Imibuzo Evela Kubafundi
KweyabaseRoma 12:19, ngaba umpostile uPawulos wayebonisa ukuba amaKristu akamele aqumbe xa wayesithi: “Musani ukuziphindezelela, zintanda, kodwa yikhweleleni ingqumbo”?
Ngamafutshane nje singathi wayengathethi loo nto. Apha umpostile uPawulos wayebhekisela kwingqubo kaThixo. Kakade ke, oko akuthethi kuthi ayibalulekanga into yokuba amaKristu ayoyiswa ngumsindo kusini na. IBhayibhile iyasiluleka ukuba singabi nengqumbo. Khawuqwalasele nantsi eminye imizekelo yeziluleko ezivela kuThixo.
“Wuyeke umsindo uyishiye ingqumbo; Musa ukuvutha ngumsindo uze wenze ububi.” (INdumiso 37:8) “Wonk’ ubani oqhubeka equmbele umzalwana wakhe uya kuphenduliswa kwinkundla yokusesikweni.” (Mateyu 5:22) “Iyabonakala ke yona imisebenzi yenyama, eyile, uhenyuzo, ukungahlambuluki, ihambo evakalala, unqulo-zithixo, ukusebenzelana nemimoya, ubutshaba, iimbambano, amakhwele, ukugqajukelwa yimisindo.” (Galati 5:19, 20) “Mabususwe kuni bonke ubukrakra bolunya nomsindo nengqumbo nokumemeza nokutshabhisa nabo bonke ububi.” (Efese 4:31) “Wonke umntu umele akhawuleze ukuva, acothe ukuthetha, acothe ukuqumba.” (Yakobi 1:19) Ngaphezu koko, incwadi yeMizekeliso isiluleka isilulekile nxamnye nokoyiswa ngumsindo okanye ukucaphuka msinya ngenxa yezinto ezincinane nje okanye iimpazamo zabantu.—IMizekeliso 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.
Umongo weyabaseRoma 12:19 uyavisisana nezo ziluleko. UPawulos wancomela ukuba singahanahanisi xa sibonakalisa uthando, sibasikelele abo basitshutshisayo, sizame ukucinga izinto ezilungileyo ngabanye abantu, singabuyekezi ububi ngobubi yaye sizabalazele ukuba seluxolweni nabantu bonke. Emva koko wabongoza esithi: “Musani ukuziphindezelela, zintanda, kodwa yikhweleleni ingqumbo; kuba kubhaliwe kwathiwa: ‘Impindezelo yeyam; kuya kubuyekeza mna, utsho uYehova.’”—Roma 12:9, 14, 16-19.
Ewe, asifanele sivumele umsindo usishukumisele ukuba siziphindezelele. Ulwazi lwethu ngeemeko kunye nemvo yethu yokusesikweni azigqibelelanga. Ukuba sivumela umsindo ukuba usenze siziphindezele, ngokufuthi siya kwenza okuphosakeleyo. Siya kuba siphumeza injongo yoTshaba lukaThixo, uMtyholi. UPawulos wayekhe wabhala namazwi athi: “Qumbani, kodwa ningoni; malingatshoni ilanga nicaphukile, ningamvuleli indawo uMtyholi.”—Efese 4:26, 27.
Elona khondo lilungileyo, ikhondo lobulumko, kukuyekela uThixo agqibe ngexesha nangomntu ofanelwe yimpindezelo. Unokukwenza oko enolwazi olupheleleyo ngezibakala, kwaye nayiphi na impindezelo yakhe iya kubonisa okusesikweni kwakhe okugqibeleleyo. Sinokubona ukuba leyo yingongoma eyayidluliselwa nguPawulos kweyabaseRoma 12:19 xa simbona ebhekisela kwiDuteronomi 32:35, 41, equka amazwi athi: “Yeyam impindezelo, nembuyekezo.” (Thelekisa eyamaHebhere 10:30.) Ngaloo ndlela, nakuba igama elithi “kaThixo” lingafumaneki kumbhalo wesiGrike, iinguqulelo ezininzi zale mihla ziye zalifakelela kweyabaseRoma 12:19. Loo nto iye yabangela ukuba ifundeke ngokuthi “vumela uThixo aphindezele” (The Contemporary English Version); “khwelela ingqumbo kaThixo” (American Standard Version); “yeka ibe nguThixo owohlwayayo xa efuna” (The New Testament in Modern English); “khwelela impindezelo yobuthixo.”—The New English Bible.
Kwanaxa sixhatshazwa okanye sitshutshiswa ziintshaba zenyaniso, sinokuthembela kwindlela uMoses aweva uYehova uThixo echazwa ngayo: “UYehova, uYehova, uThixo onenceba nobabalo, ozeka kade umsindo, onobubele bothando obuninzi nenyaniso, ogcinela amawaka ububele bothando, oxolela isiphoso nokunxaxha nesono, ongakhe amenze msulwa ofanelwe sisohlwayo.”—Eksodus 34:6, 7.