Abefundisi Ababini Ababezithanda Iincwadi ZikaRussell

NGOWE-1891, uCharles Taze Russell, owenza umsebenzi obalaseleyo phakathi kwamaKristu angabanquli bokwenyaniso bakaYehova, watyelela eYurophu okwesihlandlo sokuqala. Ngokutsho kwezinye iingxelo, ngoxa wayemise ePinerolo, eItali, uRussell wadibana noNjingalwazi uDaniele Rivoire, owayefudula engumfundisi weqela lonqulo elalibizwa ngokuba ngamaWaldensi.a Nangona lo kaRivoire waqhubeka enxulumana ngokusondeleyo namaWaldensi emva kokuba eyekile ukuba ngumfundisi wawo, wayenengqondo ephangaleleyo yaye wayezifunda iimpapasho ezininzi ezazibhalwe nguC. T. Russell.

Ngowe-1903, lo kaRivoire waguqulela incwadi eyayibhalwe nguRussell ethi The Divine Plan of the Ages kwisiTaliyane, yaza yashicilelwa ngeendleko zakhe. Oku kwenzeka ngaphambi kokuba kupapashwe uhlelo lwesiTaliyane ngokusemthethweni. Kwintshayelelo yale ncwadi lo kaRivoire wabhala wathi: “Ngamana iNkosi ingalukhusela olu hlelo lokuqala lwesiTaliyane. Ngamana ingalusikelela, nangona lunamakhwiniba athile, ukuze lube negalelo ekudumiseni igama loyena ungcwele luze lukhuthaze abantwana bayo abathetha isiTaliyane ukuba babe nenzondelelo engakumbi. Ngamana iintliziyo zabo bonke abo baya kuyifunda le ncwadi, zingabuqonda ubunzulu bobutyebi, ubulumko nokwazi injongo nothando lukaThixo, zibe nombulelo kuThixo, eye le ncwadi yapapashwa ngobabalo lwakhe.”

Lo kaRivoire waqalisa ukuguqulela neZion’s Watchtower and Herald of Christ’s Presence kwisiTaliyane. Eli phephancwadi, luhlelo lwangaphambili lweMboniselo, olwalufumaneka kanye ngekota ngowe-1903. Nangona uNjingalwazi uRivoire engazange abe nguMfundi weBhayibhile, njengoko amaNgqina kaYehova ayebizwa njalo ngelo xesha, wabonakalisa umdla kakhulu ekusasazweni kwesigidimi seBhayibhile esasicaciswa kwiimpapasho zaBafundi beBhayibhile.

“Kwaba Ngathi Kusuka Amaxolo Emehlweni Am”

Omnye umfundisi wamaWaldensi owayezithanda iimpapasho zikaRussell nguGiuseppe Banchetti. Uyise kaGiuseppe, owayefudula engumKatolika, wamfundisa iimfundiso zamaWaldensi. Ngowe-1894, uGiuseppe waba ngumfundisi yaye wayekhonza kwiindawo ezahlukahlukeneyo ezazihlala amaWaldensi, eApulia naseAbruzzi nakwisiqithi sase-Elba nesaseSicily.

Ngowe-1905, kwapapashwa uhlelo lwesiTaliyane olusemthethweni lwencwadi kaRussell ethi Divine Plan of the Ages. UBanchetti wabhala udlwabevu lwamagqabaza. Aphuma kulindixesha wamaProtestanti othi La Rivista Cristiana. Lo kaBanchetti wabhala: “Kuthi,” le ncwadi kaRussell “lolona khokelo lucacileyo nolunokuthenjwa, olo nawuphi na umKristu anokulusebenzisa ukuze afundisise iZibhalo Ezingcwele ngokunengenelo . . . Ndithe nje ndakuyifunda, kwaba ngathi kusuka amaxolo emehlweni am, ndayibona indlela eya kuThixo ingqalile yaye ilula. Kuye kwaphela naloo nto kudla ngokubonakala ngathi kukuphikisana. Iimfundiso ekwakufudula kunzima ukuziqonda ziye zabonakala zilula yaye zisamkeleka ngokupheleleyo. Izinto ezazifudula zingaqondakali ziye zacaca ngakumbi. Injongo ebalaseleyo yokusindiswa kwehlabathi ngoKristu, kum, iye yabonakala ilula ngendlela engummangaliso kangangokuba iye yandishukumisela ekubeni ndidanduluke njengoMpostile owathi: Hayi ubunzulu bobutyebi nobobulumko nobolwazi lukaThixo!”—Roma 11:33.

Njengoko uRemigio Cuminetti watshoyo ngowe-1925, uBanchetti “wayewuxhasa ngokupheleleyo” umsebenzi waBafundi beBhayibhile yaye “wayeyiseke ngokupheleleyo” yindlela ababezicacisa ngayo iimfundiso. UBanchetti, naye wenza umzamo wokwazisa abantu ngezo mfundiso ezisisiseko, esebenzisa eyakhe indlela.

Ngokuvisisana noko kwabhalwa nguBanchetti, kuyabonakala ukuba, ngokufanayo namaNgqina kaYehova, wayekholelwa ukuba kuza kubakho uvuko lwasemhlabeni, njengoko iZibhalo zifundisa njalo. Kwakhona wayevumelana naBafundi beBhayibhile xa wayechaza ukuba unyaka uYesu awafa ngawo awuguquguquki, ngulowo watyhilwa nguThixo kwisiprofeto sikaDaniyeli seeveki ezingama-70. (Daniyeli 9:24-27) Izihlandlo eziliqela, wayephikisana ngokuphandle neemfundiso zecawa yakhe, wayekholelwa ukuba iSikhumbuzo sokufa kukaYesu Kristu sifanele sibhiyozelwe kanye ngonyaka, “ngosuku oluvisisana ngokuthe ngqo nolo senziwa ngalo.” (Luka 22:19, 20) Wayiphikisa ingcamango kaDarwin yendaleko, yaye wangqina ukuba amaKristu okwenyaniso akafanele abandakanyeke kwimfazwe yehlabathi.—Isaya 2:4.

Ngesinye isihlandlo, uBanchetti wayexubusha nenye indoda egama linguJ. Campbell Wall, ngeencwadi zikaRussell. Ephendula uWall kuhlalutyo lwakhe, uBanchetti wathi: “Ndiqinisekile ukuba xa unokufunda imiqulu emithandathu kaRussell, unokuvuya ngendlela engathethekiyo, yaye unokundibulela ngokusuk’ entliziyweni. Andinguye umququzeleli wezo mfundiso, kodwa ezo ncwadi ndazifunda kwiminyaka elishumi elinanye eyadlulayo yaye ndiyambulela uThixo imihla ngemihla ngokubeka ukukhanya okunjalo phambi kwam nentuthuzelo enjalo ngeencwadi ezisekelwe ngokupheleleyo nangokuqinileyo kwiZibhalo Ezingcwele.”

“Phulaphula, Phulaphula, Phulaphula”

Kuyabonakala ukuba aba befundisi babini bamaWaldensi—uDaniele Rivoire noGiuseppe Banchetti—babekholiswa yindlela uRussell awayeyichaza ngayo iBhayibhile. UBanchetti wabhala: “Ndithi akukho namnye kuthi baVangeli, nditsho nabefundisi bethu okanye oonjingalwazi bezakwalizwi, akukho mntu wazi yonke into. Hayi khona, zininzi kakhulu izinto ekusafuneka sizifunde. . . . [Sifanele] . . . sihlale size siphulaphule, singacingi ukuba sazi yonke into, singakugatyi oko sikunikwa ngenjongo yokuba sikuphonononge. Kunoko, phulaphula, phulaphula, phulaphula.”

Nyaka ngamnye, abantu abaninzi bayasiphulaphula isigidimi soBukumkani esiza namaNgqina kaYehova emakhayeni abo. Kuyo yonk’ indawo, abantu abaneengqondo eziphangaleleyo, abanxanelwe inyaniso yeBhayibhile bayasabela kwisimemo sikaYesu esithi: ‘Yiza ube ngumlandeli wam.’—Marko 10:17-21; ISityhilelo 22:17.

[Umbhalo osemazantsi]

[Umfanekiso okwiphepha 28]

Unjingalwazi uDaniele Rivoire

[Umfanekiso okwiphepha 29]

UGiuseppe Banchetti

[Inkcazelo]

Banchetti: La Luce, April 14, 1926