Nime Ngokuqinileyo Ningahexi
Ukunceda Abantu Abaselula Ngemfundiso Efika Ngexesha Elifanelekileyo
UEPAFRA wayengumKristu wenkulungwane yokuqala owaya eRoma. Noko ke, ngenxa yezizathu ezivakalayo waqhubeka ecinga ngeKolose, isixeko saseAsia Minor. Wayeshumayele iindaba ezilungileyo apho yaye ngokungathandabuzekiyo wanceda abathile ukuba babe ngabafundi bakaYesu Kristu. (Kolose 1:7) UEpafra wayebaxhalabele kakhulu abo wayekholwa nabo eKolose, kuba ngoxa wayeseRoma umpostile uPawulos wababhalela esithi: “Uyanibulisa uEpafra, . . . osoloko enithandazela, ukuze ekugqibeleni nime ngokuqinileyo ningahexi kuko konke ukuthanda kukaThixo.”—Kolose 4:12.
Ngokufanayo, ootata noomama abangamaKristu namhlanje ngokunyanisekileyo bathandazela intlalo-ntle yokomoya yabantwana babo. Aba bazali benza unako-nako ukuze bamilisele uthando ngoThixo kwiintliziyo zabantwana babo abaselula ukuze baqine elukholweni.
Ulutsha oluninzi olungamaKristu luye lwacela uncedo lokuhlangabezana neengxaki olujamelana nazo esikolweni nakwezinye iindawo. Enye intombazana eneminyaka eli-15 ubudala yathi: “Iingxaki zethu ziya zisiba mbi nangakumbi. Ubomi buyoyikeka kakhulu. Sifuna uncedo!” Ngaba izicelo ezinjalo zolutsha nemithandazo yabazali aboyika uThixo iye yaphendulwa? Ewe! Kuye kwanikelwa imfundiso esekelwe eBhayibhileni ‘ngekhoboka elithembekileyo neliyingqondi.’ (Mateyu 24:45) Kweli nqaku kukho olunye uncwadi oluye lwanceda amakhulu amawaka olutsha ukuba ‘lume ngokuqinileyo lungahexi.’ Makhe siqwalasele ezimbalwa zezi mpapasho.
“Khanibone . . . AmaNgqina Amatsha Ali-15 000!”
NgoAgasti 1941, kwahlanganisana abantu abali-115 000 eSt. Louis, eMissouri, eMerika, kweyona ndibano yakhe yankulu yamaNgqina kaYehova ngelo xesha. Kusuku lwayo lokugqibela—“uSuku Lwabantwana”—abantwana abali-15 000 babehleli kufuphi neqonga bephulaphule ngenyameko njengoko uJoseph F. Rutherford ethetha ngomxholo othi “Abantwana BoKumkani.” Ekuqukumbeleni intetho yakhe, uRutherford oneminyaka engama-71 ubudala wathetha njengotata esithi:
“Nina nonke . . . bantwana abavumileyo . . . ukuthobela uThixo noKumkani wakhe, ncedani niphakame.” Abantwana bathi funqu ngamxhelo mnye. UMzalwan’ uRutherford wathi: “Khanibone, amangqina amatsha oBukumkani angaphezu kwe-15 000!” Kwavakala intswahla yezandla. Isithethi songezelela sisithi: “Nonke nina eniya kwenza konke okusemandleni enu nixelela abanye ngobukumkani bukaThixo . . . , yithini Aye.” Aba bantwana bathi “Aye!” Wandula ke waphakamisa incwadi entsha ethi Children, eyamkelwa ngokuqhwatywa kwezandla ixesha elide.
Emva kwalo ntetho ichukumisayo, ukrozo lwabantu abaselula lwaya eqongeni, apho uMzalwan’ uRutherford wabanika umbhalo osisipho wencwadi entsha. Abaphulaphuli bakhala iinyembezi ngenxa yokuchukunyiswa koko bakubonayo. Omnye owayekho kweso siganeko watsho: “Kuphela ngumntu onentliziyo elukhuni obengenakuchukumiseka xa ebona ulutsha [lubonisa] intembelo epheleleyo nokholo kuThixo walo, uYehova.”
Kuloo ndibano engenakulibaleka, kwabhaptizwa abantu abaselula abali-1 300 befuzisela uzahlulelo lwabo kuYehova. Abaninzi kubo baye bahlala beqinile elukholweni de kube ngoku. Baxhasa amabandla asekuhlaleni, bangamatsha-ntliziyo eBheteli, okanye bakhonza njengabavangeli basemazweni kumazwe asemzini. Eneneni, “uSuku Lwabantwana” nencwadi ethi Children yinto abantu abaselula abangasayi kuze bayilibale!
“Abonakala Efika Kanye Ngexesha Elifanelekileyo”
Ebudeni beminyaka yee-1970, amaNgqina kaYehova apapasha iincwadi ezintathu ezingakumbi ezafikelela iintliziyo zamakhulu amawaka abantu abaselula. Incwadi ethi Ukuphulaphula KuMfundisi Omkhulu, Ubutsha Bakho—Ukufumana Okona Kulungileyo Kubo, nethi Incwadi Yam Yamabali EBhayibhile. Ngowe-1982 kwaqalisa ukuvela uthotho lwamanqaku athi “Abantu Abaselula Bayabuza . . . ” kwiphephancwadi uVukani! La manqaku aye achukumisa iintliziyo zabaselula nabakhulileyo. “Busuku ngabunye ndiyambulela uThixo ngokuwapapasha,” watsho omnye oneminyaka eli-14 ubudala. “Ndiyawathanda la manqaku,” watsho omnye oneminyaka eli-13 ubudala, “abonakala efika kanye ngexesha elifanelekileyo.” Abazali nabadala abamiselweyo abangamaKristu bayavuma ukuba la manqaku afika ngexesha yaye ayingenelo.
Ngowe-1989 kwakukho amanqaku athi “Abantu Abaselula Bayabuza . . . ” amalunga nama-200 kuVukani! KwiNdibano YeSithili ‘Yokuhlonela UThixo’ eyayingaloo nyaka, kwakhululwa incwadi ethi Abantu Abaselula Bayabuza—Iimpendulo Eziluncedo. Ngaba iye yalunceda ulutsha ukuba luhlale luqinile elukholweni? Abantu abaselula abathathu babhala besithi: “Le ncwadi iye yaba sisixhobo esihle kuthi ukuze siqonde iingxaki zethu sikwazi nokuhlangabezana nazo. Siyabulela ngokuba nomdla kwintlalo-ntle yethu.” Uninzi lwabafundi abaselula ehlabathini lonke luyavumelana noku.
“Kuye Kwasihluthisa”
Ngowe-1999, amaNgqina kaYehova avelisa olunye uhlobo lokufundisa olufike ngexesha elifanelekileyo kulutsha—ividiyo ethi Young People Ask—How Can I Make Real Friends? Yachukumisa abantu abaninzi. “Le vidiyo iye yandichukumisa ngokunzulu,” watsho omnye oneminyaka eli-14 ubudala. “Iya kuba kukutya komoya esiya kukutya rhoqo,” watsho omnye umama ongenaqabane. “Kuyavuyisa ukwazi ukuba oyena Mhlobo wethu wokwenene, uYehova, uyaluthanda yaye uyalukhathalela ulutsha olukwintlangano yakhe ehlabathini lonke,” latsho elinye ibhinqa eliselula.
Iye yafeza ntoni le vidiyo? Abantu abaselula bathi: “Iye yandinceda ukuba ndilulumkele unxulumano lwam, ukuba ndiphangalale ebandleni, yaye ndimenze umhlobo wam uYehova.” “Iye yandenza ndakwazi ukujamelana noontanga bam.” “Iye yandenza ndaqina kuzimiselo lwam lokukhonza uYehova kangangoko ndinako.” Yaye esinye isibini esitshatileyo sabhala sisithi: “Siyabulela ngokusuka emazantsi eentliziyo zethu ngokusilungiselela oku ‘kutya.’ Kuye kwasihluthisa.”
Lithembekile kuthumo lwalo olulunikwe nguThixo, “ikhoboka elithembekileyo neliyingqondi” elithanjisiweyo liye lalungiselela ukutya kokomoya ngexesha elifanelekileyo kubo bonke abakwamkelayo. Yaye hayi indlela ekuvuyisa ngayo ukubona indlela imfundiso yeZibhalo ebanceda ngayo abantu abaselula namhlanje ukuba ‘bame ngokuqinileyo bengahexi kuko konke ukuthanda kukaThixo’!