Abavakalisi BoBukumkani Bayabalisa

Abafeli-nkolo Bale Mihla Banikela Ubungqina ESweden

IGAMA lesiGrike elithetha “ingqina” lelithi martyr, ekuvela khona igama lesiNgesi elithi “martyr” (umfeli-nkolo), elithetha “lowo unikela ubungqina ngokufa kwakhe.” AmaKristu amaninzi enkulungwane yokuqala anikela ubungqina ngoYehova ngokufela ukholo lwawo.

Ngokufanayo, kwinkulungwane yama-20, amawaka amaNgqina afa ezandleni zabaxhasi bakaHitler ngenxa yobundilele kwimibandela yezobupolitika neyobuhlanga. Aba bafeli-nkolo bale mihla banikela ubungqina obunamandla. Oku koko kuye kwenzeka eSweden kutshanje.

Ngokuphathelele isikhumbuzo somnyaka wama-50 wokuphela kweMfazwe Yehlabathi II, urhulumente waseSweden waqalisa iphulo lemfundiso yelizwe lonke engokuBulawa Kwabantu Ngenkohlakalo. Eli phulo lalibizwa ngokuba yiLiving History (Imbali Yokwenene). AmaNgqina kaYehova amenywa ukuba abe nenxaxheba aze anikele amava awo.

AmaNgqina asabela ngokubonisa umboniso onomxholo othi The Forgotten Victims of the Holocaust (Amaxhoba Alityelweyo Ephulo Lokubulawa Kwabantu Ngenkohlakalo). Lo mboniso waqaliswa kwiHolo yeNdibano yamaNgqina kaYehova eSträngnäs. AmaNgqina awasinda kwiphulo lokuBulawa Kwabantu Ngenkohlakalo ayekho ukuze anikele amava awo kwabo babetyelele abangaphezu kwama-8 400 ababeze kusuku lokuqala! Ngasekupheleni kowe-1999, lo mboniso wawusele uboniswe kwiimyuziyam nemizi yogcino-zincwadi engaphezu kwe-100 kulo lonke elaseSweden, yaye uye wabonwa ngabantu abanokuba ngama-150 000. Abo babetyelele babequka amagosa aseburhulumenteni, awathetha kakuhle ngoko akubonayo.

Asikho esinye isiganeko esingomsebenzi wamaNgqina kaYehova eSweden esabonwa ngabantu abaninzi kangaka nesiye sathandwa ngaphezu kwesi. Abaninzi ababetyelele babuza: “Kutheni ningazange nisixelele ngamava enu angokuBulawa Kwabantu Ngenkohlakalo ngaphambili?”

Emva kokuba lo mboniso uye waboniswa kwingingqi yalo, elinye ibandla lanikela ingxelo yokuba izifundo zeBhayibhile ziye zanda ngama-30 ekhulwini! Elinye iNgqina lamema umntu owayesebenza nalo ukuba aze kubona lo mboniso. Ekuvuyela oku lo asebenza naye wasamkela eso simemo waza nomhlobo wakhe. Emva koko, lo mhlobo wathi wakufumanisa kunzima ukuqonda indlela abantu abanokuba nokholo oluqine ngolo hlobo ngayo bade bakhethe ukubulawa kunokutyobela uxwebhu lokuba bayalulahla ukholo lwabo. Oku kwakhokelela kwiingxubusho ezingakumbi, yaye kwaqaliswa isifundo seBhayibhile naye.

Njengamaqabane abo enkulungwane yokuqala, aba bafeli-nkolo bathembekileyo benkulungwane yama-20 baye ngenkalipho banikela ubungqina bokuba nguYehova kuphela uThixo wokwenyaniso, esifanele sibe nokholo yaye sinyaniseke kuye ngokungaguquguqukiyo.—ISityhilelo 4:11.

[Inkcazelo Ngomfanekiso okwiphepha 13]

Camp prisoner: Państwowe Muzeum Oświęcim-Brzezinka, courtesy of the USHMM Photo Archives