Umculo Okholisa UThixo

Umculo uye wachazwa “njengobona bugcisa bemvelo bakudala.” Ngokufanayo nolwimi, sisipho esibalaseleyo esahlula abantu kwizilwanyana. Umculo uchukumisa iimvakalelo. Kunokuba luncuthu ukuwuphulaphula yaye unokuhlala unkenteza engqondweni. Ngaphezulu, umculo unokumkholisa uThixo.

NJENGOKO iBhayibhile ibonisa, amaSirayeli ayengabantu abathanda umculo. Umculo “wawububugcisa obubalaseleyo mandulo kumaxesha okubhalwa kweBhayibhile,” yagqabaza njalo iUnger’s Bible Dictionary. Njengenxalenye yobomi bemihla ngemihla, ukucula ngamazwi nangezixhobo kwakuyimbalasane yonqulo lwawo. Kodwa eyona nto yayisetyenziswa ngokubalaseleyo yayililizwi lomntu.

UKumkani uDavide wanyula abameli phakathi kwabaLevi ukuba ‘balathise ukuvuma’ kwitarbanekile, ngaphambi kokuba kumiselwe itempile eyayakhiwe nguSolomon, unyana wakhe. (1 Kronike 6:31, 32) Xa ityeya yomnqophiso, eyayimela ubukho bukaYehova yafikayo eYerusalem, uDavide walungiselela abathile kubaLevi “ukuba bakhumbule yaye babulele, badumise uYehova.” Babedumisa ngamazwi abo besebenzisa ‘nezixhobo zohlobo lomrhubhe neehadi, . . . namacangci adlalwa ngokuvakalayo, . . . namaxilongo.’ La madoda ‘ayetyunjwe ngamagama ukuba abulele kuYehova, ngenxa yokuba “ububele bakhe bothando bukho ukusa kwixesha elingenammiselo.”’—1 Kronike 16:4-6, 41; 25:1.

Ikhorasi ethi “Ububele [bukaYehova] bothando bukho ukusa kwixesha elingenammiselo” ivela izihlandlo ezininzi kwiiNdumiso, incwadi yeBhayibhile enxulunyaniswa kakhulu nomculo. Ngokomzekelo, iyinxalenye yesibini kwindinyana nganye kwezingama-26 zeNdumiso ye-136. Omnye umphengululi weBhayibhile uthi: “Ukuba mfutshane kwayo kwenza ukuba ibe lula ebantwini. Wonk’ ubani oyivileyo angakwazi ukuyikhumbula.”

Imibhalo engasentla kwiindumiso ibonisa ukusetyenziswa kakhulu kwezixhobo zomculo. INdumiso ye-150 ikhankanya isigodlo, uhadi, intambula, ugwali namacangci ukongezelela kwimirhubhe. Sekunjalo, eyona nto inomtsalane lilizwi lomntu. Indinyana yesi-6 iyabongoza isithi: “Yonk’ into ephefumlayo—mayidumise uYa. Dumisani uYa!”

Ekubeni umculo uchaza iimvakalelo zethu, iingcamango ezilusizi kumaxesha okubhalwa kweBhayibhile zabangela ukuba kubekho izimbonono okanye iingoma zovuyo. Noko ke, olu hlobo lomculo lwalunqongophele kwingqokelela yomculo wakwaSirayeli. Intyilalwazi yeBhayibhile i-Insight on the Scriptures ithi: “Kwakuye kuvunywe ngesandi esimnandi okanye kutshintshatshintshwe ilizwi kuze kugxininiswe nangamazwi kwisimbonono okanye kwisililo kuphela.”a

UYesu kunye nabapostile bakhe abathembekileyo bavuma iindumiso kuYehova ngobusuku obungaphambi kokufa kukaYesu, ngokungathandabuzekiyo bephinda amazwi eeNdumiso zeHallel. (INdumiso 113-118) Hayi indlela ekumele ukuba kwabomeleza ngayo abafundi bakaYesu ukuze bahlangabezane nokulahlekelwa kwabo yiNkosi yabo! Ngaphezu koko, isigqibo sabo sokuhlala bengabakhonzi abathembekileyo boMongami Ophakamileyo wendalo iphela, uYehova, simele ukuba sendela ngokunzulu njengoko babecula kahlanu umbongo othi “kuba ububele bakhe bothando bukho ukusa kwixesha elingenammiselo.”—INdumiso 118:1-4, 29.

AmaKristu okuqala ase-Efese naseKolose ayevuma ‘iindumiso nemibongo kuThixo’ (ngokoqobo, “amaculo”). Kuzo ongeza ‘iingoma zokomoya’ awayezivuma ezintliziyweni zawo. (Efese 5:19; Kolose 3:16) Ngokucula nangentetho, ayeyisebenzisa ngokufanelekileyo imilomo yawo ukuze avakalise indumiso. Ngaba uYesu akazange athi “umlomo uthetha ngokuphuphuma kwentliziyo”?—Mateyu 12:34.

Umculo Ongamkholisiyo uThixo

Asinguwo wonke umculo ekuthethwa ngawo eBhayibhileni okholisa uThixo. Phawula isiganeko esenzeka kwiNtaba yeSinayi, ekufumaneni kukaMoses uMthetho, kuquka iMithetho Elishumi. Ekuhleni kukaMoses entabeni, yintoni awayivayo? ‘Kungekhona isandi sokuvuma kwabeyisayo,’ “ingesiso nasandi sakuvuma kwaboyiswayo,” kodwa ‘isandi sakuvuma kumbi.’ Lo mculo wawunento yokwenza nonqulo zithixo, nto leyo eyabangela ukuba uThixo angakholiswa nguwo yaye oko kwaphumela ekufeni kwabamalunga nama-3 000 abo babecula.—Eksodus 32:18, 25-28.

Nangona abantu benokuqamba, badlale baze banandiphe zonke iintlobo zomculo, oko akuthethi kuthi wonke ngokuzenzekelayo uyamkholisa uThixo. Ngoba? Umpostile uPawulos ongumKristu uyachaza: “Bonke bonile baza basilela kuzuko lukaThixo.” (Roma 3:23) Imibhiyozo yabahedeni yokuchuma, imfundiso yokungafi komphefumlo womntu, ukuhlonelwa kukaMariya “njengonina kaThixo” ngokufuthi zizinto ezidla ngokuvela kwimixholo yomculo. Ukanti, ezi nkolelo nezi zenzo zibonisa ukungamhloneli uThixo wenyaniso, kuba zichasene noko kutyhilwa liLizwi lakhe eliphefumlelweyo, iBhayibhile.—Duteronomi 18:10-12; Hezekile 18:4; Luka 1:35, 38.

Ukwenza Ukhetho Lobulumko Emculweni

Ukukhetha umculo kuphixanis’ ingqondo. Amaqweqwe eecompact disc enzelwe ukuba ashukumisele abathengi ukuba bathenge lonke uhlobo lwamacwecwe omculo. Kodwa ukuba umkhonzi kaThixo unqwenela ukumkholisa, uya kusebenzisa ubulumko xa ekhetha ukuze aphephe umculo wamazwi nowezixhobo ophefumlelwe ziinkolelo zonqulo lobuxoki okanye obethelela ukungafi komphefumlo nonobudemoni.

UAlbert, owayekhe wakhonza njengomvangeli wasemazweni ongumKristu eAfrika, uyavuma ukuba lalilincinane ithuba awayenalo lokudlala ipiyano apho. Noko ke, wayephulaphula ngokuphindaphindiweyo umculo odlalwa kumacwecwe ambalwa awayeze nawo. Kwilizwe lakowabo, ngoku uAlbert utyelela amabandla amaKristu njengomveleli ohambahambayo. Lincinane ixesha lokuba aphulaphule umculo. Uthi: “Oyena mqambi ndimthandayo nguBeethoven. Ukutyhubela iminyaka, ndiye ndaqokelela amacwecwe omculo wakhe awudlala ngezixhobo, iokhestra, isonatas nalowo udlalwa ngezixhobo ezine.” Uye wakunandipha kakhulu ukuphulaphula olu hlobo. Kakade ke, mntu ngamnye unohlobo lwakhe aluthandayo lomculo, kodwa njengamaKristu sihlala sisikhumbula isiluleko sikaPawulos esithi: “Enoba niyatya okanye niyasela okanye nenza nantoni na eyenye, zonke izinto zenzeleni uzuko lukaThixo.”—1 Korinte 10:31.

Umculo Nokuzinikela

Eyona nto yayithandwa kakhulu nguSusie yayingumculo. Uyachaza: “Ndaqala ukudlala ipiyano xa ndandineminyaka emi-6, ivayolin xa ndandineminyaka eli-10, yaye ekugqibeleni ndadlala uhadi xa ndandineminyaka eli-12.” Kamva uSusie waya kwiRoyal College of Music eLondon, eNgilani, ukuze afunde ngohadi. Wafunda iminyaka emine nomdlali wohadi odumileyo waseSpeyin nonyaka omnye kwiSikolo somculo saseParis, wafumana isidanga esiphakamileyo emculweni neediploma ngokudlala uhadi nokufundisa ipiyano.

USusie wanxulumana nebandla lamaNgqina kaYehova eLondon. Apho wafumana umdla nothando lokwenene phakathi kwamanye amaNgqina. Ngokuthe ngcembe, uthando lwakhe ngoYehova lwakhula yaye inzondelelo awayenayo ngenkonzo yakhe yamshukumisela ukuba afune iindlela zokumkhonza. Oku kwakhokelela ekubeni azahlulele aze abhaptizwe. USusie uthi: “Ukuba yimvumi kukuphila ubomi bokuzinikela, ngoko ukuzinikela kwakungeyonto ingaqhelekanga kum.” Ixesha lokuya kucula kwiikonsathi lancipha njengoko wayebandakanyeka kubulungiseleli bamaKristu bokushumayela iindaba ezilungileyo zoBukumkani bukaThixo ethobela umyalelo kaYesu.—Mateyu 24:14; Marko 13:10.

Ngoku njengoko echitha ixesha elilinganiselweyo emculweni, uvakalelwa njani? Uyavuma esithi: “Maxa wambi kuyandikhathaza ukungabi naxesha elingakumbi lokuqhelisela, kodwa ndisazidlala izixhobo zam ndize ndinandiphe umculo. Umculo sisipho esivela kuYehova. Ndiwunandipha ngakumbi ngoku njengoko ndiye ndabeka inkonzo yakhe kwindawo yokuqala ebomini bam.”—Mateyu 6:33.

Umculo Odumisa UThixo

UAlbert noSusie kunye namanye amaNgqina kaYehova aphantse abe zizigidi ezithandathu ayamdumisa rhoqo uYehova uThixo ngomculo. Kwiintlanganiso zamaKristu eziqhutyelwa kwiiHolo zoBukumkani kumazwe angama-234, aqalisa aze aphethe iintlanganiso zawo, xa kunokwenzeka, ngokuvumela uYehova iingoma. Enoba kusetyenziswa yiphi inowuthi, uncuthu lweengoma ludlulisela amazwi asekelwe eZibhalweni adumisa uYehova uThixo.

Bonke abakhoyo bavuma ngokuvakalayo nangokufudumeleyo besithi uYehova nguThixo okhathalayo (Ingoma 44). Bavuma ingoma yokudumisa uYehova (Ingoma 190). Iingoma zabo zibonisa uvuyo neembopheleleko zobuzalwana bobuKristu, ubomi bobuKristu neempawu zobuKristu. Enye into eyongezelela kolo yolo ziintlobo ezahlukahlukeneyo ezasetyenziswa ngamaNgqina xa ayeqamba ezi ngoma eAsia, eOstreliya, eYurophu nakuMntla noMzantsi Merika.b

“Mvumeleni ingoma entsha uYehova. Mvumeleni uYehova, nonke nina bantu basemhlabeni. Mvumeleni uYehova, nilibonge igama lakhe,” lawo ngamazwi okuqala omhobe ozukileyo wasebukhosini owabhalwa ngomhla womdumisi. “Imihla ngemihla xelani iindaba ezilungileyo zosindiso lwakhe. Vakalisani uzuko lwakhe phakathi kweentlanga, phakathi kwezizwana zonke imisebenzi yakhe emangalisayo.” (INdumiso 96:1-3) Oku koko kwenziwa ngamaNgqina kaYehova kwindawo ohlala kuyo, yaye ayakumema ukuba uwathelele ekuvumeni le ndumiso. Wamkelekile kwiiHolo zawo zoBukumkani, apho unokufunda khona indlela yokudumisa uYehova ngomculo omkholisayo.

[Imibhalo esemazantsi]

[Umfanekiso okwiphepha 28]

Ukuvumela UYehova iindumso