“Sondelani KuThixo, Naye Uya Kusondela Kuni”
Ngaphambi Nasemva—Wafumana Amandla Okuguqula Ubomi Bakhe
USANDRA, ibhinqa laseMexico, wayezibona njengomntu ophume ecaleni kwintsapho yakowabo. Ngoxa wayekwishumi elivisayo wayeziva engafunwa yaye engathandwa ngabanye. Uthi: “Xa ndandikwishumi elivisayo ndandizibona ndingento yanto yaye ndingayazi into endandiyiphilela kwaye ndingenanjongo ebomini.”
Ngoxa wayekwisikolo samabanga aphezulu, uSandra waqalisa ukusela iwayini kayise. Ekuhambeni kwexesha, waqalisa ukuzithengela obakhe utywala waza waba likhoboka lotywala. Uyavuma: “Ndandingenamdla wokuphila.” Ngenxa yokudandatheka, uSandra wabhenela ekusebenziseni iziyobisi. Uthi: “Ekuphela kwento eyayindinceda ukuze ndizilibale iingxaki zam, koko ndandikuphatha ebhegini yam: ibhotile yotywala, iziyobisi okanye umya.”
Emva kokuba uSandra egqibile kwisikolo sezonyango, waba linxila. Wazama ukuzibulala. Kodwa wasinda.
USandra wafuna uncedo ngokomoya nangokweemvakalelo kwiicawa ezahlukahlukeneyo, kodwa wabuya nemband’ esikhova. Ephelelwe lithemba, ngokuphindaphindiweyo wathi kuThixo: “Uphi? Kutheni ungandincedi nje?” Wayedandatheke kakhulu xa omnye wamaNgqina kaYehova wathetha naye. Oku kwakhokelela kwisifundo seBhayibhile. USandra wachukumiseka kakhulu xa wafumanisa ukuba “uYehova usondele kwabo baphuke intliziyo.”—INdumiso 34:18.
Lowo wayeqhubela uSandra isifundo seBhayibhile wamnceda waqonda ukuba uYehova uThixo uyazi ukuba sibuthathaka ngenxa yesono nokungafezeki esikuzuze ilifa kuAdam. USandra wabona ukuba uThixo uyaqonda ukuba asinakuyithobela ngokugqibeleleyo imigaqo yobulungisa. (INdumiso 51:5; Roma 3:23; 5:12, 18) Wavuyiswa kukwazi ukuba uYehova akanikeli ngqalelo kubuthathaka bethu, yaye akalindelanga okungaphezu kwamandla ethu. Umdumisi wabuza: “Ukuba ubulinda iziphoso, Ya, owu Yehova, ngubani na obenokuma?”—INdumiso 130:3.
Eyona nyaniso ibalulekileyo yeBhayibhile eyamchukumisayo uSandra, yintlawulelo yedini likaYesu Kristu. Ngenxa yalo, uYehova ngenceba ubagqala abantu abathobekileyo bengabalungileyo nangona bengafezekanga. (1 Yohane 2:2; 4:9, 10) Ewe, ‘sinokuxolelwa izigqitho zethu’ size ngaloo ndlela sincedwe silwisane neemvakalelo zokuziva singaxabisekanga.—Efese 1:7.
USandra wafunda isifundo esixabisekileyo kumzekelo kampostile uPawulos. Wayebuxabisa kakhulu ububele bukaThixo bokuxolela iimpazamo zakhe zangaphambili nokumxhasa ngamandla ekoyiseni ubuthathaka bakhe. (Roma 7:15-25; 1 Korinte 15:9, 10) UPawulos walungisa ubomi bakhe, ‘wawuqoba umzimba wakhe waza wawuphatha njengekhoboka’ ukuze ahlale kwindlela kaThixo. (1 Korinte 9:27) Akazange avumele utyekelo lwakhe lwesono lumlawule.
USandra wayekhathazwa bubuthathaka bakhe, kodwa wayeqhubeka elwisana nabo. Wathandazela uncedo lukaYehova ngokunyanisekileyo ukuze akwazi ukulwisana nabo aze afumane inceba yakhe. (INdumiso 55:22; Yakobi 4:8) Ewuqonda umdla uThixo anawo kuye, uSandra wafumana amandla okuguqula ubomi bakhe. Uthi: “Kundivuyisa gqitha ukufundisa abanye iBhayibhile ixesha elizeleyo.” USandra uye wafumana ilungelo lokunceda udadewabo omdala nomncinane ukuze bamazi uYehova. Njengokuba ‘esenza okulungileyo,’ kwakhona ngokuzithandela usebenzisa ubuchule bakhe bokunyanga kwiindibano zamaNgqina kaYehova.—Galati 6:10.
Kuthekani ngezinto awayekhotyokiswa zizo uSandra? Uthi: “Ingqondo yam izinzile. Ndayeka ukusela, ukutshaya, okanye ukusebenzisa iziyobisi. Andisazifuni nganto. Ndikufumene oko ndandikufuna.”
[Amagama acatshulweyo akwiphepha 9]
“Ndikufumene oko ndandikufuna”
[Ibhokisi ekwiphepha 9]
Ukusebenza Kwemigaqo YeBhayibhile
Nantsi eminye imigaqo yeBhayibhile eye yanceda abaninzi bahlukana nezinto ezibakhobokisayo:
“Masizihlambulule kuko konke ukudyobheka kwenyama nokomoya, sigqibelelisa ubungcwele sisoyika uThixo.” (2 Korinte 7:1) UThixo usikelela abo baye bazihlambulula ekungcoleni, baze baphephe imikhwa engacocekanga.
“Ukoyika uYehova kuthetha ukuthiya okubi.” (IMizekeliso 8:13) Ukumoyika ngokunzulu uThixo kumnceda ubani ayeke imikhwa emibi, kuquka nokusebenzisa kakubi iziyobisi. Ngaphandle kokukholisa uYehova, umntu oguqukileyo uyakhuseleka kwizifo ezoyikekayo.
“Balulamele baze bathobele oorhulumente namagunya alawulayo.” (Tito 3:1) Kwiindawo ezininzi, ukuba neziyobisi ezithile okanye ukuzisebenzisa kukwaphula umthetho. AmaKristu okwenyaniso akagcini okanye asebenzise iziyobisi ezingekho mthethweni.