Ungancedwa

‘NAZI iipilisi zokulalisa ezingama-49 ekomityini. Ndizinkwamze bethu?’ yazibuza ngelitshoyo indoda enama-28 eminyaka ubudala yaseSwitzerland. Inkosikazi nabantwana bayo babeyishiye yodwa, ibe yayibhuqwa lolunzima lona uxinezeleko. Noko ke, emva kokunkwamza ezithile kuzo, yazixelela ukuba: ‘Hay’ khona. Andibaweli kufa!’ Ngethamsanqa yasinda ukuze isibalisele eli bali. Abasoloko bephumelela abantu abafuna ukuzibulala.

UAlex Crosby weU.S. Centers for Disease Control and Prevention wathi ngokuphathelele ukuzama ukuzibulala komlisela nomthinjana: “Ukuba unokukunqanda nangeeyure nje ezimbalwa, unako ukukuthintela. Xa ungenelela unokunceda abaninzi bangaphumeleli ukuzibulala. Ungasindisa ubomi babo.”

Ngoxa wayesebenza kwiLifesaving and Emergency Center kwiKholeji Yezonyango YaseJapan, uNjingalwazi Hisashi Kurosawa wanceda amakhulukhulu abantu abafuna ukuzibulala ukuba baphinde babe nomdla wokuphila. Ewe, xa kuye kwanikelwa uncedo kunokusindiswa ubomi. Luluphi ke uncedo olufunekayo?

Ukujamelana Neengxaki Ezisisizekabani

Njengoko kubonisiwe kwinqaku elingaphambili, abaphengululi bathi ama-90 ekhulwini abo bazibulalayo bebegula ngengqondo okanye bengamakhoboka eziyobisi. Ngenxa yoko, uEve K. Mościcki, weU.S. National Institute of Mental Health, uthi: “Eyona nto inokunceda ekupheliseni ukuzibulala kwabantu enoba bangakanani na kukunqanda izigulo zengqondo okanye ezibangelwa kukuba likhoboka leziyobisi.”

Okulusizi kukuba, abaninzi abanezi zigulo abathandi kufuna luncedo. Ngoba? UYoshitomo Takahashi weTokyo Metropolitan Institute of Psychiatry uthi: “Kaloku kucalulwana gqitha kwibutho labantu.” Wongezelela ngelithi loo nto iphumele ekubeni kwanabantu abangaziva mnandi ncam babe mathidala ukufuna unyango olukhawulezileyo.

Noko ke, abanye abakoyiki ukusizelwa. UHiroshi Ogawa, umsasazi kamabonwakude odumileyo, obenenkqubo yakhe eJapan kangangeminyaka eli-17, wavakalisa esidlangalaleni ukuba unoxinezeleko yaye wakha waphantsa ukuzibulala. UOgawa wathi: “Uxinezeleko luyafana nomkhuhlane wengqondo.” Nabani na unokulufumana, kodwa akho amathuba okuphila.

Xelela Umntu

UBéla Buda, oligosa lezempilo laseHungary elicatshulwe ngaphambilana uthi: “Xa umntu eyigcina kuye ingxaki yakhe, udla ngokuyigqala inkulu gqitha yaye ingenakucombululeka.” La mazwi abethelela ubulumko bomzekeliso wamandulo oseBhayibhileni: “Ozahlulayo uya kufuna ulangazelelo lwakhe lokuzingca; uya kuphambuka kubo bonke ubulumko bobuqili.”—IMizekeliso 18:1.

Khawuve nje loo mazwi obulumko. Musa ukuzivumela ukrekrethwe wedwa ziingxaki zakho. Yiya kumntu onokumthemba nonokuzityand’ igila kuye. Usenokuthi: ‘Akukho mntu ndinokuzityand’ igila kuye.’ Ngokutsho kwengcali yezigulo zengqondo uGqr. Naoki Sato, abaninzi bavakalelwa ngolo hlobo. USato wathi abaguli basenokungafuni ukuzityand’ igila kwabanye ngenxa yokuba bengafuni ukuchaza ubuthathaka babo.

Umntu unokuphulaphulwa ngubani? Kwiindawo ezininzi unokudwelisa amagama amaziko okuthintela ukuzibulala okanye indawo onokutsalela umnxeba kuyo ukuze ufumane uncedo okanye uye kugqirha onesandla esihle onceda abantu abaneengxaki ezingokweemvakalelo. Kodwa ezinye iingcali zazi omnye umthombo woncedo—unqulo. Lunokuba luncedo njani?

Bafumana Uncedo Oluyimfuneko

UMarin, owayengakwazi ukuzenzela nto eBulgaria, wayefuna ngamandla ukuzibulala. Ngenye imini engacingelanga wabona ulindixesha wonqulo, IMboniselo, eyimpapasho yamaNgqina kaYehova. Wasithanda isimemo esikweli phephancwadi sokutyelelwa ngamaNgqina kaYehova. UMarin uthi xa echaza umphumo woko: “Bandifundisa ukuba ubomi busisipho esivela kuBawo wethu osezulwini yaye asinalungelo lokuzenzakalisa okanye sizicim’ igama ngabom. Ngenxa yoko, ndawutshintsha umnqweno endandinawo wokufuna ukuzibulala ndaza ndaphinda ndabuthanda ubomi!” Kwakhona uMarin wafumana inkxaso enothando kwibandla lamaKristu. Nangona esengumlwelwe, uthi: “Ngoku ubomi bam buzaliswe luvuyo noxolo, yaye ndinezinto ezininzi ezimnandi endinokuzenza—ezinye ndide ndiphelelwe lixesha lokuzenza! Konke oku ndikwenzelwe nguYehova nangamaNgqina akhe.”

Laa mfana waseSwitzerland ukhankanywe ekuqaleni naye wancedwa ngamaNgqina kaYehova. Namhlanje akawuvali umlomo “ngenxa yobubele bentsapho yamaKristu” eyamamkelela ekhayeni layo. Wongezelela ngelithi: “Kamva, amalungu ebandla [lamaNgqina kaYehova] abolekisana ngam endimema ukuba ndiye kunandipha isidlo kunye nawo mihla le. Andizange ndincedwe nje kuphela kukuphathwa ngobubele kodwa ndancedwa nakukuba nomntu wokuthetha.”

Le ndoda yakhuthazwa kakhulu zizinto eyayizifunda eBhayibhileni, ingakumbi xa yafumanisa uthando uThixo wenyaniso, uYehova, analo ngoluntu. (Yohane 3:16) Eneneni, uYehova uThixo uyakuphulaphula xa ‘uphalaza intliziyo yakho’ phambi kwakhe. (INdumiso 62:8) “Amehlo akhe asingasinga emhlabeni wonke,” kungekhona ukuze afumane iimpazamo zabantu, kodwa ‘ukuze ababonise amandla abo bantliziyo ziphelele kuye.’ (2 Kronike 16:9) UYehova uyasiqinisekisa: “Musa ukoyika, kuba ndinawe. Musa ukubhekabheka, kuba ndinguThixo wakho. Ndiza kukuqinisa. Ndiza kukunceda ngokwenene. Ndiza kukubamba nkqi ngokwenene ngesandla sam sasekunene sobulungisa.”—Isaya 41:10.

Ngokuphathelele isithembiso sikaThixo sehlabathi elitsha, le ndoda yaseSwitzerland yathi: “Oku kuye kwanegalelo kakhulu ekuthobeni udandatheko endandinalo.” Eli themba, elichazwa ‘njengeankile yomphefumlo,’ liquka isithembiso sobomi obungunaphakade kwiParadesi esemhlabeni.—Hebhere 6:19; INdumiso 37:10, 11, 29.

Ubomi Bakho Bubalulekile Kwabanye

Liyinyaniso elokuba, usenokujamelana neemeko ezinokukwenza uvakalelwe kukuba ulilolo ngokupheleleyo yaye ukufa kwakho akunakukhathaza mntu. Noko ke, khumbula ukuba: Kukho umahluko omkhulu phakathi kokuziva ulilolo nokuba lilolo. Ngamaxesha okubhalwa kweBhayibhile, umprofeti uEliya waziva enomxhelo ophantsi. Wathi kuYehova: “Abaprofeti bakho bababulele ngekrele, kangangokuba ndim kuphela oseleyo.” Ewe, uEliya wayeziva elilolo ngokupheleleyo—yaye kwakufanele ukuba kube njalo. Uninzi lwabaprofeti awayesebenza nabo babebulewe. Wayelengalenga emlonyeni wengcwaba, yaye wayebalekela ubomi bakhe. Kodwa ngaba ngokwenene wayelilolo? Akunjalo. UYehova wamxelela ukuba kwakukho abantu abangama-7 000 ababezama ukukhonza uThixo wokwenyaniso ngaloo maxesha anzima kanye njengaye. (1 Kumkani 19:1-18) Noko ke, kuthekani ngawe? Ngaba kunokwenzeka ukuba ngokwenene akulololo njengokuba ucinga?

Bakho abantu abakukhathaleleyo. Usenokucinga ngabazali bakho, iqabane lakho, abantwana bakho nabahlobo bakho. Kodwa baninzi. Kwibandla lamaNgqina kaYehova, unokufumana amaKristu aqolileyo anomdla kuwe, anokukuphulaphula ngenyameko nanokuthandaza kunye nawe aze akuthandazele. (Yakobi 5:14, 15) Kwanokuba umntu ongafezekanga angakushiya, ukho Lowo ungasokuze akushiye. UKumkani uDavide wamandulo wathi: “Nokuba ubawo noma bangandishiya, ke yena uYehova uya kundithabatha.” (INdumiso 27:10) Ewe, uYehova ‘ukukhathalele.’ (1 Petros 5:7) Ungaze ulibale ukuba uxabisekile emehlweni kaYehova.

Ubomi busisipho esivela kuThixo. Kuyavunywa ukuba, maxa wambi ubomi busenokuba ngathi ngumthwalo kunokuba bube sisipho. Noko ke, ubuya kuvakalelwa njani ukuba ubuya kunika umntu isipho esixabisekileyo aze asilahle ngaphambi kokusisebenzisa? Thina bantu abangafezekanga asikaqalisi ngokwenene ukusisebenzisa isipho sobomi. Enyanisweni, iBhayibhile ithi ubomi esibuphilayo ngoku ayikabi ‘bubomi benene’ emehlweni kaThixo. (1 Timoti 6:19) Ewe, kwikamva elingekude ubomi bethu buya kuba nentsingiselo engakumbi. Njani?

IBhayibhile ithi: “[UThixo] uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.” (ISityhilelo 21:3, 4) Khawube nomfanekiso-ngqondweni wento obuya kuba yiyo ubomi bakho xa loo mazwi ezaliseka. Musa ukungxama. Zama ukuzakhela umfanekiso-ngqondweni opheleleyo. Loo mfanekiso-ngqondweni asikokuphuph’ emini. Njengoko ucamngca ngendlela uYehova aye waqhubana ngayo nabantu bakhe kwixa elidluleyo, intembelo yakho kuye iya kukhula yaye loo mfanekiso-ngqondweni unokuba yinto yokwenene ngakumbi kuwe.—INdumiso 136:1-26.

Kusenokuthabatha ithuba ngaphambi kokuba uphinde unqwenele ukuphila. Qhubeka uthandaza ‘kuThixo wentuthuzelo yonke, osithuthuzelayo kuyo yonke imbandezelo yethu.’ (2 Korinte 1:3, 4; Roma 12:12; 1 Tesalonika 5:17) UYehova uya kukunika amandla ayimfuneko. Uya kukufundisa ukuba ubomi sifanele sibuphile.—Isaya 40:29.

[Ibhokisi/Umfanekiso okwiphepha 27]

Unokumnceda Njani Umntu Obonakala Enokuzibulala?

UFANELE wenze ntoni xa umntu ezityand’ igila kuwe esithi ufuna ukuzibulala? IU.S. Centers for Disease Control and Prevention (CDC) inikela eli cebiso: “Phulaphula ngenyameko.” Mvumele achaze indlela avakalelwa ngayo. Noko ke, kwiimeko ezininzi, umntu ofuna ukuzibulala uba nqum angathethi. Buqonde ubunyaniso bentlungu okanye ukuphelelwa lithemba ajamelene nako. Ukuba ngobunono uchaza utshintsho oye waluphawula kwindlela enza ngayo izinto, usenokumshukumisela ukuba aqhabalake ezityand’ igila kuwe.

Ngoxa uphulaphule, bonisa uvelwano. ICDC ithi: “Kubalulekile ukugxininisa kwelokuba, lo mntu ubalulekile kuwe nakwabanye.” Mxelele ukuba wena nabanye niya kukhathazwa kukufa kwakhe. Mncede lo mntu abone ukuba uMdali wakhe umkhathalele.—1 Petros 5:7.

Kwakhona iingcali zincomela ukuba kususwe nantoni na lo mntu anokuzibulala ngayo—ngokukodwa umpu. Ukuba imeko ibonakala imaxongo, usenokufuna ukumkhuthaza lo mntu ukuba afumane unyango lwezamayeza. Kwiimeko ezigabadeleyo unokungabi nakwenza ngakumbi ngaphandle kokuba ubize uhlobo oluthile lonyango lwezamayeza ngokwakho.

[Ibhokisi ekwiphepha 28]

Ngaba Umntu Omthandayo Uye Wazibulala?

Xa umntu ezibulala, amalungu entsapho nezalamane ezisondeleyo zixakaniseka ngokwenene. Uninzi luzibeka ityala ngesi sihelegu. Ludla ngokuthi: ‘Ukuba nje bendikhe ndazipha ithuba kunye naye ngoluya suku,’ ‘Ukuba nje bendikhe ndazibamba ngokuya,’ ‘Ukuba nje bendikwazile ukumnceda.’ Eyona nto bazam’ ukuyitsho kukuba, ‘Ukuba bendenze oku nokuya, umntu endimthandayo ngesaphila.’ Noko ke, ngaba kusengqiqweni ukuzibek’ ityala ngokuzibulala komnye umntu?

Khumbula ukuba, kulula gqitha ukuqonda iimvakalelo zomntu ofuna ukuzibulala emva kokuba sehlile isihelegu. Akulula ukuziqonda esaphila. IBhayibhile ithi: “Intliziyo iyabuqonda ubukrakra bomphefumlo kabani, yaye ngemihlali yayo akakho owasemzini oya kuzibandakanya.” (IMizekeliso 14:10) Maxa wambi akunakwenzeka ukuqonda oko kucingwa ngomnye umntu okanye indlela avakalelwa ngayo. Abanye abantu abatyekele ekuzibulaleni abakwazi nje ukuthetha nabanye ngendlela abavakalelwa ngayo, kwanakumalungu asondeleyo entsapho.

Incwadi ethi Giving Sorrow Words ithi ngemiqondiso ebonisa ukuba umntu usenokuzibulala: “Enyanisweni akusoloko kulula ukuziqonda ezi mpawu.” Kwale ncwadi inye yongezelela ngelithi ukuba uye waphawula ezinye iimpawu, loo nto iyodwa ayisosiqinisekiso sokuba ngewumnqandile angazibulali. Kunokuzixhoxh’ igila, unokuthuthuzelwa ngala mazwi kaKumkani uSolomon osisilumko: “Abaphilayo bayazi ukuba baya kufa; kodwa abafileyo, abazi nto konke konke.” (INtshumayeli 9:5) Lo mntu umthandayo akangcungcuthekiswa kwisihogo somlilo. Intlungu yengqondo neyeemvakalelo emkhokelele ekuzibulaleni iphelile. Akabandezeleki; uphumle.

Ngoku kusenokuba lithuba elihle lokunikela ingqalelo kwimpilo-ntle yabasaphilayo, kuquka eyakho. USolomon uqhubeka ngelithi: “Konke esikufumanayo ukuba sikwenze isandla sakho kwenze ngamandla akho onke” ngoxa usaphila. (INtshumayeli 9:10) Qiniseka ukuba amathemba obomi bekamva abo baye bazibulala asezandleni zikaYehova, “uYise onenceba noThixo wentuthuzelo yonke.”—2 Korinte 1:3.a

[Umbhalo osemazantsi]

[Ibhokisi ekwiphepha 29]

‘Ngaba UThixo Uya Kundixolela Ngenxa Yale Ndlela Ndivakalelwa Ngayo?’

Ukunxulumana namaNgqina kaYehova kuye kwanceda abaninzi ukuba boyise iingcinga zokufuna ukuzibulala. Kodwa, akakho umntu namhlanje okhuselekileyo kwiziganeko ezixinezelayo zobomi okanye udandatheko. AmaKristu aye acinga ngokuzicim’ igama adla ngokulwisana nokuba neemvakalelo ezibuhlungu zokuzisola. Oko kuzisola kongezelela kumthwalo anawo. Kunokuhlangatyezwana njani neemvakalelo ezinjalo?

Kubalulekile ukuqonda ukuba amanye amadoda namabhinqa awayethembekile ngamaxesha okubhalwa kweBhayibhile akha aba neemvakalelo ezingentle ngobomi. URebheka, umfazi kasolusapho uIsake, wakha waxinezelwa yingxaki yentsapho kangangokuba wathi: “Ndiyabenyanya ubomi bam.” (Genesis 27:46) UYobhi, owaphulukana nabantwana bakhe, impilo yakhe, ubutyebi bakhe, nesigxina sakhe ebuthweni, wathi: “Ngokuqinisekileyo umphefumlo wam uziva uzothekile bubomi bam.” (Yobhi 10:1) UMoses wakha wadanduluka wathi kuThixo: “Nceda usele undibulala ndife fi.” (Numeri 11:15) UEliya, umprofeti kaThixo, wakha wathi: “Kwanele! Owu Yehova, wuthabathe umphefumlo wam.” (1 Kumkani 19:4) Nomprofeti uYona wathi ngokuphindaphindiweyo: “Kulunge ngakumbi ukuba ndife kunokuba ndiphile.”—Yona 4:8.

Ngaba uYehova wabagweba aba ngokuvakalelwa ngendlela ababevakalelwa ngayo? Akunjalo. Wada wawalondoloza eBhayibhileni amazwi abo. Noko ke, kubalulekile ukuphawula ukuba, akukho namnye kwabo bathembekileyo owavumela iimvakalelo zabo ukuba zibaqhubele ekuzibulaleni. UYehova wayebaxabisa; wayefuna baphile. Inyaniso ikukuba, uThixo uxhalabile nangobomi babangendawo. Uyababongoza ukuba batshintshe iindlela zabo baze ‘okunene bahlale bephila.’ (Hezekile 33:11) Hayi indlela akufuna ngakumbi ngayo ukuba abo bakuxhalabeleyo ukufumana inkoliseko yakhe baqhubeke bephila!

UThixo uye walungiselela idini lentlawulelo loNyana wakhe, ibandla lamaKristu, iBhayibhile nelungelo lomthandazo. Eli jelo lonxibelelwano noThixo—umthandazo—alizange linqamke. UThixo unokubaphulaphula yaye uya kubaphulaphula bonke abo basondela kuye ngentliziyo ethobekileyo nenyanisekileyo. “Ngoko ke, masisondele sinenkululeko yokuthetha kwitrone yobubele obungasifanelanga, ukuze sizuze inceba, sifumane ububele obungasifanelanga noncedo ngexesha elifanelekileyo.”—Hebhere 4:16.

[Umfanekiso okwiphepha 25]

Ubomi bakho buyaxatyiswa ngabanye abantu

[Imifanekiso ekwiphepha 26]

Xelela umntu