“Intsikelelo KaYehova—Yiyo Etyebisayo”
SONKE siyafuna ukusikelelwa. IThe American Heritage College Dictionary ithi iintsikelelo zibangela “ulonwabo, impilo-ntle okanye inkqubela.” Ngenxa yokuba uYehova enguMniki waso “sonke isipho esilungileyo naso sonke isipho esigqibeleleyo,” sonke isipho sokwenene nesihlala sihleli siphuma kuMdali wethu onothando. (Yakobi 1:17) Uthulula iintsikelelo kubo bonke abantu, nkqu nakwabo bangamaziyo. UYesu wathi ngoYise: ‘Wenza ilanga lakhe liphume kubantu abangendawo nabalungileyo nemvula uyinisa kubantu abangamalungisa nabangengomalungisa.’ (Mateyu 5:45) Sekunjalo, uYehova ubakhathalela ngokukhethekileyo abo bamthandayo.—Duteronomi 28:1-14; Yobhi 1:1; 42:12.
Umdumisi wabhala: “UYehova akayi kubandeza nantoni na elungileyo kwabo bahamba ngokungenamposiso.” (INdumiso 84:11) Ewe, abo bakhonza uYehova banobomi obutyebileyo, nobunenjongo. Bayazi ukuba “intsikelelo kaYehova—yiyo etyebisayo, yaye akongezi ntlungu kuyo.” Kwakhona iBhayibhile ithi: “Abo basikelelwayo [nguYehova] baya kuwudla ilifa umhlaba.” (IMizekeliso 10:22; INdumiso 37:22, 29) Hayi indlela eya kuba yintsikelelo ngayo loo nto!
Sinokuyifumana njani intsikelelo kaYehova? Phakathi kwezinye izinto, simele sihlakulele iimpawu ezimkholisayo. (Duteronomi 30:16, 19, 20; Mika 6:8) Oku sikubona kwimizekelo yabakhonzi bakaYehova bamandulo abathathu.
UYehova Uyabasikelela Abakhonzi Bakhe
UNowa wayengumkhonzi kaThixo obalaseleyo. KwiGenesis 6:8, sifunda oku: “UNowa yena wakholeka emehlweni kaYehova.” Ngoba? Ngenxa yokuba uNowa wayethobela. Ingxelo ithi: “UNowa wahamba noThixo oyinyaniso.” UNowa wabambelela ngokuqinileyo kwimigaqo kaYehova yobulungisa waza wathobela imiyalelo yakhe. Ngexesha apho ihlabathi lalizinikele ngokupheleleyo kugonyamelo nokonakala, uNowa washukunyiselwa ukuba ‘enze njengako konke oko uThixo abemyalele kona. Wenza kanye njengoko.’ (Genesis 6:9, 22) Umphumo waba kukuba, uYehova wamyalela ukuba akhe “umkhombe wokusindisa indlu [kaNowa].” (Hebhere 11:7) Ngale ndlela, uNowa nentsapho yakhe—yaye ngenxa yabo, noluntu luphela—basinda kwintshabalalo yeso sizukulwana. Yaye uNowa wafa enethemba lokuvuselwa kubomi obungunaphakade kwiparadesi esemhlabeni. Ezinjani ukuba ninzi iintsikelelo awazifumanayo!
NoAbraham wayeneempawu ezimkholisayo uYehova. Olona lubalaseleyo kuzo yayilukholo. (Hebhere 11:8-10) UAbraham wabushiya ubomi obutofotofo baseUre yaye kamva nobakwaHaran ngenxa yokuba wayenokholo kwisithembiso sikaYehova sokuba imbewu yakhe yayiya kuba ninzi ize ibe yintsikelelo kuzo zonke iintlanga. (Genesis 12:2, 3) Nangona waye wavavanywa kangangeminyaka emininzi, ukholo lwakhe lwavuzwa xa kwazalwa unyana wakhe uIsake. Ngaye, uAbraham waba ngukhokho wohlanga lukaThixo olunyuliweyo, amaSirayeli, yaye ekugqibeleni kaMesiya. (Roma 4:19-21) Ngaphezu koko, “nguyise wabo bonke abo banokholo,” yaye wabizwa ngokuba “ngumhlobo kaYehova.” (Roma 4:11; Yakobi 2:23; Galati 3:7, 29) Obunjani ukuba nentsingiselo ubomi awabuphilayo, yaye hayi indlela awasikelelwa kakhulu ngayo!
Kwakhona, khawucinge ngendoda enokholo uMoses. Phakathi kweempawu awayenazo, olona lubalaseleyo luxabiso awayenalo ngezinto zokomoya. UMoses wabunikel’ umva bonke ubunewunewu baseYiputa waza “waqhubeka eqinile ngokungathi uyambona Lowo ungabonakaliyo.” (Hebhere 11:27) Emva kweminyaka engama-40 ekwaMidiyan, wabuyela eYiputa sele eyindoda ekhulileyo waza wajamelana nelona gunya lalongamile ngelo xesha, uFaro, efuna inkululeko yabazalwana bakhe. (Eksodus 7:1-7) Wazibona izibetho ezilishumi, ukwahlulwa koLwandle Olubomvu, nokutshatyalaliswa kwemikhosi kaFaro. UYehova wamsebenzisa ukudlulisela uMthetho kumaSirayeli nokulungelelanisa umnqophiso Wakhe nohlanga olutsha. Kangangeminyaka engama-40, uMoses wakhokela uhlanga lwakwaSirayeli entlango. Ngenene ubomi bakhe babunentsingiselo, yaye wanandipha iintsikelelo ezininzi kwinkonzo yakhe.
Iintsikelelo Zomhla Wethu
Le mizekelo ibonisa ukuba ubomi babo bakhonza uThixo ngokwenene bunentsingiselo. Njengoko abantu bakaYehova behlakulela iimpawu ezifana nokuthobela, ukholo, noxabiso ngezinto zokomoya, bayasikelelwa kakhulu.
Yiyiphi indlela esisikelelwe ngayo? Eneneni, ngoxa izigidi ezikwiNgqobhoko zithwaxwa yindlala yokomoya, thina ‘sinokukhazimla ngenxa yokulunga kukaYehova.’ (Yeremiya 31:12) Esebenzisa uYesu Kristu ‘nekhoboka elithembekileyo neliyingqondi,’ uYehova uye wasinika intabalala yokutya kokomoya okusinceda sihlale ‘endleleni esa ebomini.’ (Mateyu 7:13, 14; 24:45; Yohane 17:3) Ukunxulumana nabazalwana bethu abangamaKristu yenye intsikelelo enkulu. Kwiintlanganiso nangezinye izihlandlo, ukuba kunye nabo sikhonza nabo ababonisa uthando nabenza unakonako wokwambatha “ubuntu obutsha” kuyonwabisa kakhulu. (Kolose 3:8-10; INdumiso 133:1) Noko ke, eyona ntsikelelo yethu inkulu lilungelo elixabisekileyo lokuba nolwalamano noYehova uThixo nokulandela emanyathelweni oNyana wakhe, uYesu Kristu.—Roma 5:1, 8; Filipi 3:8.
Xa sicinga ngeentsikelelo ezilolo hlobo, siyayibona indlela exabiseke ngayo inkonzo yethu kuThixo. Mhlawumbi sicinga ngomzekeliso kaYesu womrhwebi owayehamba efuna iiperile zexabiso eliphezulu. UYesu wathi ngaloo ndoda: ‘Yakuba ifumene iperile enye yexabiso eliphakamileyo, yemka kwangoko yathengisa zonke izinto eyayinazo yaza yayithenga.’ (Mateyu 13:46) Ngokuqinisekileyo le yindlela esivakalelwa ngayo ngolwalamano lwethu noThixo, ilungelo lethu lokumkhonza, unxulumano lwethu lobuKristu, ithemba lethu lobuKristu nazo zonke ezinye iintsikelelo ezinxulumene nokholo lwethu. Ayikho enye into exabiseke ngaphezu kwezi kubomi bethu.
Mbuyekeze UYehova
Ngenxa yokuba sigqala uYehova njengoMphi waso sonke isipho esilungileyo, iintliziyo zethu zishukunyiselwa ukuba zivakalise uxabiso ngeentsikelelo esizifumanayo. Sinokukwenza njani oku? Enye indlela kukunceda abanye banandiphe ezi ntsikelelo sizifumanayo nathi. (Mateyu 28:19) Kumazwe angaphezu kwama-230, amaNgqina kaYehova axakekile etyelela abamelwane bawo ukuze enze kanye oko. Njengoko esenjenjalo, andisa ubuncwane bawo obulinganiselweyo—ixesha, amandla, kunye nezinto eziphathekayo anazo—ukuze ancede abanye ‘bafikelele elwazini oluchanileyo lwenyaniso.’—1 Timoti 2:4.
Cinga ngoovulindlela abahlala eGlendale, eKhalifoniya, eUnited States. Ngazo zonke iintsasa ngoMgqibelo, bahamba umgama oziikhilomitha ezili-100 ukuya nokubuya ukuze batyelele enye intolongo karhulumente. Nangona bechitha iiyure ezimbalwa kunye namabanjwa, abadinyazwa yiloo nto. Omnye wabo uthi: “Kunomvuzo omkhulu ukukhonza kule ntsimi ikhethekileyo. Sikwenza ngovuyo olukhulu. Baninzi kakhulu abantu abanomdla kangangokuba asikwazi ukufikelela kubo bonke. Sithethanje, sifunda nabantu abahlanu, yaye abanye abane baye bacela ukuqhutyelwa isifundo seBhayibhile.”
Abalungiseleli abangamaKristu abanenzondelelo bayakuvuyela ukukhonza abanye ngaphandle kwentlawulo besenza lo msebenzi usindisa ubomi. Babonisa isimo sengqondo sikaYesu owathi: “Namkele ngesisa, yiphani ngesisa.” (Mateyu 10:8) Izigidi emhlabeni wonke zenza umsebenzi ofanayo, yaye ngenxa yoko, bayinkungu nelanga abo bantliziyo zinyanisekileyo abasabelayo baze babe ngabafundi. Kule minyaka mihlanu idluleyo kuphela, bamalunga nezigidi ezisisi-1,7 abaye bahlulela ubomi babo kuYehova. Ukunyamekela iimfuno zolwando oluqhubekayo kufuna ukuveliswa kweeBhayibhile neempapasho ezisekelwe eBhayibhileni kuquka nokwakha iiHolo zoBukumkani ezintsha nezinye iindawo zokuhlanganisana. Ivela phi imali yokuxhasa ezi mfuno? Ivela ngokupheleleyo kwiminikelo yokuzithandela.
Ngenxa yemeko yezoqoqosho engentle kwezinye iindawo zehlabathi, abaninzi abakwazi ukufikelela izinto ezingundoqo kubomi beentsapho zabo. Ngokutsho kwephephancwadi iNew Scientist, iwaka lesigidi sabantu lichitha malunga nama-70 ekhulwini omvuzo walo lithenga ukutya. Uninzi lwabazalwana noodade bethu abangamaKristu lukuloo meko. Ngaphandle koncedo oluvela kwabo bakholwa nabo, alunakuzifikelela izinto ezifana neempapasho zamaKristu okanye iiHolo zoBukumkani ezifanelekileyo.
Kakade ke, oku akuthethi ukuba abo banjalo bayaneliseka kukuthwalisa abanye umthwalo wabo. Kodwa bafuna uncedo. Xa uMoses wayekhuthaza amaSirayeli ukuba anikele ngezinto eziphathekayo njengendlela yokubulela uYehova ngeentsikelelo azifumeneyo, wathi: “Isipho sayo nganye masibe ngokwentsikelelo akunike yona uYehova uThixo wakho.” (Duteronomi 16:17) Ngenxa yoko, xa uYesu wabona umhlolokazi enikela “iingqekembe ezimbini ezincinane zexabiso elincinane kakhulu” etempileni, wamncoma kubafundi bakhe. Wenza konke okusemandleni akhe. (Luka 21:2, 3) Ngokufanayo, amaKristu ahlwempuzekileyo enza konke okusemandleni awo. Yaye ukuba kukho apho kunganelanga khona, iminikelo evela kwamanye amaKristu angaziswele kangako izinto eziphathekayo inokuba luncedo.—2 Korinte 8:13-15.
Xa sinikela kuThixo ngezi ndlela, kubalulekile ukuba sibe neentshukumisa ezilungileyo. (2 Korinte 8:12) UPawulos wathi: “Ngamnye makenze kanye njengoko egqibile entliziyweni yakhe, kungekhona ngokukrokra okanye ngokunyanzelwa, kuba uThixo uthanda umphi ochwayitileyo.” (2 Korinte 9:7) Ngokunikela ngesisa ngokusuka entliziyweni, sixhasa ulwando lobuthixo oluqhubekayo ngoku yaye sandisa uvuyo lwethu.—IZenzo 20:35.
Ukuba nesabelo kumsebenzi wokushumayela nokunikela ngokuzithandela ziindlela ezimbini esinokunikela ngazo kuYehova ngenxa yeentsikelelo asinike zona. Yaye hayi indlela ekukhuthaza ngayo ukwazi ukuba uYehova unqwenela ukuthulula iintsikelelo zakhe kwabanye abanyanisekileyo, abasenokuba abakamazi! (2 Petros 3:9) Ngoko ke, masiqhubeke sisebenzisa ubuncwane bethu kwinkonzo kaThixo ukuze sifumane abantliziyo zinyanisekileyo size sibancede babonakalise iimpawu ezifana nokuthobela, ukholo, noxabiso. Ngaloo ndlela, siya kuba novuyo lokubanceda ‘bangcamle baze babone ukuba uYehova ulungile.’—INdumiso 34:8.
[Ibhokisi ekwiphepha 28, 29]
Iindlela Abanye Abakhetha Ukunikela Ngazo
IMINIKELO EYA KUMSEBENZI OWENZIWA EHLABATHINI LONKE
Abaninzi babekela bucala okanye benze uqingqo-mali lwesixa abaza kusifaka kwiibhokisi zeminikelo ezibhalwe “Iminikelo Eya Kumsebenzi Owenziwa Ehlabathini Lonke.—Mateyu 24:14.”
Nyanga nganye amabandla athumela ezi zixa kwikomkhulu lehlabathi lamaNgqina kaYehova eliseBrooklyn, eNew York, okanye kwiofisi yesebe esekuhlaleni. Iminikelo yokuzithandela yemali isenokuthunyelwa ngokungqalileyo kwiAccounting Office, Watch Tower Bible and Tract Society of Pennsylvania, Private Bag X2067, Krugersdorp, 1740, South Africa, okanye kwiofisi yesebe enyamekela ilizwe lakho. Kusenokunikelwa ngezinto ezenziwe ngamatye anqabileyo okanye ngezinye izinto ezixabisekileyo. Le minikelo imele iphelekwe yileta emfutshane echaza ukuba le yiminikelo.
ILUNGISELELO LOMNIKELO WOXHOMEKEKO
Kusenokunikelwa ngemali phantsi kwelungiselelo elikhethekileyo lokuba, xa lowo unikeleyo enokuba nengxaki yobuqu, loo mnikelo ubuyiselwe kuye. Ukuze ufumane inkcazelo engakumbi, nceda uqhagamshelane neAccounting Office yesebe lasekuhlaleni.
UKUNIKEKELA OKUCETYIWEYO
Ukongezelela kwiminikelo yemali neminikelo yemali yoxhomekeko, zikho nezinye iindlela zokunikela kwinkonzo yoBukumkani ehlabathini lonke. Ziquka:
I-Inshorensi: IWatch Tower Society inokubhaliswa njengemele ifumane imali kwi-inshorensi yobomi okanye kwilungiselelo lemali yomhlala-phantsi.
Imali Eselugcinweni Neebond: Kunokunikelwa ngemali eselugcinweni neebond kwiWatch Tower Society.
Izindlu Nemihlaba: Kunokunikelwa ngezindlu nemihlaba enokuthengiswa kwiWatch Tower Society njengesipho okanye ngokuzigcina elungelweni lalowo wenze umnikelo, onokuqhubeka ehlala kuzo ngethuba esaphila. Qhagamshelana neofisi yesebe ekwilizwe lakho ngaphambi kokubhalisa izindlu nemihlaba.
Iminqophiso Yamafa: Izinto okanye imali inokushiyelwa iWatch Tower Society ngomnqophiso welifa osemthethweni.
Ukuba unomdla kuyo nayiphi na indlela ecetyiweyo yokunikela, umele uqhagamshelane neAccounting Office, ngokuyibhalela okanye ngokutsala umnxeba, kwidilesi ebhalwe apha ngaphantsi okanye kwiofisi yesebe enyamekela ilizwe lakho.
ACCOUNTING OFFICE
Watch Tower Bible and Tract Society of Pennsylvania
Private Bag X2067,
Krugersdorp, 1740
Inombolo Yomnxeba: (011) 761 1000