IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w09 12/1 iphe. 26-30
  • UKumkani UDavide Nomculo

No video available for this selection.

Sorry, there was an error loading the video.

  • UKumkani UDavide Nomculo
  • IMboniselo Evakalisa UBukumkani BukaYehova—2009
  • Imixholwana
  • Amanqaku Afanayo
  • Indima Yomculo KuSirayeli Wamandulo
  • Imvumi Ebalaseleyo
  • UDavide Wachukunyiswa Ngumculo
  • Ukucula Etempileni
  • Umculo Nonqulo LukaYehova
  • Ngaba Ubusazi?
    IMboniselo Evakalisa UBukumkani BukaYehova (Efundwayo)—2024
  • Umculo Okholisa UThixo
    IMboniselo Evakalisa UBukumkani BukaYehova—2000
  • Umculo—Isipho SikaThixo Kubantu
    Vukani!—2008
  • Culela UYehova!
    IMboniselo Evakalisa UBukumkani BukaYehova—2010
Khangela Okunye
IMboniselo Evakalisa UBukumkani BukaYehova—2009
w09 12/1 iphe. 26-30

UKumkani UDavide Nomculo

UKUBA kukho umntu okwenza ucinge ngomculo owawudlalwa ngamaxesha okubhalwa kweBhayibhile, nguKumkani uDavide, indoda abalaseleyo eyayiphila malunga neminyaka engama-3 000 eyadlulayo. Eneneni, into eninzi esiyaziyo ngomculo welo xesha sifunda ngayo kwizahluko zeBhayibhile ezithetha ngobomi bukaDavide—ukususela ngexesha awayengumalusi ngalo ukusa xa wayengukumkani nomlungelelanisi.

Ininzi into esinokuyifunda kuDavide mayela nomculo wamaxesha okubhalwa kweBhayibhile. Ngokomzekelo, zazinjani izixhobo zomculo ezazisetyenziswa yaye ayenjani amaculo elo xesha? Wawunayiphi indima umculo kubomi bukaDavide, nakuhlanga lukaSirayeli?

Indima Yomculo KuSirayeli Wamandulo

Ukukhumbula amazwi engoma ethile kwenza kuthi qatha engqondweni nesingqi sayo. IBhayibhile inamazwi eengoma ezininzi, ngelishwa asiyazi indlela ezaziculwa ngayo. Umele ukuba wawumnandi gqitha loo mculo. Imibongo ekwincwadi yeeNdumiso ekumgangatho ophezulu ibonisa ukuba indlela ezaziculwa ngayo imele ukuba yayikumgangatho ophezulu nayo.

IBhayibhile ayizichazi iinkcukacha zezixhobo ezazisetyenziswa. (Funda ibhokisi ethi “Izixhobo Zomculo Zamaxesha Okubhalwa KweBhayibhile.”) Alwaziwa nohlobo lohadi olwalusetyenziswa nguDavide. Kodwa ke kuyacaca ukuba amaSirayeli ayila izixhobo zomculo eziliqela, njengohadi olwenziwe ngomthi nolunqabileyo.—2 Kronike 9:11; Amosi 6:5.

Noko ke, kukho nto ithile esiqinisekileyo ngayo. Umculo wawudlala indima ebalulekileyo kumaHebhere, ngokukodwa xa kunqulwa uThixo. Kwakudlalwa umculo xa kumiselwa ukumkani, xa kunqulwa naxa kusiliwa iimfazwe. Wawudlalwa nakumabhotwe asebukhosini, kumatheko emitshato nakwimbutho zentsapho yaye wawusenza kube mnandi xa kubhiyozelwa ukuvunwa kweediliya nengqolowa. Ngelishwa, umculo wawusetyenziswa nakwiindawo ezingafanelekanga. Xa kukho umntu obhubhileyo, umculo wawuthuthuzela abantu abasentlungwini.

KwaSirayeli, umculo wawusetyenziselwa nezinye iinjongo. Wawuyenza ibe namandla ingqondo uze ubenze abaprofeti bacacelwe zizinto zikaThixo. Kwakudlalwa isixhobo somculo xa uElisha wafumana ulwalathiso oluvela kuYehova. (2 Kumkani 3:15) Kwakhona umculo wawusetyenziswa ukuchaza iziganeko ezikhethekileyo. Ukuthwasa kwenyanga entsha nemithendeleko yayisaziswa ngokuvuthelwa kwamaxilongo amabini esilivere. Ngomhla weNtlokoma, isandi sesigodlo sasivakalisa inkululeko kumakhoboka nokubuyela kwabantu kwimihlaba nakwimizi yabo. Hayi indlela abamele ukuba babevuya ngayo abantu abangamahlwempu xa besiva isaziso sokuba abantu bakhululekile okanye bangabuyiselwa izinto zabo!—Levitikus 25:9; Numeri 10:10.

Ngokuqinisekileyo amaSirayeli athile amele ukuba ayeziimvumi ezibalaseleyo. Ngokutsho komnye umfanekiso waseAsiriya, uKumkani uSenakheribhe wacela iimvumi ezingamadoda namabhinqa kuKumkani uHezekiya. Kubonakala ukuba aye ziimvumi eziphum’ izandla. Kodwa ke, uDavide wayeyeyona mvumi ivunyiweyo.

Imvumi Ebalaseleyo

Into eyayimenza abalasele uDavide kukuba wayeyimvumi aphinde abe yimbongi. Kuthiwa iindumiso ezingaphezu kwesiqingatha zaqanjwa nguye. Xa wayeyinkwenkwe, wayengumalusi yaye wayesoloko ebona amadlelo amahle aseBhetelehem. Wayeqhele ukuphulaphula iigusha zibiza amatakane azo aze nawo asabele. Xa echukunyiswe bubuhle bamadlelo nezandi awayeziva, wayethabatha uhadi lwakhe aze adumise uThixo. Kumele ukuba kwakumnandi gqitha ukuva umculo oqanjwe nguDavide kwiNdumiso 23!

Xa wayeselula, uDavide wayeyincutshe yokudlala uhadi kangangokuba kwathethwa ngaye kukumkani uSawule, owamthabathayo ukuze amdlalele. Xa uSawule ekhathazekile, uDavide wayemdlalela umculo omnandi ngohadi owawumenza abe seluxolweni ukumkani. Umvandedwa kaSawule wawudamba.—1 Samuweli 16:16.

Maxa wambi umculo awayewuthanda uDavide nowawumenza onwabe wawubangela neengxaki. Ngenye imini, xa uDavide noSawule babevela kulwa namaFilisti, ukumkani weva umculo omnandi woloyiso. Abafazi babecula besithi: “USawule uxabele amawaka akhe, noDavide amashumi akhe amawaka.” Ngenxa yale ngoma uSawule waba nomsindo nomona kangangokuba waqhubeka emgxeleshile uDavide ukususela loo mini kuse phambili.”—1 Samuweli 18:7-9.

UDavide Wachukunyiswa Ngumculo

Umculo awaphefumlelwa ukuba awuqambe uDavide wawugqwese ngeendlela ezininzi. Ezinye zeengoma zakhe wayeziqamba ngezinto awayecamngca ngazo zize ezinye zithethe ngendalo. Ezi ndumiso zakhe zazahlukahlukene, ezinye zazithetha ngembali, ezinye ngovuyo lwexesha lokuvuna iidiliya nangexesha lokumiselwa kwebhotwe, inkumbulo nokuba nethemba, izicelo nezibongozo. (Funda iNdumiso 32; 23; 145; 8; 30; 38; 72; 51; 86 nemibhalo ephezulu.) Ekufeni kukaSawule nonyana wakhe uYonatan, uDavide waqamba ingoma yosizi, ebizwa ngokuba “sisaphetha,” eqala ngamazwi athi: “Ubuhle, Sirayeli, bubulewe kwiindawo zakho eziphakamileyo.” Kwakukubi. UDavide wayekwazi ukuvakalisa iimvakalelo ezahlukahlukeneyo, ngamazwi nangohadi.—2 Samuweli 1:17-19.

Ekubeni uDavide wayenobuntu obudlamkileyo wayewuthanda umculo obangela imihlali nonesingqi esinamdla. Xa wayezisa ityeya yomnqophiso eZiyon, wayeduda evuya ngenxa yeso siganeko. IBhayibhile ibonisa ukuba lo mculo wawuvusa imihlali. Ngaba unawo umfanekiso ngqondweni wesi siganeko? Umfazi wakhe uMikali wamtyhola ngokuziphatha ngendlela engenasidima. Kodwa ayizange imkhathaze loo nto uDavide. Wayemthanda uYehova yaye loo mculo owawumvuyisa wawumenza abe nemihlali phambi kukaThixo.—2 Samuweli 6:14, 16, 21.

UDavide wayengapheleli nje ekukwazini ukucula nokudlala izixhobo zomculo, wayekwazi nokwenza izixhobo zomculo ezitsha. (2 Kronike 7:6) Kuyabonakala ukuba uDavide wayebalasele kuba wayesenza izixhobo zomculo, eyimbongi, eqamba iingoma yaye ekwazi nokududa. Noko ke, uDavide wenza nezinye izinto, ezinkulu ngakumbi kunezi.

Ukucula Etempileni

Into akhunjulwa ngayo uDavide kukulungelelanisa kwakhe umculo wasendlwini kaYehova. Wamisela uAsafu, uHeman noYedutun (okwabizwa ngokuba nguEthani) ukuba bavelele iimvumi ezingama-4 000. UDavide wabafunela iingcali zomculo ezingama-288 zokubaqeqesha nokuvelela ezinye iimvumi. Ezi mvumi zingama-4 000 zazisibakho zonke etempileni kwimithendeleko emithathu emikhulu yaminyaka le. Unokuyithelekelela indlela eyayinkulu ngayo loo kwayala.—1 Kronike 23:5; 25:1, 6, 7.

Etempileni kwakucula amadoda kuphela. Ibinzana elithi “eziNtombini,” emantla eNdumiso 46, libonisa ilizwi eliphezulu okanye isixhobo esithile sokucula. Babecula ngazwinye njengokuba kubonisiwe kweyesi-2 Kronike 5:13: ‘Iimvumi zavakalisa njengamntu mnye.’ Mhlawumbi ezi ngoma yayizezo zikwiNdumiso 3 nezinye iindumiso zikaDavide, mhlawumbi namakhorasi anjengeNdumiso 42:5, 11 neNdumiso 43:5. Zazithandwa neengoma apho kwakuhlabela umntu omnye baze abanye balandele. Umzekelo wezo yiNdumiso 24, ekucacileyo ukuba yaqanjwa xa uDavide wayesizisa ityeya yomnqophiso eZiyon.—2 Samuweli 6:11-17.

YayingengobaLevi kuphela ababecula. Nabantu babecula xa beye emithendelekweni eYerusalem. Mhlambi kubhekiselwa kwezi ngoma xa kuthethwa “Ngengoma yeZinyuko.” (INdumiso 120 ukusa kweye-134) Ngokomzekelo kwiNdumiso 133, uDavide uncoma ubuzalwana obabunanditshwa ngamaSirayeli ngezo zihlandlo. Uvula ngala mazwi: “Khangela! Hayi indlela ekulunge nekuthandeka ngayo ukuba abazalwana bahlale ndawonye ngomanyano!” Khawucinge ngezixhobo zomculo ezazihamba namazwi ale ngoma!

Umculo Nonqulo LukaYehova

Icandelo elinye kwalishumi eBhayibhileni lenziwe zezo ngoma yaye incwadi yeeNdumiso ikhuthaza bonke abantu ukuba badumise. (INdumiso 150) Umculo umenza umntu azilibale izinto ezimkhathazayo, yaye unokuyithambisa intliziyo ebuhlungu. Kwakhona iBhayibhile ikhuthaza abantu abonwabileyo ukuba bacule iindumiso.—Yakobi 5:13.

Umculo unokumenza umntu abonise ukholo nothando lwakhe ngoThixo. Kubusuku obungaphambi kokubulawa kukaYesu, yena nabapostile bakhe baqukumbela isidlo sabo ngomculo. (Mateyu 26:30) Umele ukuba wayenelizwi elimnandi xa ecula uNyana kaDavide—owayeqhele ukuva umculo kwinkundla kaThixo ezulwini! Inokuba babecula iiHallel, iNdumiso 113 ukusa kweye-118. Ukuba kunjalo umele ukuba uYesu wayecula ngaphezu kwabapostile ekubeni bona babengazazi iziganeko ezaziza kwenzeka, esithi: “Ndiyathanda, ngenxa yokuba uYehova uyaliva Ilizwi lam, izibongozo zam. . . . Iintsontelo zokufa zandirhawula neemeko ezibandezelayo zeShiyol zandifumana. . . .‘Awu, Yehova, sindisa umphefumlo wam!’”—INdumiso 116:1-4.

Asingobantu abaqala umculo. IBhayibhile ibonisa ukuba kuyaculwa ezulwini, izidalwa zomoya zidlala uhadi lokomfuziselo ziculela uYehova iindumiso kwitrone yakhe. (ISityhilelo 5:9; 14:3; 15:2, 3) UYehova uThixo wabenza bakwazi ukucula abantu, wabenza bakwazi ukucula ngomlomo okanye ngezixhobo zomculo. Kumntu onokholo, umculo sisipho esivela kuThixo.—Yakobi 1:17.

[Amagama acatshulweyo akwiphepha 27]

“Ngomhla wokuba nemihlali kwenu nangamaxesha emisitho yethu . . . nimele nivuthele amaxilongo enu.”—NUMERI 10:10.

[Amagama acatshulweyo akwiphepha 28]

“UYehova ngumaLusi wam. Andiyi kuswela nto. Undilalisa kumadlelo anengca; undikhaphelela kwiindawo zokuphumla ezinamanzi amaninzi.”—INDUMISO 23:1, 2.

[Amagama acatshulweyo akwiphepha 29]

‘Kwakukho . . . amawaka amane awayedumisa uYehova ngezixhobo uDavide awathi ‘Ndizenzele ukudumisa’—1 KRONIKE 23:4, 5.

[Amagama acatshulweyo akwiphepha 29]

UDavide wayekwazi ukuvakalisa iimvakalelo ezahlukahlukeneyo, ngamazwi nangohadi

[Amagama acatshulweyo akwiphepha 30]

“Dumisani uYa! Mdumiseni ngentambula nangokungqungqa nijikeleza. Yonk’ into ephefumlayo—mayidumise uYa.”—INDUMISO 150:1, 4, 6.

[Ibhokisi/Imifanekiso ekwiphepha 28]

Izixhobo Zomculo Zamaxesha Okubhalwa KweBhayibhile

Izixhobo zomculo ezineentambo zaziquka isigingci, uhadi nesixhobo esineentambo ezilishumi. (INdumiso 92:3) Zazidlalwa ngeAlamoti neSheminiti, mhlawumbi la mabinzana abhekisela kwinowuthi ephezulu nesezantsi. (1 Kronike 15:20, 21) Ezinye zezixhobo zomculo yayilugwali, imbande, isigodlo namaxilongo ‘awayekhaliswa ngokuvakalayo.’ (2 Kronike 7:6; 1 Samuweli 10:5; INdumiso 150:3, 4) Xa kwakunikezelwa itempile, amaxilongo neemvumi ‘babevakalisa njengamntu mnye isandi esinye.’ (2 Kronike 5:12, 13) Kubonakala ngathi le ndinyana ithetha ukuba babevakala kakuhle yaye behambisana. Ezinye izixhobo zomculo zaziquka iintambula namakhenkcekhenkce, ezinye izixhobo nazo “zonke iintlobo zezixhobo zomthi wejunipha.” Kwakukho namacangci—amancinane “atsho ngoncuthu lwengoma” namakhulu abizwa ngokuba “ngamacangci akhenkcezayo.”—2 Samuweli 6:5; INdumiso 150:5.

[Imifanekiso]

Ngasentla: Detail from the Arch of Titus, eRoma, eItali, ibonisa amaxilongo awathinjwa etempileni eYerusalem ngowama-70 C.E. Iingqekembe zamalunga nonyaka wama-130 C.E., zibonisa izixhobo zomculo wamaYuda

[Inkcazelo]

Coins: © 2007 by David Hendin. All rights reserved.

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share