Abenzi BeLizwi LikaThixo Bafumana Ulonwabo
“Le ndibano yenye yamalungiselelo kaYehova okusilungiselela umsebenzi ongakumbi woBukumkani,” satsho esinye sezithethi ekuqaleni kweNdibano YeSithili ‘Yabenzi BeLizwi LikaThixo’ yamaNgqina kaYehova. Sahlabela mgama sisithi: “Siye salindela ukuba sifundiswe ngobomi bentsapho eyonwabileyo, sikhuthazwe ukuba sihlale sisondelelene nentlangano kaYehova, sishukunyiselwe ukuhlala sinenzondelelo ngenkonzo yoBukumkani, nokukhunjuzwa ngemfuneko yokuhlala siphaphile.”
UKUSUSELA ngasekupheleni kukaMeyi 2000, izigidi zabenzi belizwi likaThixo nabahlobo babo baye bathontelana kwiindawo ezingamawaka emhlabeni ukuze bafumane imfundiso yeBhayibhile ebalulekileyo. Bafunde ntoni ebudeni beentsuku ezintathu zale ndibano?
Usuku Lokuqala—Ungakulibali Ukwenza Kwakhe Konke
Kwintetho yokuvula, usihlalo wacela abaphulaphuli ukuba bacinge ngeentsikelelo ezibangelwa lunqulo lukaYehova olumanyeneyo kwiindibano. Bonke ababelapho baqinisekiswa ukuba ukholo lwabo luya kwanda yaye ulwalamano lwabo noYehova luya komelezwa.
‘UThixo onoyolo’ uyakwazi oko sikufunayo ukuze sonwabe njengabantu ngabanye. (1 Timoti 1:11) Ngoko ke, intetho ethi “Ukwenza Ukuthanda KukaThixo Kubangela Uyolo” yagxininisa ukuba iLizwi likaYehova, iBhayibhile, lichaza eyona ndlela ebalaseleyo yokuphila. (Yohane 13:17) Udliwano-ndlebe olwenziwa namaNgqina kaYehova angamagqala lwabonisa indlela ukwenza ukuthanda kukaThixo phantsi kweemeko ezahlukahlukeneyo okubangela injongo ngayo ebomini bethu. Intetho elandelayo ethi, “Memelelani Luvuyo Ngenxa Yokulunga KukaYehova,” yagxininisa ukuba, ‘njengabantu abaxelisa uThixo,’ amaKristu afuna ukuvelisa “konke ukulunga” ebomini bawo. (Efese 5:1, 9) Enye indlela ebalaseleyo yokwenza oku kukushumayela iindaba ezilungileyo nokwenza abafundi.—INdumiso 145:7.
Ingxubusho ethi “Qhubekani Niqinile Ngokungathi Niyambona Lowo Ungabonakaliyo” yabonisa indlela ukholo olomeleleyo olunokusinceda ngayo ukuze ‘sibone’ uThixo ongabonakaliyo. Isithethi sabonisa indlela abantu bokomoya abaziqonda ngayo iimpawu zikaThixo, kuquka namandla akhe okwazi noko sikucingayo. (IMizekeliso 5:21) Abo babekudliwano-ndlebe bachaza amanyathelo abaye bawathabatha ukuze bakhe ukholo olomeleleyo nokuze babeke izilangazelelo zokomoya kwindawo yokuqala ebomini babo.
Ucwangciso lwakusasa lwaphethwa ngentetho engumxholo ethi, “Dumisani UYehova—UMenzi Wezinto Ezimangalisayo.” Yanceda abaphulaphuli baqonda ukuba okukhona sifunda ngoYehova, kokukhona sinezizathu ezininzi zokumdumisa njengoMenzi wezinto ezimangalisayo. Isithethi sathi: “Njengoko sicamngca ngemisebenzi yendalo kaThixo emangalisayo kunye nazo zonke zinto ezimangalisayo asenzela zona ngoku, uxabiso lwethu olusuk’ entliziyweni lusishukumisela ukuba simdumise. Njengoko sicamngca ngezinto ezimangalisayo azenzele abantu bakhe kumaxesha angaphambili, sifuna ukumdumisa. Yaye njengoko sicamngca ngezithembiso zezinto ezimangalisayo uYehova aseza kuzenza, kwakhona sikhangele iindlela zokubonakalisa uxabiso.”
Ucwangciso lwasemva kwemini lwaqala ngentetho ethi “Musa Ukuyeka Ukwenza Okuhle,” eyakhumbuza bonke abebekho ukuba iingcinezelo zeli hlabathi zingqina ukuba isiphelo sisondele. (2 Timoti 3:1) Noko ke, ngokunganikezeli, sinokuzingqina ukuba “asingabahlehla baye entshabalalweni, kodwa siluhlobo olunokholo olugcina umphefumlo uphila.”—Hebhere 10:39.
Sisiphi isiluleko seBhayibhile esiye sanikelwa ngokuphathelele ubomi bentsapho? Uluhlu lokuqala longcelele lweentetho kule ndibano—“Lithobele Ilizwi LikaThixo”—lwaqalisa ngenxalenye ethi “Xa Ukhetha Iqabane Lomtshato.” Ukukhetha iqabane lomtshato sesinye sezigqibo ezinzulu abantu abazenzayo. Ngenxa yoko, amaKristu afuna ukulinda ukuze atshate xa eqolile, yaye afanele atshate “kuphela eNkosini.” (1 Korinte 7:39) Inxalenye elandelayo yongcelele lweentetho yaxubusha ngomnqweno kaYehova wokuba zonke iintsapho zamaKristu ziphumelele njengabantu abomeleleyo ngokomoya, yaye yanikela iindlela ezisebenzisekayo okunokuphunyezwa ngazo oku. Inxalenye yokugqibela yakhumbuza abazali ukuba ukufundisa abantwana babo ukuba bathande uThixo kuqala ngokuba bona bazali bamthande.
Iingongoma ezavezwa kwintetho ethi “Walumkele Amarhe Nentlebendwane” zanceda bonke babona ukuba nangona kusenzeka izinto ezimangalisayo, sifanele senze ngobulumko, singaqhathwa, xa sisiva iindaba ezibangela umdla. Kulunge ngakumbi ukuba amaKristu athethe ngoko akwaziyo ukuba yinyaniso—iindaba ezilungileyo zoBukumkani. Abaninzi bayifumanisa ithuthuzela yaye ikhuthaza intetho eyalandelayo eyayisithi, “Indlela Yokuhlangabezana ‘Neliva Enyameni.’” Yabanceda babona ukuba nangona sisenokujamelana nezilingo ezingapheliyo, uYehova unokusipha amandla ngomoya wakhe oyingcwele, iLizwi lakhe nobuzalwana bethu bobuKristu. Kwafunyanwa ukhuthazo olungakumbi kumava obuqu kampostile uPawulos ngokuphathelele lo mba.—2 Korinte 12:7-10; Filipi 4:11, 13.
Usuku lokuqala lwaqukunjelwa ngentetho ethi “Ukuhambisana Kunye Nentlangano KaYehova.” Iinkalo ezintathu eye intlangano kaThixo yahambela phambili ngokukhethekileyo kuzo: (1) ukuqonda okwandayo kokukhanya kokomoya okuvela kuYehova, (2) ubulungiseleli uThixo asinike bona, yaye (3) uhlengahlengiso olusexesheni ngeenkqubo zentlangano. Emva koko isithethi siqinisekile, sathi: “Sinemihlali ngenxa yethemba elisengaphambili.” Sabuza: “Ngaba eso ayisiso isizathu sokugcina intembelo esasinayo ekuqaleni iqinile de kuse ekupheleni?” (Hebhere 3:14) Impendulo yayicacile. Emva koko kwakhululwa incwadana enemifanekiso ethi Unako Ukuba Ngumhlobo KaThixo! Iya kuba luncedo kakhulu ekufundiseni abantu abangafundanga okanye abangakwaziyo ukulesa ukuba bafunde ngoYehova.
Usuku Lwesibini—Qhubeka Uxela Imisebenzi KaThixo Emangalisayo
Emva kokuqwalasela itekisi yosuku, usuku lwesibini lwendibano lwaqhubeka ngongcelele lweentetho oluthi “Abalungiseleli Belizwi LikaThixo.” Inxalenye yokuqala yanikela ingqalelo kwimpumelelo ekhoyo yomsebenzi wethu wokushumayela owenziwa emhlabeni wonke. Noko ke, ukunyamezela kwethu kulo msebenzi kulucelomngeni ngenxa yabantu abaninzi abasichasayo isigidimi sethu soBukumkani. Iqela labo bebengabavakalisi ixesha elide liye lachaza indlela eliye lahlala linovuyo ngayo kubulungiseleli ngokomeleza ingqondo nentliziyo ukuze lihlangabezane nokungabikho komdla okanye inkcaso. Inxalenye yesibini yakhumbuza ababeze kule ndibano ukuba amaNgqina kaYehova enza unako-nako ukufikelela bonke abantu kuyo yonke indawo, ngokucwangcisiweyo nangokungacwangciswanga. Yaye inxalenye yokugqibela yachaza iindlela ezininzi onke amaKristu anokwandisa ngazo ubulungiseleli bawo bobuqu. Isithethi sagxininisa ukuba ukuze senze oku, uBukumkani bukaThixo bufanele bube yeyona nto iphambili kuthi, kwanokuba ukwenjenjalo kuquka iingxaki nokuzincama.—Mateyu 6:19-21.
Ekubeni siphila kwihlabathi elingathandi Thixo nelizaliswe kukuthanda ngokugqithiseleyo izinto eziphathekayo, intetho ethi “Hlakulela Uzinikelo Lobuthixo Nokwaneliseka” yafika ngexesha. Sisekele amagqabaza aso kweyoku-1 kuTimoti 6:6-10, 18, 19, isithethi sabonisa indlela uzinikelo lobuthixo oluwanceda ngayo amaKristu ukuba aphephe ukuthanda imali, nto leyo enokuwalahlekisa aze abe sentlungwini. Sagxininisa ukuba enoba injani imeko yethu yoqoqosho, ulonwabo luxhomekeke kulwalamano lwethu noYehova nobumoya bethu. Abaninzi bachukumiseka kakhulu ziingongoma zentetho ethi “Ukungamenzi UThixo Abe Neentloni.” Yabethelelwa into yokuba uYehova akawalibali amaNgqina akhe athembekileyo. Umzekelo ongenakuthelekiswa namntu kaYesu Kristu—lowo “ukwanguye izolo nanamhlanje, nangonaphakade”—uya kunceda abaninzi baqhubeke bebaleka ugqatso lobomi ngokunyamezela.—Hebhere 13:8.
Ucwangciso lwakusasa lwaqukunjelwa ngentetho yobhaptizo—esoloko iyimbalasane kwiindibano ezinkulu zamaNgqina kaYehova. Hayi indlela ekumnandi ngayo ukubona abasandul’ ukuzahlulela belandela emanyathelweni kaYesu ngokubhaptizwa emanzini! (Mateyu 3:13-17) Bonke abathabatha eli nyathelo sele befeze okuninzi njengabenzi belizwi likaThixo. Ngapha koko, xa bebhaptizwa baba ngabalungiseleli abamiselweyo beendaba ezilungileyo, befumana uvuyo ngenxa yokwazi ukuba banesabelo ekungcwaliseni igama likaYehova.—IMizekeliso 27:11.
Kwanikelwa isiluleko esingqalileyo kwintetho ethi “Kufuneka Ukuqola ‘Ukuze Kwahlulwe Okubi Nokuhle.’” Imilinganiselo yehlabathi yokuhle nokubi iphantsi kakhulu. Ngoko ke sifanele sithembele kwimilinganiselo kaYehova. (Roma 12:2) Bonke bakhuthazwa ukuba bazabalazele ukufumana ukuqonda okuchanileyo ngeendlela zikaThixo baze babe ngabantu abaqolileyo. Emva koko, ngokukuqhelisela oko, amandla ethu okuqonda aya kuqeqeshelwa “ukwahlula okulungileyo nokubi.”—Hebhere 5:11-14.
Emva koko kwalandela ungcelele lweentetho oluthi “Zibhokoxe Ukuze Uhlale Uphilile Ngokomoya.” AmaKristu okwenyaniso ayakuqonda ukubaluleka kokukhula nokulondoloza ubumoya. Oku kubandakanya ukuzibhokoxa—ukufunda, ukufundisisa nokucamngca. (Mateyu 7:13, 14; Luka 13:24) Abantu bokomoya ‘bayathandaza bekhunga.’ (Efese 6:18) Siyaqonda ukuba imithandazo yethu ityhila ubunzulu bokholo nozinikelo lwethu, ubumoya bethu noko sikugqala ‘njengento ebaluleke ngakumbi.’ (Filipi 1:10) Kwabethelelwa nokubaluleka kokuba nolwalamano olufudumeleyo nolunothando noYehova njengolo luphakathi komntwana othobelayo noyise onobubele. Asinalunqulo nje kuphela—nangona ilolwenyaniso—kodwa sifuna ukwakha ukholo olomeleleyo, ‘njengababona uThixo.’—Hebhere 11:6, 27.
Umbandela wokwenza inkqubela ngokomoya waxutyushwa ngokubhekele phaya kwintetho ethi “Ukuhambela Kwenu Phambili Kwenzeni Kubonakale.” Kwaqwalaselwa iinkalo ezintathu zokuhambela phambili okunjalo: (1) ukwandisa ulwazi, ukuqonda nobulumko, (2) ukuvelisa isiqhamo somoya kaThixo, yaye (3) ukuzalisekisa iimbopheleleko zethu njengamalungu entsapho.
Ekupheleni kwentetho yokuqukumbela kolo suku ethi, “Ukuhamba Ekukhanyeni Okuqhubekayo Kwelizwi LikaThixo,” ababeze kwindibano bavuya ukufumana incwadi entsha ethi, Isiprofeto SikaIsaya—Ukhanyiselo Lwalo Lonke Uluntu I. Lo ngumqulu wokuqala kwemibini ethetha ngencwadi yeBhayibhile kaIsaya, isahluko nesahluko. “Incwadi kaIsaya inesigidimi nakuthi namhlanje,” satsho isithethi. Saqhubeka sisithi: “Ewe, iziprofeto zayo ezininzi zazaliseka emva phayaa ngemihla kaIsaya. . . . Noko ke, uninzi lweziprofeto zikaIsaya zizaliseka namhlanje kwaye ezinye ziya kuzaliseka kwihlabathi elitsha likaThixo elithenjisiweyo.”
Usuku Lwesithathu—Yibani Ngabenzi Belizwi LikaYehova
Usuku lokugqibela lwendibano laqala ngengxubusho yetekisi yosuku. Kwandula ke kwalandela ungcelele lweentetho oluthi “Isiprofeto SikaZefaniya Esinentsingiselo Kwabo Benza Ukuthanda KukaThixo.” Iintetho ezintathu zolu ngcelele zabonisa ukuba, njengoko wenjenjalo ngemihla kaYuda onxaxhayo, uYehova uzisa imbandezelo kwabo bakwalayo ukuthobela isilumkiso sakhe. Ngenxa yokuba besona uThixo, baya kuhamba njengamadoda aziimfama angenaluncedo, bengakwazi ukufumana usindiso. Noko ke, amaKristu okwenyaniso ngokuthembeka aqhubeka efuna uYehova, yaye aya kusitheliswa ngemini yomsindo kaThixo. Ngaphezu koko, anandipha iintsikelelo ezininzi kwanangoku. Anelungelo elisikelelekileyo lokuthetha “ulwimi olusulungekileyo” lwenyaniso yeBhayibhile. (Zefaniya 3:9) Isithethi sathi: “Ukuthetha ulwimi olusulungekileyo kubandakanya kungekuphela nje ukukholelwa kwinyaniso size siyifundise abanye kodwa nokuvumelana kwendlel’ esiziphatha ngayo nemithetho nemigaqo kaThixo.”
Ababesendibanweni babelindele ngomdla umdlalo othi “Imizekelo Esisilumkiso Kumhla Wethu.” Lo mdlalo, apho abadlali bebenxibe impahla yamandulo, uye wabonisa amawaka amaSirayeli awafela emdeni weLizwe Ledinga ngenxa yokuba amlibala uYehova aze alukuhlelwa kuhenyuzo nakunqulo lobuxoki ngamabhinqa angabahedeni. Omnye wabalinganiswa abaphambili—uYamin—ekuqaleni wayengakwazi ukukhetha phakathi kwamabhinqa akwaMowabhi nozinikelo lwakhe kuYehova. Ukuqiqa okuphosakeleyo neengcinga ezikhohlisayo zikaZimri ongathobeli Thixo kwabonakala, njengoko kwakunjalo nangokholo nozinikelo lukaFinehasi. Baboniswa kakuhle ubungozi bokuzibandakanya nabo bangamthandiyo uYehova.
Lo mdlalo waba yingabula-zigcawu yentetho eyalandelayo ethi, “Musani Ukuba Ngabevayo Baze Balibale.” Eyoku-1 yabaseKorinte 10:1-10 yabonisa ukuba uYehova uyakuvavanya ukuthobela kwethu ukuze abone enoba siyafaneleka kusini na ukulizuza ilifa ihlabathi elitsha. Kwabanye, umnqweno wenyama uyaluminxa usukelo lokomoya kwanangoku, nakuba sele sisondele kwinkqubo entsha. Bonke bakhuthazwa ukuba bangalahlekelwa lilungelo ‘lokungena ekuphumleni kukaYehova.’—Hebhere 4:1.
Intetho yesidlangalala yayisithi “Isizathu Sokuba Sinikel’ Ingqalelo Kwimisebenzi Emangalisayo KaThixo.” “Imisebenzi emangalisayo” kaYehova ibonisa ubulumko anabo negunya analo kwindalo esingqongileyo. (Yobhi 37:14) Imibuzo eliqela eyabuzwa nguYehova yayanele ukuze uYobhi abone amandla oMdali ongusomandla. UYehova uya kwenza “imisebenzi emangalisayo” kwikamva esenzela abakhonzi bakhe abathembekileyo. Isithethi saqukumbela sisithi: “Sinezizathu ezininzi zokunikela ingqalelo kwimisebenzi emangalisayo kaYehova—oko akwenzileyo kwixesha elidluleyo, oko kusingqongileyo akwenzayo kwindalo yakhe namhlanje noko athembisa ukukwenza kungekudala.”
Emva koshwankathelo lwenqaku elifundisiswayo leMboniselo laloo veki, kwanikelwa intetho yokuqukumbela indibano. Yayinomxholo othi “Lixabise Ngokwenene Ilungelo Onalo Lokuba Ngumenzi Welizwi LikaThixo,” le ntetho ichukumis’ intliziyo yagxininisa ukuba kulilungelo ukuba ngabenzi belizwi likaThixo. (Yakobi 1:22) Abaphulaphuli bakhunjuzwa ukuba ilungelo lethu njengabenzi belizwi likaThixo likhethekile, yaye okukhona sicinga ngalo, kokukhona silixabisa kakhulu. Bonke abebekho bakhuthazwa ukuba babonise ukuba bangenelwe njani kule ndibano yesithili ngokuphathelele umnqweno wabo wokuba ngabenzi belizwi likaThixo ngokuzeleyo. Leyo kuphela kwendlela yokuzuza uvuyo olukhulu.
[Ibhokisi/Umfanekiso okwiphepha 25]
Unako Ukuba Ngumhlobo KaThixo!
Emva kwemini ngoLwesihlanu kwakhululwa incwadana enemifanekiso entsha enomxholo othi Unako Ukuba Ngumhlobo KaThixo! Kukho imfuneko enkulu yemfundiso yeBhayibhile eyenziwe yalula kwiindawo ezininzi emhlabeni, yaye le ncwadana inemifanekiso iya kusetyenziswa ukuzalisekisa loo mfuneko. Iya kuba yintsikelelo enkulu kubantu abangafundanga okanye abangakwazi ukulesa.
[Ibhokisi/Imifanekiso ekwiphepha 26]
Isiprofeto SikaIsaya—Ukhanyiselo Lwalo Lonke Uluntu
Ababekho kule ndibano bavuya bakufumana uMqulu I wemiqulu emibini yencwadi ethi Isiprofeto SikaIsaya—Ukhanyiselo Lwalo Lonke Uluntu. Kule mpapasho, kuye kwagxininiswa kwimbaluleka yesiprofeto sikaIsaya kumhla wethu.