Ugqirha Wamehlo Uhlwayela Imbewu

Ngaba imigudu yogqirha wamehlo eLviv, eUkraine, inakuthanani nokusekwa kwebandla lamaNgqina kaYehova elithetha isiRashiya eHaifa, kwaSirayeli, elikude kangangeekhilomitha ezingama-2 000 nelikwilizwe elikude lee? Eli libali elibonisa ukubaluleka kwamazwi eBhayibhile akwiNtshumayeli 11:6: “Kusasa hlwayela imbewu yakho, yaye ungasiphumzi isandla sakho de kube ngokuhlwa; kuba akuyazi indawo oya kuphumelela kuyo.”

IBALI lethu liqala ngowe-1990 xa uElla, isazi semichiza esiselula onemvelaphi yobuYuda, wayehlala eLviv. UElla nentsapho yakowabo babelungiselela ukufudukela kwaSirayeli. Ngaphambi nje kokuba bahambe, uElla wayeza kuya kugqirha wamehlo owayengomnye wamaNgqina kaYehova. Ngelo xesha, umsebenzi wamaNgqina kaYehova wawuvaliwe eUkraine. Sekunjalo, ugqirha wamehlo wabelana noElla ngeenkolelo zakhe ezisekelwe eBhayibhileni. Wamothusa ngokuba athi uThixo unegama. Oko kwenza uElla afune ukwazi okungakumbi, yaye kwaqaliswa ingxubusho entle yeBhayibhile.

UElla wayinandipha le ngxubusho kangangokuba wafuna enye ingxubusho kwiveki elandelayo nenye emva koko. Umdla wakhe wawukhula, kodwa kwakukho ingxaki. Ixesha lokuba ahambe nentsapho yakowabo baye kwaSirayeli lalikufuphi. Kwakusekuninzi awayesafanele akufunde uElla! Ukuze alisebenzise kakuhle eli xesha liseleyo, wacela ukufundisisa iBhayibhile imihla ngemihla de ahambe. Nangona uElla engazange aqhubeke nesifundo sakhe ukufika kwakhe kwaSirayeli, imbewu yenyaniso yayendele entliziyweni yakhe. Ekupheleni konyaka, kwakhona wafundisisa iBhayibhile ngokunyaniseka.

Kwaqalisa imfazwe kwiPersian Gulf, yaye uSirayeli wahlaselwa yi-Iraq ngezikhali. Oku kwakusoloko kungundaba-mlonyeni. Ngenye imini evenkileni, uElla weva intsapho ethetha isiRashiya nayo esanda kufuduka incokola. Nangona wayesafundisisa iBhayibhile, uElla waya kule ntsapho waza wabelana nayo ngethemba leBhayibhile lehlabathi elinoxolo. Ngenxa yoko, umakhulu, uGalina; umama, uNatasha; unyana, uSasha (uAriel); nentombi, uIlana, bonke bathelela kwisifundo seBhayibhile sikaElla.

USasha waba lilungu lokuqala ukubhaptizwa kule ntsapho—phezu kwazo nje izilingo ezininzi. Nangona wayengumfundi, wagxothwa esikolweni kuba isazela sakhe sobuKristu sasingamvumeli ukubandakanyeka kuqeqesho lwasemkhosini, olwaluyinxalenye yezifundo zeso sikolo. (Isaya 2:2-4) Ityala likaSasha lasiwa kwiNkundla Ephakamileyo yakwaSirayeli eYerusalem, eyanika umyalelo wokuba uSasha abuyiselwe esikolweni ukuze akwazi ukugqiba izifundo zakhe. Eli tyala laziwa kulo lonke ilizwe. Ngenxa yoko, abaninzi abakwaSirayeli bazazi iinkolelo zamaNgqina kaYehova.a

Emva kokuphumelela kwakhe kwisikolo samabanga aphakamileyo, uSasha wangenela inkonzo yexesha elizeleyo yamaNgqina kaYehova. Namhlanje ukhonza njengovulindlela okhethekileyo nanjengomdala webandla. Udadewabo, uIlana, uye wamthelela kwinkonzo yexesha elizeleyo. Unina noninakhulu bobabini bangamaNgqina abhaptiziweyo. Imbewu eyahlwayelwa ngugqirha wamehlo yayisavelisa isiqhamo!

Kusenzeka oku nje, uElla wenza inkqubela ngokomoya yaye kungekudala wayeshumayela kwindlu ngendlu. Kwindlu yakhe yokuqala, uElla wadibana noFaina, owayesuka eUkraine. UFaina wayedandathekile. Kamva uElla wafumanisa ukuba ngaphambi nje kokuba ankqonkqoze endlwini kaFaina, eli bhinqa likhathazekileyo lalithandaza kuThixo lisithi: “Andikwazi ukuba ungubani na, kodwa ukuba uyandiva, ndincede.” Yena noElla baba nengxubusho ekhuthazayo. UFaina wabuza imibuzo emininzi yaye ngenyameko wacinga ngeempendulo awazinikwayo. Ekuhambeni kwexesha, weyiseka ukuba amaNgqina kaYehova afundisa inyaniso yeBhayibhile. Wahlengahlengisa izifundo zakhe zaseyunivesithi ukuze akwazi ukuchitha ixesha elingakumbi ebandleni nakumsebenzi wokushumayela. NgoMeyi 1994, uFaina wabhaptizwa. Wangenela inkonzo yobuvulindlela, ezixhasa ngomsebenzi wesingxungxo kwezekhompyutha.

NgoNovemba 1994, ngoxa wayekumsebenzi wokushumayela, ngesiquphe uElla waziva ebuthathaka. Waya esibhedlele apho wafumanisa ukuba wayenesilonda esophayo ethunjini. Ngengokuhlwa ihemoglobin yegazi lakhe yayehle yaya kwisi-7,2. Umdala okwibandla likaElla, usihlalo weKomiti Yokunxibelelana Nezibhedlele [Hospital Liaison Committee (HLC)], wanika oogqirha inkcazelo ngeendlela ezininzi zonyango ezingafuni ukusetyenziswa kwegazi.b Kwenziwa uqhaqho ngokuphumelelayo ngaphandle kwegazi, yaye uElla wachacha ngokupheleleyo.—IZenzo 15:28, 29.

Ugqirha onyanga izifo zamabhinqa kaElla, uKarl, umYuda ozalelwe eJamani, wachukumiseka kakhulu. Ngoko ke wakhumbula ukuba abazali bakhe, abasinda eKubulaweni Kwabantu Ngenkohlakalo, babewazi amaNgqina kaYehova kwiinkampu zoxinaniso. UKarl wabuza imibuzo emininzi. Nangona wayexakeke kakhulu kwezonyango, uKarl wazipha ixesha lesifundo seBhayibhile esithe rhoqo. Ngonyaka olandelayo, wayesiya kwiintlanganiso zamaKristu zeeveki ngeeveki.

Waba yintoni umphumo wembewu eyahlwayelwa ngugqirha wamehlo? Sele sikubonile okwenzeka kuSasha nentsapho yakowabo. UElla ungumlungiseleli onguvulindlela okhethekileyo. Intombi yakhe, uEina, usandula ukugqiba esikolweni, uqalise inkonzo yobuvulindlela. UFaina naye ukhonza njengovulindlela okhethekileyo. Ke yena uKarl, ugqirha onyanga izifo zamabhinqa kaElla, ngoku uliNgqina elibhaptiziweyo nesicaka solungiselelo, wabelana ngamandla aphilisayo enyaniso yeBhayibhile nabaguli kwakunye nabanye.

Iqela elincinane labantu basemzini elithetha isiRashiya elaqala njengenxalenye yeBandla lesiHebhere laseHaifa ngoku liye laba libandla lesiRashiya elinenzondelelo elinabavakalisi boBukumkani abangaphezu kwe-120. Inxalenye yolu lwando ibangelwa kukuba ugqirha wamehlo eLviv waxhakamfula ithuba lokuhlwayela imbewu!

[Imibhalo esemazantsi]

[Imaphu ekwiphepha 29]

(Ukuba ufuna inkcazelo ehlahlelwe kakuhle, yiya kwimpapasho)

UKRAINE

ISRAEL

[Inkcazelo]

Mountain High Maps® Copyright © 1997 Digital Wisdom, Inc.

[Imifanekiso ekwiphepha 30]

UElla nentombi yakhe, uEina

[Umfanekiso okwiphepha 31]

Iqela elichwayitileyo lamaNgqina athetha isiRashiya eHaifa. Ukusuka ekhohlo ukuya ekunene: USasha, uIlana, uNatasha, uGalina, uFaina, uElla, uEina noKarl