Londoloza Uvuyo Enkonzweni KaYehova
“Hlalani ninemihlali eNkosini. Ndiyaphinda ndithi, Yibani nemihlali!”—FILIPI 4:4.
1, 2. Omnye umzalwana nentsapho yakhe bakwazi njani ukulondoloza uvuyo lwabo noxa balahlekelwa kuko konke ababenako?
UJAMES, ongumKristu oneminyaka engama-70 ubudala ohlala eSierra Leone, wasebenza nzima bonke ubomi bakhe. Khawucinge ngendlela amele ukuba wavuya ngayo xa ekugqibeleni walondoloza imali eyaneleyo ukuba athenge indlu nje eqhelekileyo enamagumbi amane! Noko ke, emva kwexesha elithile uJames efudukele kuloo ndlu nentsapho yakhe, kwaqhambuka imfazwe yamakhaya kwelo lizwe, yaye ikhaya labo latshiswa laphela kwathi tu. Baphulukana nendlu yabo, kodwa abazange baphelelwe luvuyo. Ngoba?
2 UJames nentsapho yakhe bamilisela iingqondo zabo, kungekhona kwinto ababephulukene nayo, kodwa kwinto eyayisele. UJames uyachaza: “Kwanasebudeni baloo masikizi, sasiqhuba iintlanganiso, sifunde iBhayibhile, sithandaze kunye size sabelane nabanye ngoko kuncinane sasinako. Sakwazi ukulondoloza uvuyo lwethu ngenxa yokuba samilisel’ iingqondo zethu kulwalamano lwethu oluxabisekileyo noYehova.” La maKristu athembekileyo akwazi ‘ukuqhubeka enemihlali’ ngenxa yokuba ayecinga ngeentsikelelo zawo, yaye eyona ibalaseleyo kuzo zonke kukuba nolwalamano olusenyongweni noYehova. (2 Korinte 13:11) Kakade ke, kwakungelula ukunyamezela ezo meko zibuhlungu. Kodwa akazange ayeke ukuhlala enemihlali ngoYehova.
3. Amanye amaKristu okuqala alulondoloza njani uvuyo lwawo?
3 AmaKristu okuqala ahlangabezana neemvavanyo ezifana nezo zafunyanwa nguJames nentsapho yakhe. Ukanti, umpostile uPawulos wabhala la mazwi aya kumaKristu angamaHebhere: “Nakwamkela ngovuyo ukuphangwa kwempahla yenu.” Wandula ke uPawulos wachaza umthombo wovuyo lwabo esithi: “Nisazi ukuba nina ngokwenu ninokuthile eninako okulunge ngakumbi nokuhlala kuhleli.” (Hebhere 10:34) Ewe, loo maKristu enkulungwane yokuqala ayenethemba elinamandla. Ayekhangele phambili ngentembelo ekwamkeleni into eyayingenakuphangwa—“isithsaba sobomi” esingabuniyo kuBukumkani bukaThixo basezulwini. (ISityhilelo 2:10) Namhlanje, ithemba lethu njengamaKristu—enoba lelasezulwini okanye lelasemhlabeni—linokusinceda silondoloze uvuyo kwanaxa sijamelana neenkxwaleko.
“Yibani Nemihlali Ngalo Ithemba”
4, 5. (a) Kwakutheni ukuze icebiso likaPawulos lokuba “nemihlali ngalo ithemba” lifike ngexesha elifaneleke kangaka kumaRoma? (b) Yintoni enokwenza umKristu aphelelwe lithemba?
4 Umpostile uPawulos wakhuthaza amanye amakholwa aseRoma ukuba ‘abe nemihlali ngalo ithemba’ lobomi obungunaphakade. (Roma 12:12) Elo cebiso lalifike ngexesha elifanelekileyo kumaRoma. Kwisithuba seminyaka engaphantsi kweshumi emva kokuba uPawulos ewabhalele, afumana intshutshiso ekrakra, yaye amanye athuthunjiswa de afa ngokomyalelo woMlawuli uNero. Ukholo lokuba uThixo wayeza kuwanika isithsaba sobomi ngokungathandabuzekiyo lwawomeleza embandezelweni yawo. Kuthekani ngathi namhlanje?
5 NjengamaKristu, nathi sikulindele ukutshutshiswa. (2 Timoti 3:12) Ngapha koko, siyaqonda ukuba sonke ‘sehlelwa lixesha nasisihlo esingenakubonwa kwangaphambili.’ (INtshumayeli 9:11) Umntu esimthandayo unokufa engozini. Sinokufelwa ngumzali okanye umhlobo osenyongweni. Ngaphandle kokuba sigcina ithemba lethu loBukumkani liqaqambile, sinokuba sengozini ngokomoya xa sifikelwa zezo zilingo. Ngokufanelekileyo, senza kakuhle ukuzibuza, ‘Ngaba “ndinemihlali ngalo ithemba”? Ndizinika ngokufuthi kangakanani ithuba lokucamngca ngalo? Ngaba iParadesi ezayo yinto yokwenene kum? Ngaba ndizibona ndilapho? Ngaba ndilangazelela ukuba le nkqubo yezinto ikhoyo iphele ngendlela endandilangazelela ngayo ekuqaliseni kwam ukufunda inyaniso?’ Lo mbuzo wokugqibela ufuna ukucingisiswa nzulu. Ngoba? Ngenxa yokuba, xa siphile kakuhle, siphila ubomi obutofotofo yaye sihlala kwindawo engachatshazelwa kangako yimfazwe, ukunqongophala kokutya okanye iintlekele zemvelo, kusenokwenzeka—okwexeshana—silahlekelwe yimbono yokungxamiseka kokufika kwehlabathi elitsha likaThixo.
6. (a) Xa uPawulos noSilas babebandezelwa, bamilisel’ iingqondo zabo entwenini? (b) Umzekelo kaPawulos noSilas unokusikhuthaza njani namhlanje?
6 Ngokubhekele phaya uPawulos waluleka amaRoma ukuba ‘anyamezele imbandezelo.’ (Roma 12:12) UPawulos wayeqhelene nembandezelo. Wakha wabona embonweni indoda eyammemela ukuba ‘awelele eMakedoni’ ukuze ancede abantu apho ukuba bafunde ngoYehova. (IZenzo 16:9) Kwaoko, uPawulos noLuka, uSilas noTimoti baya eYurophu. Babelindelwe yintoni apho abo bavangeli basemazweni banenzondelelo? Yimbandezelo! Emva kokuba beshumayele eFilipi isixeko saseMakedoni, uPawulos noSilas babethwa baza bavalelwa entolongweni. Ngokucacileyo, abanye abemi baseFilipi abazange banele nje kukungabonakalisi umdla kwisigidimi soBukumkani—babesichase ngokukrakra. Ngaba oku kwabangela ukuba aba bavangeli basemazweni banenzondelelo baphulukane novuyo lwabo? Akunjalo. Emva kokuba bebethiwe baza baphoswa entolongweni, “malunga naphakathi kobusuku uPawulos noSilas babethandaza, bedumisa uThixo ngengoma.” (IZenzo 16:25, 26) Kakade ke, uPawulos noSilas babengavuyiswa ziintlungu zokubethwa, kodwa abazange bamilisel’ iingqondo zabo kuloo nto. Babecinga ngoYehova nangeendlela awayebasikelela ngazo. ‘Ngokunyamezela imbandezelo’ ngemihlali, uPawulos noSilas baba yimizekelo emihle kubazalwana babo baseFilipi nakwezinye iindawo.
7. Kutheni sifanele siquke umbulelo kwimithandazo yethu?
7 UPawulos wabhala: “Emthandazweni zingisani.” (Roma 12:12) Ngaba uyathandaza xa kukho nto ithile ikuxhalabisayo? Uthandazela ntoni? Kusenokwenzeka ukuba ukhankanya ingxaki yakho ethile uze ucele uncedo lukaYehova. Kodwa usenokuquka umbulelo ngeentsikelelo ozifumanayo. Xa kuvela iingxaki, ukucinga ngezinto ezintle esizenzelwa nguYehova, kuyasinceda ‘sibe nemihlali ngalo ithemba.’ UDavide, owayeneengxaki ezininzi, wabhala: “Zininzi izinto ozenzileyo, Owu Yehova Thixo wam, kwanemisebenzi yakho emangalisayo neengcamango zakho kuthi; akukho namnye onokuthelekiswa nawe. Ukuba bendityekele ekuxeleni ndize ndithethe ngazo, zininzi kakhulu kunokuba ndinokubalisa.” (INdumiso 40:5) Ukuba, njengoDavide, sicamngca ngeentsikelelo esizifumana kuYehova, ngokuqinisekileyo siya kuba nemihlali.
Hlala Unesimo Sengqondo Esifanelekileyo
8. Yintoni enceda umKristu ukuba ahlale onwabile xa etshutshiswa?
8 UYesu ukhuthaza abalandeli bakhe ukuba bahlale benesimo sengqondo esifanelekileyo xa bejamelana neemvavanyo ezahlukahlukeneyo. Uthi: “Ninoyolo nina xa abantu beningcikiva, benitshutshisa, bethetha ngani lonke uhlobo lwento engendawo bexoka, ngenxa yam.” (Mateyu 5:11) Sisiphi isizathu esinaso sokonwaba phantsi kweemeko ezinjalo? Ukukwazi kwethu ukumelana nenkcaso bubungqina bokuba umoya kaYehova uphezu kwethu. Umpostile uPetros waxelela amaKristu omhla wakhe: “Ukuba niyangcikivwa ngenxa yegama likaKristu, ninoyolo, ngenxa yokuba umoya wozuko, oko kukuthi, umoya kaThixo, uphumle phezu kwenu.” (1 Petros 4:13, 14) Esebenzisa umoya wakhe, uYehova uya kusinceda sinyamezele size, ngenxa yoko, silondoloze uvuyo lwethu.
9. Yintoni eyanceda abanye abazalwana bafumana izizathu zokuba novuyo xa babevalelwe entolongweni ngenxa yokholo lwabo?
9 Kwanaxa sityhubela kwezona meko zibuhlungu, sinokuzifumana izizathu zokuba nemihlali. UmKristu ogama linguAdolf wakufumanisa kunjalo oko. Uhlala kwilizwe apho umsebenzi wamaNgqina kaYehova wawuvaliwe kangangeminyaka emininzi. UAdolf namaqabane akhe aliqela babanjwa baza bagwetywa ixesha elide entolongweni ngenxa yokungavumi ukulahla iinkolelo zabo ezisekelwe eBhayibhileni. Kwakunzima entolongweni, kodwa njengoPawulos noSilas, uAdolf namaqabane akhe bafumana izizathu zokumbulela uThixo. Bathi, amava abo asentolongweni abanceda ukuba bomeleze ukholo lwabo baze bakhulise iimpawu zobuKristu ezixabisekileyo, ezinjengesisa, uvelwano nothando lobuzalwana. Ngokomzekelo, xa umntu obanjiweyo efumana ipasile evela ekhaya, wayesabelana namanye amakholwa, kuba la malungiselelo ongezelelekileyo wayewagqala njengavela kuYehova, oyena Mphi mkhulu waso “sonke isipho esilungileyo naso sonke isipho esigqibeleleyo.” Ezo zenzo zobubele zabazisela uvuyo abo babephisa nabo babesamkela. Ngoko kanye loo mava abo ayemele aphelise ukholo lwabo abenza bomelela ngokomoya!—Yakobi 1:17; IZenzo 20:35.
10, 11. Omnye udade wahlangabezana njani nokuncinwa kunye nokuvalelwa entolongweni ixesha elide?
10 UElla, ohlala kwilizwe apho umsebenzi woBukumkani wawuvalwe ixesha elide, wabanjwa ngenxa yokwabelana nabanye ngethemba lobuKristu. Wancinwa kanobom kangangeenyanga ezisibhozo. Xa ekugqibeleni wasiwa ematyaleni, wagwetywa iminyaka elishumi entolongweni eyayingenabo abanye abanquli bakaYehova. Ngelo xesha, uElla wayeneminyaka engama-24 kuphela ubudala.
11 Kakade ke, uElla wayengakhangelanga phambili ekuchitheni inxalenye enkulu yobutsha bakhe kwisisele sasentolongweni. Kodwa ekubeni wayengenakuyiguqula loo meko, wagqiba kwelokuba aguqule isimo sakhe sengqondo. Ngenxa yoko, waqalisa ukuyigqala intolongo njengentsimi awayeza kunikela ubungqina kuyo. Uthi: “Wawumninzi kakhulu umsebenzi wokushumayela apho, kangangokuba loo minyaka yahamba ngokukhawuleza.” Emva kweminyaka engaphezu kwesihlanu, uElla wancinwa kwakhona. Bephawula ukuba imivalo yentolongo ayiluphelisanga ukholo lwakhe, abo babemncina, bathi kuye: “Asinako ukukhulula; akukaguquki.” Waphendula ngozimiselo uElla esithi: “Kodwa ndiguqukile! Isimo sengqondo sam sibhetele ngoku kunento esasiyiyo ekungeneni kwam entolongweni, yaye ukholo lwam lomelele ngakumbi kunangaphambili!” Yaye wongezelela: “Ukuba anifuni ukundikhulula, ndiza kuhlala de uYehova abone kufanelekile ukundikhulula.” Iminyaka emihlanu enesiqingatha yokuvalelwa ayizange iluphelise uvuyo lukaElla! Wafunda ukwaneliseka phantsi kwazo naziphi na iimeko. Ngaba kukho nto unokuyifunda kumzekelo wakhe?—Hebhere 13:5.
12. Yintoni enokwenza umKristu abe noxolo lwengqondo xa etyhubela iimeko ezinzima?
12 Ungacingi ukuba uElla wayenesiphiwo esingaqhelekanga esasimenza akwazi ukujamelana nolo celomngeni. Ethetha ngexesha awayencinwa ngalo kwiinyanga ezingaphambi kokuba agwetywe, uElla uyavuma esithi: “Ndikhumbula amazinyo am eqhaqhazela, yaye ndandisoyika njengentaka.” Noko ke, uElla unokholo olomeleleyo kuYehova. Uye wafunda ukukholosa ngaye. (IMizekeliso 3:5-7) Ngenxa yoko, uThixo ungumntu wokwenene kuye ngakumbi kunangaphambili. Uthi: “Ngalo lonke ixesha ndingena kwindlu yokuncina, ndandiziva ndiseluxolweni. . . . Okukhona imeko isoyikisa, ndandiziva ndiseluxolweni ngakumbi.” YayinguYehova umthombo wolo xolo. Umpostile uPawulos uyachaza: “Musani ukuxhalela nantoni na, kodwa ezintweni zonke zaziseni izibongozo zenu kuThixo ngomthandazo nesikhungo nombulelo; yaye uxolo lukaThixo olungaphaya kokuqonda luya kuzilinda iintliziyo zenu namandla enu engqondo ngoKristu Yesu.”—Filipi 4:6, 7.
13. Yintoni esiqinisekisayo ukuba xa sifikelwa yimbandezelo, siya kuba namandla okunyamezela?
13 UElla, uye walondoloza uvuyo lwakhe ukususela ekukhululweni kwakhe nangona wayejamelene nobunzima. Akazange akwenze ngamandla akhe oku, kodwa wakwenza ngamandla awawanikwa nguYehova. Kwakunjalo nangompostile uPawulos, owabhala oku: “Ke ngoko, ngokuchulumanca okukhulu, ndiza kuqhayisa ngobuthathaka bam, ukuze amandla kaKristu ahlale njengentente phezu kwam. . . . Kuba xa ndibuthathaka, kuxa kanye ndinamandla.”—2 Korinte 12:9, 10.
14. Bonisa indlela umKristu anokuba nesimo esingqalileyo ngayo xa esesilingweni nomphumo onokubakho ngenxa yoko.
14 Iingcinezelo ojamelana nazo namhlanje zisenokwahluka kwezi sithethe ngazo apha. Sekunjalo, enoba zinjani na, kunzima ukujamelana neengcinezelo. Ngokomzekelo, umqeshi wakho usenokugxeka umsebenzi owenzayo—ngaphezu kokuba esenza kumsebenzi wabanye abaqeshwa bolunye unqulo. Usenokungakwazi ukufumana omnye umsebenzi. Unokululondoloza njani uvuyo lwakho? Khumbula uAdolf namaqabane akhe, abafunda ukuvelisa iimpawu ezintle entolongweni. Ukuba wenza umgudu wenyameko ukuze wanelise umqeshi wakho—kwanokuba ‘kunzima ukumkholisa’—uya kukhulisa iimpawu zobuKristu ezinjengonyamezelo nokuzeka kade umsindo. (1 Petros 2:18) Ngaphezu koko, unokuba ngumqeshwa oxabisekileyo, nto leyo enokwandisa amathuba okufumana umsebenzi owanelisa ngakumbi ngenye imini. Makhe sixubushe ezinye iindlela esinokulondoloza ngazo uvuyo enkonzweni kaYehova.
Ukuphila Ubomi Obulula Kuzisa Uvuyo
15-17. Yintoni eyabonwa sesinye isibini ukuba inokulunciphisa uxinezeleko, nangona into eyayilubangela yayingenakushenxiswa ngokupheleleyo?
15 Usenokungabi nako ukukhetha uhlobo lomsebenzi wempangelo ofuna ukuwenza okanye indawo ofuna ukusebenza kuyo, kodwa zisenokubakho iinkalo zobomi bakho onokuzilawula. Khawuqwalasele la mava alandelayo.
16 Isibini esingamaKristu samemela umdala ekhayeni laso ukuze afumane isidlo. Ebudeni baloo ngokuhlwa, lo mzalwana nenkosikazi yakhe bazityand’ igila kuye besithi mvanje baziva bexinezelekile ngenxa yeengcinezelo zobomi. Nangona bobabini babesebenza imisebenzi eyayibaqoba kakhulu, babengenakukwazi ukufuna omnye umsebenzi. Babezibuza ukuba babeya kuyinyamezela kude kube nini le meko.
17 Xa becela icebiso kulo mdala, waphendula wathi, “Philani ubomi obulula.” Njani? Ixesha elalichithwa yile ndoda nenkosikazi yayo ukuya nokubuya emsebenzini suku ngalunye yayiziiyure ezintathu. Lo mdala, owayesazi kakuhle esi sibini, wacebisa ukuba sifudukele kwindawo ekufuphi nomsebenzi waso, ukuze sinciphise ixesha esasilichitha ukuya nokubuya emsebenzini suku ngalunye. Elo xesha sasinokulichitha sinyamekela eminye imibandela ebalulekileyo—okanye siphumle. Ukuba iingcinezelo zobomi zikuphanga ulonwabo ngandlel’ ithile, kutheni ungahlolisisi iimeko zakho uze ubone enoba akunakwenza uhlengahlengiso kusini na uze ufumane isiqabu?
18. Kutheni kubalulekile ukucingisisa into ngenyameko ngaphambi kokuba wenze izigqibo?
18 Enye indlela yokunciphisa uxinezeleko kukucingisisa ngenyameko ngaphambi kokuba wenze izigqibo. Ngokomzekelo, omnye umKristu wagqiba kwelokuba akhe indlu. Wakhetha iplani enobugocigoci obuninzi, nangona engazange akhe ndlu ngaphambili. Ngoku uyaphawula ukuba wayenokuziphepha iingxaki ezininzi ukuba ‘wayewaqwalasele amanyathelo akhe’ ngaphambi kokuba akhethe iplani yendlu yakhe. (IMizekeliso 14:15) Omnye umKristu wavuma ukuba ngummeli welinye ikholwa elaliboleka imali. Ngokwesivumelwano, ukuba lowo ubolekayo wayengakwazi ukuhlawula imali awayeyibolekile, kwakuza kufuneka ihlawulwe ngulowo wayengummeli wakhe. Ekuqaleni, izinto zahamba kakuhle, kodwa ekuhambeni kwexesha lowo wayeboleke imali waqalisa ukwaphula izigqibo. Umbolekisi wacaphuka waza wafuna imali yakhe yonke kulowo wayengummeli. Loo nto yabangela ukuba ummeli abandezeleke kakhulu. Ngaba wayengenakukuphepha oko ukuba wayehlolisise bonke oothunywashe ngaphambi kokuba avume ukwamkela loo mbopheleleko yelo tyala?—IMizekeliso 17:18.
19. Ziziphi ezinye iindlela esinokunciphisa uxinezeleko ngazo ebomini bethu?
19 Xa sidiniwe, masingaze sigqibe kwelokuba sinokunciphisa uxinezeleko size sizuze uvuyo lwethu ngokuyeka ukwenza ufundisiso lobuqu lweBhayibhile, inkonzo yasentsimini nokuya kwiintlanganiso. Kaloku, ezi ziindlela ezibalulekileyo esinokufumana ngazo umoya oyingcwele kaYehova, osiqhamo sawo siluvuyo. (Galati 5:22) Ngalo lonke ixesha imisebenzi yobuKristu iyahlaziya yaye ngokufuthi ayidinisi ngokugqithiseleyo. (Mateyu 11:28-30) Kusenokwenzeka ukuba yimisebenzi yempangelo okanye eyokuzihlaziya, kungekhona eyokomoya, eba negalelo ekubeni sidinwe. Ukuzifundisa ukuya kulala ngethuba kunokusinceda sizive sihlaziyekile. Ukuphumla ngokwaneleyo kunokuba luncedo kakhulu. UN. H. Knorr, owayekhonza njengelungu leQumrhu Elilawulayo lamaNgqina kaYehova de kwasekufeni kwakhe, wayedla ngokuthi kubavangeli basemazweni: “Xa udimazekile, into yokuqala omawuyenze kukuphumla. Uya kumangaliswa yindlela ekuya kubonakala kulula ngakumbi ngayo ukusombulula nayiphi na ingxaki emva kokuba uye walala ngokwaneleyo!”
20. (a) Shwankathela ezinye zeendlela esinokulondoloza ngazo uvuyo lwethu. (b) Ziziphi izizathu zokuvuya onokucinga ngazo? (Bona ibhokisi kwiphepha 17.)
20 AmaKristu anelungelo lokukhonza ‘uThixo onoyolo.’ (1 Timoti 1:11) Njengoko sele sibonile, sinokululondoloza uvuyo lwethu kwanaxa sikhathazwa ziingxaki ezinzulu. Masihlale sicinga ngethemba loBukumkani, senze uhlengahlengiso kwindlela esizibona ngayo izinto xa kuyimfuneko size siphile ubomi obulula. Yaye, nokuba sikweyiphi na imeko, siya kusabela kumazwi ompostile uPawulos athi: “Hlalani ninemihlali eNkosini. Ndiyaphinda ndithi, Yibani nemihlali!”—Filipi 4:4.
Khawucingisise Le Mibuzo Ngenyameko:
• Kutheni amaKristu efanele ahlale emilisele iingqondo zawo kwithemba loBukumkani?
• Yintoni enokusinceda sihlale sivuya xa sityhubela ebunzimeni?
• Kutheni sifanele sizame ukuphila ubomi obulula?
• Abanye baye baphila ubomi obulula ngaziphi iindlela?
[Ibhokisi/Imifanekiso ekwiphepha 17]
Izizathu Ezongezelelekileyo Zokuba Novuyo
NjengamaKristu, sinezizathu ezininzi zokuba nemihlali. Phawula ezi zilandelayo:
1. Sazi uYehova.
2. Sifunde inyaniso yeLizwi likaThixo.
3. Sinokuxolelwa izono zethu ngokuba nokholo kwidini likaYesu.
4. UBukumkani bukaThixo buyalawula—ihlabathi elitsha liza kufika kungekudala!
5. UYehova usingenise kwiparadesi yokomoya.
6. Sinandipha unxulumano olwakhayo namaKristu.
7. Sinelungelo lokuba nesabelo kumsebenzi wokushumayela.
8. Siyaphila, yaye sinomlinganiselo othile wamandla.
Zingaphi ezinye izizathu zokuba novuyo onokuzikhankanya?
[Umfanekiso okwiphepha 13]
UPawulos noSilas babevuya nangona babesentolongweni
[Imifanekiso ekwiphepha 15]
Ngaba ingqondo yakho uyimilisele kwithemba elivuyisayo lehlabathi elitsha likaThixo?