IBhayibhile Iphendula Imibuzo Ebalulekileyo Yomhla Wethu
NGABA iBhayibhile ilulutho namhlanje? Ukuze ibe lulutho, ngokuqinisekileyo le ncwadi indala kuza kufuneka inike abo bayifundayo ukhokelo kwimibandela esexesheni nebalulekileyo. Ngaba iBhayibhile iyasinikela isiluleko esiyingenelo kwimibandela ebaluleke ngokwenene kwihlabathi lanamhlanje?
Makhe sihlole imiba emibini esexesheni. Xa sisenjenjalo, siya kuhlolisisa oko iBhayibhile ikutshoyo ngale mibandela.
Kutheni UThixo Evumela Ukubandezeleka?
Ngenxa yeemeko ezigquba ehlabathini namhlanje, omnye weyona mibuzo ebuzwa umhla nezolo ngothi: Kutheni uThixo evumela abantu abamsulwa ukuba babandezeleke? Ufanele ke phofu ukuphakama lo mbuzo kuba liya lintinga ngokuntinga inani labantu abachatshazelwa lulwaphulo-mthetho olunogonyamelo, ubungendawo, ukutshatyalaliswa kohlanga oluthile, izihelegu ezihlela abantu, njalo njalo.
Ngokomzekelo, ngoJuni 1998 uloliwe okhawulezayo wantlaleka kwibhulorho ethile kumntla weJamani, ebulala abantu abangaphezu kwekhulu ababekhwele kuye. Ubutyobo obabulapho babangela ukuba kwanabezamayeza kunye nabacimi-mlilo ababenceda abenzakeleyo kunye nabafileyo bakhathazeke. Ubhisopu we-Evangelical Church wabuza esithi: “Owu Thixo, Besekutheni na ukuze kube nje?” Kwanalo bhishopu akazange awuphendule loo mbuzo.
Ngokusuka kumava kuyacaca ukuba xa abantu abamsulwa bebandezeleka, sibe singaziwa isizekabani saloo nto, maxa wambi baye baqumbe. Kulapho ke iBhayibhile ifika incede khona, kuba ichaza isizathu sokuba abantu abamsulwa behlelwe bububi kwaye babandezeleke.
Xa uYehova uThixo wadala umhlaba nayo yonke into ekuwo, wayengenanjongo yakuba uluntu lukhathazwe bububi nakukubandezeleka. Sinokuqiniseka njani ngaloo nto? Kaloku akugqiba ukudala, “wakubona uThixo konke akwenzileyo, nanko, kulungile kunene.” (Genesis 1:31) Khawuzibuze, ‘Ukuba bendinokubona into embi isenzeka, ngaba bendiya kuthi “ilunge kunene”?’ Ngokuqinisekileyo akunjalo! Ngokufanayo ke, xa uThixo wayesithi yonke into ‘ilunge kunene,’ kwakungekho bubi emhlabeni. Ngoko ububi obu baqalisa nini yaye njani?
Kungekudala emva kokuba abazali bethu bokuqala, uAdam noEva, bedaliwe, isidalwa somoya esithile esinamandla saya kumfazi saza sacel’ umngeni ukuba nenyaniso kukaYehova kunye nokulufanelekela kwakhe ulongamo lwakhe. (Genesis 3:1-5) Kamva esi sidalwa, uSathana uMtyholi, satyhola abantu sisithi abanako ukuhlala benyanisekile kuThixo xa besebunzimeni. (Yobhi 2:1-5) Wasabela njani uYehova kule meko? Wavumela ixesha lokuba kucace ukuba abantu abanakukwazi ukuphumelela ngaphandle kwakhe. (Yeremiya 10:23) Xa izidalwa zisenza izinto ezingqubana nemithetho nemigaqo kaThixo, umphumo uba sisono, esithi sona sivelise iimeko eziyingozi. (INtshumayeli 8:9; 1 Yohane 3:4) Noko ke, phezu kwawo nje la magingxigingxi, uYehova wayesazi ukuba abanye abantu babeya kugcina ingqibelelo kuye.
Sele kudlule iminyaka emalunga nama-6 000 yenzekayo loo mvukelo yase-Eden edale usizi. Ngaba lide gqitha elo xesha? UYehova ngewayembulele kudal’ okuyaa uSathana needemon zakhe. Kodwa ngaba akatyaphanga na ngokulinda ukuba kuphele onke amathandabuzo anokuvumbuluka ngokuphathelele ukufaneleka kolongamo lukaYehova kunye nengqibelelo yabantu kuye? Ngaba ayenzeki na kwiinkundla zamatyala zale mihla into yokuba ukuchotshelwa kwetyala kuthabathe iminyaka ukuze kufunyaniswe ukuba ngubani owonileyo nongonanga?
Ngenxa yokubaluleka kwembambano uYehova kunye nabantu abajamelene nayo—ulongamo kwindalo iphela kunye nengqibelelo yabantu—hayi indlela uThixo aye wenza ngobulumko ngayo ngokuvumela ixesha! Ngoku siyibona kakuhle into eyenzekayo xa abantu betyeshela imithetho kaThixo baze bahambe ngabayibonayo. Umphumo uba kukwesamela kobubi. Naso ke isizathu sokuba abantu abaninzi abamsulwa babandezeleke namhlanje.
Noko ke, okuvuyisayo kukuba iLizwi likaThixo liyabonisa ukuba ububi abuyi kuhlala bukho ngonaphakade. Enyanisweni, kungekudala uYehova uza kubuphelisa ububi kunye nabenzi bobubi. IMizekeliso 2:22 ithi: “Banqunyulwe ezweni abangendawo, abanginizayo bancothulwe kulo.” Kwelinye icala, abo bathembekileyo kuThixo banokukhangela phambili kwixesha, ngoku elisele lisemnyango, apho ‘ukufa kungasayi kubakho, kungayi kubakho nakukhedama nasikhalo nantlungu kwakhona.’—ISityhilelo 21:4.
Ngoko ke, iBhayibhile isichaza kakuhle isizathu sokuba abantu abamsulwa babandezeleke. Ikwasiqinisekisa nangokuba ubungendawo nokubandezeleka kuza kuphela kungekudala. Noko ke, ukho omnye umbuzo esifuna uphendulwe njengoko sijamelana namahla-ndinyuka obu bomi.
Yintoni Injongo Yobomi?
Kusenokwenzeka ukuba ngoku abantu bazama ukufumana injongo yobomi ngaphezulu kunanini na ngaphambili kwimbali yoluntu. Uninzi luyazibuza, ‘Kutheni ndiphila nje? Ndinokuyifumana njani intsingiselo yobomi bam?’ Zininzi izinto ezibangela ukuba luzibuze le mibuzo.
Ubomi bomntu bunokonakaliswa sisihelegu esimhleleyo. Ngokomzekelo, ebutsheni bowe-1998 intwazana eneminyaka eli-12 ehlala eBavaria, eJamani, yabiwa yaza yabulawa. Emva konyaka yenzekile loo nto, unina wavuma ukuba usuku ngalunye uluchitha ekhangelana nenjongo yobomi—kodwa akayifumani. Olunye ulutsha luye lushukunyiselwe ukuba luzibuze ngenjongo yobomi. Lufuna unqabiseko, ulwaneliseko nokuziva lufunwa, kodwa ke luphoxeka lube manzi ngenxa yohanahaniso nobungendawo obesameleyo. Abanye abantu basekela ubomi babo emisebenzini, kodwa bafumanisa ukuba igunya, isikhundla nokuba nezinto akuwanelisi umnqweno owendeleyo wokufumana isizathu sokuba baphile.
Enoba yintoni na eshukumisela umntu ukuba afune injongo yobomi, lo mbuzo ufuna impendulo ecingisiswe kakuhle neyanelisayo. Nalapho, iBhayibhile inokuba yingenelo kakhulu. Ithi uYehova nguThixo onenjongo, lowo unezizathu ezibambekayo kuyo yonke into ayenzayo. Makhe sibuze, Ngaba ubunokuyakha indlu singekho isizathu sokuba uyakhe? Ngokuqinisekileyo akunjalo, kuba kaloku ukwakhiwa kwendlu kungena kanobom ezipokothweni kwaye kunokuthabatha iinyanga okanye iminyaka. Indlu uyakhela ukuze wena okanye omnye umntu ahlale kuyo. Kuyafana ke nangoYehova. Wayengenakuziduba kangako ngokudala umhlaba nezinto eziphila kuwo kanti akanasizathu, injongo. (Thelekisa eyamaHebhere 3:4.) Iyintoni injongo yakhe ngomhlaba?
Isiprofeto sikaIsaya sichaza uYehova ‘njengoThixo, uMenzi wehlabathi, uMseki walo.’ Okunene, nguye ‘owalizinzisayo, akalidalela ukuba kube senyanyeni, walibumba ukuba limiwe.’ (Isaya 45:18) Ewe, ukususela oko umhlaba wadalwayo, bekuyinjongo kaYehova ukuba umiwe. INdumiso 115:16 ithi: “Amazulu ngamazulu kaYehova, ihlabathi ulinike oonyana babantu.” Ngaloo ndlela iBhayibhile iyabonisa ukuba uYehova wadala umhlaba ukuze umiwe ngabantu abathobelayo, ababeza kuwunyamekela.—Genesis 1:27, 28.
Ngaba imvukelo ka-Adam noEva yabangela ukuba uYehova ayiguqule injongo yakhe? Akunjalo. Kodwa sinokuqiniseka njani? Kaloku, khawucinge ngale ngongoma: IBhayibhile yabhalwa kumawaka eminyaka emva kwemvukelo yase-Eden. Ukuba uThixo wayilahla injongo yakhe yantlandlolo, kutheni ingachazwanga nje loo nto eBhayibhileni? Sinye isigqibo esinokufikelela kuso, sesokuba injongo yakhe ngomhlaba nangoluntu ayikaguquki.
Ukongezelela koko, injongo kaYehova ayisileli. Esebenzisa uIsaya, uThixo usinika esi siqinisekiso: “Njengokuba kusihla imvula nekhephu ezulwini, ingabuyeli kulo ingathanga iwunyakamise umhlaba uvunde, iwuhlumise, iwenze untshule, imnike imbewu umhlwayeli, imnike isonka odlayo: liya kuba njalo ilizwi lam eliphuma emlonyeni wam; aliyi kubuyela kum lilambatha, lingakwenzanga endikuthandayo, lingakuphumelelisanga oko ndilithumela kuko.”—Isaya 55:10, 11.
Oko UThixo Akulindeleyo Kuthi
Ngoko kucacile ukuba sinokuba nentembelo kwinzaliseko yenjongo kaThixo yokuba umhlaba umiwe ngonaphakade ngabantu abathobelayo. Ukuba sifuna ukuba phakathi kwabo banelungelo lokuphila ngokusisigxina emhlabeni, simele senze oko uKumkani uSolomon owayesisilumko wakutshoyo: “Yoyika uThixo, ugcine imithetho yakhe; ngokuba indawo leyo yimfanelo yoluntu lonke.”—INtshumayeli 12:13; Yohane 17:3.
Ukuphila ngokuvisisana nenjongo kaYehova ngoluntu kuthetha ukumazi uThixo oyinyaniso nokwenza oko akufunayo okuchazwe kwiZibhalo Ezingcwele. Ukuba senza oko ngoku, sinokuhlala sicinga ngethemba lobomi obungunaphakade kumhlaba oyiparadesi, apho singayi kupheza ukufunda izinto ezintsha ngoThixo nangendalo yakhe emangalisayo. (Luka 23:43) Elinjani ukubangel’ imincili ithemba!
Uninzi lwabo bafuna injongo ebomini luphethukela eBhayibhileni ibe sithethanje lonwabile. Ngokomzekelo, omnye umfana ogama linguAlfred wayengayifumani injongo yobomi. Ukubandakanyeka konqulo emfazweni kwakulizothe kuye, ibe wayekruqulwa luhanahaniso nabubungendawo kwezobupolitika. UAlfred watyelela amaIndiya aseMntla Merika enethemba lokuba wokhanyiselwa ngenjongo yobomi, kodwa wabuyela eYurophu ephoxekile. Ephelelwe lithemba, waphethukela kwiziyobisi nakumculo ondlongondlongo. Noko ke, kamva ukuhlolisisa iBhayibhile rhoqo nangenyameko kwamnceda uAlfred wayibona eyona njongo yokwenene yobomi waza wafumana ulwaneliseko.
Isibane Esinokuthenjwa Esikhanyisa Umendo Wethu
Ngoko ke, sisiphi isigqibo esinokufikelela kuso ngeBhayibhile? Ngaba ilulutho namhlanje? Okunene ilulutho kuba isinika ukhokelo kwimibandela esexesheni. IBhayibhile iyachaza ukuba ubungendawo abubangelwa nguThixo yaye iyasinceda sifumane injongo yobomi. Ngaphezu koko, iBhayibhile isichazela lukhulu ngemibandela ebangel’ umdla namhlanje. ILizwi likaThixo liyathetha ngemiba enjengomtshato, ukukhulisa abantwana, ulwalamano oluphakathi kwabantu kunye nethemba ngabafi.
Ukuba akukenjinjalo, nceda ukuhlolisise oko kuqulethwe yiBhayibhile. Wakuba uyibonile imbaluleka yokwenene yokhokelo lwayo ebomini, usenokuvakalelwa kanye njengomdumisi, owalindela ukufumana ukhokelo kuYehova uThixo waza wavuma ingoma esithi: “Lisisibane seenyawo zam ilizwi lakho, likukukhanya emendweni wam.”—INdumiso 119:105.
[Umfanekiso okwiphepha 6]
Ngaba uyasazi isizathu sokuba uThixo avumele ukuba abantu abamsulwa babandezeleke?
[Umfanekiso okwiphepha 7]
Unako ukuphila ubomi obunenjongo