Unokulufumana Phi Unqabiseko?

Kwidolophana eseNtshona Afrika, uJosué oselula uyanduluka eshiya intsapho nabahlobo bakhe ngasemva.a Usinge kwisixeko esikhulu ukuya kufuna imali. Noko ke, kungekudala emva kokuba efikile ithemba liyafiphala njengoko efumanisa ukuba eso yayingesosixeko apho imali idlal’ abantwana.

ESIWA evuka eziqhelanisa nobomi besixeko, uJosué uyadana. Akakufumani oko ebekulindele kwesi sixeko. Kanye ngelo thuba, entliziyweni uJosué ulangazelela ukubuyela kwintsapho nakubahlobo bakhe kwidolophana ehlelelekileyo avela kuyo. Kodwa woyika ukuba abantu baloo dolophana baza kumgculela. Ekhathazekile uthi: ‘Baza kuthi ndingungantweni kuba andibuyanga nanto kweso sixeko.’

Eyona nto eluxanduva nakakhulu kuye kukuba abazali bakhe baza kuphoxeka. Bathembe imali yakhe. Ngoxa ezama ukulwa nezi mvakalelo, uJosué usebenza iiyure ezininzi esenza umsebenzi ongaphucukanga, yaye wamkela imali engaphantsi gqitha kuleyo ebeyilindele. Udiniwe kukusebenza nzima. Yaye ixesha eliseleyo lemisebenzi yobuKristu, ayixabise kakhulu, liyancipha veki nganye. Ekude lee nentsapho nabahlobo bakudala abanobubele, uziva elusizi yaye elilolo. Ufumanisa ukuba esi sixeko asimnikanga unqabiseko ebelunqwenela ngamandla.

Nangona amagama neendawo zisenokwahluka, imeko ebuhlungu kaJosué ixhaphakile. Asikukuba uJosué wayezingca xa wayenqwenela ukufuduka—wayefuna nje unqabiseko. Ngokunyanisekileyo wayevakalelwa kukuba wayenamathuba abhetele okufumana umsebenzi kweso sixeko kunakwidolophana yakhe. Kakade ke, maxa wambi ubani usenokuba nezinto ezingakumbi eziphathekayo, kodwa oko akuthethi ukuba nonqabiseko lokwenene. Oku akuzange kube njalo kuJosué, yaye kusenokungabi njalo nakwinkoliso yabanye abazama ukwenza okufanayo. Oku kusenza sizibuze, ‘Luyintoni unqabiseko?’

Unqabiseko lugqalwa ngeendlela ezahlukileyo ngabantu abahlukahlukeneyo. Esinye isichazi-magama sithi unqabiseko “kukungaxhalabeli ingozi” okanye “ukungabi naloyiko okanye ixhala.” Inkoliso yabantu iyaqonda ukuba “ukungaxhalabeli ingozi” ngokupheleleyo akukho namhlanje. Iyaneliseka lo gama nje ivakalelwa kukuba inqabisekile, phezu kwazo nje iimeko ezisongelayo eziyingqongileyo.

Kuthekani ngawe? Ulufuna phi unqabiseko? Ngaba lufumaneka kwisixeko kungekhona kwidolophana, njengokuba uJosué wayecinga? Okanye ngaba lufumaneka kwimali, ingakhathaliseki indawo okanye indlela oyifumana ngayo? Ngaba mhlawumbi unokulufumana ngokuba kwisikhundla esiphezulu? Ingakhathaliseki indawo okholelwa kukuba uza kulufumana kuyo unqabiseko, uza kuhlala unqabiseke ixesha elingakanani wena nentsapho yakho?

Makhe siqwalasele iindlela ezintathu abantu abalufuna ngazo unqabiseko—indawo; imali okanye isikhundla. Siya kwandula ke sihlolisise apho lunokufumaneka khona unqabiseko lokwenene noluhlala luhleli.

[Umbhalo osemazantsi]