Indlela Ukuba Ngumhlolokazi Okwawachaphazela Ngayo Amabhinqa Amabini

USANDRA ngumhlolokazi ohlala eOstreliya. Xa umyeni wakhe wafa kwiminyaka ethile eyadlulayo, uSandra wothuka gqitha. “Ukuqonda nje ukuba ngesiquphe ndiphulukene neqabane nomhlobo wam wokwenene kwandenza ndadandatheka. Eneneni andisakhumbuli ukuba ndagoduka njani ukusuka kwam esibhedlele okanye ndenza ntoni ngaloo mini. Ebudeni beeveki ezimbalwa ezilandelayo, uloyiko endandinalo lwaba yintlungu ethe rhoqo emzimbeni.”

USandra unomhlobo omdala kunaye, uElaine, obengumhlolokazi kangangeminyaka emithandathu. UElaine wanyamekela umyeni wakhe, uDavid, kangangeenyanga ezintandathu ngaphambi kokuba abulawe ngumhlaza. Waba buhlungu kakhulu kangangokuba emva kokufa komyeni wakhe, waba yimfama okwexeshana. Kwiminyaka emibini kamva wafa isiqaqa phakathi kwabantu. Ugqirha wakhe akazange aphawule nto agula yiyo. Noko ke, wafumanisa ukuba intlungu kaElaine ingaphakathi, ngoko wamcebisa ukuba aye ekhaya aze azame ukukhala. “Kwathabatha ithuba ukuze ndihlangabezane nentlungu endandikuyo,” uvuma ngelitshoyo uElaine, esongeza ngelithi xa ndililolo, “ndandidla ngokuya kwigumbi lokulala ndize ndizigqume ngeempahla zikaDavid.”

Ewe, ukufa kweqabane elithandekayo kunokubangela ukuba abantu basabele ngeendlela ezahlukahlukeneyo, kuba ukuba ngumhlolokazi kuquka okungakumbi kunokuhlala ungenamyeni. Ngokomzekelo, uSandra, kangangexesha wavakalelwa kukuba wayengazazi ukuba ungubani na. Njengabanye abahlolokazi abasandul’ ukufelwa, naye wayeziva esengozini, engakhuselekanga. USandra ukhumbula oku: “Ngenxa yokuba umyeni wam wayesoloko endenzela izigqibo, ngesiqhuphe kwakufuneka ndizenze ndedwa ezo zigqibo. Ndandingakwazi ukulala kakuhle. Ndandihlala ndidiniwe. Kwakunzima ukuyazi into emandiyenze.”

Kubaliswa amabali afana nelikaSandra nelikaElaine imihla ngemihla emhlabeni wonke. Ukugula, iingozi, iimfazwe, ukutshatyalaliswa kohlanga, nobungendawo buba negalelo kwinani elandayo labahlolokazi.a Uninzi lwala mabhinqa luyigcina ngaphakathi intlungu yawo, lungayazi into emalunyenze. Banokwenza ntoni abahlobo nezalamane ukunceda abo bangabahlolokazi? Inqaku elilandelayo linamacebiso anokuba luncedo.

[Umbhalo osemazantsi]