Nceda Abanye Bahambe Ngokumfaneleyo UYehova

‘Asiyekanga ukunithandazela nokunicelela ukuba nihambe ngokumfaneleyo uYehova nize nimkholise ngokupheleleyo njengoko niqhubeka nivelisa isiqhamo kuwo wonke umsebenzi olungileyo.’—KOLOSE 1:9, 10.

1, 2. Yintoni ngokukhethekileyo enokuba ngumthombo wovuyo nolwaneliseko?

“SIHLALA efama kwinqwelwana erhuqwayo. Ngenxa yokuba siphila ubomi obulula, sifumana ithuba elingakumbi lokufikelela abantu ngeendaba ezilungileyo. Siye sasikelelwa ngokutyebileyo ngelungelo lokunceda abantu abaninzi ukuba bahlulele ubomi babo kuYehova.”—Isibini esitshatileyo, esingabalungiseleli bexesha elizeleyo eMzantsi Afrika.

² Akuvumi na ukuba ukunceda abanye kubangela uvuyo? Abanye abantu bazama ngokuthe rhoqo ukunceda abagulayo, abahlelelekileyo okanye abantu abangamalolo—bezuza ulwaneliseko ngokwenjenjalo. AmaKristu okwenyaniso aqinisekile ukuba ukwabelana nabanye ngolwazi ngoYehova uThixo noYesu Kristu lolona ncedo lubalaseleyo anokulunikela. Yiloo nto kuphela enokukhokelela abanye ukuba bamkele idini lentlawulelo likaYesu, bahlakulele ulwalamano oluhle noThixo, baze ngaloo ndlela bafanelekele ukufumana ubomi obungunaphakade.—IZenzo 3:19-21; 13:48.

3. Hlobo luni loncedo olufuna ingqalelo yethu?

³ Noko ke, kuthekani ngokunceda abo sele bekhonza uThixo, abo balandela “iNdlela”? (IZenzo 19:9) Ngokungathandabuzekiyo, unomdla kakhulu kubo, kodwa usenokungayiboni indlela onokuba luncedo ngakumbi okanye onokuqhubeka ubanceda ngayo. Okanye imeko okuyo isenokubonakala ikuvalela amathuba okubanceda, ngaloo ndlela ikubandeze ulwaneliseko obunokulufumana. (IZenzo 20:35) Ngokuphathelele ezi nkalo zombini, sinokufunda nto ithile kwincwadi yabaseKolose.

4. (a) Zazinjani iimeko ngexesha uPawulos wayebhalela abaseKolose? (b) Wabandakanyeka njani uEpafra?

⁴ Xa umpostile uPawulos wayebhalela amaKristu aseKolose, wayevalelwe endlwini eRoma, nangona wayevumelekile ukuba anganazo iindwendwe. Njengoko usenokukulindela oko, uPawulos wayisebenzisa loo nkululeko ilinganiselweyo wayenayo ekushumayeleni ngoBukumkani bukaThixo. (IZenzo 28:16-31) Amanye amaKristu awayekhonza kunye nawo ayenokumtyelela uPawulos, mhlawumbi amanye ayevalelwa naye ngamaxesha athile. (Kolose 1:7, 8; 4:10) Omnye yayingumhambisi wevangeli owayenenzondelelo uEpafra owayevela kwisixeko saseKolose eFrigiya, kwilizwe elingumxawuka ngakwimpuma ye-Efese eAsia Minor (kwiTurkey yanamhlanje). UEpafra waba luncedo ekusekeni ibandla laseKolose, yaye wabulaleka ngenxa yamabandla awayekufuphi, iLawodike neHirapoli. (Kolose 4:12, 13) Kwakutheni ukuze uEpafra aye kubona uPawulos eRoma, yaye yintoni esinokuyifunda kwindlela awasabela ngayo uPawulos?

Ukunceda AbaseKolose

5. Kwakutheni ukuze uPawulos abhalele abaseKolose oko wababhalela kona?

⁵ Ukuze adibane noPawulos ngokuphathelele iimeko zebandla laseKolose, uEpafra wathabatha uhambo olunzima oluya eRoma. Wanikela ingxelo ngokholo, uthando nemigudu yokushumayela ivangeli eyayisenziwa ngaloo maKristu. (Kolose 1:4-8) Ukanti, umele ukuba wamxelela ngenkxalabo awayenayo ngempembelelo engakhiyo eyayisongela ubumoya babantu baseKolose. UPawulos wabhala incwadi eyayiphikisa ezinye zeembono ezazisasazwa ngabafundisi bobuxoki. Wanikela ingqalelo ekhethekileyo kwindima ephambili efanele idlalwe nguYesu Kristu.a Ngaba uncedo lwakhe lwalupheleliselwe ekubetheleleni iinyaniso ezisisiseko zeBhayibhile? Yiyiphi enye indlela awayenokubanceda ngayo abaseKolose, yaye yintoni esinokuyifunda ngokunceda abanye?

6. Yintoni eyabethelelwa nguPawulos kwincwadi yakhe eyayisiya kwabaseKolose?

⁶ Ekuqaleni kwale ncwadi yakhe, uPawulos wabonisa ngohlobo loncedo esinokungalugqali njengolubalulekileyo. Yayiluhlobo loncedo olunamandla olwanikelwa nguPawulos noEpafra ngoxa babekude eKolose. UPawulos wathi: “Sisoloko simbulela uThixo uYise weNkosi yethu uYesu Kristu xa sinithandazela [umbhalo osemazantsi we-NW eneembekiselo, “sinithandazela rhoqo”].” Ewe, le yayiyimithandazo engqalileyo ngokuphathelele amaKristu aseKolose. UPawulos wongezelela wathi: “Kungenxa yoko le nto nathi, kususela kwimini esakuvayo oko, singayekanga ukunithandazela nokunicelela ukuba nizaliswe ngolwazi oluchanileyo lokuthanda kwakhe kubulumko bonke nokuqiqa kokomoya.”—Kolose 1:3, 9.

7, 8. Imithandazo yethu yobuqu naleyo siyenza ebandleni iquka ntoni ngokufuthi?

⁷ Siyazi ukuba uYehova ‘nguMphulaphuli wemithandazo,’ ngoko sinokuba nentembelo yokuba ukulungele ukuphulaphula imithandazo yethu eyenziwa ngokuvisisana nokuthanda kwakhe. (INdumiso 65:2; 86:6; IMizekeliso 15:8, 29; 1 Yohane 5:14) Noko ke, sithandaza njani xa sithandazela abanye?

⁸ Ngokufuthi sisenokucinga size sithandazele ‘abazalwana bethu bonke abasehlabathini.’ (1 Petros 5:9) Okanye sisenokuthetha noYehova ngamaKristu nabanye abakummandla othwaxwe yintlekele okanye lishwangusha. Abafundi benkulungwane yokuqala ababekwenye indawo beva ukuba kukho indlala kwelakwaYuda, yaye bamele ukuba benza imithandazo emininzi ngenxa yabazalwana babo kwanangaphambi kokuba bathumele imali yokubanceda. (IZenzo 11:27-30) Kumhla wethu, ngokufuthi kwiintlanganiso zamaKristu kwenziwa imithandazo ngenxa yobuzalwana buphela okanye ngenxa yeqela elikhulu labazalwana, apho kufuneka abaninzi baqonde baze bakwazi ukuthi “Amen.”—1 Korinte 14:16.

Xa Uthandaza Ngqala

9, 10. (a) Yiyiphi imizekelo ebonisa ukuba ukuthandazela abantu abathile ngokungqalileyo kufanelekile? (b) Wakubalaselisa njani uPawulos ukungqala emthandazweni?

⁹ Ukanti, iBhayibhile isinika imizekelo yemithandazo eyayisenziwa ngokuphathelele abanye eyayingqale ngakumbi, kukhankanywa abathile ngokungqalileyo. Khawucinge ngamagqabaza kaYesu abhalwe kuLuka 22:31, 32. Wayengqongwe ngabapostile abathembekileyo abali-11. Bonke babekufuna ukuxhaswa nguThixo kumaxesha anzima awayeza kubafikela, yaye uYesu wabathandazela. (Yohane 17:9-14) Sekunjalo, uYesu wakhetha uPetros, wenza isibongozo esingqalileyo ngenxa yaloo mfundi mnye. Eminye imizekelo: UElisha wathandazela ukuba uThixo ancede enye indoda, umlindi wakhe. (2 Kumkani 6:15-17) Umpostile uYohane wathandazela ukuba uGayo aqhubeke ephilile enyameni nasemoyeni. (3 Yohane 1, 2) Yaye eminye imithandazo yayisenziwa ngokuphathelele iqela elithile ngokukhethekileyo.—Yobhi 42:7, 8; Luka 6:28; IZenzo 7:60; 1 Timoti 2:1, 2.

¹⁰ Iincwadi zikaPawulos zibalaselisa umbandela wokuba ngongqalileyo emthandazweni. Wacela ukuba athandazelwe okanye kuthandazelwe yena namaqabane akhe. AmaKolose 4:2, 3 afundeka ngolu hlobo: “Zingisani emthandazweni, nihlale nithe qwa kuwo ninombulelo, kwangaxeshanye nisithandazele nathi, ukuze uThixo asivulele umnyango wamazwi, sibe nokuthetha ngemfihlelo engcwele engoKristu, leyo, enyanisweni, endikwimixokelelwane yentolongo ngenxa yayo.” Qwalasela nantsi eminye imizekelo: Roma 15:30; 1 Tesalonika 5:25; 2 Tesalonika 3:1; Hebhere 13:18.

11. Ngoobani abathandazelwa nguEpafra xa wayeseRoma?

¹¹ Kwakunjalo nangeqabane likaPawulos elaliseRoma. “Uyanibulisa uEpafra, ophuma phakathi kwenu, . . . nosoloko [ezibhokoxa; Inguqulelo Yehlabathi Elitsha YeZibhalo ZamaKristu ZesiGrike] enithandazela.” (Kolose 4:12) Igama eliguqulelwe ngokuthi ‘ukuzibhokoxa’ linokuthetha “ukuzabalaza,” njengomntu owenza umthambo kwimidlalo yamandulo. Ngaba uEpafra wayethandaza ngenzondelelo ngenxa nje yequmrhu lamakholwa asehlabathini lonke okanye ngenxa yabanquli bokwenyaniso abakulo lonke elaseAsia Minor? UPawulos wabonisa ukuba uEpafra wayethandazela abaseKolose ngokukhethekileyo. UEpafra wayeyazi imeko yabo. Asibazi bonke ngamagama, singazazi neengxaki ababejamelene nazo, kodwa khawuthelekelele oko kunokuba kwakusenzeka. Mhlawumbi uLino oselula wayesilwa nempembelelo yeentanda-bulumko ezazixhaphakile, yaye kusenokwenzeka ukuba uRufo wayefuna amandla okuxhathisa ekuhendweni yimikhwa yamaYuda awayeyiqhelisela ngaphambili. Ekubeni wayenomyeni ongakholwayo, ngaba uPersi wayelufuna unyamezelo nobulumko bokukhulisela abantwana bakhe eNkosini, yaye ngaba uAsinkrito, owayenesifo esinganyangekiyo, wayekufuna ngakumbi ukuthuthuzelwa? Ewe, uEpafra wayebazi abo babekwibandla lakowabo, yaye wabathandazela ngokunyanisekileyo ngenxa yokuba yena noPawulos babefuna ukuba abo bazinikeleyo bahambe ngokumfaneleyo uYehova.

12. Sinokungqala ngakumbi njani kwimithandazo yethu yangasese?

¹² Ngaba uyawubona umzekelo esiwumiselweyo—indlela esinokubanceda ngayo abanye? Njengoko sele kuphawuliwe, imithandazo eyenziwa kwiintlanganiso zamaKristu ngokufuthi ayingqali kangako, ngenxa yabantu abahlukahlukeneyo abaphulaphuleyo. Kodwa sinokungqala ngakumbi kwimithandazo yethu yobuqu okanye yentsapho. Ngoxa maxa wambi sisenokucela uThixo ukuba akhokele aze asikelele bonke abaveleli abahambahambayo okanye abalusi bokomoya, ngaba maxa wambi asinakungqala? Ngokomzekelo, kutheni ungamthandazeli umveleli ohambahambayo otyelele ibandla lakho okanye umqhubi weSifundo Sencwadi Sebandla okuso? AmaFilipi 2:25-28 neyoku-1 kuTimoti 5:23 zibonisa inkxalabo awayenayo uPawulos ngempilo kaTimoti nekaEpafrodito ngokukhethekileyo. Ngaba asinakubonisa umdla ofanayo ngabagulayo esiwaziyo amagama abo?

13. Yiyiphi imibandela ekufanelekileyo ukuyiquka kwimithandazo yethu yobuqu?

¹³ Kuyavunywa ukuba, simele sikuphephe ukufak’ impumlo kwimicimbi yobuqu yabanye abantu, kodwa kufanelekile ukuba sibonise ngemithandazo yethu umdla onyanisekileyo esinawo ngabo sibaziyo nesibakhathaleleyo. (1 Timoti 5:13; 1 Petros 4:15) Kusenokwenzeka ukuba umzalwana uphulukene nomsebenzi wakhe wempangelo, yaye asinakumnika omnye. Ukanti, sinokumkhankanya ngegama size sithethe ngobunzima ajamelene nabo xa sisenza imithandazo yobuqu. (INdumiso 37:25; IMizekeliso 10:3) Ngaba kukho udade ongatshatanga esimaziyo osele emdala ongenamyeni nabantwana ngenxa yokuba ezimisele ukutshata “kuphela eNkosini”? (1 Korinte 7:39) Kutheni ungaceli uYehova kwimithandazo yakho yangasese ukuba asikelele loo dade aze amncede aqhubeke ekhonza ngokunyanisekileyo? Omnye umzekelo, ngowabazalwana ababini abasenokuba baye banikela isiluleko kumzalwana othile oye wona. Kutheni ngamnye wabo engamkhankanyi ngegama ngamathub’ athile kwimithandazo yakhe yangasese?

14. Imithandazo engqalileyo inxulumene njani nokunceda abanye?

¹⁴ Zininzi izinto onokuziquka kwimithandazo yakho yobuqu ngabantu obaziyo ukuba bafuna ukuxhaswa, ukuthuthuzelwa, ubulumko nomoya oyingcwele kaYehova okanye naziphi na iziqhamo zawo. Ngenxa yokuba kude okanye ngenxa yezinye iimeko, usenokungakwazi ukunikela uncedo lwezinto eziphathekayo okanye nokuba luluphi na uncedo. Kodwa musa ukulibala ukubathandazela abazalwana noodade wenu. Uyazi ukuba bafuna ukuhamba ngokumfaneleyo uYehova, ukanti basenokuba balufuna ngokwenene uncedo lokuqhubeka besenjenjalo. Eyona nto inokubanceda yimithandazo yakho.—INdumiso 18:2; 20:1, 2; 34:15; 46:1; 121:1-3.

Sebenzela Ukomeleza Abanye

15. Kutheni sifanele sibe nomdla kwinxalenye equkumbelayo yencwadi yabaseKolose?

¹⁵ Kakade ke, ukukhankanya abanye kwimithandazo yakho esuk’ entliziyweni akuphela kwendlela onokubanceda ngayo, ingakumbi abo bakufuphi kuwe nabo ubathandayo. Incwadi yabaseKolose iyakucacisa oko. Abaphengululi abaninzi bakholelwa ukuba emva kokuba uPawulos enikele imfundiso esisiseko nesiluleko esisebenzisekayo, wafaka nemibuliso yobuqu. (Kolose 4:7-18) Ngokwahlukileyo koko, sifumanise ukuba le nxalenye yokugqibela yale ncwadi iqulethe isiluleko esibalulekileyo, yaye kuninzi esinokukufunda kule nxalenye.

16, 17. Yintoni esinokuyithetha ngabazalwana abakhankanywe kumaKolose 4:10, 11?

¹⁶ UPawulos wabhala: “Uyanibulisa uAristarko umthinjwa olidlelane lam, wenjenjalo noMarko umza kaBharnabhas, (lowo nanifumene umyalelo wokuba nimamkele ukuba uthe weza kuni,) noYesu obizwa ngokuba nguYusto, bona ke aba bengabolwaluko. Ngaba kuphela ababa ngamadlelane am ngenxa yobukumkani bukaThixo, bendomeleza.”—Kolose 4:10, 11.

¹⁷ Apha uPawulos uchaza abazalwana abathile ababefanelwe yingqalelo ekhethekileyo. Uthi babephakathi kwabo babalukile, bengamaYuda. Ayemaninzi amaYuda alukileyo eRoma, yaye amanye ngoku ayengamaKristu. Sekunjalo, abo bakhankanywa nguPawulos babemncedile. Mhlawumbi, abazange babe mathidala ekunxulumaneni namaKristu awayengabantu beeNtlanga, yaye bamele ukuba ngovuyo baba nesabelo ekushumayeleni kunye noPawulos kwabeeNtlanga.—Roma 11:13; Galati 1:16; 2:11-14.

18. Wabancoma njani uPawulos abanye ababekunye naye?

¹⁸ Phawula amagqabaza kaPawulos athi: “Bendomeleza.” Wasebenzisa igama lesiGrike elivela ngesi sihlandlo kuphela eBhayibhileni. Abaguquleli abaninzi baliguqulela ngokuthi “intuthuzelo.” Noko ke, likho elinye igama lesiGrike elithi (pa·ra·ka·le’o) elidla ngokuguqulelwa ngokuthi “intuthuzelo.” UPawulos ulisebenzisile kwenye indawo kwakule ncwadi kodwa kungekhona kumaKolose 4:11.—Mateyu 5:4; IZenzo 4:36; 9:31; 2 Korinte 1:4; Kolose 2:2; 4:8.

19, 20. (a) Lithetha ntoni ibinzana elasetyenziswa nguPawulos xa wayethetha ngabazalwana ababemnceda eRoma? (b) Ziziphi iindlela abasenokuba bamnceda ngazo uPawulos abo bazalwana?

¹⁹ Abo bakhankanywe ngamagama nguPawulos bamele ukuba benza okungakumbi kunokumthuthuzela nje ngomlomo. Igama lesiGrike eliguqulelwe ngokuthi “bendomeleza” kumaKolose 4:11 maxa wambi lalisetyenziswa kwiincwadi zehlabathi ngokuphathelele iyeza lokuthomalalisa uxinezeleko. INew Life Version ifundeka ngolu hlobo: “Olunjani lona uncedo abaye baba lulo kum!” IToday’s English Version isebenzisa eli binzana: “Baye baluncedo kakhulu kum.” Yintoni ekusenokwenzeka ukuba bamenzela yona ukuze bamncede uPawulos aba bazalwana bangamaKristu ababehlala kufuphi naye?

²⁰ Kusenokwenzeka ukuba babekho ababemtyelela uPawulos, kodwa zininzi izinto awayengenakuzenza, njengokuthenga izinto awayezifuna ngokusisiseko—ukutya nempahla yasebusika. Wayeza kuyifumana njani imisongo yokufundisisa okanye wayeza kuzithenga njani izinto zokubhala? (2 Timoti 4:13) Ngaba akunambono wabo bazalwana benceda uPawulos kwezo mfuno zakhe, bemenzela izinto ezisisiseko njengokumyela evenkileni okanye ukumenzela imisetyenzana ethile? Wayesenokufuna ukuhlola nokwakha ibandla elithile. Ekubeni wayeseluvalelweni, wayenganakukwazi, ngoko kusenokwenzeka ukuba abo bazalwana babemtyelela uPawulos, bemphathele imiyalezo, bebuyisa neengxelo ezithile. Okunjani kona ukomelezwa!

21, 22. (a) Kutheni amazwi akumaKolose 4:11 efanele abangele umdla kuthi? (b) Ziziphi ezinye iindlela esinokusebenzisa ngazo umzekelo wabo babekunye noPawulos?

²¹ Oko kwabhalwa nguPawulos ‘ngokomeleza’ kusikhanyisela indlela esinokubanceda ngayo abanye. Basenokuba bahamba ngokumfaneleyo uYehova ngokuphathelele imilinganiselo yakhe yokuziphatha, bayaya kwiintlanganiso zamaKristu yaye banesabelo kumsebenzi wokushumayela. Ngenxa yoko sifanele sivakalise amazwi oxabiso kubo. Noko ke, ngaba asinakwenza okungakumbi ‘ekomelezeni’ abanye njengoko babenjalo abo babehlala noPawulos?

²² Ukuba kukho udade omaziyo oye ngobulumko wabambelela koko kuthethwe kweyoku-1 kwabaseKorinte 7:37 kodwa ngoku ongenayo intsapho ekufuphi kuye, ngaba akunakumquka kwizinto enizenzayo njengentsapho, mhlawumbi ummemele isidlo okanye imbutho encinane yabahlobo nezalamane? Kuthekani ngokummema ukuba ahambe nentsapho yakho ukuya endibanweni okanye kwiiholide? Okanye mcele ukuba ahambe nawe, ukuba ithuba liyavuma, xa uyokuthenga ukutya. Sinokwenza okufanayo nakubahlolokazi nabahlolo, okanye mhlawumbi abo bangasakwaziyo ukuqhuba. Unokufumanisa ukuba kuyingenelo ukuva amava abanawo okanye ulwazi abanalo ngezinto eziqhelekileyo njengokukhetha iziqhamo okanye impahla yabantwana. (Levitikus 19:32; IMizekeliso 16:31) Umphumo woko unokuba kukuzuza ubuhlobo obusenyongweni. Ngaloo ndlela banokuziva bekhululekile ukucela uncedo lwakho xa befuna iyeza ekhemesti, okanye enye into enjalo. Kusenokwenzeka ukuba abazalwana ababekunye noPawulos eRoma banikela uncedo olomelezayo, njengoko kunokuba njalo nangolwakho uncedo. Intsikelelo eyongezelelekileyo eyayikho ngelo xesha nekhoyo ngoku kukomeleza amaqhina othando nokuqinisa isigqibo sokukhonza uYehova kunye ngokunyaniseka.

23. Yintoni ekunokuba kuhle ukuba sichithe ixesha siyenza?

²³ Ngamnye kuthi unokucinga ngeemeko ezikhankanywe kweli nqaku. Yimizekelo nje, kodwa inokusikhumbuza ngeemeko zokoqobo ‘esinokubomeleza’ ngakumbi kuzo abazalwana noodade wethu. Ingongoma apha asikokuba sixelise oonontlalo-ntle. Babengenasukelo lunjalo abazalwana abakhankanywe kumaKolose 4:10, 11. ‘Babengamadlelane ngenxa yobukumkani bukaThixo.’ Ukomeleza kwakunxulumene ngokungqalileyo noko. Ngamana kungaba njalo nakuthi.

24. Uyintoni oyena ndoqo wokuthandazela nokufuna ukomeleza abanye?

²⁴ Siyabakhankanya abanye kwimithandazo yethu yangasese ngamagama size senze imigudu yokubomeleza ngenxa yoku: Sikholelwa ukuba abazalwana noodade wethu bafuna ‘ukuhamba ngokumfaneleyo uYehova baze bamkholise ngokupheleleyo.’ (Kolose 1:10) Oku kunxibelelene nenye into eyakhankanywa nguPawulos xa wayebhala ngokuphathelele imithandazo kaEpafra mayela nabaseKolose, ukuze ‘beme ngokuqinileyo bangahexi kuko konke ukuthanda kukaThixo.’ (Kolose 4:12) Sinokukufikelela njani oko thina ngokobuqu? Makhe sibone.

[Umbhalo osemazantsi]

Ngaba Uphawulile?

• Sinokuba luncedo ngakumbi njani kwimithandazo yethu yobuqu?

• Amanye amaKristu ‘ayemomeleza’ njani uPawulos?

• Ziziphi iimeko ‘esinokubomeleza’ kuzo abanye?

• Yintoni injongo yokuthandazela nokufuna ukomeleza abazalwana noodade wethu?

[Umfanekiso okwiphepha 18]

Ngaba ninokuhamba nomnye umKristu xa niphuma njengentsapho?

[Inkcazelo]

Courtesy of Green Chimney’s Farm