uYesu akazange alisebenzise elo lungelo; engazange aphulukane nalo xa wathi wafa waza wavuselwa kubomi basezulwini. Ngoko ke wayenako ukulisebenzisa njengelifa elixabisekileyo anokulidlulisela ‘kubantwana’ bakhe.—Roma 5:18, 19.

Iindlalifa—“Abantwana” BakaKristu

KuIsaya 9:6 UYesu ngokwesiprofeto ubizwa ngokuba “nguSonininanini [“nguBawo Ongunaphakade,” NW].” Uba nguBawo Ongunaphakade kuluntu olusehlabathini oluhlawulelweyo, ekwimeko yokuba angakwazi ukudlulisela ilifa kwaba bahlawulelweyo, okanye kwabo benziwe abantwana bakhe. (Mateyu 20:28; bona kwaneNdumiso 37:18, 29.) Oku kuboniswa ngokucacileyo kwidinga lakhe elithi: “Yizani, nina nisikelelweyo ngubawo, nibudle ilifa ubukumkani obalungiselwa nina kwasekusekweni kwehlabathi.” Ngokubhekele phaya wathi: “Banoyolo abanobulali; ngokuba umhlaba baya kuwudla ilifa bona.”—Mateyu 5:5; 25:34.

Noko ke, ukuze umhlaba ube lilifa elixabisekileyo, iimeko zifanele ziguqulwe ngokupheleleyo—uziswe emfezekweni! Ufanele ube lihlabathi apho uxolo olufezekileyo nemvisiswano epheleleyo zibalaseleyo phakathi kwazo zonke izidalwa zikaThixo. (Isaya 11:6-9) Zonke iimpawu zokungafezeki komntu zifanele zishenxiswe, kuquka ukufa. (1 Korinte 15:25, 26) Oku kuthetha ukuba abafileyo, abayinxalenye yoluntu oluhlawulelweyo, bafanele bavuswe. Kuphela kungale ndlela abanokuthi babe nethuba lokuba ziindlalifa zikaKristu!—Yohane 5:28, 29.

Ngaloo ndlela, uLawulo Lweminyaka Eliwaka lukaKristu luba sisihlandlo solonwabo apho uluntu luya kuthi ngokuthe ngcembe ‘lukhululwe ebukhobokeni bokonakala’ luze lufikelele kwimfezeko. (Roma 8:21) Okubangel’ umdla kukuba, kwanemithombo yehlabathi iyakuqonda oku njengoko kuya kufezwa liwaka leminyaka. IWebster’s Ninth New Collegiate Dictionary (uhlelo lowe-1985,) ilichaza igama elithi “millenium” ‘njengesihlandlo solonwabo olukhulu okanye imfezeko yoluntu.’

Iyalugqwesa Ulawulo LukaSolomon

Olu Lawulo Lwewaka Leminyaka luzukileyo lunokufaniswa nolawulo olunoxolo nolunempumelelo lukaKumkani uSolomon olwathabatha iminyaka engama-40 kuSirayeli wamandulo. (1 Kumkani 4:24, 25, 29) Xa ukumkanikazi waseShebha watyelela ukumkani uSolomon, wathi: “Libe liyinene ilizwi endaliva, ezweni lam, lezinto zakho nobulumko bakho. Andikholwanga ngamazwi lawo, ndada ndeza, abona amehlo am; uyabona, bendingaxelelwanga nesiqingatha esi. Ulugqithile ngobulumko nangokulunga [“nangempumelelo,” NW] udaba ebe ndiluvile. Anoyolo amadoda akho, banoyolo aba bakhonzi bakho bemiyo phambi kwakho amaxesha onke, bebuva ubulumko bakho.”—1 Kumkani 10:6-8.

Ukuba uxolo, impumelelo nobulumko bolawulo lweminyaka engama-40 lukaKumkani uSolomon wasemhlabeni lwakugqwesa, ewe, lwaba ngaphezu kokuphindwa kabini, oko ukumkanikazi waseShebha wayekulindele ngokukhulu, ngoko uLawulo Lweminyaka Eliwaka lukaKumkani uSolomon omkhudlwana wasezulwini, uYesu Kristu, ngokuqinisekileyo luya kukugqwesa konke oko abantu banokukuthelekelela! Ngokwamazwi kaYesu ngokwakhe, ‘ungomkhulu kunoSolomon.’ (Mateyu 12:42) Khawuzame ukuba nomfanekiso-ngqondweni weemeko ezisemhlabeni ezizezona zinik’ impilo, ezinempumelelo, ezinoxolo, ezilungileyo nezonwabisayo onako ukuzithelekelela, ibe awusayi kuba nako ukuqonda kwanesuntswana loko iWaka Leminyaka likaKristu lisigcinele kona.

Ngaba Liya Kufika Ngaxeshanye Newaka Leminyaka Lesithathu?

Iziganeko zehlabathi ukususela ngowe-1914 zibonisa ukuba siphila ‘ekuphelisweni kwephakade eli.’ UYesu ngokubhekele phaya wathi isizukulwana esasiya kubona ezi ziganeko ezaxelwa ngenx’ engaphambili ‘sasingasayi kudlula, zingadanga zonke ezo zinto zibekho.’ Ngoko, ngaba oku kuthetha ukuba, uLawulo lukaKristu lweWaka Leminyaka luya kufika ngaxeshanye newaka leminyaka lesithathu?—Mateyu 24:3-21, 34.

UYesu wabalumkisa abafundi bakhe ukuba bangenzi intelekelelo. Wathi: “Asikokwenu ukwazi amaxesha nokuba ngamathuba, awamise ngelakhe igunya uBawo.” (IZenzo 1:7) Ibe ngokuphathelele kanye ‘umhla neyure’ ezaziya kwenzeka ngayo ezi ziganeko, uYesu wathi kuphela nguYise, uYehova uThixo, owayesazi. (Mateyu 24:36) Ngoko ke, iBhayibhile ayixhasi nabaphi na kwinani elandayo labaprofeti bentshabalalo nemibutho eyalatha ekukhaleni kwentsimbi ezinzulwini zobusuku Kusuku Oluphambi koNyaka Omtsha lowe-1999, njengesiphelo sehlabathi.

Noko ke, iziganeko zehlabathi zanamhlanje zibonisa ngokucacileyo ukuba ixesha lokuphela kwale nkqubo yezinto yobumnyama nengendawo ‘lihambile’ ibe iWaka Leminyaka likaKristu ‘lisondele.’ (Roma 13:12) Kunokuba senze uqashiqashi ngosuku neyure ethe ngqo yokwenzeka kwako oku, ngoku lixesha elifanelekileyo lokuba sifumane ulwazi ngeemfuneko zikaThixo zokusinda. (Yohane 17:3) Ngale ndlela unokufunda indlela yokuba phakathi kwabo uYesu athi ngabo: “Yizani, nina nisikelelweyo nguBawo, nibudle ilifa ubukumkani obalungiselwa nina kwasekusekweni kwehlabathi.” (Mateyu 25:34) AmaNgqina kaYehova akulungele ibe anako ukukunceda ukuba ube phakathi kwabo baya kunandipha iintsikelelo zeWaka Leminyaka elizukileyo elizayo.b

[Imibhalo esemazantsi]

[Amagama acatshulweyo akwiphepha 6]

“Yizani, nina nisikelelweyo nguBawo, nibudle ilifa ubukumkani obalungiselwa nina kwasekusekweni kwehlabathi”